Tende, skucha i obedesé

Ayera nos a studia ku Dios tin un programa pa kada dia di mi bida. I nos a mira dos manera kon nos por deskubrí e plan diario ei pa mi bida: Atraves di orashon i lesamentu di Beibel.

Awor nos ta bai wak dos manera mas kon nos por deskribí e plan diario ei ku Dios tin pa nos bida: tende i skucha, i tende i obedesé.

Tende i Skucha

Meimei di asina tantu bos, kiko òf ken nos a duna mas atenshon? E desishon pa priorisá ken tende i skucha ta di nos. Nos ta liber pa skohe ken nos ta duna mas atenshon, pero nos no ta liber pa skohe e konsekuensianan di nos desishon.

Nada, den e mundu akí, lo mester a risibí mas atenshon ku e Palabra di Dios. Na promé lugá, nos mester skucha e bos di Dios, pasobra e ta esun di mas importante di tur bos. Ta bale la pena destaká ku no ta sufisiente pa djis tende (suseshon di zonido). Nos mester skucha (pone atenshon na loke nos ta tende).

“Bendishoná ta e hende ku ta skuchaMi, vigilando na Mi portanan tur dia, wardando na e kozeinnan di Mi portanan!” (Prov. 8:34).

“Mira, dianan ta bin,” Señor Dios ta deklará, “ku lo Mi manda hamber riba e tera; no hamber pa pan ni set di awa, sino di tende e Palabra di Señor” (Amos 8:11).

Un biaha mi a skucha e siguiente frase di un ruman: “Krísisnan ta bai i krísisnan ta bin, pa por mira ken ta ken”. Kuantu bèrdat tin den e afirmashon akí! Esun ku no ta desaroyá e kustumber di buska Dios durante e promé oranan di kada dia den tempu di pas, lo e busk’E di bèrdat den tempunan di krísis? E persona ku, ora e lanta, ta buska Dios na promé lugá, lo ta mihó kapas pa vense e krísisnan diario i lo ta mas felis.

Tende i Obedesé

Ora nos habri Beibel, nos ta dilanti di e Palabra bibu di Dios i, komo ku nos no por separá Dios for di Su Palabra, E tambe ta presente mirando nos i deseando profundamente pa nos sali pa busk’E. Na e momento solèm i santu akí nos mester pone atenshon na lo siguiente:

Esei ta nos enkuentro ku Dios, ku Hesus i ku Spiritu Santu. Nos lo sinti e brasa di e Tata, e amistat di Hesus i e interes di Spiritu Santu ku nos ta haña e alimento nesesario pa nos bida durante dia. Ban purba visualisá e kuadro ei, i kere den loke nos ta mirando i den loke nos ta bai skucha ku atenshon.

Ora nos kuminsá buska Dios na promé lugá, na komienso di kada dia, nos ta ser bendishoná i transformá, pasobra nos ta topa ku i kontemplá Hesus mes. E mes ta bisa: “Mi ta stima esnan ku ta stimaMi, i esnan ku ta buskaMi trempan ta hañaMi” (Prov. 8:17). “I boso lo buskaMi i boso lo hañaMi, pasobra boso lo buskaMi di henter boso kurason” (Jer. 29:13).

Laga nos no solamente skucha, laga nos papia tambe den orashon. Estudio di Beibel i orashon ta inseparabel.

E mandamentu bíbliko ta kla i direkto: “Ma sea kumplidónan di e Palabra, i no solamente tendedónan, gañando boso mes. Pasobra si un hende ta tendedó di e Palabra, ma no hasidó di dje, esaki ta semehante na e hende ku ta konsiderá su kara natural den un spil. Pasobra e ta konsiderá su mes, i e ta bai, i despues e ta lubidá kon e tabata” (Santiago 1:22–24).

Nos no tin otro manera pa komprondé e kosnan spiritual, ku di ta hendenan spiritual. Kua ta e promé tarea di un hende spiritual? Bai dilanti di e presensia di Dios manera e lanta, tratando di haña den Beibel kiko ta e programa di Dios pa e dia ei. Despues, sigui ta den Su presensia durante e aktividatnan di e dia.

Un otro opservashon ku lo mi tabatin gana di hasi ta ku, desde awe, laga nos purba duna máksimo atenshon na e Palabra ora un hende ta les’é. Ora bo tende e Himno Nashonal, bo no ta pone bo mes den posishon di atenshon? Nos lo no mester hasi mesun kos relashoná ku Beibel?