Lès 4

* 17 - 23 di òktober

Profetanan di Tèstamènt Nobo

Sabat

17 di òktober

Lesa pa e Estudio di e Siman Akí:

Mat. 16:13-16; Efe. 2:20; Rev. 22:6; Lukas 2:36-38; Echonan 21:9; Efe. 6:10-18.

Versíkulo di Memoria:

"Tin diversidat di don, ma ta e mesun Spiritu. Tin diferensianan di ministerio, ma e mesun Señor. I tin diversidat di aktividat, ma ta e mesun Dios ta esun ku ta obra tur kos den tur hende” (1 Korintionan 12:4-6, NKJV).

Segun ku un tata tabata kore outo, su yu hòmber tabata skèn e outonan ku tabata pasa pa asina mira esnan ku tabata meskos ku esun di su tata. Despues e tata a mustra riba un outo i a sklama: “Yu, esei tabata meskos ku mi promé outo!” Ora ku nan a yega kas, e tata a saka e manual di su promé outo, huntu ku e manual di e outo aktual. Kuidadosamente el a mustra su yu hòmber e karakterístikanan di kada vehíkulo, resaltando kosnan ku tabata meskos i loke a ser kambiá. Sinembargo, ora e tata a kompará e dos motornan, tur kos tabata idéntiko. Hopi kos a kambia, ma no e motor.

Dios a papia pa medio di profetanan den Tèstamènt Bieu i Nobo, i e kontinuidat i harmonia den nan mensahenan ta pasobra e Spiritu Santu, e Fuente, òf “Motor,” di inspirashon divino, a keda mesun kos. Spiritu Santu semper ta empoderá profetanan berdadero a traves di e don di profesia. Tambe e ta pone Kristu den sentro di e mensahenan di e profetanan, manera Hebreonan ta hasi kla (Hebr. 1:1-3).

E siman akí nos lo analisá e don di profesia den Tèstamènt Nobo, mirando kiko profetanan a hasi, ken a funshoná komo profeta, kon profetanan tabata kompará ku apòstelnan, i e peliger di profetanan falsu tambe.

Djadumingu

18 di òktober

Hesus komo Profeta

Moises a pronostiká ku "Señor boso Dios lo lanta pa boso un Profeta meskos ku ami for di boso meimei, for di boso rumannan. E boso mester skucha" (Deut. 18:15, NKJV). Ken e profeta tabata? Skritura mes ta hasié kla: e tabata mustra riba Hesus Mes. "Pasobra di bèrdat Moises a bisa e tatanan: ‘Señor boso Dios lo lanta pa boso un Profeta manera ami for di boso rumannan. E boso mester skucha den tur kos, kiko ku E bisa boso' " (Echonan 3:22, NKJV; lesa tambe Juan 6:14).

Kiko ta e ròl profétiko di Hesus? Kon e pregunta akí a ser kontestá den tempu di Hesus? (Mat. 16:13-16, Marko 8:27-29, Lukas 9:18-20).

Hesus, komo e Kristu, e Mesias, ta Esun na ken tur e profetanan di Tèstamènt Bieu tabata mustra. Den Tèstamènt Nobo Hesus ta ser rekonosé komo e kumplimentu di nan profesianan mesiániko. Den Lukas 24:13-35 E ta presentá Su mes komo Esun na ken e profesianan mesiániko tabata mustra.

De echo, den Juan 1:1-5, e deskripshon duná di e Palabra akinan no ta pas ku ningun ser humano òf simpel profeta humano. E Palabra ta ser identifiká komo e Kreador, pasobra “tur kos a ser trahá pa medio di djE, i sin djE nada a ser trahá ku a ser trahá” (Juan 1:3, NKJV). Es desir, El a krea tur loke a ser kreá, ku ta henter e kòsmós, ku awor ta kalkulá di tin un hanchura di 93 mil mion aña di lus.

