Versíkulo di Memoria:

“I na e di nuebe ora Hesus a dal un gritu duru: ‘Eloi, Eloi, lama sabachthani?’ ku ta ser tradusí: ‘Mi Dios, mi Dios, pakiko Bo a bandonáMi?’ ” (Marko 14:36, NKJV).

Marko 15 ta e kurason di e Historia di Pashon. E ta presentá e huisio di Hesus, Su kondena, e bofon di e sòldánan, Su krusifikashon, i despues Su morto i entiero. E eventonan den e kapítulo akí ta keda presentá den detaye skèrpi i persikas, probablemente pasobra e outor ta laga e echonan papia pa nan mes.

Ironia ta hunga un ròl importante a lo largu di e kapítulo akí. Pa motibu di esaki, ta útil pa nos tin un un definishon kla di kiko ironia ta.

E siman akí, for di e pregunta di Pilato: “ ‘Ta Abo ta e rei di e hudiunan?’ ” pasando pa e burla di e sòldánan, e bòrchi ariba di e krus, pa e burla di e lidernan religioso: “ ‘El a salba otronan; E mes E no por salba’ ”, i yegando te na e aparishon inesperá di Hose di Arimatea, e kapítulo ta yená ku ironianan doloroso ku, sinembargo, ta revelá bèrdatnan poderoso tokante e morto di Hesus i loke e ta nifiká.

Lesa Marko 15:1–15. Ki tipo di situashonnan iróniko ta tuma lugá aki?

Ponsio Pilato tabata gobernadó di Hudea for di A.D. 26 te A.D. 36. E no tabata un lider amabel, i un kantidat di su akshonnan tabata kousa konsternashon meimei di e habitantenan di e pais (kompará ku Lukas 13:1). E huisio hudiu di Hesus a resultá den un sentensia di morto pa blasfemia. Pero bou di gobièrnu romano e hudiunan no por a ehekutá hende den mayoria kaso, i asina, nan a hiba Hesus pa Pilato pa konden’E.

E akusashon kontra Hesus dilanti di Pilato no ta ser menshoná, pero ta posibel pa komprobá e akusashon basá riba e pregunta kòrtiku ku Pilato ta hasi Hesus: “ ‘Ta Abo ta e Rei di e hudiunan?’ ” (Marko 15:2, ESV). Den tempunan di Tèstamènt Bieu, Israel tabata ungi su reinan; asina, no ta difísil pa mira kon e palabra Mesias (“Esun Ungí”) por a ser kombertí den reklamá homenahe komo un rei, den kompetensia ku e emperador. Pues, e akusashon presentá dilanti di e Sanhedrin tabata blasfemia, miéntras e akusashon presentá dilanti di e gobernadó tabata instigashon, loke lo a hiba na morto.

Ironia ta ku Hesus ta tantu e Mesias komo e Rei di e hudiunan. Su kondena pa blasfemia i instigashon tabata kiboká; E mester a risibí homenahe i adorashon en kambio. Sinembargo, ainda Hesus ta aktua manera un rei. Su kontesta na Pilato: “ ‘Ta bo a bisa esei’ ” (Marko 15:2, ESV), ta sin kompromiso. E no ta nenga e título ni ta afirm’é. E kontesta akí por sugerí ku E ta un rei, ma di un klase diferente (kompará ku Juan 18:33–38).

Marko 15:6 ta introdusí den e narashon e kustumber di libra un prizonero den tempu di Pasku. Den Marko 15:9, Pilato ta puntra si nan ke pa e libra e “ ‘Rei di e hudiunan’ ”, i aunke kisas el a usa e título diforma iróniko, e ironia en realidat ta hungando den su kontra.

Marko 15:9 i 10 ta un estudio di persepshon i falta di esaki. Pilato ta persibí ku e lidernan religioso a entregá Hesus pa motibu di envidia, ma e no ta ripará ku, ora el a puntra e multitut, e ta yudando e lidernan religioso. Nan ta instigá e multitut i ta pidi pa krusifikashon di Hesus. Pilato ta hala atras. Krusifikashon tabata un manera asina teribel pa muri, partikularmente pa un hende ku e tabata konsiderá inosente. Ki dolorosamente iróniko ku e gobernadó pagano ker a libra e Mesias, miéntras e lidernan religioso tabata ker E krusifiká.

Kiko por strobabo di sigui e multitut ora e preshon pa hasi esei ta grandi?

Lesa Marko 15:15–20. Kiko e sòldánan a hasi ku Hesus, i kiko ta su nifikashon?

