Lès 3

* 10 - 16 di òktober

Profetanan di Tèstamènt Bieu

Sabat

10 di òktober

Lesa pa e Estudio di e Siman Akí:

Santiago 5:17-18; 1 Reinan 19:1-16; 1 Reinan 22:1-14; Eks. 15:20; 2 Reinan 22:11-14; Jer. 14:1-15.

Versíkulo di Memoria:

"Josafat a lanta para i a bisa: ‘Tendemi, o Juda i boso habitantenan di Jerusalèm: Kere den SEÑOR boso Dios, i boso lo ta establesé; kere Su profetanan, i boso lo prosperá’ ” (2 Krónikanan 20:20, NKJV).

E Sistema di Posishonamentu Global (GPS) ta yuda biaheronan sa unda nan ta, unda nan ta bai, i asta ta proveé atvertensia kontra peligernan. Biaheronan spiritual ku ta biaha pa shelu tambe mester di guia awor i den futuro for di un “sistema di posishonamentu” selestial. Un manera ku Dios a hasi esaki den tempu pasá tabata a traves di e ministerio di profetanan di Tèstamènt Bieu. Den nan narativonan, konsehonan, profesianan, poesia i kantikanan, nos ta deskubrí hopi tokante e dozein di profeta ku a presentá e mensahenan di Dios na e pueblo.

E lès di e siman akí ta eksplorá deskripshonnan di profetanan den Tèstamènt Bieu, deskripshonnan ku ta yuda nos komprondé e don di profesia manera el a ser manifestá dor di algun di e sirbidónan di Dios akí.

Manera nos lo mira, esakinan tabata hendenan manera nos, den sentido ku nan tabata sernan humano frágil sometí na miedu, rabia i desánimo. Bida pa nan no tabata fásil, sino yená ku reto i difikultat, manera e ta pa nos tur.

Kiko, antó, nos por siña for di wak algun di e sirbidónan di Dios spesialmente yamá akí?

Djadumingu

11 di òktober

E Humanidat di Profetanan

Manera nos a mira siman pasá, Señor a usa profeta Elias pa hasi un tremendo trabou den Israel, apesar di oposishon ferviente. Loke Señor a logra pa medio di dje tabata inkreibel. I tòg . . . kiko?

Reflekshoná riba kon Santiago ta presentá profeta Elias, den Santiago 5:17,18. Kiko e lo por ke men dor di bisa ku Elias tabatin “un naturalesa manera esun di nos” (NKJV)?

Elias tabatin un éksito impreshonante riba Seru Karmelo (1 Reinan 18); Dios a obra na un manera poderoso a traves di dje, i un di e milagernan di mas asombroso deskribí den historia di Tèstamènt Bieu a sosodé: na zonido di Elias su mes palabranan, kandela literalmente a baha for di shelu (1 Reinan 18:38)! Lo bo a pensa ku e hòmber di Dios akí lo tabata sumamente felis despues di algu asina.

Lesa 1 Reinan 19:1-16. Kiko esaki ta bisa nos tokante e estado emoshonal di e profeta di Dios?

"Ta basta! Awor, Señor, kita mi bida, pasobra mi no ta mihó ku mi tatanan!” (1 Reinan 19:4, NKJV). Esaki ta zona meskos ku un hòmber ku ta sufri di algun forma di depreshon. Dikon? Loke a pasa riba Seru Karmelo lo no tabata un akto fásil pa sigui, sigur; pero, tòg, algu otro ta pasando aki.

Kisas e yabi por ser hañá den su palabranan: "Mi tabata masha zeloso pa Señor Dios di ehérsitonan; pasobra e yunan di Israel a bandoná Bo aliansa, a basha Bo altarnan abou, i a mata Bo profetanan ku spada. Ami so a keda; i nan ta buska pa kita mi bida" (1 Reinan 19:10, NKJV). Esaki ta zona komo si fuera e ta lamentando loke e ta kere ta su frakasonan den ministerio. Apostasia ta keda, apesar di su mihó esfuersonan, komo si fuera e so por a frena e marea. Loke sea finalmente ta pasando aki, nos por mira e humanidat i fragilidat di e hòmber di Dios akí. Ku otro palabra, Elias tabata un hòmber ku tabatin “un naturalesa meskos ku esun di nos.”

Djaluna

12 di òktober

Identifikando Profetanan Berdadero

Den e historia tempran di Israel tin evidensia di profetanan falsu (Deut. 18:20). Dios, pa e motibu ei, no a laga Su pueblo sin guia riba ken Su profetanan berdadero tabata.

Komo reseptornan di e revelashon i inspirashon di Dios, profetanan berdadero a transmití e mensahenan di Dios fielmente, eksaktamente i honestamente, asta si, tin biaha, esaki a hasi nan impopular serka e hendenan na poder.

