Lès 3

E Rei ku ta Bini

Atalía, e reina sin mizerikòrdia di Huda, tabata mas malbado ainda ku su mama Jezebel. Ora su yu hòmber Ahaziah a muri, rápidamente el a tuma kontrol di e reino dor di ehekutá tur su ñetunan ku por a reina na su lugá. “Ma Josaba, ..., ruman muhé di Okozias, a kohe Joas, yu hòmber di Okozias, i ... nan a skond’é ... for di Atalía, asina ku e no a ser matá. I el a keda huntu kuné, skondí den e kas di Señor seis aña. I Atalía a reina riba e tera.” 2 Reinan 11:2,3.

Pa seis aña solamente un man yen di hende di konfiansa tabata sa ku e yu real tabata biba i skondí den e tèmpel di Dios. Joiada, e sumo saserdote, a stima i a entrená e hóben Joas meskos ku su mes yu. Pa seis aña Joiada a plania i hasi orashon pa e mihó momentu pa presentá e heredero legítimo akí na e pueblo. Finalmente e saserdote bieu, den sekreto, a yama kapitannan di konfiansa den ehérsito i a mustra nan ku e yu mas hóben di Okozias tabata na bida ainda.

Nan a disidí di warda te djabièrnè anochi, ora ku tur e hendenan fiel lo a bin na e tèmpel pa adorashon di Sabat, pa presentá e rei hóben na nan. Ku sentenar di sòldá armá na tur banda, Joiada a trese e heredero di e trono di David dilanti di e multitut i a introdusié. Na promé instante e pueblo a keda asombrá, pero ora nan a mira e korona real poné riba su kabes, “nan a bati man, i a bisa: Dios salba e rei.” 2 Reinan 11:12.

Awor ora e malbado Atalía a tende e zonido di tròmpèt i henter e pueblo alegrándo, el a kore bin den tèmpel solamente pa deskubrí ku su reinado di teror a terminá. E dia ei e i su siguidónan a ser matá, i e reino a ser duná na Joas.

Beibel ta bisa nos ku un otro yu di David lo surgi pronto for di e tèmpel selestial meimei di e tokamentu di tròmpèt pa risibí Su reino legítimo i pa destruí e malbadonan.