E romanonan tabata usa un forma di bati severo pa prepará prizoneronan pa ehekushon. Tabata kita e víktima su paña, mar’é na un staka, i despues sut’é ku zuip di kueru na kua tabatin pidanan di wesu, glas, piedra, i klabu mará.

Despues ku Hesus a ser sutá, e sòldánan ku tabata enkargá ku Su ehekushon a sigui ku Su humiashon dor di bistiE ku un mantel püs, pone un korona di sumpiña riba Su kabes, i hasi chèrchi di djE komo rei di e hudiunan. E grupo di sòldá ta ser yamá un batayon, den e kaso akí entre 200 i 600 hòmber.

E ironia den e esena ta evidente pa e lesadó pasobra Hesus realmente ta e Rei, i e palabranan di bofon di e sòldánan ta proklamá e bèrdat akí. E akshon di e sòldánan tabata un parodia di e forma kon sòldánan tabata saludá e emperador romano ku e palabranan: “Saludo, Cesar, Emperador!” Pues, tin un komparashon implísito ku e emperador.

E akshonnan di e sòldánan komo parti di nan bofon di Hesus ta inkluí “dal” Su kabes ku un bara, “skupi” riba djE, i “hinka rudia” den homenahe di gañagaña. Tur e tres akshonnan akí ta ser ekspresá na griego, usando tempu imperfekto. Den e konteksto akí, e tempu verbal akí tin e idea di akshon repititivo. Pues, nan a sigui dal E, sigui skupi riba djE, i a sigui hinka rudia den homenahe di gañagaña su dilanti. Hesus ta soportá tur esaki den silensio, i no ta reakshoná mes.

E patronchi típiko di ehekushon romano atraves di krusifikashon tabata konsistí di laga e persona kondená karga e krus sunú te na e lugá di ehekushon. E patronchi akí, atrobe, tabata pa humiá i bergonsá e persona kompletamente dilanti di e komunidat.

Pero e hudiunan tabata aboresé desnudes públiko. Marko 15:20 ta destaká ku nan a kita e mantel püs i a bistiE Su mes pañanan bèk. Pues, ta parse ku esaki ta un konseshon ku e romanonan a hasi na e hudiunan den e tempu i lugá ei.

Pensa riba tur e ironia aki. Nan bùigmentu i rindimentu di “homenahe” na djE komo Rei, tur tabata un forma di chèrchi aunke Hesus realmente tabata e Rei, no solamente di e hudiunan sino di e romanonan tambe.

E hòmbernan akí no tabata niun idea kiko nan tabata hasiendo. Dikon, sinembargo, nan ignoransia lo no diskulpá nan riba Dia di Huisio?

Lesa Marko 15:21–38. Ki ironia teribel i doloroso ta aparesé den e pasashinan akí?

Na e punto akí den e Storia di Pashon, Hesus ta un víktima silensioso, kontrolá pa hendenan ku ta empeñá riba Su morto. Durante henter e Evangelio, te na Su aresto, E tabata e maestro di aktividatnan. Awor E ta opheto di nan aktividatnan. Aunke E tabata un predikador nomádiko robusto, e sota ku El a risibí, huntu ku e falta di kuminda i soño, a agot’E te na e punto ku un strañero mester a karga Su krus.

Na e krus Su pañanan a ser kitá i a bira propiedat di e sòldánan, ku a tira lòt pa mira di ken nan lo a bira (kompará ku Salmo 22:18). Krusifikashon tabata un método di ehekushon ku no tabata nifiká un dramamentu importante di sanger. E klabunan ku nan tabata usa pa pega un persona na e krus (kompará ku Juan 20:24–29) tabata pasa probablemente atraves di e pòls, bou di e plant’i man, kaminda no tin benanan mayó ta kore. (Den tantu hebreo komo griego, e palabra pa “man” por referí tantu na e plant’i man komo e brasa parti abou.) E plant’i man mes no tin e strukturanan nesesario pa karga e peso di e kurpa na momento di krusifikashon. E nèrvio mediano ta pasa atraves di e sentro di e parti abou di e brasa i lo a ser aplastá dor e klabunan, kousando un doló insoportabel den e brasa. Hala rosea tabata difísil. Pa haña un bon rosea, víktimanan di krusifikashon mester a pusha kontra nan pianan klabá i dobla nan brasanan, loke atrobe tabata kousa doló agonisante. Sofokamentu pa motibu di agotamentu tabata un di e posibel kousanan di morto.

