Kon Hiba Hende na Hesus

Ora mi tabata direktor di hóben, mi a purba siña e hubentut kon biba den spiritu di orashon i kon studia Beibel diariamente. Despues di un siman di instrukshon intenso, e hóbennan a keda asombrá, nan a emoshoná i “a disidí” ku nan bida lo a kambia desde e dia ei. No tabata falta promesanan i deklarashonnan públiko di amor pa Kristu. Tabata algu ekstraordinario i konmovedor pa mira.

Mi tabata kontentu pa bai bishitá hóbennan di otro iglesianan i, ora mi a regresá despues di tres òf kuater luna, mi a mira ku tristesa ku tur kos a bira bèk manera e tabata ántes.

Mi no tabata komprondé kiko tabata e problema. Algun kompañero a bisami ku mi tabata traha solamente ku e emoshonnan di e hóbennan, otronan a referí na e mensahe di hustifikashon pa medio di fe ku mi tabata prediká. E evangelio ei ta “awa ku suku”, nan a bisami, i realmente mi no tabata sa kiko hasi, i mi a reflekshoná mi so, puntrando Dios kiko tabata pasando.

Sierto dia, na kas, mi esposa tabata preparando kompota di peach. Tabata temporada di e fruta ei i peach tabata barata, asina ta ku nos a kumpra un kaha i el a prepará e kompotanan pa warda nan, pa asina e por a dura nos bastante tempu.

Miéntras e tabata pone e peachnan den e bòternan mi a nota ku, promé ku el a sera nan hermétikamente, el a pone un elemento blanku riba kada un di nan. E ora ei mi a puntr’é:

"Kiko e kos ku bo ta poniendo riba dje ei ta?" El a wak mi intrigá i a kontestá. "Kiko bo ke men ku mi ta poniendo riba dje? E preservativo." "I pa kiko esei ta?" "Pa asina e peachnan keda konservá. Si mi no pon’é, den poko tempu nan lo ta putrí."

Na e momentu ei un idea a bria den mi mente. Mi mester a deskubrí e preservativo spiritual, pa e determinashon di e hóbennan, di studia Beibel i hasi orashon, no flakia ku tempu.

Awor mi ta komprondé dikon e sirbidó di Dios ta bisa: "Mester hasi trabou bon organisá den iglesia, pa su miembronan sa kon impartí e lus na otronan, i asina fortalesé nan mes fe i oumentá nan konosementu. Miéntras nan ta impartí e loke nan a risibí di Dios, nan lo ser konfirmá den fe. Un iglesia ku ta traha ta un iglesia bibu." (Joyas de los Testimonios 3, p. 68)

E problema ta ku hopi kristian sinsero ta pensa ku trese hende na Kristu ta nifiká solamente duna estudio bíbliko, bati na porta di hende deskonosí, òf dirigí serinan di evangelismo. Komo ku nan no ta sinti nan mes kapasitá pa e aktividatnan ei, nan ta desanimá, biba den un estado permanente di kulpabilidat i no ta felis. Pero trese hende pa Kristu ta un aventura fasinante, yen di emoshon i eksperensianan inolvidabel.

Skohe e persona ku bo ta deseá di trese pa Hesus i kuminsá hasi orashon p’é tur dia. No kansa di hasié. Dos kos lo sosodé: na mes momentu ku e Spiritu ta bai obrando den kurason di e persona, abo lo bai kresiendo den bo eksperensia spiritual. Orashon ta mantenébo den komunion ku Hesus.

Ke tal si den nan tempu tabata eksistí mentenan sekularisá? Naturalmente ku sí. Yama inkredulidat manera bo ke. Mentenan será pa e evangelio a eksistí semper. Esei no ta patrimonio di nos dianan. Den Su tempu, Hesus a bisa: “P’esei mi ta papia ku nan den parabel; pasobra mirando nan no ta mira, i tendiendo nan no ta tende ni komprondé. Asina e profesia di Isaías ta kumpli den nan, ku a bisa: Ku orea boso lo tende, i boso lo no komprondé, i mirando boso lo mira, i lo bo no ripará. Pasobra kurason di e pueblo akí a hincha, i ku nan orea nan ta tende pisá, i nan a sera nan wowo; pa nan no mira ku nan wowo, i tende ku nan orea, i ku nan kurason nan komprondé, i nan kombertí, i Mi kura nan” (Mateo 13:13-15) E hòmbernan ei no tabatin mente i kurason duru? Pero Señor tabatin éksito den Su mishon di evangelisashon. Dikon? Pasobra E tabata aserká hende di tal manera ku niun hende por a resistí.

Kon Hesus a hasié? Laga nos wak loke spiritu di profesia ta bisa: "Solamente e método di Kristu lo ta esun ku lo duna éksito pa yega serka e hendenan. E Salbador tabata trata ku hende komo un ku ker a hasi nan bon. E tabata mustra nan simpatia, tabata atendé nan nesesidatnan i E tabata gana nan konfiansa. Despues E tabata bisa nan: “SiguiMi” (Ministerio de curación, p. 102).