Lesa 1 Reinan 22:1-14. Kiko e ta bisa nos tokante kon profetanan fiel ta operá?

Pa tin un rei ku ta bisa di un profeta ku "Mi ta odi'é, pasobra e no ta profetisá bon tokante mi, sino malu" (1 Reinan 22:8, NKJV) ta bisa hopi tokante e rei, pero mas tokante e profeta. E tabata, opviamente, un hòmber ku no tabatin miedu di papia e bèrdat, asta ku e rei mes—no un manera pa gana fabor real, pa bisa lo ménos.

Mikeas a para su so kontra 400 profeta falsu ora el a presentá e bèrdat revelá na dje. Enfrente di preshon pa alterá mensahenan negativo di Señor pa trankilisá e Rei malbado Akab i su kasá, Jezabel (1 Reinan 22:13-14), Mikeas a presentá e bèrdat di Dios, sin importá kon e por a ser risibí.

Lesa 1 Samuel 9:3-14. Kiko e versíkulonan akí ta bisa nos tokante kon otronan tabata mira profetanan fiel di Dios?

Tin numeroso ehèmpel di e kalidat di bida ku profetanan a biba den Beibel. Den e kaso akí, Saul a ser mandá dor di su tata, Kish, pa buska su burikunan pèrdí. E sirbidó ku tabata biaha huntu ku Saul a sugerí pa e no bandoná e búskeda, pasobra tabatin “den e stat akí un hòmber di Dios, i e ta un hòmber honorabel” (1 Sam. 9:6, NKJV). E deskripshon duná aki di profeta Samuel ta deskribí e kualidatnan ku ta spera di e profetanan di Dios. Profetanan berdadero den Skritura ta ser identifiká komo “hòmbernan di Dios,” skohí en parti pa ta ehèmpel di Su karakter. Na mes momento, djis pasobra algun meimei di e “hòmbernan di Dios” por ta profeta, esaki no ta hasi nan sernan humano sin defekto.

Djamars

13 di òktober

Funshonnan di Profetanan

Lesa 1 Samuel 8:4-22 i Levítiko 8:10-13. Kon profetanan tabata funshoná en relashon ku reinan i saserdotenan?

Profetanan tabata interaktuá ku reinan den situashonnan tantu agradabel komo desagradabel. Ora Israel a demandá un rei (1 Sam. 8:4-22), nan a bisa ku nos ke “un rei pa husga nos meskos ku tur e nashonnan” (1 Sam. 8:5). Ki un ehèmpel tristu pero poderoso di e peliger ku e pueblo di Dios a enfrentá den tur era: e deseo pa ta meskos ku esnan rònt di nan. Den e kaso akí, nan no tabatin niun idea kiko e petishon akí lo a trese, aunke nan a ser atvertí di antemano (1 Sam. 8:11-18) dor di Dios pa medio di Su profeta. Basá riba nan deseonan, i apesar di su spièrtamentu na nan, Samuel pronto a ungi e promé rei di Israel, konosí den historia bíbliko komo Rei Saul.

E bukinan di Tèstamènt Bieu di 1 i 2 Reinan i 1 i 2 Krónikanan ta registrá e tipo i kalidat di gobernashon ekshibí dor di e reinan di Israel i Juda. Historia sagrado ta mustra ku e reinan ku a hasi malu tabata hopi mas tantu ku esnan ku a hasi bon den bista di Dios. Un di e funshonnan núkleo di e profetanan tabata pa yuda hiba reinan infiel bèk na obediensia na e lei di Dios. Komo resultado, e profetanan akí a enfrentá menasanan, ku algun asta perhudiká i matá dor di reinan ku a hiba e pueblo di Dios for di djE (1 Reinan 18:4-19, 2 Kron. 24:20-22).

Profetanan tabata interkambiá tambe ku saserdotenan. Moises, un profeta di Dios, a ungi Aaron i su yunan komo e promé saserdotenan israelita (Lev. 8:10-13). Tabatin biaha ku saserdotenan a risibí palabranan di reprenshon for di Dios pa medio di e profetanan (Os. 6:9, Mal. 2:1-3). Un ehèmpel impreshonante di esaki ta henter e kas di Eli, ku a ser konfrontá pa nan práktikanan korupto (1 Sam. 2:27-36). Esakinan tabata algun reprenshon hopi fuerte kontra korupshon desenfrená bou di hende ku a haña privilegionan spesial.