Hesus a risibí tremendo burla i humiliashon durante Su krusifikashon. E Evangelio di Marko tin un motibu òf tema teológiko di revelashon/sekresia den kua Hesus, típikamente, ta pidi silensio tokante ken E ta. Konsekuentemente, títulonan kristológiko manera “Señor”, “Yu di Dios”, òf “Kristu” no ta aparesé hopi biaha den e narashon.

E elemento akí ta kambia na e krus. E no por keda skondí. Ta iróniko ku ta e lidernan religioso ta usa e títulonan akí ora nan ta hasi bofon di Hesus. Kon e hòmbernan akí ta kondenando nan mes!

Un di nan deklarashonnan di burla ta resaltá. Ta den Marko 15:31 nan ta bisa: “ ‘El a salba otronan; E no por salba E mes’ ” (ESV). Pa demostrá nan punto tokante E impotensia di Hesus riba e krus, nan ta indiká ku El a yuda otronan sí (e verbo griego por nifiká “salba”, “sana”, òf “reskatá”). Pues, irónikamente, nan ta atmití ku E ta e Salbador. E ironia ta bai mas leu: e motibu ku E no por, òf lo no, a salba Su mes, tabata pasobra na e krus E tabata salbando otronan.

Lesa Juan 1:1–3, i despues pensa riba loke e pasashi akí ta bisa nos tokante Hesus, e mesun Hesus ku ta ser krusifiká aki, den Marko. Kon nos por abarká ku nos mente loke e morto di Kristu ta nifiká pa nos?

Lesa Marko 15:33–41. Kiko ta e úniko palabranan di Hesus riba e krus den Marko? Kiko e morto di Kristu ta nifiká finalmente pa nos tur?

E Evangelio di Marko ta presentá e krus komo un lugá masha skur, tantu físikamente komo spiritualmente. Un skuridat sobrenatural a baha riba Kalvario for di masoménos mèrdia riba e djabièrnè ei te masoménos 3 p.m. “I ora e di seis ora a yega, tabatin skuridat riba henter e pais te e di nuebe ora” (Marko 15:33, ESV).

E palabranan di Hesus riba e krus, ora E ta sklama na Dios, puntrando dikon El a bandon’E, ta ser yamá e “gritu di desamparo”. E ta sitando for di Salmo 22:1. Otro referensianan na e mesun salmo ta tuma lugá den Marko 15:24 i 29, indikando ku e Skrituranan ta ser kumplí den e morto di Hesus. Asta den e konspirashonnan malbado di hende, e boluntat di Dios ta ser kumplí.

E palabranan di Hesus for di e krus ta ser reportá na arameo huntu ku su tradukshon. E palabranan “mi Dios, mi Dios” ta Eloi, Eloi den e versíkulo (un transkripshon di e ‘elahi arameo). Lo tabata fásil pa tende komo si fuera Hesus ta yamando Elias (’eliyyah arameo ku ta nifiká “Mi Dios ta YHWH”). Esaki ta e eror ku algun espektador ta kometé. Loke ta bira remarkabel tokante e pasashi akí ta su paralelismo ku e boutismo di Hesus, den Marko 1:9–11.

Loke e paralelonan akí ta sugerí ta ku meskos ku e boutismo di Hesus den Marko 1 ta e komienso di Su ministerio, manera a ser pronostiká den Daniel 9:24–27, loke ta tuma lugá den Marko 15 na e krus ta e kulminashon, òf meta di Su ministerio, ora E muri komo un reskate pa hopi hende (Marko 10:45). E morto di Hesus riba e krus tambe ta kumpli parti di e profesia di Daniel 9:24–27. E skermentu di e kortina di tèmpel (Marko 15:38) ta mustra na kumplimentu di e sistema di sakrifisio, ora tipo, òf símbolo, topa antitipo, òf realidat simbolisá, i un fase nobo di historia di salbashon kuminsá.

Apesar di e konspirashon malbado di humanidat, e propósitonan di Dios a kumpli. Dikon esaki mester yuda nos komprondé ku, no importa loke sosodé rònt di nos, ainda nos por konfia Dios i sa ku Su bondat lo prevalesé finalmente?

Lesa Marko 15:42–47. Kiko ta nifikashon di e intervenshon di Hose di Arimatea, spesialmente ya ku no por a mira e disipelnan di Hesus niun kaminda?

Despues di tur e drama ei, e kosnan mas “mundano” ta sosodé despues. Pa kuminsá, hende morto semper mester ser derá. Pero vários faktor den loke ta sigui ta bastante emoshonante spiritualmente, i otronan ta ekstremadamente importante histórikamente.

