Un tristu realidat

Sea bo ta un teenager òf un persona ku kabei blanku, probablemente bo ta puntra bo mes: Kiko ta e base di bida kristian? Kon kristianismo por bira signifikativo den mi bida? Kon bo por konosé Hesus personalmente? Mi ke kontabo kon bida kristian a bira notabel pa mi.

Despues ku mi tabata den ministerio pa tres aña, mi a enfrentá un gran difikultat. Te e momento ei, mi tabatin éksito ora mi tabata fia predikashinan for di otro predikadónan, inkluso di mi tata i di mi tio. Mi a logra prediká tokante e eventonan final i e doktrinanan di iglesia, pero un dia mi a realisá ku e diskursonan ei no tabata reflehá e loke mi tabata pensa i tampoko nan tabata konta mi eksperensia ku Kristu. Mi tabata fingi, i a sigui e rutina den mi bida sin sa realmente loke kristianismo tabata nifiká. Komo pastor, mi tabatin e obligashon di ta un outoridat den esei.

Un dia mi a purba prediká tokante Hesus, i mi a deskubrí ku mi a kai den e trampa di ke papia tokante un hende ku mi no tabata konosé personalmente.

Keremi, no ta eksistí nada mas frustrante ku ta un pastor di evangelio sin konosé Hesus! Miéntras úlseranan tabata forma den mi paden, mi a realisá dolorosamente ku, a ménos ku mi konosé Hesu-Kristu pa medio di un eksperensia personal, lo tabata mihó pa buska otro okupashon.

Asina, mi a disidí di hasi lo mihó posibel pa deskubrí e kontestanan relashoná ku e asuntu akí di kristianismo. Na un reunion di kampamentu, miéntras e pastornan tabata lanta nan tèntnan, mi a yama algun di e amigunan ei un banda, un pa un, i a hasi nan preguntanan tokante fe i religion, i kon esaki lo por a bira real den mi bida. Komo un kompañero den ministerio mi tabata sinti bèrgwensa pa atmití ku mi tabatin preguntanan personal tokante esei, asina ta ku mi a trata e asuntunan den terser persona:

• Suponé ku den mi kongregashon mi tin un hende ku no sa kon pa ser salbá. Kiko mi mester bis’é?
• Bis’é ku e mester haña un bida nobo for di ariba.
• Bon, kon e por hasi esei?
• Bis’é pa e saka su man i kue man di Dios.
• Kon e por hasi esei?
• E mester kai riba e Baranka i ser kibrá.
• Kiko esei ta nifiká?
• E ta nifiká ku e tin ku kontemplá e Lamchi.

Ta tristu pa bisa ku mi a yega kas bèk mas desanimá ku nunka. Mi a usa algun di e frasenan inkonsebibel ei kaba ora mi tabata konsehá i prediká, pero den mi búskeda di kontestanan konkreto nan no tabata nifiká nada. E términonan ei tabata ireal i fuera di alkanse pa un hende ku nunka a eksperensiá nan. Mi tabata desidido pa bandoná e ministerio, pero un hende a bisami: “Bo búskeda no a kaba ainda, pasobra ainda bo no a studia esaki den e bukinan”.

Mi a kumpra tur e bukinan ku tabata trata asuntunan manera fe, Hesus i viktoria riba piká. Den e tempu ei no tabatin masha kos skirbí, pero mi a topa un buki, El Camino a Cristo, ku tabata parse bastante chikitu ku mi por a les’é di kaft pa kaft sin muchu difikultat. Mi a les’é kaba den pasá pa un klas, i e no a parsemi masha interesante. E biaha akí mi a disidí di les’é kompletamente, suprayando tur loke e tabata pidimi hasi. Mi a kuminsá lesa e buki, i imaginábo: mi a suprayá kasi tur kos. Mi a deskubrí tambe di unda tur e frasenan intangibel i inkonsebibel a bini, nan tur tabata ei. Ora mi a kaba e buki, mi tabata asina rabiá ku mi por tir’é den kandela. E frasenan suprayá a sigui ta ireal i intangibel.

Mi a disidí di purba lesa un biaha mas. Awor lo mi a supraya, ku liña dòbel, e kosnan konkreto ku mi por a hasi. Mi sorpresa tabata grandi, pasobra mi a suprayá apénas tres kos: Estudio di Beibel, orashon i testimonio.

Mañan nos lo sigui ku e testimonio akí.