Profetanan tabata maestronan di e pueblo (2 Krónikanan 34). Nan tabata presentá mensahenan di Dios na e saserdotenan, reinan i e nashon (Jer. 5:31, Ezek. 22:26). Profetanan a papia tambe ku e nashonnan bisiña, deliniando e plan di Dios pa nan, un tema ripití vários biaha den e mensahenan di e profetanan di Tèstamènt Bieu (Isa. 60:1-3; Isa. 62:1,2). Profetanan tabata ser sperá no solamente pa pasa fielmente e mensahenan ku Dios a duna nan sino tin biaha tabata ser instruí pa skirbi nan i konservá nan (2 Kron. 13:22). Atrobe, no ta importá kon humano e profetanan tabata (i tur e debilidatnan ku ta bai ku esei), nan tabata hòmber- i muhénan di orashon, e Palabra, i sirbishi na Dios i Su pueblo (Jer. 42:4; 2 Reinan 22:15-17).

Djárason

14 di òktober

Profetanan Muhé

Lesa Eksodo 15:20, Huesnan 4:4, 2 Reinan 22:14 i Nehemias 6:14. Kiko e tekstonan akí tambe ta siña tokante e ròl profétiko?

Tin abundante evidensia den Skritura ku Dios a yama hende muhé pa ta profeta. (Wak e uso di e palabra hebreo nevi’ah [Eks. 15:20] i e palabra griego prophētis [Lukas 2:36].) Den Mikeas 6:4, Miriam ta ser menshoná huntu ku Moises i Aaron komo esnan mandá na e pueblo. Miriam ta ser presentá komo un profetisa ku a kanta un kantika di viktoria ora e israelitanan a krusa Laman Kòrá (Eks. 15:20,21). Sinembargo, e profetisa akí, meskos ku su kontrapartidonan maskulino, no tabata sin kulpa, manera su aktitut bergonsoso pa ku Moises i su kasá etiope ta revelá, akshonnan pa kua e profetisa a ser kastigá debidamente (lesa Num. 12:1-10).

Nos por mira e trabou di un otro profeta den e storia di Débora, kende a sirbi komo hues den Israel (Hues. 4:1-4).

De echo, tin evidensia kla ku Débora (Hues. 4:4) a risibí revelashon for di Dios (Hues. 4:4-9,14-22). Su kantika di viktoria (Hues. 5:2-31) ta un rekonosementu di e intervenshon di Dios i tabatin nifikashon teológiko profundo pa e nashon e tempu ei den historia.

Lesa 2 Reinan 22:11-14. Dikon e hòmbernan di Rei Josias a bai serka Hulda? Kiko esaki mester bisa nos tokante su ròl importante den e nashon?

Hulda “e profetisa,” a ser konsultá dor di e hòmbernan mas haltu di e konseho di Rei Josias (2 Reinan 22:14, 2 Kron. 34:22) despues ku nan a lesa e palabranan di e “Buki di Lei” (2 Reinan 22:8, NKJV) (ta kere ku ta Deuteronomio) na e rei, ku, komo kontesta, “a sker su pañanan” (2 Reinan 22:11, NKJV). Esaki tabata opviamente un asuntu masha serio, i e rei a tum’e asina, motibu pa kua su hòmbernan a bai direktamente serka Hulda. El a risibí un mensahe for di Dios relashoná ku e huisio inminente di Juda. Josias su reformanan a resultá for di e mensahenan profétiko di Hulda i a evitá e huisio di Dios riba Su pueblo.

Djaweps

15 di òktober

Profetanan Falsu

No ta importá kiko Dios hasi, Satanas tin su falsifikashonnan. Ta meskos ku profetanan. Israel a enfrentá profetanan berdadero i falsu. E klave tabata pa sa e diferensia.

Lesa Jeremias 14:1-15. Kiko tabata pasando aki, i kon Señor a konsiderá esnan ku a papia falsamente komo “profetanan” den Su nòmber?

Den Jeremias 14, Dios a duna Jeremias un mensahe di huisio pa Juda, un huisio ku lo a bini den forma di un spada (guera), hamber i pèst. Profetanan falsu di e tempu ei a kontradesí e mensahe di Jeremias. Jeremias ta deskribí nan den términonan masha kla: "I Señor a bisa mi: 'E profetanan ta profetisá mentira den Mi nòmber. Mi no a manda nan, a ordená nan, ni a papia ku nan; nan ta profetisá na boso un vishon falsu, adivinashon, un kos sin balor, i e engaño di nan kurason’ ” (Jer. 14:14, NKJV).

Profetanan falsu ta korupto pasobra nan fuente di pretenshonnan profétiko hopi bes ta e “diosnan” falsu ku nan ta adorá (Jer. 23:13,14). Dios ta atvertí: "Mi no a manda nan, a ordená nan, ni a papia ku nan" (Jer. 14:14, NKJV). Nan ta "profetanan di e engaño di nan mes kurason" (Jer. 23:26, NKJV). Ezekiel a ser instruí pa profetisá kontra “e profetanan . . . ku ta profetisá for di nan mes kurason” (Ezek. 13:2, NKJV).

