Mayordomia i Mishon

Lesa 2 Corintionan 8:1,5, i 2 Korintionan 9:7,9,13,15. Kiko ta e mensahe sentral di e pasashinan akí?

E lenguahe di duna ta penetrá 2 Korintionan 8 i 9: “E grasia di Dios ... a ser duná” (2 Kor. 8:1, ESV); “Nan a duna nan mes” (2 Kor. 8:5, ESV); “Kada un di boso mester duna loke boso a disidí den boso kurason ..., pasobra Dios ta stima un dunadó alegre” (2 Kor. 9:7, NIV); “El a duna na e pobernan” (2 Kor. 9:9, ESV); “Nan lo glorifiká Dios pa motibu di ... e generosidat di boso kontribushon” (2 Kor. 9:13, ESV); “Danki na Dios pa su don ineksplikabel!” (2 Kor. 9:15, ESV). 2 Korintionan 8 i 9 ta kuminsá i ta kaba ku e lenguahe di duna (2 Kor. 8:1, i 2 Kor. 9:15). Nos mester lesa e dos kapítulonan akí ku e idea di duna den mente. Nan ta presentá por lo ménos kuater motibu grandi pa duna nos ofrendanan.

Gratitut pa e grasia di Dios (2 Kor. 8:1; 2 Kor. 9:14,15). 2 Korintionan 8-9 ta kuminsá ku un referensia na “e grasia di Dios” (2 Kor. 8:1). Un tiki mas leu, Pablo ta bisa: “Boso konosé e grasia di nos Señor Hesu-Kristu” (2 Kor. 8:9, ESV). E grasia di Dios i Kristu ta ser presentá aki komo e motibu prinsipal di un hende pa e práktika di duna ofrenda. Dios a hasi asina tantu pa nos dor di duna nos Kristu. Dor di ofresé nos donnan a kambio, nos ta rekonosé e grasia di Dios den nos bida.

Meskos ku e konsepto di duna, e término “grasia” (na griego, charis) tambe ta aparesé repetidamente den 2 Korintionan 8-9. Di mes manera, e palabra charis ta aparesé na kuminsamentu i na final di e pasashi akí (2 Kor. 8:1; 2 Kor. 9:14-15). Pablo ta apliká e término akí ku diferente nifikashon den e pasashi pa enfatisá ku e grasia di Kristu den nos bida ta resultá den grasia pa otronan i pa gradisimentu.

Deseo pa sigui e ehèmpel di Hesus (2 Kor. 8:9). Hesus tabata riku i a bira pober (kòrda ku esakinan ta símbolonan pa Su preeksistensia eterno i despues Su binimentu den humanidat, respektivamente). Tin solamente un manera pa esei por a sosodé: El a duna tur. Pa loke ta nos, dor di kompartí nos ofrendanan, nos ta proveé medionan pa otronan konosé Kristu.

Deseo pa kompartí e bendishonnan di Dios (2 Kor. 9:10-11). Nos ta duna na otronan solamente pasobra nos a risibí promé di Dios. E ta enrikesé nos pa asina nos por ta generoso.

Amor sinsero (2 Kor. 8:8,24). Duna ta e prueba di amor sinsero i genuino. E ta e evidensia di mas supstansial ku amor ta biba den un hende su kurason. Pa usa un ekspreshon ingles, e ta pa “pone bo sèn kaminda bo boka ta.”

Lesa 2 Korintionan 9:7. Kiko e pasashi akí ta bisa tokante e akto di duna ofrenda?