Den kada “i Dios a bisa” di Génesis 1, nos ta tende Hesus papiando. Esun ku a bisa, “Laga tin lus” (Gén. 1:3) tambe ta e “lus di hende” (Juan 1:4), i a traves di e plan di salbashon (Juan 1:4,5) E tabata kitando e skuridat di tera.

E palabranan profétiko di Dios ta sigur i konfirmá. Ora pone atenshon na nan, nan ta “un lus ku ta bria den un lugá skur, te ora dia habri i e strea di mardugá sali den boso kurason” (2 Pe. 1:19, NKJV). Profesia lo sigui trese lus na nos mundu pekaminoso te ora ku Hesus, “e Strea di Mardugá,” i Fuente di e lus profétiko ei, lo introdusí Su reino eterno.

Te e dia ei, pa medio di Su bida, morto i resurekshon, Kristu ta ofresé nos tur bida eterno. E úniko pregunta ta si nos lo asept’é òf nò.

Djaluna

19 di òktober

Apòstelnan i Profetanan

Tèstamènt Nobo ta menshoná e trabou di profetanan i apòstelnan. E apòstelnan tabata “mensaheronan,” òf “esnan mandá” di Dios, manera definí pa e palabra griego apostolos. Den henter e Evangelionan, e palabra “apòstel” ta referí na e 12 disipelnan. E restu di Tèstamènt Nobo ta sostené e idea akí i ta inkluí otro individuonan ku no tabata entre e disipelnan original di Kristu.

Pablo ta yama su mes un apòstel 12 biaha den su epístolanan. Den Romanonan 1:1,2 e ta konektá su yamada apostóliko i e kontenido di su predikashon, ku e mensahe di e profetanan di Tèstamènt Bieu. Pablo ta presentá su mes komo un apòstel na e paganonan (Rom. 11:13). El a ser nombrá "pa medio di e boluntat di Dios" (1 Kor. 1:1).

Kontrali na e saserdotenan ku a sigui un liña familiar di tatanan pa yunan, Dios a nombra profetanan i apòstelnan di akuerdo ku Su boluntat. Ora Pablo su apostolado tabata den disputa, el a defendé su yamada (1 Kor. 9:1,2). Pablo a mira su apostolado komo edifikando riba e obra di Kristu, e Fundeshi di iglesia (Efe. 2:20). Komo reseptornan di e revelashon di Dios, e apòstelnan pues ta poseé e mesun nivel di inspirashon ku e profetanan (Efe. 3:1-5).

Den 2 Pedro 3:1,2, Pedro ta hasi referensia na profetanan komo esnan ku a bini promé i kende nan palabranan tabata importante, pero awor e apòstelnan ta ser presentá komo kargando e mesun outoridat. Den e versíkulonan akí, referensia ta ser hasí na tempunan di Tèstamènt Bieu i Nobo. Miéntras ku profetanan por parse di ta mensaheronan di Dios di e era di Tèstamènt Bieu i apòstelnan mensaheronan di Dios di e era di Tèstamènt Nobo, tabatin hende tambe ku a profetisá òf a ehersé e don profétiko pero ku no tabata apòstel. E don di profesia no tabata limitá na e apòstelnan den tempu di Tèstamènt Nobo. I no ta tur profeta tabata apòstel (Echonan 15:32).

Kon apòstelnan i profetanan ta funshoná en relashon ku Kristu i e iglesia, di akerdo ku Efesionan 2:20 i Efesionan 3:5?

I manera nos sa tambe dor di lesa loke e apòstelnan den Tèstamènt Nobo a skirbi, Hesus tabata e sentro di kasi tur loke nan a skirbi. Di un manera òf otro, Su bida, morto, resurekshon, ministerio sumosaserdotal, i regreso tabata nan enfoke sentral.

Djamars

20 di òktober

Funshonnan di Profetanan di Tèstamènt Nobo

Kiko 1 Korintionan 14:3, Efesionan 4:11-13, i Revelashon 22:6 ta bisa nos tokante e ròl di profetanan di Tèstamènt Nobo?

