Diesmo i Spiritualidat

Ora mi debolbé diesmo, mi ta hasiendo un akto di adorashon na Dios? Nos por komprondé diesmo di tal forma ku e ta yuda nos den nos kaminata ku Dios?

E storia di Abram i Melkisedèk (Gén. 14:20) ta e promé referensia bíbliko na diesmo. E di dos ehèmpel ta aparesé ora Jacob ta asumí e kompromiso pa debolbé e diesmo komo kontesta riba e bendishonnan di Dios (Gen. 28:22). Ningun di e ehèmpelnan ei ta e kontesta riba un òrdu nobo di Dios. E ta simplemente kontinuidat di e estilo normal di adorashon ku nan ta praktiká. Pa medio di diesmo, e hòmbernan ei a rekonosé e man di Dios den e aspekto material di nan bida. Nan no tabata sosteniendo e iglesia; no tabata eksistí iglesia. Nan tabata simplemente adorando Dios.

Despues, ora Dios a duna Israel instrukshon direkto tokante diesmo, el a ser rekordá atrobe den konteksto di adorashon. Nan mester a ofresé nan diesmo i ofrenda den e Santuario, ya ku e tabata e lugá di biba di e nòmber di Dios (Deut. 12:5,6,11). Dios tabata risibí e diesmo i tabata us’é pa sostené e ministerio di santuario ku e saserdote- i levitanan tabata realisá.

Ora nos ta sigui studia e registro bíbliko, nos ta topa e diesmo relashoná ku e yamada pa reavivamentu (2 Kron. 31; Neh. 12,13; Mal. 3). E berdadero motibu semper ta e kulto; e ta e manera ku nos ta rekonosé nos relashon ku Dios komo nos Propietario i Redentor. Esaki ta hiba nos na kòrda lo siguiente: “Un hende por duna diesmo i no ta yen di e Spiritu; sinembargo, un hende no por ta yen di e Spiritu i no ta un dunadó”.

Sinembargo, un di e motibunan mas importante pa komprondé e propósito di Dios pa e diesmo nos ta haña registrá den Mateo 6:25–34. Den e versíkulonan akí, Hesus ta pone plaka i poseshonnan material den kompetensia direkto ku Dios. E ta konfrontá nos ku e siguiente eskoho:

Ken nos lo sirbi? i kon nos lo sirbi? Ta interesante pa nota ku e konteksto ta papia di e nesesidatnan básiko di bida, no di luho. Bida enfoká riba provishon di e nesesidatnan di kuminda i paña ta ser identifiká komo pagano. En bes di e enfoke akí, Hesus ta duna nos e siguiente desafio: “Ma buska promé e reino di Dios i Su hustisia, i tur e kosnan akí lo ser añadí na boso” (Mat. 6:33).

Apesar di ku esei no ta aparesé den e konteksto inmediato di Mateo 6, diesmo ta un di e hèrmèntnan prinsipal di Dios den nos “trayekto komo disipelnan”, ya ku e ta yuda nos konsentrá nos mes riba djE miéntras nos ta trata ku e mundu material.

Nos ta rekonos’E komo e Doño di tur loke nos tin den nos man. Nos ta atmití ku nos ta mayordomonan (atministradónan). P’esei, nos tin ku analisá algun manera ku ta yuda nos mehorá nos adorashon dor di debolbé diesmo. Ta eksistí hopi kos ku nos por hasi pa mehorá nos aktitut di adorashon:

Paso 1: Aseptá Dios komo Kreador. Komo Kreador, E ta pèrkurá pa tur nos nesesidatnan. Den e sentido akí, diesmo ta un hèrmènt ku ta yuda nos kambia nos prioridatnan.

Paso 2: Someté nos dominio i aseptá Su dominio. Dor di duna bèk, nos ta rekonosé ku tur loke nos tin den nos man ta pertenesé na Dios. Nos ta simplemente atministradónan.

Paso 3: Rekonosé e kuido, e guia i e amor di Dios. Promé ku nos debolbé e diesmo, ya El a hasi provishon pa atendé ku tur nos nesesidatnan diario.

Paso 4: Aseptá ku nos mester ta santu dilanti di Dios (lesa Lev. 20:26). Dor di debolbé e diesmo, nos por rekonosé ku nos ta pertenesé totalmente na djE. Di e manera akí nos diesmo ta bira un konfeshon di ku nos ta “separá” tambe pa Dios.

Paso 5: Rekonsagrá nos bida na Dios. Ora nos aseptá e diesmo komo algu santu, ku ta pertenesé na Dios, e diesmo ta bira e oportunidat ku nos tin pa bolbe konsagrá nos mes totalmente na djE kada bes ku nos debolb’é.

Riba un di e islanan di Sur Pasífiko, un mucha hòmber di 13 aña a demostrá e aktitut di adorashon akí: El a trese un piská grandi ku el a kohe i a bisa e ansiano di su iglesia ku esei tabata su diesmo. Despues el a puntr’é kon e mester a sigui ku e piská. E ansiano a splik’é loke e mester a hasi i a felisit’é ku el a kohe dies piská. E mucha a kontestá: “Ainda no! Esaki tabata e promé ku mi a kohe. E otronan ta den laman ainda, i mi ta bai piska nan awor.”

Diesmo ta e rekonosementu tangibel di nos relashon kresiente ku Señor. Awe bo a siña ku ora bo debolbé e diesmo bo ta aseptando Dios komo e kreador di tur kos, i na mes momentu e ta resultado di bo reavivamentu spiritual i adorashon na djE.