E Rais di Nos Problemanan

E Palabra di Dios ta mustra tres diferente grupo di hende pa loke ta trata nan relashon personal ku Dios:

• No tin relashon: Beibel ta referí na esaki komo e hende natural.
• Relashon pleno i real: Beibel ta referí na esaki komo un persona spiritual.
• Relashon dividí òf fingi: Beibel ta deskribí e persona akí komo un persona karnal.

E términonan “natural”, “spiritual” òf “karnal” den e Palabra di Dios ta deskribí e hende su relashon personal ku Dios. E tres gruponan akí ta ser deskribí den 1 Korintionan 2:14–16 i 1 Korintionan 3:1–4 (lesa e tèkstnan bíbliko akí kuidadosamente).

Den e trayekto di awe i mañan bo mester analisá i realisá na kua grupo bo ta pertenesé. E opservashon akí lo yudabo hasi un outodiagnóstiko. Purba wak bo mes bida i no esun di otronan.

Kua ta e kriterio ku ta definí na kua grupo un hende ta pertenesé?
E faktor determinante den tur tres grupo ta e relashon ku bo tin ku Spiritu Santu.

E hende natural: Ta biba e momentu, e no ta preokupá pa su relashon ku Dios. "Ma e hende natural no ta komprondé e kosnan ku ta di e Spiritu di Dios, pasobra nan ta lokura p'e; i e no por komprondé nan, pasobra nan mester ser diserní spiritualmente" (1 Kor. 2:14). E hende natural no tin niun relashon ku Spiritu Santu. E ta biba su mes bida i no ta interesá pa sa tokante Dios, òf e ta interes’é masha poko.

E hende spiritual i e hende karnal: Nan ta denter di Iglesia.
E dos gruponan aki ta ser presentá na nos den 1 Korintionan 2 i 3, i tambe den Romanonan 8:1–17 i Galationan 5 i 6. Nos mester tuma nota ku e kriterio pa e dos gruponan akí ta nan relashon ku Spiritu Santu. “Esaki ta pasobra Dios a stipulá ku Spiritu Santu ta nos úniko konekshon ku shelu.” (El Deseado de todas las gentes, p. 289)

“E kurason mester ta habrí pa e influensia di Spiritu Santu; di otro manera, e no por risibí e bendishonnan di Dios.” (El Camino a Cristo, p. 95)

E persona spiritual ta e kristian berdadero. E ta ser yamá “spiritual” pasobra e ta yen di Spiritu Santu. Hesus ta e “sentro di su bida” òf, manera nos ta bisa tin biaha, Hesus ta sintá riba e trono di su kurason.

E persona spiritual a entregá su mes realmente i kompletamente na Hesus, i pa regla general esaki ta ser konfirmá diariamente ora e entregá su mes tur mainta ku tur loke e ta i tur loke e tin. Den e mensahe pa Laodisea e ta ser denominá “kayente”, i den e parabel di e 10 bírgennan ta yam’é “prudente”. E ta biba un bida “na abundansia” (Juan 10:10) òf, manera Pablo ta ekspres’é: “yen di tur e plenitut di Dios.” (Efe. 3:19, Kol. 2:9)

Un persona por ta un miembro di iglesia pa tiki tempu òf pa hopi aña i sigui ta un kristian karnal. Si, pa bo sorpresa, bo deskubrí ku tin momentunan ku bo ta un kristian karnal, no aflihí bo mes; al kontrario, alegrá bo mes, pasobra bo tin e posibilidat di kambia bo estado inmediatamente. Mi ta konvensí di ku mayoria kristian karnal ta den e kondishon akí sin sa i nan tin deseo pa eksperimentá mas den nan fe. Hopi biaha nan ignoransia no ta nan mes falta. Konsiderá esaki: lo bo eksperensiá gran goso atraves di un bida ku Kristu den bo kurason atraves di Spiritu Santu (Juan 15:11, pa "boso goso por ta kompleto"). Atraves di e kambio akí lo bo por, stap pa stap, eksperensiá un bida na abundansia (Juan 10:10), i bo speransa den bida eterno lo tin un fundeshi sigur.

Orashon: Tata Selestial, por fabor, yudami realisá mesora si mi ta un kristian karnal. Yudámi pa ta dispuesto pa hasi tur loke Bo ke pa mi hasi. Por fabor, guiami pa hiba un bida kristian felis na bida abundante i bida eterno. Por fabor, renobá mi kurason. Danki pa kontestá mi orashon. Amèn.

Mañan den nos trayekto nos lo amplia mas riba e tópiko akí i kiko nos por hasi si nos ta den e grupo di kristiannan karnal.