E versíkulonan aki riba, maske kon útil nan ta, no ta presentá un bista amplio di tur loke e profetanan di Tèstamènt Nobo a hasi. No opstante, hopi di loke nan a hasi ta reflehá loke profetanan den Tèstamènt Bieu tambe a hasi, dunando asina kontinuidat ku e don profétiko.

Den 1 Korintionan 12:10, profesia ta ser menshoná entre otro donnan spiritual. Den e metáfora di kurpa di Kristu (1 Kor. 12:27,28), profetanan ta ser menshoná despues di apòstelnan, kendenan tambe a risibí revelashonnan for di Dios. Di akuerdo ku 1 Korintionan 14:3: “Esun ku ta profetisá ta papia edifikashon i eksortashon i konsuelo na hende” (NKJV).

Efesionan 4:11-13 ta menshoná un grupo similar di donnan spiritual, manera 1 Korintionan 12 ta menshoná. Profetanan ta ser menshoná entre apòstelnan, evangelistanan, pastornan i maestronan (Efe. 4:11). E personanan akí ta eksistí pa “ekipá e santunan pa e trabou di sirbishi, pa edifikashon di e kurpa di Kristu, te ora nos tur yega na e unidat di fe i e konosementu di e Yu di Dios, na un hòmber perfekto, na e midí di e estatura di e plenitut di Kristu” (Efe. 4:12,13, NKJV). Manera ta ser mirá aki i otro kaminda, Hesus ta e enfoke sentral di nan mensahe.

E buki di Echonan a papia tokante dos profeta, Judas i Silas (niun di nan n a skirbi un buki den Beibel), kendenan “a eksortá i fortalesé e rumannan ku hopi palabra” (Echonan 15:32, NKJV). Aunke, sí, tin bes profetanan mester pronunsiá spièrtamentunan, asta spièrtamentu severo tin biaha, nan, dependiendo di e sirkunstansia, ta ofresé tambe palabranan di enkurashamentu, spesialmente den tempunan difísil, palabranan ku sin duda tabata hopi apresiá dor di esnan ku mester a tende nan i e speransa i promesa ku nan tabata kontené.

E trabou di kurashamentu tambe ta ser menshoná den e konteksto di profetisá (1 Kor. 14:31, NKJV). Den tempunan di tribulashon i persekushon, e don di profesia tabata un fuente di kurashamentu i speransa.

Den Revelashon 22:6, Hesus ta ser presentá komo “Señor Dios di e profetanan santu” i kende su “palabranan ta fiel i berdadero” (NKJV). Naturalmente, kualke kos ku ta bini di e sirbidónan di Dios, ora nan ta papia pa Dios, ta bai ta “fiel i berdadero,” tambe. Den un mundu den kua nos por konfia asina tiki, enbèrdat nos por konfia loke e profetanan di Señor ta bisa, spesialmente den Su Palabra, nos outoridat final i supremo.

Djárason

21 di òktober

Profetanan Muhé i Asosiadonan Pastoral Hóben

Lesa Lukas 2:36-38 i Echonan 21:9. Kiko e pasashinan akí ta bisa nos tokante profetanan muhé?

Den tempu di Tèstamènt Bieu, Dios a yama tantu hòmber komo muhé pa ta Su mensaheronan. Den tempu di Tèstamènt Nobo, tin evidensia kla di profetanan muhé. Ana tabata e promé ku a ser yamá un “profetisa” den Tèstamènt Nobo. E ta un hende ku, den su ministerio di tempu kompletu, "a sirbi Dios ku yunamentu i orashon anochi i di dia. I . . . el a duna danki na Señor, i a papia di djE" (Lukas 2:37,38, NKJV).

