E Yamada di un Profeta

Lesa 1 Reinan 18:19-39. Kiko nos por mira for di e storia akí tokante kon e ofishi profétiko por funshoná?

Elías su yamada i manera di papia a reflehá su ròl komo mensahero di Dios. Pa stòp e apostasia di Israel, Dios a manda Elias serka Rei Akab pa asina anunsiá un sekura di vários aña. Dios a usa e aflikshon akí pa bira Su pueblo for di idolatria i bèk na obediensia. Rei i pais a kulpa profeta Elias pa nan desgrasia i a buska su morto.

Riba Seru Karmelo, Elias a konfrontá e profetanan di Baal i Asera. E mensahero di Dios a hasi un apelashon yená ku e Spiritu na Israel idólatra pa denunsiá nan diosnan falsu i regresá na Señor. E pueblo tabata sa ku nan eskohonan a hiba nan den apostasia nashonal. Awor nan tabata kla pa brasa e Dios di Elias atrobe, ku a proba di ta superior na nan diosnan falsu, ku, en realidat, no tabata ni eksistí.

Djis promé ku e segundo binida di Kristu, Dios ta ordená Su iglesia pa proklamá e mensahe di Elias atrobe, i pa hende bira for di nan “ídolonan” i ta prepará pa para riba e gran dia di Señor. Dios ainda ta komuniká ku Su pueblo pa medio di kanalnan ku El a skohe. Su Palabra i e don di profesia ta proveé amonestashon, spièrtamentu, konseho i kurashamentu.

“Un rebibamentu di berdadero piedat meimei di nos ta esun di mas grandi i urgente di tur nos nesesidatnan. Buska esaki mester ta nos promé trabou. Mester tin esfuerso sinsero pa optené e bendishon di Señor, no pasobra Dios no ta dispuesto pa otorgá Su bendishon riba nos, sino pasobra nos no ta prepará pa risibí esaki.”—Ellen G. White, Selected Messages, buki 1, p. 121.

Lesa Malakías 4:5,6. Kon e mensahe di Elias ta impaktá e kasnan di esnan ku ta sigui Dios?

Berdadero rebibamentu ta kuminsá den kurason i den kas. E famia ta e piedra di skina di e iglesia i un blòki di konstrukshon indispensabel di komunidat. Rebibamentu den e hogar ta plama un amor selestial pa e iglesia, e komunidat, i e nashon. Esaki ta e propósito di Dios pa e hogar kristian. Tambe rebibamentu ta motivá e pueblo di Dios pa mishon.

Isaias, un profeta mayor di Tèstamènt Bieu, a risibí Su yamada pa ministerio profétiko direktamente for di Dios (lesa Isa. 6:1-8). Abrumá pa e santidat i mahestat di Dios, Isaias a realisá su indignidat. Na e momento ei, un serafin a bula bai serka Isaias ku un karbon bibu for di e altar selestial i a “purga” su pikánan. E ora ei Dios a puntra: “Ken lo Mi manda, i ken lo bai pa Nos?” E kontesta di Isaias mester ta di nos: “Atami aki, mandami” (Isa. 6:8).

E yamada di Isaias a bini na un punto krusial den historia di Israel. Apesar di su mes fayonan, e tarea di spièrta Israel i su lidernan di nan pikánan tabata masha importante. E profesianan di Isaias ta pasashinan klave di Skritura, ku ta proveé persepshon profundo riba e naturalesa di Dios, e naturalesa di humanidat, i e plan di salbashon ku ta desaroyando. De echo, loke ta sin duda e profesia di mas poderoso ku ta deskribí no solamente e morto di Hesus sino loke Su morto a hasi pa mundu, ta ser hañá den Isaias, e famoso kapítulo 53.

Lesa Isaias 53. Kon e profesia asombroso akí, skirbí mas ku mei milenio promé ku e krus, a revelá asina poderosamente e morto di Kristu pa nos? Kiko e profesia akí mester siña nos tokante e don profétiko?

E profesianan di Isaias a profetisá e propósito i mishon di e Mesias (Isa. 53:3-5). Nan a splika dikon Kristu a ser "hibá manera un lamchi na e matadero" (Isa. 53:7, NIV) i kon Su sakrifisio ekspiatorio a salba Su pueblo for di nan pikánan. E aspekto sustitutivo di e morto di Kristu ta ser deskribí asina eksplísitamente einan, mustrando e fundeshi di e ekspiashon hasí na nòmber di henter humanidat.

"Nos tur a kana dual manera karné, kada un a kohe su mes kaminda; ma SEÑOR a hasi e inikidat di nos tur baha riba djE " (Isa. 53:6). E naturalesa universal di piká ta ser deskribí aki; e naturalesa universal di e Krus, e solushon pa piká, ta ser deskribí aki tambe. E kapítulo akí, kisas mas ku kualke otro den tantu Tèstamènt Bieu komo esun Nobo, ta mustra e plan di salbashon den términonan asina kla i eksplísito.

Tòg e yamada profétiko di Isaias no tabata fásil. Hende tabata haña su pronóstikonan teribel di nan destrukshon apsurdo, manera hopi hende ta hasi awendia ora nan a ser atvertí tokante e konsekuensianan di piká (Rom. 6:23). Isaias su bos profétiko pa su tempu i esun di nos ta kla (lesa Isa. 2:4, Isa. 5:20). Tabata e rechaso di e nashon pa praktiká hustisia i reforma ku a hiba na e destrukshon di Jerusalèm. E mesun piká ei lo marka e destrukshon di e habitantenan malbado di tera ora Kristu regresá.

