Versíkulo di Memoria:

“Awor, despues ku Juan a ser poné den prizòn, Hesus a bin Galilea, predikando e evangelio di e reino di Dios, i bisando: ‘E tempu a kumpli, i e reino di Dios ta serka. Arepentí i kere den e evangelio’ ” (Marko 1:14,15, NKJV).

Ken a skirbi e Evangelio di Marko, i dikon el a ser skirbí? Niun Evangelio ta menshoná nòmber di e outor. Esun ku ta yega mas serka ta Juan, ku referensia na e disipel stimá (lesa Juan 21:20,24).

Sinembargo, desde prinsipio e Evangelionan kanóniko a ser asosiá ku sea un apòstel (Mateo, Juan) òf ku un kompañero di un apòstel. Por ehèmpel, e Evangelio di Lukas ta konektá ku Pablo (lesa Kol. 4:14, 2 Tim. 4:11, Filemon 1:24). E Evangelio di Marko ta konektá ku Pedro (lesa 1 Pe. 5:13).

Aunke e outor di Marko nunka ta duna su nòmber den e teksto, tradishon di iglesia primitivo ta indiká ku e outor di e Evangelio di Marko tabata Juan Marko, ku un tempu tabata un kompañero di biahe di Pablo i Barnabas (Echonan 13:2,5) i despues un kolaborador di Pedro (1 Pe. 5:13).

E promé paso e siman akí lo ta pa siña tokante Marko manera ta registrá den Skritura, pa mira su frakaso trempan i rekuperashon final. Despues e estudio lo bira na e sekshon di apertura di Marko ku un bista padilanti na unda e storia ta bai i un bista patras na dikon un mishonero frakasá i despues restourá lo a skirbi un teksto asina.

Lesa Echonan 12:12. Kon Marko ta ser introdusí den e buki di Echonan?

Ta parse probabel ku Juan Marko, e outor di mas probabel di e Evangelio di Marko, tabata un hóben ora e eventonan den Marko 12 a tuma lugá, probablemente meimei di añanan A.D. 40. E ta ser introdusí den versíkulo 12 komo yu di un muhé yamá Maria. E tabata evidentemente un partidario riku di e iglesia i tabata tene e reunion di orashon na su kas, hasí famoso den Echonan 12. E storia di Pedro su eskape for di prizòn i e akshonnan subsiguiente, i despues e morto di Herodes, ta yen di kontrastenan sorprendente, asta humorístiko entre Pedro i e rei. Juan Marko realmente no ta hunga niun ròl den e storia, pero e introdukshon di dje na e punto akí ta prepará pa su konekshon mas despues ku Barnabas i Saulo.

Lesa Echonan 13:1–5, 13. Kon Juan Marko a pega na Saulo i Barnabas, i kiko tabata e resultado?

Echonan 13 ta deskribí e promé biahe mishonero di Saulo i Barnabas, kuminsando na mas o ménos A.D. 46. Juan Marko no ta ser menshoná te na versíkulo 5, i su ròl ta simplemente komo un ayudante òf sirbidó. Niun otro referensia ta ser hasí na e hóben te na versíkulo 13, kaminda e relato kòrtiko ta nota ku el a regresá Herusalèm.

Niun motibu ta ser duná pa e partida akí, i e ousensia di kualke deskripshon di su sintimentunan òf emoshonnan ta laga na imaginashon loke a motivá su retiro for di e esfuerso mishonero ku, sin duda, tabata yená ku peliger i desafionan. Ellen G. White ta indiká ku “Marko, dominá pa miedu i desánimo, a duda pa un momento den su propósito pa duna su mes ku henter su kurason na e obra di Señor. No kustumbrá ku difikultat, el a ser deskurashá pa e peligernan i privashonnan di e kaminda.”—The Acts of the Apostles, p. 169. Den un palabra, kosnan simplemente a bira mucha difísil p’e, i asina e ker a sali.

Pensa bèk riba un momento ku bo a hala atras for di algu, òf asta a frakasá totalmente den dje, den bo kaminata kristian. Kiko bo a siña di e eksperensia?

Lesa Echonan 15:36–39. Dikon Pablo a rechasá Juan Marko, i dikon Barnabas a dun’é un di dos oportunidat?

E motibu pa Pablo su rechaso di e hóben ta ser duná den Echonan 15:38. Marko a retirá su mes for di nan i no a sigui den e obra di ministerio. Pablo su aktitut ta komprendibel, aunke poko brutu. Bida mishonero, partikularmente den e mundu antiguo, tabata pisá i eksigente (kompará ku 2 Kor. 11:23–28). Pablo tabata dependé riba su kompañeronan mishonero pa yuda karga e karga di un obra i kondishonnan asina desafiante. Den su perspektiva, un hende ku a desertá asina lihé no tabata meresé un lugá den un tim mishonero ku ta bringa man na man kontra forsanan malbado.

