Meditá bou di guia di Spiritu Santu

Awe nos lo sigui profundisá mas riba e importansia di meditá riba e Palabra di Dios.

Sumishon total na e direkshon di Spiritu Santu

Berdadero meditashon ta impliká un sumishon total di e mente na e dominio di Spiritu Santu.

E bèrdat spiritual, ku nos ta risibí pa medio di eksposishon bíbliko, no ta toka, riba su mes, nos bida di forma profundo. Pa nos por eksperensiá e transformashon deseá, ta nesesario pa e bèrdat ser risibí den profundidat di e alma. Solamente Spiritu Santu ta kapas pa realisá e trabou akí, dunando nos asina e revelashon kompleto di tur bèrdat. Nos mester presentá nos mes dilanti di Dios, konvensí ku nos ta dependé kompletamente di djE pa risibí e alimento spiritual diario.

Pablo ta aklará esei masha bon den 1 Korintionan 2:10–12. “Ma Dios a revelá nan na nos pa medio di e Spiritu; pasobra e Spiritu ta skrudiñá tur kos, asta e kosnan profundo di Dios. Pasobra, ken di hende sa e kosnan di hende, sino e spiritu di hende ku ta den dje? Asina, tampoko ningun hende no a konosé e kosnan di Dios, sino e Spiritu di Dios. I nos no a risibí e spiritu di mundu, sino e Spiritu ku ta bini di Dios, pa nos sa loke Dios a duna nos.”

Pa medio di Spiritu Santu nos ta risibí e bendishon di konosé Dios. Nunka nos mester konfia riba nos mes komprondementu ni riba nos kapasidat intelektual pa komprondé e kosnan spiritual.

Salomon su aktitut, na kuminsamentu di su reinado, ta un ehèmpel di e aktitut ku nos mester adoptá ora nos haña nos mes dilanti di e presensia di Dios. Poko despues di a subi e trono di Israel, Dios a presentá Su mes su dilanti den soñonan i a bis’é: “Pidi loke ku bo ke pa Mi dunabo.” I e kontesta riba e oferta divino maravioso ei tabata: “I awor, o Señor mi Dios, Bo a hasi Bo sirbidó rei na lugá di mi tata David, i mi ta hóben; mi no sa kon pa sali ni kon pa drenta. ... Asina, duna Bo sirbidó un kurason di komprendementu pa huzga Bo pueblo, pa diserní entre bon i malu. Pasobra ken ta kapas pa goberná e pueblo grandi akí di Bo?" (1 Reinan 3:7,9).

Salomon su reakshon natural tabata di obedesé e revelashon divino. Versíkulo 3 ta bisa: “Ma Salomon tabata stima Señor, kanando den e statutonan di su tata David”. E mesun kondishon ta ser eksigí di nos awe pa tur dia nos por risibí e revelashonnan divino huntu ku e programa diario di Dios pa nos bida.

Ademas di ta obediente, Salomon tabatin otro kualidatnan ku ta meresé di ser destaká:

1. E tabata manera un mucha: E tabata dependé totalmente di e Tata selestial. “I mi ta hóben," Salomon a bisa. Dios ta bendishoná i ta revelá su mes na esnan humilde di spiritu. Ta p’esei nos mester tin e humildat i dependensia di un mucha chikitu. Den kaso di Salomon, su sintimentu di dependensia, su konfiansa i sinseridat, a pone ku Dios tabata e figura di mas importante di su bida.
   Hesus a bisa: “... Di bèrdat Mi ta bisa boso, si boso no kambia i bira manera mucha, boso lo no drenta e reino di shelu… (Mat. 18:3,4). Esun ku ta humilde ta rekonosé ku e mester di e aktuashon di Spiritu Santu pa komprondé e revelashonnan di Dios.
2. E tabata rei: E tabatin un responsabilidat. Apesar di sinti su mes manera un mucha, Salomon a rekonosé e posishon den kua Dios a pon’é. “Bo a hasi Bo sirbidó rei.” Mesun kos mester sosodé ku nos. Ora nos ta aserká Dios pa E revelá su mes i Su bèrdatnan, nos mester rekonosé ku, den Su grasia, E ta hasi nos yunan di e Dios bibu, koherederonan ku Kristu i yunan di e Rei. E tin plaser den manifestá su mes na esnan ku ta obedes’E.

E palabra meditá ta bini di un término latin for di kua tambe ta bini e palabra medicalus, ku ta nifiká “medisina, remedi”. I, manera nos sa, un remedi ta benefisiá nos solamente ora nos tum’é e biahanan ku ta preskribí.

Nos mester meditá riba e Palabra di Dios bou di un aktitut di dependensia total riba Spiritu Santu, pa E revelá nos e nifikashon di e bèrdatnan kontené den e inspirashon. E ora ei, pa medio di aseptashon i obediensia na e mensahe ei, asimilá esaki den nos paden.