Echonan 21:9 ta bisa ku Felipe tabatin “kuater yu muhé bírgen ku tabata profetisá” (NKJV). Historiadónan di Tèstamènt Nobo, manera Eusebio, a haña tekstonan mas despues ku ta menshoná unda posiblemente nan a biba, i despues a ser derá. Di kualke manera, loke nos ta mira ta muhénan, mas probablemente muhénan yòn, ku tin e don profétiko. Nos no sa eksaktamente kiko nan a profetisá ni e alkanse di nan ministerio. Un kos, sinembargo, ku nos sa sí tokante e muhénan yòn akí ku e don profétiko: ningun di nan palabranan profétiko a drenta den e kánon, Beibel. Esta, meskos ku hopi otro, nan tabata profetanan no-kanóniko, profetanan berdadero kende nan palabranan, eskritonan, loke sea, no a bira bukinan bíbliko.

Ademas di profetanan muhé, pastornan hóben tabata traha den asosiashon estrecho ku apòstelnan. Apòstelnan tabata mèntòr di lidernan hóben pa ministerio. Pablo, por ehèmpel, a dirigí su mes na Timoteo komo “un berdadero yu den fe” (1 Tim. 1:2, NKJV; lesa tambe 1 Tim. 4:12). Pablo a siña Timoteo e kosnan básiko di ministerio pastoral. E ta deklará tokante su yamada: “E enkargo akí mi ta enkomendá na bo, yu Timoteo, di akuerdo ku e profesianan hasí anteriormente tokante bo pa, pa medio di nan, bo por hiba e bon lucha” (1 Tim. 1:18, NKJV).

Den Tito 1:4 Pablo a introdusí Tito komo “un berdadero yu den nos fe komun” (NKJV). Pablo a duna Tito e tarea di nombra lidernan pa e kreyentenan na Kreta, un kongregashon desafiante. El a ofresé e hóben Tito konseho spiritual riba kon aserká e responsabilidat importante akí, despues a konkluí: "Papia e kosnan akí, eksortá, i reprendé ku tur outoridat. No laga niun hende despresiábo" ( Tito 2:15 , NKJV).

Djaweps

22 di òktober

Profetanan Falsu den Tèstamènt Nobo

Lesa Mateo 24:23,24. Tokante kiko Hesus ta atvertí nos aki? Dikon nos mester tuma e spièrtamentu akí asina na serio?

Hesus Mes no por tabata mas kla: "Pasobra kristunan falsu i profetanan falsu lo lanta i mustra señalnan grandi i maravianan pa gaña, si ta posibel, asta e skohínan" (Mat. 24:24, NKJV).

E engañonan ku E ta spièrta tokante dje mester ta bastante persuasivo, si, enbèrdat, “señalnan i maravianan grandi” lo ta parti di dje. Susesonan sobrenatural, den i di nan mes, no ta evidensia di e obra di Dios, maske kon persuasivo nan por parse. Nos tin enemigu sobrenatural. Manera Pablo a spièrta nos: “Pasobra nos no ta lucha kontra karni i sanger, sino kontra prinsipadonan, kontra podernan, kontra e gobernantenan di e skuridat di e era akí, kontra ehérsitonan spiritual di maldat den e lugánan selestial” (Efe. 6:12, NKJV). I e podernan akí ta funshoná pa medio di profetanan falsu.

De echo, profetanan falsu no ta nada nobo. Tèstamènt Nobo ta referí na e profetanan falsu den tempu di Tèstamènt Bieu (Lukas 6:26). Den Tèstamènt Nobo profetanan falsu ta ser kompará ku “lobonan hambrá” ku ta “den bistí di karné” (Mat. 7:15, NKJV), i nos ta ser bisá ku nos lo “konosé nan pa medio di nan frutanan” (Mat. 7:16, NKJV).

Nan trabou prinsipal ta engaño (Mat. 7:17–20). Hesus Mes a deklará ku "hopi profeta falsu lo lanta i gaña hopi hende" (Mat. 24:11, NKJV), i "si ta posibel, asta e skohínan" (Mat. 24:24, NKJV; lesa tambe Marko 13:22, 1 Juan 4:1).

