Formashon Spiritual

Formashon spiritual ta un proseso ku ta impliká un relashon diario ku Dios durante henter nos eksistensia. Den nos trayekto di awe, nos ta bai konosé e elementonan klave di formashon spiritual i e formanannan pa medio di kua nos por mehorá nos vishon di Dios kada dia.

Formashon spiritual, òf disipulado, ta e moveshon di henter e bida den direkshon di Dios. E ta nifiká habri kada área di bida na un relashon será ku Dios, permitiendo pa hasi Su boluntat. Ta eksistí kuater elemento klave pa formashon spiritual:

1. Vishon: E vishon ta ser formá for di e enkuentro personal ku Dios den e promé oranan di kada dia. E ta impliká e búskeda di konosementu i kompromiso ku e boluntat di Dios pa bida durante e dia ei. Tambe e ta inkluí komprondé kiko E ke hasi den nos i pa medio di nos.
2. Evangelio: Aseptá loke Kristu a hasi i ta hasi pa nos. E ta inkluí: Su aplikashon den tur nos relashonnan i e idea di kompromiso ku predikashon den tur loke nos ta hasi diariamente. Pablo a bisa: “Mi a hasi mi mes débil pa e débilnan, pa gana e débilnan; mi a hasi mi mes tur kos pa tur hende pa, di tur manera, mi salba algun. I esaki mi ta hasi pa kousa di e evangelio, pa bira kopartisipante di dje” (1 Kor. 9:22,23).
3. Supremasia: E ta simbolisá e idea di ku mi ta e klei i Dios ta e alfarero (Jer. 18:4). Rekonosé e supremasia di Kristu ta nifiká someté tur loke nos ta, nos tin i nos ta hasi na e direkshon i kontrol di Dios. Esaki ta un asuntu diario, di tal manera ku nos kurason por eksperensiá, den kada relashon òf den kualke kos ku e hasi, e sensashon ei di sumishon i entrega kontinuo di tur kos na e kontrol di Kristu.
4. Presensia: Nos mester kuminsá e dia dilanti di e presensia di Dios i sali kunE pa kumpli ku nos debernan. Nos tin ku kustumbrá nos mes pa biba kontinuamente den Su presensia durante kada momentu di bida i den tur loke nos ta hasi. "Bo a lagami konosé e kamindanan di bida; lo Bo yenami ku goso ku Bo presensia" (Echonan 2:28).

E úniko manera di kibra e dominio di maldat i kombertí mi mes den un kristian invensibel ta pa mantené mi mes den presensia di Kristu. "No tin nada aparentemente asina débil, i no opstante asina invensibel, manera e alma ku ta sinti su insignifikansia i ta konfia kompletamente den e méritonan di e Salbador. Pa medio di orashon, estudio di Su Palabra, i e kerensia ku Su presensia ta biba den e kurason, e ser humano di mas débil por vinkulá su mes ku e Kristu bibu, ku lo tene su man i nunka lo lag’é bai” (El Ministerio de Curación, p. 136,137).

Ora e kuater elementonan ta integrá, nos tin union kompleto, i nos unidat ku Kristu ta krese i ta desaroyá su mes. E enfoke di e union òf unidat akí ta konsentrá su mes semper riba e Krus, e revelashon mas kompleto di Dios.

Aplikashonnan Práktiko

1. Hasi orashon pa Spiritu Santu mustrabo loke E ke pa bo hasi.
2. Puntra bo mes: Ki diferensia Hesu-Kristu ta produsí den mi bida diario? Den ki forma e presensia visibel di Hesus lo marka un gran diferensia den e desishonnan ku mi mester tuma awe?
3. Ku Kristu ta e prioridat den tur e desishonnan ku bo ta tuma.

KORDA: Formashon spiritual, òf disipulado, ta e moveshon di henter e bida den direkshon di Dios. E ta nifiká habri kada área di bida pa un relashon será ku Dios, permitiendo E hasi Su boluntat.

Adaptá di e seminario "Fundamentos Bíblicos de Mayordomía Cristiana", desaroyá dor di pastor Benjamín C. Maxson.