Barnabas no tabata di akuerdo. El a mira potensial den Marko i no ker a laga e hóben atras. A surgi asina un disputa entre Pablo i Barnabas riba Juan Marko ku nan a separá. Pablo a skohe Silas pa bai huntu kuné, i Barnabas a bai ku Marko.

Echonan no ta splika dikon Barnabas a skohe pa bai ku Marko. De echo, e pasashi akí ta e último kaminda ku e dos hòmbernan ta aparesé den Echonan. Pero ta interesante pa bisa ku no ta e último kaminda ku Marko ta ser menshoná den Tèstamènt Nobo.

Lesa Kolosensenan 4:10, 2 Timoteo 4:11, Filemon 24, i 1 Pedro 5:13. Kua detayenan tokante rekuperashon di Marko e versíkulonan akí ta sugerí?

Un transformashon asombroso parse a tuma lugá den Marko. Den e pasashinan akí, Pablo ta indiká e balor di Marko p’é i pa ministerio. Pablo ta kont’é komo un di su koleganan i ke pa Timoteo trese Marko kuné. E buki di 1 Pedro ta indiká ku Pedro tambe tabatin un relashon será ku Marko. E bukinan akí, skirbí pa Pablo i Pedro, probablemente a ser skirbí na prinsipio di añanan A.D. 60, un 15–20 aña despues di e eksperensia den Echonan 15. Marko a rekuperá klaramente di su frakaso, kasi sigur pa motibu di e konfiansa ku su primu, Barnabas, a pone den dje.

Konsiderá un momento ora abo òf un amigu a faya i a haña un di dos oportunidat. Kon e eksperensia ei a kambia abo i esnan ku a yudabo? Kon el a modifiká bo ministerio na otronan?

Lesa Marko 1:1–8. Ken ta e personahenan den e versíkulonan akí, i kiko nan ta bisa i hasi?

E versíkulonan akí tin tres personahe prinsipal: Hesu-Kristu, refería na djE den Marko 1:1; Dios Tata, impliká den e palabranan di Marko 1:2; i Juan Boutista, e mensahero i predikadó ku ta e tema prinsipal di e último sekshon di e pasashi akí.

Marko 1:2, 3 ta kontené un sita for di Tèstamènt Bieu ku Marko ta presentá pa deskribí loke lo sosodé den e storia. Loke Marko ta sita ta un meskla di frasenan for di tres pasashi: Eksodo 23:20, Isaias 40:3, and Malakias 3:1.

Lesa Eksodo 23:20, Isaias 40:3, i Malakias 3:1. Kiko e tres pasashinan akí tin en komun?

Eksodo 23:20 ta referí na un angel ku Dios lo manda dilanti di Israel pa hiba nan Kanaan. Isaias 40:3 ta papia di Dios ku ta aparesé den desierto ku un karetera prepará su dilanti. Malakias 3:1 ta papia di un mensahero ku ta bai dilanti di Señor pa prepará Su kaminda. Tur e tres pasashinan akí ta papia di un biahe.

E teksto den Isaias tin hopi vínkulo ku e ministerio di Juan Boutista i ta enfoká tambe riba e Kaminda di Señor. Den e Evangelio di Marko, Señor Hesus ta riba un biahe. E narativo ku ta move rápidamente ta oumentá e sentido di e biahe akí, un biahe ku lo hiba na e krus i na Su morto di sakrifisio pa nos.

Pero hopi kos mester sosodé promé ku E yega na e krus. E biahe a kaba di kuminsá, i Marko lo konta nos tur kos di dje.

Di akuerdo ku e sita di Tèstamènt Bieu den Marko 1:2, 3, Juan Boutista ta yama pa repentimentu, un biramentu for di piká, i un biramentu bèk na Dios (Marko 1:4). Bistí manera e profeta antiguo Elias (kompará ku 2 Reinan 1:8), e ta papia den Marko 1:7, 8 tokante Esun ku ta bini despues di dje ku ta mas poderoso kuné. Su deklarashon ku e no ta digno di lòs un strèp di e sandalianan di Esun ku ta bini ta mustra e bista elevá ku e tin di Hesus.

Lesa Marko 1:9–13. Ken ta presente na e boutismo di Hesus, i kiko ta sosodé?

Juan ta batisá Hesus den riu Yordan. Miéntras Hesus ta sali for di awa, E ta mira e shelunan sker habri i Spiritu Santu bahando riba djE manera un palomba. E ta tende e bos di Dios for di shelu: “ ‘Abo ta mi Yu stimá; ku Bo Mi ta mashá satisfecho’ ” (Marko 1:11, ESV).

E eventonan akí ta indiká e importansia di e boutismo di Hesus. E Tata, Yu, i Spiritu Santu ta presente, i huntu nan ta afirmá e komienso di Hesus su ministerio. E importansia di e evento akí lo haña su eko na e esena di e krus den Marko 15. Hopi di e mesun elementonan di e storia lo ripití den e esena ei.