Hopi bes profetanan falsu ta sigui puntonan di bista popular. Esaki tabata e kaso den 1 Reinan 22, ora ku un grupo di 400 “profeta” a reuní riba òrdu di Rei Ahab (1 Reinan 22:6). Ku un solo bos nan a konsehá rei pa bringa kontra Ramoth-Gilead. Ahab a konsultá ku Jehoshaphat, rei di Juda, despues ku nan a tende e konseho profétiko di e profetanan di Aserah. Jehoshaphat a urgi Ahab pa konsultá profeta Mikeas pa sa si nan mester a bai guera òf nò. “E ora ei e mensahero ku a bai yama Mikeas a papia kuné, bisando: ‘Awor skucha, e palabranan di e profetanan ta enkurashá rei ku un akuerdo. Por fabor, laga bo palabra ta meskos ku e palabra di un di nan, i papia enkurashamentu’ ” (1 Reinan 22:13, NKJV).

E preshon ku Mikeas a eksperensiá pa gaña tabata probablemente e mesun preshon ku e profetanan falsu di Asherah a sinti, pero Mikeas no a sigui e punto di bista popular akí; en kambio, el a warda pa Dios bis’é kiko bisa (1 Reinan 22:14).

Djabièrnè

16 di òktober

No Perfekto pero Dispuesto

Manera nos a mira, bida di profetanan di Tèstamènt Bieu ta mustra kla ku nunka tabata fásil pa ta e mensahero di Dios. Ellen G. White a eksperensiá e mesun ansiedatnan ku profetanan bíbliko a sinti. Manera nos a siña djabièrnè último, e tabata hóben, tímido i ku mal salú ora el a risibí e yamada di Dios. Miéntras ku un di dos vishon a konfirmá su yamada, Ellen Harmon (White) a keda preokupá tokante e yamada di Dios, skirbiendo:

“Mas o ménos un siman despues di esaki Señor a dunami un otro vision, i a mustrami e pruebanan ku mi mester pasa aden; ku mi mester bai relatá na otronan loke El a revelá na mi; ku mi mester enfrentá gran oposishon, i sufri angustia di spiritu. . . .

“E vishon akí a molestiámi ekstremadamente. Mi salú tabata hopi malu, i mi tabatin solamente diesshete aña di edat. . . . Mi a hasi orashon sinsero pa e peso por ser poné riba un otro hende. Pero tur e lus ku mi por a haña tabata: ‘Hasi konosí na otronan loke mi a revelá na bo.’ Mi no tabata resigná pa sali den mundu. Mi tabatin di naturalesa poko konfiansa. . . . Mi a wak ku deseo den e graf. Morto tabata parsemi preferibel ku e responsabilidatnan ku mi mester a karga.”—Spiritual Gifts, tomo 2, pp. 35,36.

Bo a nota ku Ellen Harmon (White) ker a mas bien muri ku aseptá su yamada? Despues di hopi orashon i enkurashamentu di su kompañeronan di fe, el a bai di akuerdo i a dediká e restu di su bida na sigui “[Su] mandato.”—Ellen G. White, Spiritual Gifts, tomo 2, p. 38.

E lo a bira e bos di mas influente pa, i asta di, e futuro Iglesia Atventista di e di Shete Dia. Sinembargo, Ellen Harmon (White) tabata humano i tabatin su mes fayonan personal i pruebanan físiko, retonan familiar i luchanan interpersonal. Sinembargo, meimei di su humanidat, nos ta mira un lès grandi: Dios ta skohe hende imperfekto ku ta dispuesto pa sirbiE.

Bou di guia di Spiritu Santu, e ministerio profétiko di Ellen G. White lo a enkurashá kreyentenan i konektá nan na bèrdatnan di Beibel. Banda di 1860, el a hunga un ròl di liderazgo den e desaroyo di e denominashon Atventista di e di Shete Dia nobo i su mishon pa proklamá e mensahe di e tres angelnan na mundu. Dios lo a guia e kreyentenan akí pa organisá e Iglesia Atventista di e di Shete Dia na 1863. Den dékadanan despues, Ellen G. White su bos profétiko tabata influensial den establesé e sistemanan global di salú i edukashon atventista. Sinembargo, e kontribushon di mas importante di su ministerio ta su eskritonan, ku ta suma aproksimadamente 100.000 página. E eskritonan inspirá di Ellen G. White ta sigui papia den henter mundu awe.

Pa deskubrí mas, bishitá: whiteestate.org/absg/3.