Kristian Karnal

Laga nos lesa kiko apòstel Pablo ta bisa e miembronan di iglesia karnal den 1 Korintionan 3:1–4 (les’é dos pa tres biaha).

Aki nos por mira klaramente ku e kriterio ku ta definí na kua grupo un hende ta pertenesé ta e relashon personal ku e tin ku Spiritu Santu! Den e poko versíkulonan akí apòstel Pablo ta menshoná tres biaha ku e miembronan di e iglesia di Korinto ta karnal. Kiko esaki ta nifiká? E ta nifiká ku un hende ta biba pa medio di e poder di e karni; ku otro palabra, di e forsa i e abilidatnan normal ku e persona ta poseé.

Algun hende ta pensa ku e grupo akí ta konsistí solamente di hendenan ku ta biba abiertamente den piká. Pero esaki ta djis un di e hopi variashonnan ku ta eksistí denter di e grupo akí. Mi ke enfatisá atrobe ku tin hopi diferensia denter di kada un di e gruponan akí.

Esaki ta mustra ku e tabata tratando ku miembronan di iglesia. Pablo no por a papia ku nan “manera ku hende spiritual”. Esei ta nifiká ku nan no tabata yen di Spiritu Santu òf no tabata sufisientemente yen di e Spiritu. E mester a papia ku nan komo “muchanan chikitu den Kristu”. Nan no a krese den fe manera nan lo mester a krese. Un hende por tin gran konosementu di Beibel i tòg no krese spiritualmente. Kresementu spiritual ta dependé di nos entrega kompletu na Hesus i di biba konstantemente den Spiritu Santu.

Hopi kristian karnal ta mal kontentu; nan ta sinti nan mes desanimá, sin propósito, òf nan ta den difikultat den nan bida spiritual. Otro kristiannan karnal por ta entusiasmá. Nan ta kontentu di konosé e bèrdat bíbliko. E miembronan di iglesia karnal por ta miembronan aktivo i tin posishonnan di liderazgo den e iglesia lokal òf den e atministrashon di iglesia. Nan por ta asta hasi hopi pa Dios.

Mateo 7:22,23 ta bisa: "Hopi lo bisaMi riba e dia ei: Señor, Señor, nos no a profetisá den Bo nòmber, i den Bo nòmber nos a saka demoño, i den Bo nòmber nos a hasi hopi milager? E ora ei lo Mi deklará na nan: “Nunka Mi a konosé boso. Bai for di Mi, hasidónan di maldat!”

Hesus ta bisa nan ku E no konosé nan. Nan no tabatin un berdadero relashon ku Kristu sino unu fingí. Sea no tabatin un berdadero kompromiso òf kisas nan no a mantené e kompromiso inisial. Hesus no tabata biba den nan kurason pa medio di Spiritu Santu, pues, no tabatin un relashon personal ku Kristu. "Por tin un relashon aparente ku Kristu..." Kon nos por sa si Kristu ta den nos? Promé ku mi menshoná nan, mi ke indiká ku nos por ta liber di e siguiente kosnan si nos biba un bida den komunion ku Spiritu Santu:

"Un spiritu kontrali na e Spiritu di Kristu lo neng’E, sea kual sea e profeshon di fe. Hende por nenga Kristu dor di kalumniá, papia di forma bobo, i pronunsiá palabranan falsu òf ofensivo. Nan por neng’E dor di evitá e karganan di bida, buskando plaser pekaminoso. Nan por neng’E dor di konformá nan mes ku mundu, sigui komportashon insolente, stima nan mes opinionnan, hustifiká e ami, tesorá dudanan, buska difikultatnan, i biba den skuridat. Di tur e maneranan akí, nan ta deklará ku Kristu no ta den nan”. (El Deseado de todas las gentes, p. 324)

Den e parabel di e 10 bírgennan (Mat. 25:1–13) nos por mira klaramente e dos tiponan akí di miembronan di iglesia karnal i spiritual. Esnan ku tin sufisiente zeta i esnan ku nan zeta a kaba promé ku e brùidehòm yega.

E tragedia di mas grandi pa e kristian karnal ta ku e lo no risibí bida eterno si su kondishon no kambia. “I si un hende no tin e Spiritu di Kristu, e no ta di djE”. (Romanonan 8:9)

Resumiendo: E diferensia prinsipal entre un miembro di iglesia spiritual i unu karnal tin di aber ku Spiritu Santu. E kristian spiritual ta yen di Spiritu Santu. E kristian karnal no ta yen di djE òf no ta sufisiente yen. Si bo deskubrí ku bo ta un kristian karnal, no preokupá bo mes. Dios ta ofresébo un remedi: Spiritu Santu.