E Práktika di Meditashon – 1

E tres dianan akí ku ta bini di e trayekto nos ta bai papia tokante e aspektonan práktiko di meditashon bíbliko. Sigui kada dia den e trayekto, Dios ke bendishonábo kada dia manera bo no ta imaginá.

" I nan a yega serka di e pueblito kaminda nan tabata bai, i El a hasi komo si fuera E lo a sigui bai mas leu. I nan a insistí i a bis'E: ‘Keda serka nos, pasobra nochi ta kuminsá sera i dia ta kabando.’ I El a bai paden pa keda serka nan. I a sosodé ku ora E tabata sintá na mesa huntu ku nan, El a kohe e pan, a bendishon'é, a kibr'é i a duna nan. I nan wowo a habri i nan a rekonos'E; pero El a disparsé for di nan bista." ... “I El a bisa nan: ‘Esakinan ta e palabranan ku Mi a papia ku boso miéntras ku Mi tabata serka boso ainda, ku tur kos ku ta pará skirbí tokante di Mi den e Lei di Moises i e Profetanan i e Salmonan mester keda kumplí.’ E ora ei El a habri nan huisio pa nan komprondé e Skrituranan” (Lukas 24:28–31,44,45).

Lesa e pasashi di Beibel skirbí den e paragraf anterior di nobo. Pensa riba e detayenan ku bo no a ripará na e promé lektura. Bo a logra detektá algu den e tèkst ku ta "toka" kualke aspekto di bo bida?

Awor, papia ku Dios den orashon tokante e opservashonnan ku bo tin respekto e tèkst i ku e lèsnan práktiko ku bo por a saka pa bo bida awe.

Komplementando bo konsiderashonnan riba e pasashi, laga nos analisá algun lès ku nos por saka for di e pasashi bíbliko i ku nos mester siña ora nos ta meditá riba e Palabra di Dios.

Promé Aspekto:

Meditá riba e presensia di Señor. Laga nos pensa riba e frase akí: “...sintá ku nan na mesa.”

Kòrda: Ora mi habri Beibel, mi ta poniendo mi mes dilanti di e presensia di Señor, pues e Palabra no ta apartá su mes for di esun ku ta papia. Ora bo ta bai na bo lugá di komunion, durante e promé oranan di dia, Señor ta bai ku bo i ta bai sinta banda di bo òf bo dilanti pa kòmbersá i skuchabo. Esaki ta e promé rekisito pa práktika produktivo di meditashon.

Esei ta un momentu solèm, den kua e kriatura i e Dios Kreador i Redentor ta huntu den komunion. Na e momentu ei, Spiritu Santu ta dirigí i orientá e kreyente su mente pa, pa medio di orashon i estudio di Beibel, e por konosé e boluntat di Dios pa e dia ei.

Semper ku nos ta dispuesto pa ta kunE, E lo ta dispuesto pa ta ku nos. P’esei, e meditashon mester kuminsá ku e aktitut di warda riba Señor, habriendo e kurason i mente pa Spiritu Santu ku ta dirigí nos den Su direkshon i den direkshon di e Palabra.

Esei ta e momentu di mi enkuentro ku Dios, i nada mester interferí den e momentu sagrado ei. Mi alma tin mester di djE diariamente pa mi tin bida. Mi mester ta den sombra di e Tata. Salomon a skirbi lo siguiente: “… Bou di e sombra di esun deseá mi a sinta, i su fruta tabata dushi na mi smak” (Kantika di Salomon 2:3).

Banda di e Tata nos por kòmbersá, lesa e lès di Sabat Skol, lesa algun tèkst, kanta un himno di adorashon, òf simplemente keda den Su presensia den silensio.

"Tin solamente un poder ku por kita kurason di hende for di e imperio di maldat: E poder di Dios den Kristu Hesus. Solamente pa medio di e sanger di Esun krusifiká nos por purifiká nos mes. Solamente Su grasia por hasi nos kapas pa resistí e tendensianan di un naturalesa kaí i someté nan.” ( El Evangelismo, p. 437)

Ta importante pa kòrda ku, pa meditá riba e Palabra di Dios, no ta eksistí un fórmula kla ku ta adaptá su mes na kada persona. Loke realmente ta importá ta e disposishon ku un hende tin pa konosé e boluntat di e Tata. Spiritu Santu ta bai proveé e manera ideal pa kada persona por konosé Dios.

Den e trayekto di awe i e dos dianan ku ta bin nos ta dunando solamente algun sugerensia. Si nan ta fasilitá bo komunion, usa nan; si esei no ta e kaso, pidi Spiritu Santu pa mustrabo e modelo ku mas ta identifiká su mes ku bo.