Segun Efesionan 6:10-18, kon nos por protegé nos mes di kualke tipo di engaño?

Bibando pa medio di fe, bisti e “pechura di hustisia,” ta fahá den e “bèrdat,” huntu ku sumishon na Spiritu Santu pa medio di orashon, i ta ankrá den Su Palabra, esakinan ta e maneranan ku nos por ser protegé di tur loke, di otro manera, lo hiba nos spiritualmente i teológikamente den un kaminda robes.

Djabièrnè

23 di òktober

Manteniendo Hesus i Su Palabra den Sentro

Manera nos a siña, Dios a yama profetanan na momentonan spesífiko i a duna nan tareanan importante. Nan funshon prinsipal tabata pa trese hende na un konosementu di Dios i un relashon fiel kunE. Esaki tabata e orientashon di guia di Ellen G. White. Su ministerio tabatin dos funshon prinsipal: hiba hende na Hesus i mustra nan na Su Palabra,e Beibel.

Ellen G. White tabatin un pashon di bida largu pa Hesus i un deseo pa kompartí e amor di Dios ku otronan. Su famoso seri di sinku buki, E Konflikto di e Siglonan, ta kuminsá i ta kaba ku e palabranan “Dios ta amor.” Den Steps to Christ, kisas su buki di mas popular, el a skirbi: “Nos kresementu den grasia, nos goso, nos utilidat, tur ta dependé di nos union ku Kristu. Ta pa medio di komunion kunE, diariamente, kada ora, dor di permanesé den djE, ku nos mester krese den grasia. E no ta solamente e Outor, sino e Konsumidó di nos fe.”—Steps to Christ, p. 69.

Durante dékada 90 di siglo 19, ora e tabata trahando riba The Desire of Ages, el a skirbi den su diario: “Ora mi ta skirbi riba e bida di Kristu mi ta sintimi profundamente konmoví. Mi ta lubidá di hala rosea manera mi mester. Mi no por soportá e intensidat di sintimentu ku ta bini riba mi ora mi pensa riba loke Kristu a sufri den nos mundu—Manuskrito 70, 1897. Ellen G. White tabata stima papia tokante Hesus.

Beibel tabata e di dos enfoke di e ministerio di Ellen White. E tabata mira su eskritonan komo un “lus menor” ku ta hiba hende na e “lus mayor”, e Beibel (Selected Messages, buki 3, p. 29). Semper e tabata kurashá hende pa bai na Skritura, kaminda Dios a revelá Su karakter amoroso i plan di salbashon. Manera el a bisa trempan den su ministerio: “Mi ta rekomendábo, lektor stimá, e Palabra di Dios komo e regla di bo fe i práktika.”— Selected Messages, buki 3, p. 30.

Añanan despues e lo a skirbi: “Señor ta deseá pa boso studia boso Beibelnan. E no a duna ningun lus adishonal pa tuma lugá di Su Palabra. . . . Si kome i digerí, [Su Palabra] ta manera e sanger di bida di e alma. E ora ei bon obranan lo ser mirá manera lus ku ta bria den skuridat.”—Karta 130, 1901.

Ellen G. White tabata kere tambe ku tur ku ta reklamá e mantel profétiko di Kristu mester siña “loke Kristu a siña. E loke El a papia, no solamente den persona, sino pa medio di tur e profetanan i maestronan di Tèstamènt Bieu, ta aki inkluí. Siñansa humano ta será pafó.”—The Desire of Ages, p. 826.

Ellen G. White a tene Hesus i Skritura den sentro di su eksperensia kristian. Djabièrnè próksimo nos lo eksplorá su puntonan di bista riba revelashon i inspirashon.

Pa deskubrí mas, bishitá: whiteestate.org/absg/4.