E Práktika di Meditashon – 3

"Den estudio diario, e método ku ta konsistí di saminá un versíkulo tras di otro hopi bia ta masha útil. Laga e studiante kohe un versíkulo, konsentrá su mente pa deskubrí e pensamentu ku Dios a hinka den dje p'e einan, i despues meditá riba dje te ora e hasié di dje. Un pasashi studiá di e forma ei, te ora bo komprondé su nifikashon, ta di mas balor ku lesamentu di hopi kapítulo sin propósito definí i sin haña berdadero instrukshon … Ku e fluho inmenso di material imprimí ku ta sali konstantemente for di imprentanan, tantu adulto- komo hóbennan ta atkerí e kustumber di lesa di forma purá i superfisial, i nan mente ta pèrdè e abilidat di elaborá pensamentunan vigoroso i kordiná”. (La Educación, p. 189,190)

Bo por hasi e práktika akí ora bo ta studia Beibel atraves di e plan Rebibá pa Su Palabra òf ku estudio di e lès di Sabat Skol.

Awe nos ta bai praktiká skohiendo un kapítulo di Beibel i les’é kompletamente, pa nos por haña sa su kontenido. Despues nos ta bai selektá dos òf tres versíkulo i meditá riba nan.

Nos ta bai skohe 2 Krónikanan 20. Lesa e kapítulo kompletu pa haña sa su kontenido. Si bo ke hasi un eksaminashon mas profundo, kuminsá lesa kapítulo 17.

Persibí ku Josafat a prepará pa guera den tempu di pas, el a organisá un ehérsito, a restourá e saserdosio, a establesé un bon sistema di komunikashon, a nombra huesnan i a establesé ku nan ta husga segun e boluntat di Dios. Pa konkluí, Josafat a konstruí su base den tempu di prosperidat; i, ora krísis a yega na su porta, el a manehá denter di e vishon di Señor.

Krísisnan ta bai i bin pa wak ken ta ken. Bon, laga nos selektá tres versíkulo pa meditá riba dje (versíkulo 6,9 i 12). "I el a bisa: ‘Señor Dios di nos tatanan, no ta abo ta Dios den e shelunan, i Bo tin dominio riba tur e reinonan di e nashonnan? No tin asina un forsa i poder den Bo man, ku no tin ningun hende ku por resistí?’ " (2 Kron. 20:6)

Nos ta siña ku nos mester kohe un versíkulo, konsentrá nos pensamentu, esta, meditá ku e meta di deskubrí e pensamentu ku Dios a pone einan, i despues para ketu i meditá riba dje te ora e bira e mensahe di Dios pa nos.

Un bon manera pa kuminsá ta di hasi e tèkst algun pregunta. Pues, nos por puntra 2 Krónikanan 20:6: "Ken ta e Señor di e shelunan i di tera? Ken ta e gran gobernante universal? Den man di ken tur forsa i poder ta? Si E aktua, ken lo por strob’E?"

Konsentrá tur bo sintimentunan pa deskubrí e boluntat di Dios. Eliminá tur e impreshonnan ku ta bin di bo mes, di otro hende òf di kualke otro orígen, i someté nan na e direkshon total di Spiritu Santu, pa komprondé e programa ku Dios tin pa bo bida awe, transmití pa medio di 2 Krónikanan 20:6.

“Por haña berdadero konosementu di Beibel solamente pa medio di yudansa di e Spiritu ku a duna e Palabra” (La Educación, p. 189).

Awor hasi e mesun prosedimentu ku versíkulonan 9 i 12. Versíkulo 9: “Si maldat bini riba nos, spada, kastigu, pèst òf hamber, nos lo presentá nos mes dilanti di e kas akí, i Bo dilanti (pasobra bo nòmber ta riba e kas akí), i pa motibu di nos tribulashonnan nos lo sklama na Bo, i lo Bo tende nos i lo salba nos.”

Laga nos interaktuá ku e versíkulo. Ki preguntanan nos mester hasi pa deskubrí loke Dios ke bisa nos? Na ken mi mester sklama ora mi ta desesperá? Dios lo tendemi? Ki siguransa mi tin ku E lo librami? Awor, hasi otro preguntanan na e versíkulo, ripitiendo e mesun proseso di versíkulo 6. Permití Dios dunabo e kontestanan. Purba skucha e bos di Señor.

Versíkulo 12: "O nos Dios, lo Bo no husga nan? Pasobra no tin forsa den nos kontra un multitut asina grandi ku ta bin kontra nos; nos no sa kiko hasi, i na Bo nos ta bira nos bista."

Awor, traha e preguntanan bo mes i kuminsá interaktuá. Skucha e kontesta ku Dios ta dunabo personalmente.

Bo a ripará ku e estudio di Beibel tabata mas personal, atraktivo i poderoso? Bo a komprobá ku ta fásil pa tende e bos di Dios klaramente, revelando Su boluntat na bo? Pone e prinsipionan aki den práktika diariamente.