E Spiritu a saka Hesus hiba den desierto. E palabra “saka” ta di e palabra griego ekballō, e palabra komun usá den e Evangelio di Marko pa saka demoño. E presensia di e Spiritu akinan ta ilustrá e poder di Spiritu Santu den bida di Hesus. Ya Señor ta kuminsando e biahe di Su ministerio, i inmediatamente E ta konfrontá Satanas. E sentido di e lucha den e esena ta ser interpretá pa medio di e referensia na 40 dia di tentashon, e presensia di bestianan feros, i e angelnan ministrando na Hesus.

Un karakterístika inusual di e esena di apertura di e Evangelio di Marko ta ku Hesus ta ser presentá komo un personahe ku tantu divinidat komo humanidat. Di parti di divinidat: E ta e Kristu, e Mesias (Marko 1:1), e Señor anunsiá pa un mensahero (Marko 1:2,3), mas poderoso ku Juan (Marko 1:7), e Yu stimá riba ken e Spiritu ta baha (Marko 1:10, 11). Pero di parti di humanidat, nos ta mira lo siguiente: E ta ser batisá dor di Juan (no kontrali, Marko 1:9), E ta ser saká dor di e Spiritu (Marko 1:12), tentá dor di Satanas (Marko 1:13), huntu ku bestianan feros (Marko 1:13), i ministrá dor di angelnan (Marko 1:13).

Dikon e kontrastenan akí? Esaki ta mustra na e realidat asombroso di Kristu, nos Señor i Salbador, nos Dios, i sinembargo tambe un ser humano, nos ruman hòmber i nos ehèmpel. Kon nos por komprondé e idea akí plenamente? Nos no por. Pero nos ta asept’é pa fe i ta maraviá pa loke e bèrdat akí ta revelá na nos tokante e amor di Dios pa humanidat.

Kiko e ta bisa nos tokante e amor maravioso di Dios ku, aunke Hesus tabata Dios, E lo a tuma nos humanidat riba Su mes pa asina salba nos?

Lesa Marko 1:14, 15. Kua ta e tres partinan di e mensahe di evangelio ku Hesus a proklamá?

Marko ta resumé akinan e mensahe simpel i direkto di Hesus. Su tres partinan ta keda ilustrá den e siguiente tabèl:

E profesia di tempu na kua Hesus ta referí ta e profesia di 70-siman di Daniel 9:24–27. E profesia akí ta haña kumplimentu den e boutismo di Hesus, kaminda E ta ser ungí ku Spiritu Santu i ta kuminsá Su ministerio (Echonan 10:38). E profesia asombroso di 70-siman ta keda ilustrá den e siguiente diagram:

Den e profesia akí, un dia ta para pa un aña (Num. 14:34, Ezek. 4:6). E profesia a kuminsá na 457 B.C. ku e dekreto emití pa Artaxèrxès, rei di Persia, kompletando e trabou di restourá Herusalèm (lesa Esdras 7).

Sesentinuebe siman profétiko lo a ekstendé te na A.D. 27, e momento ora Hesus a ser batisá i ungí ku Spiritu Santu na komienso di Su ministerio.

Su krusifikashon lo a tuma lugá tres aña i mei despues.

Finalmente, e terminashon di e di setenta siman lo a tuma lugá na A.D. 34 ora Esteban a keda piedrá i e mensahe di evangelio a kuminsá bai na e paganonan, komo tambe na e hudiunan.

Ki dia tabata e último biaha ku bo a studia e profesia di 70-siman? Kon konosé e profesia akí por yuda oumentá bo fe, no solamente den Hesus sino tambe den e integridat di e Palabra profétiko?

Lesa Ellen G. White, “The Voice in the Wilderness”, p. 97–108 den The Desire of Ages; i “Heralds of the Gospel”, p. 166–176 den The Acts of the Apostles.

Ki fasinante ta ku Revelashon 14:6, 7, e mensahe di e promé angel, ta paralelo na e mensahe di evangelio di Hesus den Marko 1:15.

E promé angel ta hiba e evangelio eterno na mundu den e último dianan den preparashon pa e Segundo Binida. Meskos ku e mensahe di Hesus, e angel su evangelio di tempu di fin tin e mesun tres elementonan manera ta ilustrá den e tabèl aki bou:

E mensahe di e promé angel ta anunsiá e komienso di e huisio preatvènt, ku a kuminsá na 1844 i a ser pronostiká den e profesia di 2.300 dia di Daniel 8:14. E huisio ta trese e reino di Dios na Su pueblo persiguí (Dan. 7:22). E yamada di e promé angel pa teme, glorifiká, i adorá Dios ta e yamada na disipulado, emití na e mundu den e último dianan miéntras e podernan di e bestia di Revelashon 13 ta presentá un dios falsu pa teme, glorifiká, i adorá.

Meskos ku e mensahe di Hesus den Marko 1 ta íntimamente vinkulá na e profesianan di Daniel na prinsipio di e proklamashon di e evangelio, asina e mensahe di e promé angel tambe ta vinkulá na Daniel na final di historia di tera.

Preguntanan pa Diskushon: