Kiko ta nifiká meditá riba e Palabra – 1

Ayera nos a siña dos manera kon nos por warda e Palabra di Dios den nos kurason: siñando tèkstnan bíbliko for di kabes i alabando Dios.

Awe nos lo siña dos manera mas: skirbi i papia e Palabra di Dios.

Skirbi e Palabra

Kopia e tèkst di Beibel ta un otro manera masha práktiko pa siña e Teksto Sagrado for di kabes. Pa bo momento di meditashon, usa un skref òf un kòmpiuter i purba skirbi òf taip e tèkstnan ku mas a toka bo kurason. Ora nos ta skirbi, nos ta persibí mihó e detayenan di e tèkst, i asina kosnan ku nos no ta kapta ku un simpel lesamentu, por ser deskubrí i apliká na bida.

Pa esnan ku ta predikadó, hopi predikashi lo surgi ku e práktika akí. E mihó predikashinan ta esnan ku ta toka, na promé lugá, kurason di e predikadó; asina nan lo ser eksponé ku mas poder i konvikshon. Ora Dios, atraves di Moises, a duna instrukshon pa e futuro reinan di e pueblo di Israel, El a inkluí lo siguiente.

"I ora e sinta riba e trono di su reino, e ora ei e lo skirbi pa su mes den un buki un kopia di e lei akí, di esun original ku ta bou di kuido di e saserdotenan levita; i e lo tin esaki serka dje, i e lo lesa den dje tur e dianan di su bida, pa e siña teme Señor su Dios, pa warda tur e palabranan di e lei i e statutonan akí, pa hasi nan". Deuteronomio. 17:18,19.

Dor di lesa, skirbi i kanta, diariamente, nos lo ta wardando e Palabra bibu di Dios den nos kurason, i asina nos lo ta fiel na djE den tur kos.

Papia di e Palabra di Dios

Un otro manera pa warda e Palabra di Dios den bo kurason ta pa papia di dje ku otro hende. "Ki bunita riba e serunan ta e pianan di esun ku ta trese notisia alegre, di esun ku ta anunsiá pas, di esun ku ta trese bon notisia, di esun ku ta publiká salbashon, di esun ku ta bisa Sion: ‘Bo Dios ta reina!’ ” (Isa. 52:7).

E bendishon total ta pa esun ku ta papia i pa esun ku ta tende. Ta bon pa papia di e bendishonnan di Dios i di Su mensahe! Malakias ta rekordá nos ku e kombersashon ei ta registrá den un buki den e shelunan: “E ora ei esnan ku tabata teme Señor a papia kada un ku su kompañero; i Señor a skucha i a tende, i un buki di memoria a ser skirbí Su dilanti pa esnan ku ta teme Señor , i pa esnan ku ta pensa riba Su nòmber” (Mal. 3:16).

Nos kurason ta sinti su mes edifiká i fortalesé ora nos ta papia ku otro tokante e Palabra! Esei tabata loke a sosodé ku e disipelnan ku tabata kana riba kaminda pa Emaus kòmbersando ku Hesus i despues a komentá: “Nos kurason no a kima den nos, miéntras E tabata papia ku nos riba kaminda, i ora El a habri e Skrituranan pa nos?” (Lukas 24:32 ).

E práktika di papia riba e Palabra di Dios tambe ta inkluí den e buki di Deuteronomio 6:6–9. Lesa i mi ta retabo pa siña esaki for di kabes.

“I e palabranan akí ku mi ta ordená bo awe, lo ta riba bo kurason; i lo bo ripití nan na bo yunan, i lo bo papia di nan ora bo ta den bo kas, i ora bo ta kana riba kaminda, i ora bo ta bai drumi , i ora bo lanta. I lo bo mara nan komo un señal na bo man, i nan lo ta manera banchi na bo frenta, i lo bo skirbi nan riba e kozeinnan di bo kas, i riba bo portanan.”

Mas nos meditá riba e Palabra, mas kontenido nos lo tin pa nos kombersashon i testimonio.