Renobá kada dia

Dia

2

“P’esei nos no ta desmayá, ma aunke nos hende eksterior ta degenerá, sinembargo nos hende interior ta ser renobá dia pa dia” (2 Korintionan 4:16)

Bo ta kla! Laga nos kuminsá nos trayekto di e dia di awe!

Ayera nos a siña ku nos salbashon ta diario, pues tur dia mi mester enkomendá mi bida na Dios. Si mi no proyektá e poder di Dios tur dia na promé lugá den mi bida, lo mi ser kontrolá dor di mi impulsonan karnal.

Nos a mira tambe dos motibu pakiko nos mester buska Dios durante e promé oranan di kada dia.

  1. Pasobra e ta un òrdu ku ta bini di Hesus (Mat. 6:33) i
  2. pasobra Dios tin un programa diario pa mi bida (Sal. 139:16).

Awe nos lo wak dos motibu mas:

Pasobra e hende interior mester renobá su mes tur dia

“P’esei nos no ta desmayá, ma aunke nos hende eksterior ta degenerá, sinembargo nos hende interior ta ser renobá dia pa dia” (2 Korintionan 4:16)

Loke Beibel ta siña nos relashoná ku esaki ta kla i direkto: Salbashon for di e poder di piká ta pa un dia. E teoria di ku “un biaha salbá, semper salbá” no ta bíbliko. Hende salbá for di e kastigu di piká i ku ta riba kaminda pa eternidat mester tene den mente ku salbashon for di e poder di piká ta diario i mester ser desaroyá kada dia ku temor i temblamentu.

Laga nos lesa loke Beibel ta bisa:
2 Korintionan 4:16 “... tòg nos hende interior ta ser renobá dia pa dia”.
1 Korintionan 15:31 “... mi ta muri diariamente”.
2 Korintionan 7:1 “... i asina perfekshoná nos santidat den e temor di Dios”
Kompletá:

Pa nos tin pas i alegria den nos kurason

“Bo palabranan a ser hañá i mi a kome nan, i Bo palabra a bira un goso pa mi i e delisia di mi kurason; pasobra mi a ser yamá na Bo nòmber, O SEÑOR Dios di ehérsitonan” (Jer. 15:16).

Tres punto meresé nos atenshon den e versíkulo akí:

“Bo palabranan a ser hañá”: Kiko e palabra haña ta sugerí? Pa haña mi mester buska; pues, ora mi lanta mainta, e Palabra no ta bai buska mi, ami mester busk’e. Mi tin ku buska Dios durante e promé oranan di kada dia, i esei no mester ta un búskeda superfisial, sino di henter mi kurason. Jeremias ta karakterisá e tipo di búskeda akí: “I boso lo buskaMi i boso lo hañaMi, pasobra boso lo buskaMi di henter boso kurason” (Jer. 29:13).

“I mi a kome nan”: No ta sufisiente pa bisa ku e Palabra ta importante, ku e ta bon, ku e ta divino i ku e ta salba. Ta nesesario pa kome e Palabra, pone alimento divino den mi kurason. Solamente asina su nutrientenan lo drenta den e fluho di sanger di e poder ku ta bini di Dios direktamente pa mi bida.

“Bo palabranan a bira un goso pa mi i e delisia di mi kurason”: Esun ku disidí di buska Dios den e promé oranan di kada dia lo tin pas i goso durante su transkurso.

“Den e promé oranan di e dia nobo, Dios a lant’é for di su soño, i su alma i su lepnan tabata ungí, ku grasia, pa e por a kompartí na otronan” (PVGM, 105).

Konklushon
Risibí e unshon diario di Spiritu Santu ta trese kuné tur e bida i poder di Kristu, ku ta hasi nos mas ku vensedornan den tur sirkunstansia.

Aktividatnan di dia

Awe bo a siña cu bo mester renoba bo mes tur dia, biba den pas i alegria, i esaki ta ser lográ dor di pasa momentonan bo so ku Hesus den e promé ora di kada mainta. P'esei:

  1. Studia bo Beibel na e momentonan akí atraves di e lès di Sabat Skol.
  2. Hasi orashon pa e sinku personanan di bo lista di orashon ku bo a traha ayera, i hasi orashon tambe pidiendo direkshon di Spiritu Santu den tur loke bo hasi riba e dia akí.
  3. Anochi, promé ku bo bai sosegá, reuní bo famia i hasi e Kulto Vespertino. Kòrda: “Kuminsá i terminá e dia ku Dios”.