Un bida deboshonal ku Hesus

Den e evento di ayera nos a bisa ku awe nos lo kontestá algun pregunta: Kiko ta nifiká un bida di deboshon? Kiko ta nifiká pasa tempu bo so ku Dios?

Nos lo pasa na kontestá e preguntanan akí:

E ta un tempu spesial den kua mi ta buska pa konosé Dios mihó. Nunka mi a haña un mihó método di aserkamentu ku pasa un ora kada dia kontemplando e bida i siñansanan di Kristu manera nan ta registrá den e evangelionan.

E tempu ei so kunE ta algu mas ku un tèkst diario ku nos ta lesa ora nos ta sali kas, ku un man na e man di porta. E ta lesamentu di su Palabra, i, komo Iglesia Atventista di e di Shete Dia, nos tin un guia pa hasi siñamentu di e Palabra mas didáktiko i sistemátiko. E guia ei ta e lès di Sabat Skol.

Ora nos ta lesa, nos mester internalisá kada storia òf mensahe registrá den e Palabra, ya ku nan tabata enkuentronan ku hendenan ku no tabata diferente for di abo i ami. Pues, mi ta hasi orashon tokante loke mi a lesa, poniendo mi mes den e deskripshon. Por ehèmpel: mi ta e leproso ku a ser kurá; mi ta e hòmber siegu ku su bista a ser restourá. I, segun ku mi ta personalisá loke mi ta lesa, mi ta siña konos’é.

Dios ta preferá pa nos buska Su poder mainta, pa pasa henter dia den Su presensia. I anochi, dediká un momento di gratitut pa Su kuido durante dia (kulto vespertino).

"Bon", un hende lo bisa: “Mi no tin sufisiente tempu pa esei”. Amigu, skucha esaki: Si bo no tin tempu pa hasi orashon i buska Dios, e ora ei bo no tin tempu pa biba, pasobra Dios no por siñabo nada a ménos ku bo pasa tempu kunE. Mi ta garantisábo ku, si bo pasa tempu bo so ku Dios tur dia, lo bo ta muchu mas efisiente den tur loke bo ta hasi.

Nunka lo mi lubidá e eksperensia pa medio di kua mi a deskubrí esaki pa mi mes. Mi a kuminsá persibí e importansia di pasa tempu mi so ku Dios tur dia. Mi tabata un di esnan enkargá pa inspekshoná e tèntnan di e hóbennan den un kampamentu. Nos tabatin programanan henter dia i, ora anochi a yega, nos tabatin un reunion ku e tim ousiliar. Den e reunion ei nos a diskutí e plannan i e desafionan pa e eventonan di e siguiente dia. Ora nos a kaba tabata 11 or di anochi. Debí na e trabou ku mi mester a hasi promé ku e reunionnan di mainta a kuminsá, mi a deskubrí ku mi mester a lanta mitar di 5 di mardugá pa mi por a dediká tempu mi so ku Dios.

Asina ta ku, mi a pidi Dios ku, si E tabata ke pa mi pasa tempu kunE, E lantami mitar di 5 a.m. Mi a laga mi wèker para i a bai drumi. Diripiente mi a spièrta ku un shòk. Mi a wak e oloshi, i e di dos weizer a kaba di pasa rápidamente riba e mitar di 5! Klaro, sikiatranan lo a bisa ku mi a programá i manehá mi mente pa mi logra lanta, pero mi tin mi dudanan tokante esei. Si bo studia e bida di Kristu, lo bo deskubrí ku Dios tabata lant’E tur mainta, ku e propósito di prepar’E pa e dia nobo (Isa. 50:4). Mi a deskubrí ku, si mi mester usa parti di mi soño pa pasa tempu mi so ku Dios, E lo dunami dos ora di forsa pa “kada ora” pèrdí di mi sosiegu. Isaias 40:28 te 31 ta menshoná ku Dios ta duna forsa na esnan kansá.

E reseta spiritual di pasa tempu bo so ku Señor, na kuminsamentu di kada dia, por parse místiko i ireal. Hopi di nos ta asina será den nos mes, midiendo kristianismo atraves di komportashon, atraves di e forma eksterno di prohibishonnan i pèrmitnan, di “hasi esaki i no hasi esaya”, ku nos ta haña difísil pa kambia e relashon.

Nos ta terminá e dia di awe ku e siguiente pensamentu spiritual:

“E kreyentenan ku ta bisti e armadura kompleto di Dios i ta dediká un tempu diariamente na meditashon, orashon i estudio di e Skrituranan, lo vinkulá nan mes ku Shelu i lo ehersé un influensia salbador i transformador riba esnan rònt di nan. Di nan lo ta e gran pensamentunan, e aspirashonnan noble, i e persepshonnan kla di e bèrdat i deber pa ku Dios. Nan lo anhelá puresa, lus, amor, i tur e grasianan di orígen selestial” (Testimonios para la Iglesia, tomo 5, p. 105).