Den e pasashi akí, Hose di Arimatea ta aparesé pa promé i último biaha den e Evangelio di Marko. E tabata un miembro respetá di e Sanhedrin i un di loke ta yama e “élitenan urbano”. Komo un hòmber riku i respetá, e tabatin prestigio dilanti di e gobernadó, loke ta splika kon e por a riska aserká Pilato i pidi e kurpa di Hesus. Ta un detaye emoshonante ku un miembro di e konsilio tabatin un interes asina den e entiero di Hesus. Mientrastantu, unda e disipelnan konfiabel di Hesus tabata den tur esaki?

Un detaye históriko di ekstremo importansia aki ta verifikashon di e morto di Hesus. Marko 15:43 ta konta di e petishon di Hose pa e kurpa di Hesus. Pero Pilato a keda sorprendí di tende ku Hesus a muri kaba (Marko 15:44). P’esei el a yama e senturion enkargá ku e krusifikashon i a puntr’é si Hesus ya a muri. E senturion a konfirmá ku tabata asina.

Esaki ta importante pasobra despues algun hende tabata pretendé ku Hesus no a muri riba e krus sino solamente a desmayá. E testimonio di e senturion na e gobernadó romano ta refutá e pretenshon ei direktamente. Despues di tur kos, e romanonan tabata sa kon ehekutá kriminalnan.

Hose a trese un mortaha di lino pa lora Hesus aden, i a pone Su kurpa den un graf kobá den baranka. E graf akí tabata sufisiente grandi pa por kana den dje (Mark 16:5). Huntu ku Hose, e eskritor di evangelio ta nota dos muhé ku a mira e lugá: Maria Magdalena, i Maria, mama di Santiago. E dos akí, huntu ku Salomé, a wak e krusifikashon for di un distansia. Tur tres lo bai na e graf djadumingu mainta ku intenshon di kompletá nan trabou di balsemá Hesus (Marko 16:1).

Dikon e referensia na e tres muhénan akí? Nan lo ta e testigunan di e graf bashí den Marko 16 i, pues, testigunan importante di e resurekshon di Hesus.

Ki iróniko ku e siguidónan di Hesus ta “pèrdí den akshon” miéntras un miembro di e Sanhedrin, e mesun kurpa ku a kondená Hesus, ta bira e “héroe” aki. Kon nos por ta sigur ku nos tambe, den momentonan krusial, no ta pèrdí den akshon?

Lesa Ellen G. White, “In Pilate’s Judgment Hall,” p. 723–740, “Calvary,” p. 741–757, “ ‘It Is Finished,’ ” p. 758–764, den The Desire of Ages.

“Pilato tabata anhelá pa libra Hesus. Pero el a mira ku e no por a hasi esaki, i tòg retené su mes posishon i honor. Mas bien ku pèrdè su poder mundanal, el a skohe pa sakrifiká un bida inosente. Kuantu hende, pa skapa di pèrdida òf sufrimentu, di mes manera ta sakrifiká bon prinsipio! Konsenshi i deber ta mustra un kaminda, i interes propio ta mustra un otro. E koriente ta bai fuertemente den mal direkshon, i esun ku komprometé ku maldat ta ser lastrá hibá den e skuridat diki di kulpabilidat.”—Ellen G. White, The Desire of Ages, p. 738.

“Riba Kristu komo nos sustituto i garantia a ser poné e inikidat di nos tur. El a ser kontá komo un transgresor, pa E por a redimí nos di kondena di e lei. E kulpabilidat di kada desendiente di Adam tabata primi riba Su kurason. E rabia di Dios kontra piká, e manifestashon teribel di Su desagrado pa motibu di inikidat, a yena alma di Su Yu ku konsternashon. Henter Su bida Hesus tabata proklamando na un mundu kaí e bon notisia di e mizerikòrdia i amor pordonadó di e Tata. Su tema tabata salbashon di asta esun mas prinsipal di pekadónan. Pero awor, ku e peso teribel di kulpa ku E ta karga, E no por mira e kara rekonsiliadó di e Tata. E retiro di e kara divino for di e Salbador den e ora akí di angustia supremo a bora Su kurason ku un tristesa ku nunka por ser komprondé plenamente dor di hende. Asina grandi e agonia akí tabata ku apénas El por a sinti Su doló físiko.”—Ellen G. White, The Desire of Ages, p. 753.

Preguntanan pa Diskushon: