Lès 17

Un Storia di Dos Muhé

Un silensio a kai riba e sala di huisio real, i tur wowo tabata fihá riba Rei Salomon. Su sirbidónan tabata puntra nan mes kon e monarka hóben lo a resolvé e kaso perpleho akí. Dos mama soltero tabata kompartí un kamber, i kada un a duna lus na un yu hòmber mas òf ménos na e mesun momentu. Durante anochi, un di e mamanan a bòltu aksidentalmente i a sofoká su yu hòmber. Ora el a lanta trempan i a mira ku su yu tabata friu i ketu, e muhé distraí a tuma e bebi di su kompañero di kamber, ku tabata drumí, pa su mes i a pone su bebi morto na su lugá. Despues e otro mama a lanta, a mira e bebi morto, i a kuminsá yora di tristesa. Pero despues di a saminá e bebi, el a realisá rápidamente ku no tabata su yu. Na otro banda di e kamber, e por a mira su kompañero di kamber ta tene su bebi duru.

Awor tur dos muhé tabata para dilanti di e rei, luchando pa poseshon di e bebi bibu. “E yu akí ta di mi!” un a grita.

“Nò, e bebi morto tabata di bo!” e otro a kontestá.

Kon e rei lo a determiná kua tabata e berdadero mama? Salomon a interumpí nan debate i a bisa un wardadó pa kohe un spada i parti e yu bibu na dos. Na promé instante e sòldá a pensa ku e rei tabata hasi wega, pero Salomon a kuminsá wak e duda di e guardia fihamente. Pokopoko el a saka su spada skèrpi i briante i a kana bai den direkshon di e muhé ku tabata teniendo e beibi. Diripiente e berdadero mama a tira su mes na pia di rei i a supliká: “Lag’é haña e yu, pero por fabor, no mat’é!” Pero e otro muhé a bisa: “Lag’é no ta di mi ni di bo, ma partié.” Awor Salomon tabata sa sin duda ken tabata e berdadero mama.

Den profesia, un hende muhé ta un símbolo di un iglesia (Jeremias 6:2). Ku asina tantu iglesia den e último dianan, kon nos por distinguí e berdadero iglesia di último dia, ku tin e Yu bibu, for di e falsifikashonnan? Meskos ku Salomon, nos mester usa e spada di e Palabra di Dios (Hebreonan 4:12)!