Kon warda e Palabra den bo kurason

Pabien, ya bo ta na e di 8 dia di e evento spiritual akí. Awe lo bo siña dos manera kon warda e Palabra di Dios den bo kurason. Laga nos kuminsá!

Hopi kos awendia lo ser wardá den bo kurason, pero esun di promé mester ta e programa diario di Dios ku ta skirbí den Su Buki Sagrado: Beibel. Kada dia mi mester proponé mi mes pa honra i glorifiká Dios ku henter mi kurason. Si mi no hasi esaki, mi kurason lo no tuma e programa di Dios pa e dia ei na serio.

Na kontinuashon, wak e ehèmpel di gran hòmbernan den Beibel ku a tuma esaki mashá na kuenta:

Job: “Nunka mi a separá for di e mandamentu di Su lepnan; mi a warda e palabranan di Su boka mas ku mi kuminda” (Job 23:12).

David: “Mi a warda Bo palabranan den mi kurason, pa mi no peka kontra Bo” (Salmo 119:11).

Pedro: “Stimánan, esaki ta e di dos karta ku mi ta skirbi boso, i den tur dos mi ta animá boso mente sinsero pa medio di spièrtamentu, pa boso keda kòrda e palabranan ku a ser papiá den pasado pa medio di e profetanan santu, i e mandamentu di e Señor i Salbador, duná dor di boso apòstelnan” (2 Pe. 3:1,2).

E dos maneranan akí ku lo yudabo warda e Palabra di Dios den bo kurason ta: siña for di kabes i kanta e Palabra.

Siña e Palabra for di kabes

“Ma e Konsolador, Spiritu Santu, Kende e Tata lo manda den Mi nòmber, E lo siña boso tur kos, i lo kòrda boso tur loke Mi a bisa boso” (Juan 14:26).

E deklarashon akí di Kristu mester hiba nos na pensa ku awe nos tin e obligashon i deber di yena nos mes ku e Palabra di Dios. E mandamentu sagrado ta: “Buska Yehova miéntras E por ser hañá, yam’E miéntras E ta serka” (Isa. 55:6). Kristu a ordená: “Skrudiñá e Skrituranan, pasobra ta parse boso ku den nan boso tin bida eterno; i nan ta esnan ku ta duna testimonio di Mi” (Juan 5:39). I asta El a bisa den e orashon saserdotal: “I esaki ta bida eterno: ku nan por konoséBo, e úniko Dios berdadero, i Hesu-Kristu kende Bo a manda” (Juan 17:3).

Si pa motibu di kualke sirkunstansia e Palabra skirbí a ser kitá for di bo man, lo bo por a sobrebibí spiritualmente ku loke bo a warda den bo mente?

Spiritu Santu lo pone nos kòrda loke nos a skucha, lesa òf siña for di kabes. P’esei, e desafio diario di kada kreyente ta pa presentá su mes dilanti di Dios durante e promé oranan di dia i yena su mente ku Su Palabra, meditando riba dje durante dia pa su propio inspirashon i pa testifiká tokante su fe na otronan.

Kanta e Palabra

Un otro manera pa medio di kua nos por studia e Palabra ta: kanta su tekstonan. Hopi di e salmonan, en realidat, ta himnonan. Algu bon, ku ta praktiká aktualmente, ta ku den e sirbishinan di hopi iglesia ta kanta tekstonan di e Palabra di Dios. Ken no ta kòrda 1 Juan 4:8, Salmo 23 i otro tekstonan ku, kantá, ta keda asina bibu den nos memoria? E letranan mas apropiá pa alabansa ta esnan ku Dios mes a pronunsiá. Dor di kanta e himnonan ei nos ta siñando Beibel for di kabes.

Na e momento akí, meditá riba e konsehonan di David i di apòstel Pablo:

• “Kanta na Yehova, boso Su santunan, i selebrá e memoria di Su santidat” (Salmo 30:4).
• “Kanta un kantika nobo na djE; hasié bon, zonando di alegria”(Salmo 33:3).
• “Papiando entre boso ku salmo, ku himno i kantikanan spiritual, kantando i alabando Señor den boso kurason” (Efe. 5:19).

Di awor padilanti bo no por pasa bo momentonan ku Hesus sin kanta kantikanan di alabansa.

Kòrda: Ora nos ta kanta, kantikanan di alabansa na Señor, e angelnan ta kompañá nos ku nan bosnan angelikal.