E desishon di Dios pa salba mundu a tuma lugá asta promé ku mundu a kai den piká. E binida di Kristu pa muri pa nos tabata parti di un plan antiguo (Rev. 13:8). Dios no a ser kohé di sorpresa. El a traha plan pa entregá Su mes pa medio di Hesus. Den 2 Korintionan 8 i 9, planifikashon ta un prinsipio teológiko esensial ku ta konserní e akto di duna. Esaki por ser mirá den por lo ménos dos manera:

Di promé, planifikashon ta envolví desishon previo. Pablo ta bisa ku “kada un di boso mester duna loke boso a disidí den boso kurason” (2 Kor. 9:7, NIV). E palabra griego tradusí komo “disidí” ta e verbo proaireō. E verbo akí ta un forma komponé. E partíkulo pro ta nifiká “adelantá” òf “di antemano,” i aireō ta nifiká den e konteksto akí “disidí.” Pues, proaireō ta mustra riba un desishon tumá adelantá. Tambe, dor di kuminsá su deklarashon ku “kada un di boso,” Pablo ta indiká ku e kantidat duná lo no ta meskos pa tur hende. Su punto tabata simplemente ku loke hende disidí di duna, nan mester hasié ku reflekshon kuidadoso. Nan mester duna loke nan ta kere ta e kantidat korekto pa nan duna.

Di dos, planifikashon ta envolví e prinsipio di proporshonalidat. Pablo ta informá ku e masedonionan “a duna di akuerdo ku nan medionan” (2 Kor. 8:3, ESV). Siguientemente, e ta apliká e prinsipio di proporshonalidat akí na e korintionan tambe. Enkurashando nan pa terminá e tarea ku nan a komprometé pa terminá, e ta urgi nan pa kompletá e proyekto ei dor di usa e rekursonan ku nan ta poseé (2 Kor. 8:11). E ta konkluí e pensamentu akí bisando ku e ofrenda ta ser duná “di akuerdo ku loke un hende tin, no segun loke e no tin” (2 Kor. 8:12, ESV). Miéntras ku Beibel ta definí e proporshonalidat di e diesmo, esta, dies porshento, e mesun kos no ta konta pa e ofrendanan. “Kada un di boso mester duna loke boso a disidí den boso kurason” (2 Kor. 9:7, NIV) dor di apliká e prinsipio di proporshonalidat. Ku otro palabra, kada un ta disidí kua proporshon di ganashi e lo duna komo un ofrenda. Kada un ta suponé di duna den proporshon di loke e tin. Esaki no por ser hasí sin planifikashon.

Lesa 2 Korintionan 8:1-5. Ki posibel motibu por tabatin tras di e boluntat di e masedonionan pa duna nan ofrendanan ku tal generosidat?

E aktitut positivo di e masedonionan por ser mirá den vários manera.

Di promé, nan a duna ku goso abundante (2 Kor. 8:2). Pablo ta bisa ku e masedonionan su “abundansia di goso i nan pobresa ekstremo a basha over den un rikesa di generosidat” (2 Kor. 8:2, ESV). Mas despues e ta menshoná ku “Dios ta stima un dunadó alegre” (2 Kor. 9:7, NKJV). E palabra griego tradusí komo “alegre” ta aparesé solamente akinan den Tèstamènt Nobo. Un término di e mesun famia ta aparesé otro kaminda: “Esun ku ta hasi aktonan di mizerikòrdia [mester hasié] ku alegria” (Rom. 12:8, ESV). Términonan for di e famia di palabra akí tin biaha ta aparesé den literatura èkstrabíbliko, ku un sentido di alegria i felisidat. Den 2 Korintionan 9:7, ta un dunadó alegre ta nifiká duna sin desgana.

Di dos, nan a duna ku generosidat (2 Kor. 8:2). Promé ku Pablo a menshoná e generosidat di e masedonionan, el a referí promé na nan “pobresa ekstremo” (ESV). E palabra “generosidat” (na griego, haplotētos) ta aparesé dos biaha mas den 2 Korintionan 8 i 9. Pablo ta bisa: “Boso lo ser enrikesé den tur manera pa asina boso por ta generoso na tur okashon” (2 Kor. 9:11, NIV, énfasis suministrá), loke ta nifiká ku nos ta ser duná pa asina nos por duna e ora ei. Un tiki mas leu, e ta menshoná “e generosidat di boso kontribushon” (2 Kor. 9:13, ESV, énfasis suministrá). Den e pasashi akí, ser generoso den kontribuí ta un manera di konfesá e evangelio di Kristu.

Di tres, nan a duna “di nan mes boluntat liber” (2 Kor. 8:3, NLT). Esaki ta nifiká ku nan a duna boluntariamente. Esaki ta bira ainda mas atmirabel ora un hende mira ku nan no a duna for di nan surplus, pasobra nan rekursonan tabata ekstremadamente limitá. Pablo ta usa e mesun idea pa karakterisá e boluntat di Tito pa bishitá e korintionan. El a bai Korinto boluntariamente (2 Kor. 8:17).

Di kuater, nan a duna ku e sensashon ku duna ta un privilegio (2 Kor. 8:4). E aktitut akí ta perseptibel den e petishon di e masedonionan pa partisipá den e kolekta. “Nan a roga nos urgentemente pa e privilegio di partisipá den e sirbishi akí” (2 Kor. 8:4, NIV).

Finalmente, nan a partisipá den e kolekta komo un akto di konsagrashon total (2 Kor. 8:5). Pablo ta bisa: “Nan a entregá nan mes promé na Señor i despues pa boluntat di Dios na nos” (2 Kor. 8:5, ESV). Duna bo mes na Señor ta resultá den duna bo mes na otronan. E masedonionan a ekspandé nan envolvimentu mishonero mas ayá di asistensia finansiero. Es desir, duna i ser generoso no ta limitá na plaka so.

Nos a mira ku Pablo ta enkurashá e miembronan na Korinto pa ta envolví den un kolekta pa e iglesianan pober na Judea. Un di su propósitonan ta pa sende un sentido di unidat. E ke pa nan partisipá, pa ta parti di e mision. E ke mustra ku e iglesianan pagano ta parti di e mesun famia di Dios ku e kreyentenan hudiu na Jerusalèm ta. Es desir, e hendenan akí, ku un tempu tabata nan oponentenan, awor, enbèrdat, ta miembronan kompañero ku nan den e remanente di e Aliansa Nobo di Dios. Pablo ke mira henter e famia kristian, hudiu i pagano, uní na un manera poderoso ku por duna testimonio na e iglesia den generashonnan benidero.

Tito i dos otro ruman apresiá tabata na enkargo di e fondonan. Dios a pone e kuido akí pa e iglesia den kurason di Tito (2 Kor. 8:16). Atraves di e iglesianan, Dios a skohe tambe e dos otro rumannan (2 Kor. 8:18-23). Nan ta ser yamá "mensaheronan di e iglesianan, e gloria di Kristu" (2 Kor. 8:23, NKJV). Sea ku “e gloria di Kristu” ta deskribí e dos rumannan fiel akí òf e iglesianan mes no ta importá. Duna ofrenda ta finalmente un señal di lealtat na Kristu, e Kabes di e iglesia (Efe. 4:15).

2 Korintionan 8-9 ta indiká ku e ofrendanan mester ser duná na hendenan nombrá pa Dios pa medio di e iglesia. E frasenan “tur e iglesianan” (2 Kor. 8:18, NKJV), “skohé pa e iglesianan” (2 Kor. 8:19, NKJV), i “mensaheronan di e iglesianan” (2 Kor. 8:23, NKJV) ta sugerí hustamente esei. Pues, e siguiente eksortashon no ta sorprendente: “Duna prueba dilanti di e iglesianan di boso amor” (2 Kor. 8:24, ESV).

Trese ofrenda na iglesia, e instrumento apuntá na Dios riba tera, ta promové unidat i, na mes momentu, ta e resultado di un sentido di unidat (2 Kor. 8:13-14). Plaka por ta un gran unifikadó. Di otro banda, si wowo di hende no ta únikamente dirigí riba e gloria di Dios, plaka por krea divishon tambe.

Kon Romanonan 15:26,27 ta revelá Pablo su deseo pa unidat aki?

Finalmente, Pablo ta deskribí e kolekta komo servisio òf ministerio, komo un akto di grasia, komo un bendishon, komo un akto di adorashon, i tambe komo komunion. Tur esei for di un ofrenda? Pensa riba dje.