Ora e Pueblo di Dios Hasi Orashon

Algun tempu pasá, sierto klero a purba di konsolá un muhé ku su kasá a bandoná e stat durante un krusada di reavivamentu. E tabata un agnóstiko amargá, i a bisa ku e lo no a regresá te ora “ku e boroto religioso ei” a kaba.

E esposa a spera ku su kasá finalmente lo a kombertí komo konsekuensia di e reavivamentu, pero awor e tabata mira masha poko posibilidat ku esei lo a sosodé.

Sinembargo, e pastor a invitá e señora pa asistí na un grupo di orashon di mainta ku e tabata dirigí. El a seka su lágrimanan i a disidí di asistí. E grupo di orashon mesora a bai di akuerdo pa hasi orashon pa e hòmber ku a bai. Nan a aseptá e desafio ku hopi entusiasmo, pidiendo Dios pa alkansá e esposo tèrko, tres’é bèk, i hib’é na Kristu. Nan a presentá e hòmber akí, na nòmber, dilanti di Señor.

E mesun anochi ei, el a sorprendé tur hende ora el a aparesé na e reunion di reavivamentu. E tabatin un storia pa konta. El a bisa ku el a kore su outo masoménos 35 kilometer den direkshon di e serunan, ora el a para diripiente. E no por a sigui. E tabata sa ku el a hasi kos robes i a sinti ku e tabata un pekador ku tabatin mester di e grasia di Dios. Un konvikshon profundo a yen’é di ku e mester a regresá.

Despues el a bisa e kongregashon: Awor mi sa ku mi mester nase di nobo sino nunka lo mi por mira e Reino di shelu. E hòmber akí, ku a ser reskatá na un manera inkreibel, a tuma su lugá meimei di e kongregashon. E tabata yora pisá. E mesun anochi ei el a aseptá Kristu komo su Señor i Salbador.

Orashon di interseshon ta produsí un diferensia. Orashon di interseshon ta kambia kos. I esaki ta e motibu: Den e konflikto entre bon i malu, Dios ta balorá libertat humano. E por alkansá kada persona hopi promé ku nos hasi orashon pa nan. No opstante, Dios ta limitá pa motibu di nos eskohonan. Nunka E lo violá niun hende su libertat di eskoho. E tin un límite. E ta influensiá, pero nunka ta obligá. E ta konvensé, pero nunka ta fòrsa niun hende. E ta guia, pero no ta imponé.

Ora nos hasi orashon pa otro hende, Dios ta drama su Spiritu atraves di nos pa alkans’é. Orashon di interseshon ta habri kamindanan nobo pa Dios obra. E ta duna Dios un otro oportunidat.

E mensahero di Señor ta bis’é korektamente: “E ta forma parti di e plan di Dios pa otorgá nos, komo kontesta riba orashon hasí ku fe, loke E lo no a duna nos si nos no a pidiE asin’akí” (El Conflicto de los Siglos, p. 580).

Ora hende hasi orashon, algu ta sosodé. Gruponan di orashon tin un poder inusual pa medio di esun Todopoderoso.

Dos òf tres persona ku ta hasi orashon fervientemente ta produsí un diferensia. Dios ta skucha, Dios ta respondé, Dios ta aktua, Dios ta toka bidanan. Bo tin un kompañero di orashon? Bo ta reuní regularmente den gruponan di orashon chikitu? Dikon no kuminsá un ministerio di interseshon den bo mes bida? Si bo ta un intersesor kaba, dikon no stimulá otro hendenan pa uni ku bo pa intersedé? Buska un persona pa hasi orashon ku bo, traha un lista di orashon, i wak loke Dios ta hasi. Lo bo keda asombrá!

Tur dia, e Tata Selestial ke siña nos kon biba korektamente, pa nos por kumpli ku e propósito pa kua nos a ser kreá. Skucha loke E ta bisa: "Mi yu, no lubidá Mi lei, i laga bo kurason warda Mi mandamentunan; pasobra largura di dianan i añanan di bida i pas lo oumentá pa bo". (Prov. 3:1, 2)