E poder di orashon di interseshon

Ora nos ta intersedé pa otronan, nos ta uni nos mes ku Hesus den Su obra poderoso di interseshon.

Hesus ta e úniko intersesor hustu. E ta e petishonario Todopoderoso. Isaias, e profeta, ta deskribí e ministerio di e Salbador asina. “... I el a ser kontá huntu ku e pekadornan, ya ku El a karga e piká di hopi hende, i a hasi orashon pa e transgresornan” (Isa. 53:12). E buki di Hebreonan ta añadí: “… bibando semper pa intersedé pa nan” (Hebr. 7:25). Nos ta konstantemente den Su amor infinito. Kada momentu E ta intersedé pa nos. Nos mente no ta logra kapta e dimenshon di e amor atmirabel ei, pero no ta p’esei e ta laga di ta berdadero.

At’akí e forma den kua bo por kuminsá awe pa uni bo mes ku Hesus den Su ministerio di interseshon:

1. Tin un tempu spesífiko pa hasi orashon.
   Separá periodonan spesífiko pa orashon di interseshon so. E evangelio di Marko ta registrá: “El a lanta mainta trempan, miéntras tabata hopi skur ainda, El a sali bai un lugá solitario, i einan E tabata hasi orashon” (Marko 1:35).
   
   A ménos ku nos tin un orario spesífiko pa interseshon, e okupashonnan di bida por tuma tur nos tempu. E ritmo intrankil di bida, den e dianan aktual, generalmente ta silensiá e bos suave di Spiritu Santu.
   
   Tin un lugá privá pa ta bo so ku Dios. E por ta un sala den bo kas, un lèsenar, un kuartu di studia òf un kamber di drumi. E por ta un lugá den aire liber, meimei di naturalesa: un parke, un mondi, un kunuku òf kualke lugá kaminda bo por ta bo so den kietut. E kos di mas importante ta ku bo ta bo so ku Hesus.
2. Hasi un interseshon spesífiko.
   Hesus a intersedé pa hendenan spesífiko den Su orashonnan. E Salbador a animá Pedro ku e palabranan aki: “… Ma mi a roga pa bo, pa bo fe no faya” (Lukas 22:32). Hesus a hasi orashon spesífikamente pa Pedro. El a menshoná su nòmber dilanti di e Tata. Ki goso Pedro lo mester a sinti sabiendo ku Hesus tabata hasi orashon personalmente p’e. Beibel ta stimulá nos pa hasi orashon pa otro, un pa un.
3. Tin un lista di orashon.
   Traha un lista. Skirbi nòmber di algun hende i kuminsá buska Dios diariamente, i hasi orashon pa nan.
4. Hasi orashon na bos haltu.
   Frekuentemente, e orashonnan di interseshon di Hesus tabata ser hasí na bos haltu. Un estudio kuidadoso di Hesus su bida di orashon ta revelá e echo sorprendente akí.

Ora e disipelnan a aserk’E, segun Lukas 11, nan a tende Su orashonnan poderoso, i nan a keda konmoví di paden. Ora E tabata intersedé pa e mundu akí na Getsémani, algun ora promé ku Su krusifikashon, El a kai tres biaha riba su kara, bisando: “... Pero no manera Ami ke, sino manera Abo ke” (Mat. 26:39).

Ora nos hasi orashon na bos haltu, e ehérsitonan di Satanas ta tembla i hui. Satanas no por soportá e zonido di súplikanan fervoroso ku ta subi bai na e trono di Dios. Orashon na bos haltu ta duna un sentido mas ophetivo na nos pensamentunan i ta hasi nos petishonnan mas definí. P’esei, e eskritor kristian Ellen White ta bisa nos: “Siña hasi orashon na bos haltu, ora solamente Dios por tende boso” (Nuestra Elevada Vocación, p. 132).

Aunke nos tin un lugá pa orashon silensioso, nos Señor ta invitá nos pa uni na Su interseshon ferviente, hasiendo orashon na bos haltu, halsando nos petishonnan na djE den orashon. Lo bo ke ta un intersesor poderoso? Lo bo ke elevá bo mes na halturanan nobo den e eksperensia kristian? Lo bo ke desaroyá un komunion mas profundo i personal ku Hesus?