E Evangelio Segun San Marko
For di komienso di Marko, e lesadó sa ken Hesus ta: e Mesias, e Yu di Dios (Marko 1:1). Sinembargo, hendenan den e storia ta lucha ku komprondé presis ken E ta i di kiko tur E ta trata, eksepto pa esnan ku demoño. Nan sa eksaktamente ken E ta! E demoñonan ta rekonos’E i ta marchitá den bista di Su palabranan poderoso.
Pero Hesus mas bien ta ordená konsistentemente pa nan tene e informashon akí ketu. Dikon e mandato akí pa sekresia? Studiantenan di Beibel pa siglonan a reflekshoná riba e pregunta akí. Asta e tin un nòmber den erudishon: e Sekreto Mesiániko. Dikon un evangelio lo tabata ke pa nos keda ketu tokante ken Hesus ta?
Loke lo bira evidente den e biahe akí atraves di e Evangelio di Marko ta ku no solamente tin sekresia den e buki akí, ma tin tambe revelashon asombroso. Korektamente e por yamá e motibu di revelashon/sekresia, i e ta kore den henter e Evangelio di Marko. Aunke, na final di e buki, tur e sekresia ta keda sorprendentemente remplasá ku un revelashon poderoso di Hesus.
Marko por ser partí den dos diferente sekshon, mitar, en realidat. Kapítulo unu te na kasi final di kapítulo ocho ta trata ku e pregunta krusial: Ken Hesus ta? E kontesta ta keda reprodusí den Su siñansanan i Su milagernan. Bes tras bes E ta derotá maldat, ta trese speransa na esnan oprimí, i ta siña bèrdatnan konvinsente ku ta yega te na kurason di eksistensia humano. Tur esaki ta grita na e lesadó ku E ta e Mesias, e Kristu, ken e pueblo hebreo tabata spera pa hopi tempu.
Sinembargo, no ta te na meimei di e buki ku un hende ku no ta poseí pa demoño ta deklará korektamente ken E ta, i di e manera ei ta kontestá e pregunta di e promé mitar di e buki tokante e identidat di Kristu. I e persona ei ta Pedro, ku ta deklará: “ ‘Bo ta e Kristu’ ” (Marko 8:29, NKJV).
E di dos mitar di Marko, for di Marko 8:31 te na final di e buki, ta kontestá e otro pregunt: Unda Hesus ta bai? E kontesta ta impaktante. E ta bai na e krus, e forma di morto di mas denigrante i bergonsoso den e mundu romano. I e ta un destinashon asina inesperá pa e Mesias, kende Su siguidónan ta kere ku lo derotá Roma i establesé Israel komo un nashon poderoso.
E disipelnan torpe di Hesus no por komprondé loke E ta bisando. Segun ku e buki ta progresá, nan ta puntra ménos i ménos tokante e tópiko doloroso akí, te ora finalmente nan ta keda redusí na silensio ora nan konfrontá e bèrdat no deseá.
Kosnan ta parse mas i mas sombrio ora Hesus konfrontá e lidernan religioso ku ta trama su morto. E disipelnan, yen di speransa di un reino glorioso, ta keda di shòk pa un aresto, huisio, i krusifikashon ku ta desafiá nan espektativanan.
Pero apesar di tur esaki, Hesus ta mantené un mensahe kla i konsistente di unda E ta bai i kiko ta nifiká ku E lo muri i resusitá atrobe. E pan i kopa di e Ultimo Sena lo representá Su kurpa i sanger (Marko 14:22–25), i E lo bira un reskate pa hopi (Marko 10:45).
Esaki no ta nifiká ku El a bai na e krus den trankilidat flegmátiko. Den Getsémani E ta lucha ku e desishon (Marko 14:32–42), i riba e krus E ta grita den desesperashon: “ ‘Mi Dios, mi Dios, pakiko Bo a bandoná Mi?’ ” (Marko 15:34). E Evangelio di Marko ta mustra nos e skuridat ku Kristu a eksperensiá, e preis di nos salbashon. Pero e krus no ta final di e biahe. Despues di Su resurekshon, E ta plania un reunion ku Su disipelnan na Galilea, i, manera nos sa, e iglesia kristian a kuminsá.
E ta un storia mashá remarkabel, kontá den un estilo konsiso i rápido ku tiki komentario di e eskritor di e Evangelio mes. E ta simplemente konta e storia, i despues ta laga e palabranan, e echonan, e akshonnan papia pa nan mes tokante e bida i morto di Hesus di Názarèt.