Mayoria kristian konosé e storia di Daniel 1, den kua el a para pa e prinsipionan di salú ku el a siña komo mucha. Daniel tabata un modelo di fieldat (Dan. 1:8). Ora nan a present’é ku delisianan real, el a insistí pa kome un dieta basá riba mata i bebe solamente awa en bes di partisipá di e dieta ofresé na dje for di e mesa di rei (Dan. 1:12-16). Esaki tabata un prueba chikitu kontrali na loke lo a bini despues, manera den Daniel 6, ora ku su fieldat fásilmente por a nifiká morto p’e.

Lesa Daniel 2:46-48; Daniel 4:18; Daniel 5:13,14; i Daniel 6:25-27. Kiko e versíkulonan akí ta bisa nos tokante e tipo di testigu ku Daniel tabata pa e paganonan rònt di dje?

Wak e testimonio di e paganonan akí di e poder di e Dios di Daniel. Maske kon úniko e storianan akí ta, nan tur ta revelá un prinsipio krusial: atraves di nos bida, atraves di nos fieldat, i atraves di e poder di Dios ku ta obra den i pa medio di nos, otronan por i mester siña tokante e Dios di shelu, i ku E ta “un Dios di diosnan, i un Señor di reinan.”

Tambe, pasobra e tema rekurente di e profesianan di Daniel ta huisio, ku ta kulminá den e segundo binida di Kristu (Dios su viktoria final), e nifikashon di e nòmber di Daniel, “Dios ta mi hues,” ta bastante apropiá. Su eskritonan meresé estudio i atenshon kuidadoso ya ku nan ta relevante awendia. E profesianan di Daniel ta sirbi komo un rekordatorio pa semper keda vigilante i warda e mandamentunan di Dios, asta den e kosnan “chikitu” di bida.

Tambe, komo profeta, Daniel a profetisá e lantamentu i kaida di nashonnan i e konsekuensianan di nan desobedensia na Dios. Pa medio di su vishonnan profétiko, Daniel a revelá e plan di Dios i e viktoria final di e reino di Dios (Dan. 7:13-14).

Pensa, por ehèmpel, riba Daniel 2, skirbí mei milenio promé ku Kristu. Daniel a deskribí asina eksaktamente e subida i kaida di e kuater imperionan mundial grandi akí, asta yegando te na nos tempu (esun di e pianan i e dedenan di pia di e estatua), referiendo klaramente na nashonnan di Oropa moderno, ku, manera e profesia ta siña asina kla, “lo meskla nan mes ku e simia di hende: ma nan lo no pega un na otro, meskos ku heru no ta ser mesklá ku klei” (Dan. 2:43). Ki un pronóstiko asombroso tokante Oropa, asta te dia di awe, den kua, apesar di matrimonio miksto i tur intento pa unidat, e kontinente lo a keda komo nashonnan separá ku leinan, kustumbernan i tradishonnan separá. Ora ku asta algun aña promé ku e kaida di Union Soviétiko, ningun agensia di inteligensia a mira e kaida ei ta bin, e pronóstiko di Daniel ta duna nos motibunan poderoso pa konfia e profetanan di Dios.

Lesa Marko 1:2-5. Kiko tabata e propósito di e ministerio di Juan Boutista?

E Evangelio di Marko ta informá nos ku e yegada di Juan Boutista tabata e kumplimentu di e profesia di Isaias (Isa. 40:3). E desaroyo di Juan for di infansia pa edat adulto tabata marká pa fieldat na Dios. Satanas tabatin miedu di pèrdè su dominio riba humanidat despues di a tende e bos di Juan den desierto (lesa Ellen G. White, The Desire of Ages, p. 224). E maldat di e oyentenan di Juan a ser desenmaskará na un manera ku a pone Satanas tembla. Satanas su dominio riba Israel tabata ser menasá. Repetidamente el a purba i a frakasá di distraí Juan Boutista di su estilo di bida fiel i konfiansa den e Mesias.

Lesa Mateo 11:1-6. Kon Hesus a reafirmá Juan su fe miéntras e predikadó tabata den prizòn?

Satanas no por a tenta Hesus pa hasi piká, i su derota den desierto a pon’é rabia. Despues el a kambia di táktika dor di laga Juan, primu di Hesus, ser tirá den prizòn. Juan su enkarselashon a hasi Hesus doló, aunke Satanas no por a indusiE pa hasi piká. Esaki tabata Satanas su manera di kibra Juan, miéntras e tabata karga kurason di e Salbador emoshonalmente. Pero Juan a risibí un palabra di enkurashamentu for di Hesus. I apesar di su kondishonnan teribel, i sigur no komprondiendo dikon el a keda den prizòn ora Hesus tabata asina poderoso, Juan, no opstante, a keda fiel, te na morto.

Meskos ku e profetanan di antaño, nos tambe ta yamá pa proklamá un mensahe di arepentimentu i fe i e totalidat di e hustisia di Kristu (Rev. 14:6-12). Manera el a hasi ku Juan Boutista, Satanas por usa insertidumbre pa pone nos duda e mishon di Dios pa nos bida. Nos no mester bira desesperá si nos kòrda e guia di Dios den nos bida, spesialmente ora kosnan no ta bai bon pa nos, manera a sosodé ku Juan, ku a ser enkarselá i despues matá dor di e akshonnan di un muhé malbado i un hòmber di boluntat débil. Loke sea ku hende por hasi ku nos, nos por yega serka Dios ku fe, i E lo kontestá nos. El a primintí nos poder pa hasi Su boluntat (Echonan 1:8). Den e mundu poskristian i no-kristian, ta imperativo pa nos ta testigunan fiel pa Kristu, sea kual sea nos sirkunstansianan.