Salbá pa un dia

Ku Dios bendishonábo kada dia di e evento akí. Hasi un orashon i kuminsá e aventura spiritual akí; topa ku Dios tur mainta

Dios ta salbámi den e oranan trempan di kada mainta, asina mi ta bira santu durante dia. Sin risibí diariamente e poder ku ta bini di su Palabra, lo mi no por biba komo un yu di Dios. Si Dios no ta okupá e promé lugá den mi proyektonan di kada dia, e ora ei mi por asumí ku mi bida lo ser kontrolá pa mi impulsonan karnal.

E kustumber di buska Dios, den e promé oranan di kada dia, pa medio di estudio di Beibel, orashon i estudio di e lès di Sabat Skol.

Salbashon pa un dia: Kiko Beibel ta siña relashoná ku e asuntu akí? Kon e echo ku salbashon ta pa un dia mester afektá mi prioridatnan diario? Di unda e prinsipio ta bini ku mi ta ser salbá denter di un unidat di tempu ku ta ser yamá un dia?

Na prinsipio, Dios a aktua pa pone tur kos na òrdu. “Na prinsipio Dios a krea e shelunan i tera” (Gen. 1:1). Meskos ku Dios a aktua na prinsipio di e mundu akí pa pone tur kos na òrdu, E ta deseá tambe di aktua na kuminsamentu di kada dia pa pone òrdu den nos bida segun Su boluntat.

Laga nos wak e motibunan pakiko nos mester buska Dios durante e promé oranan di kada dia. Awe nos lo analisá dos di nan:

E ta un òrdu ku ta bini di Hesus

“Buska prome e reino di Dios i Su hustisia, i tur e kosnan akí lo ser añadí na boso” (Mat. 6:33)

E kreyente mester lanta tur mainta inhalando Hesus. Bo mester lanta ku hamber i set pa e Palabra di Dios. Hesus ta ordená ku Dios mester ta e promé. Pues, ora bo lanta, promé ku bo baña, promé ku bo kambia bo paña, òf kualke otro aktividat, pa fundamental ku e por ta, bai promé dilanti di e presensia di Dios, pa bo alma risibí poder pa ta santu durante e dia ei. Sin e poder ei, e dia ei lo ta un frakaso den tur sentido.

Tur loke nos kurason karnal ta deseá ta pa Dios no okupá e promé lugá. Ora esei sosodé, e ta gañabo (Deut. 11:16). Ora mi lanta mainta, mi no mester inventá un diskulpa òf traha otro plannan, manera habri medionan sosial riba mi telefòn selular. P’esei, Dios mester okupá e promé lugá den mi bida.

Pasobra Dios tin un programa diario pa mi bida

“Bo wowonan a mira mi supstansia sin forma; i e dianan ku tabata stipulá pa mi, tur tabata skirbí den Bo buki, tempu ku no tabatin ningun di nan ainda” (Salmo 139:16).

Den e salmo ku nos a kaba di lesa ta evidente ku Dios tin un plan diario pa kada persona ku ta deseá di biba kada dia den santidat.

Ora mi lanta mainta, e promé pregunta ku mi mester hasi mi mes ta: Kiko ta e programa ku Dios tin pa mi bida awe? Unda e programa ei ta?

Den su páginanan henter Su boluntat ta deskribí pa bo dia ta bendishoná i pa bo por biba manera un santu.

Ora mi lanta mainta, promé ku mi hasi kualke otro aktividat, mi mester kue mi Beibel i mi lès di Sabat Skol i, den dependensia profundo riba Hesus i liber di kualke idea prekonsebí, pidi Spiritu Santu pa E guia mi mente na un komprondementu kla di e boluntat di Dios ekspresá den e Skrituranan Santu.

E ophetivo di e programa di Dios ta pa, kada dia, neutralisa e strategianan ku e enemigo tin pa bo bida. Bo ke buska Dios durante e promé oranan di kada dia i biba, òf bo ke ta katibu di e maldat ku Satanas por ofresébo tur dia?