Versíkulo di Memoria:

“I El a bisa nan: ‘Sabat tabata trahá pa hende, i no hende pa Sabat. P’esei e Yu di Hende ta tambe Señor di Sabat’ ” (Marko 2:27,28, NKJV).

Marko 2:1–3:6 ta kontené sinku storia ku ta ilustrá e siñansa di Hesus den kontraste ku e siñansa di e lidernan religioso. E storianan ta den un patronchi spesífiko den kua kada storia susesivo ta konektá ku esun promé via un paralelo aktual. E último storia ta bira rònt i ta rekonektá ku esun promé.

Kada un di e storianan akí ta ilustrá aspektonan di ken Hesus ta, manera e deklarashonnan den Marko 2:10, 17, 20, 28 ta spesifiká. E lèsnan pa djadumingu, djaluna, i djamars lo profundisá mas den e nifikashon di e relatonan akí i e deklarashonnan di Kristu ku tin den nan.

Marko 3:20–35 ta e tema pa estudio riba djárason i djaweps.

Loke nos lo mira tambe ta un ehèmpel di un téknika ku e eskritor di e evangelio ta usa, ku ta ser yamá “storianan sèntwich”. E patronchi di narativo akí ta aparesé por lo ménos seis biaha den Marko. Den kada kaso algun aspekto importante di e naturalesa di Hesus i Su ròl komo Mesias, òf e naturalesa di disipulado, ta e enfoke.

E siman akí nos lo lesa algun relato tokante Hesus i mira kiko nos por siña for di nan.

Lesa Marko 2:1–12. Kiko e paralítiko tabata buskando ora el a ser tresé serka Hesus, i kiko el a risibí?

E hòmber tabata paralítiko; su kuater amigunan, pa e motibu ei, mester a karg’é hiba serka Hesus. Despues ku nan a kibra e dak i a baha e hòmber den presensia di Hesus, Marko 2:5 ta destaká e echo ku Hesus a mira nan fe. Kon fe por ta visibel? Meskos ku amor, e ta bira visibel den akshonnan, manera e persistensia di e amigunan ta ilustrá klaramente.

E nesesidat opvio di e hòmber tabata físiko. Sinembargo, ora e yega den presensia di Hesus, e promé palabranan ku Hesus ta pronunsiá ta referí na pordon di piká. E hòmber no ta papia un palabra durante henter e esena. En kambio, ta e lidernan religioso ta oponé (den nan mente) kontra loke Hesus a kaba di bisa. Nan ta konsiderá Su palabranan komo blasfemia, ku ta difamá Dios, i ta asumí prerogativanan ku ta pertenesé solamente na Dios.

Hesus ta topa e ophetornan riba nan mes tereno usando un estilo di argumentashon rabíniko típiko yamá “di menor na mayor” . Ta un kos pa bisa ku e pikánan di un persona ta pordoná; ta un otro kos pa en realidat pone un hòmber paralítiko kana. Si Hesus por pone e hòmber kana pa medio di e poder di Dios, e ora ei Su demanda di pordoná piká ta haña afirmashon.

Lesa Mikeas 6:6–8. Kon e teksto akí ta splika loke ta pasando entre Hesus i e lidernan?

E lidernan religioso akí a pèrde for di bista loke realmente tabata importá: hustisia, mizerikòrdia, i kana humildemente dilanti di Dios. Nan tabata asina opseshoná ku defendé nan komprondementu di Dios, ku nan no tabata mira e aktuashon di Dios dilanti di nan bista. Nada tabata indiká ku e hòmbernan a kambia nan mente tokante Hesus, aunke El a duna nan mas ku sufisiente evidensia pa sa ku Hesus tabata di Dios, no solamente dor di laga nan sa ku E por a lesa nan mente (no ta un hazaña simpel riba su mes), sino tambe dor di kura e paralítiko den nan presensia, di un manera ku nan no por a nenga.

Kon nos por evitá di kai den e mesun trampa ku e hòmbernan akí: ta asina opseshoná ku e formanan di religion ku nan a pèrdè for di bista loke realmente tabata importá den religion berdadero (lesa Santiago 1:27) ?

Lesa Marko 2:13–22. Ken Levi, yu hòmber di Alfeo, tabata, i dikon lo tabatin un opheshon pa e bira un disipel di Hesus?

Kobradónan di belasting den tempu di Hesus tabata funshonarionan sivil bou di e gobièrnu lokal òf romano. Nan no tabata popular meimei di e poblashon hudiu na Hudea pasobra hopi biaha nan tabata eksigí mas di loke tabata rekerí i tabata bira riku riba lomba di nan kompatriotanan. Un komentario hudiu riba lei religioso, e tratado di Mishnah Tohoroth, ta bisa: “Si kobradónan di belasting drenta den un kas [tur loke ta den dje] ta bira impuru.”

Pues, no ta sorprendente ku e eskribanan ta puntra ku desaprobashon: “Dikon E ta kome ku kobradónan di belasting i pekadornan?”

Kon Hesus a respondé riba nan pregunta? E no ta rechas’é. En kambio, E ta bir’é kabes abou, indikando ku e hendenan ku ta malu, no esnan salú, tin mester di un dòkter. Asina E ta reklamá e beinam di dòkter spiritual, Esun ku por kura e alma enfermo di piká. I un dòkter lo no mester bai kaminda esnan malu ta?

Marko 2:18–22 ta kuminsá ku un tema nobo. Ta trata di e storia sentral di e sinku storianan ku ta trata ku konflikto. Kaminda e sekshon anterior tabata inkluí un fiesta proveé pa Levi, e siguiente storia ta drai rònt di e asuntu di ayuno. E ta konsistí di un pregunta tokante dikon e disipelnan di Hesus no ta yuna ora esnan di Juan Boutista i di e fariseonan sí ta hasié. Hesus ta respondé ku un ilustrashon òf parábola den kua E ta kompará Su presensia ku un fiesta di kasamentu. Lo tabata un kasamentu ekstremadamente straño si tur e invitadonan tabata yuna. Pero Hesus sí ta pronostiká un dia ora ku e brùidehòm lo a ser kitá for di nan, un referensia na e krus. Lo tin hopi tempu pa yuna e ora ei.

Hesus ta sigui ku dos ilustrashon ku ta destaká e kontraste entre Su siñansa i esun di e lidernan religioso: bistí ku no a krem ainda riba un bistí bieu, i biña nobo den saku di biña bieu. Ki un manera interesante di kontrastá e siñansa di Kristu i esun di lidernan religioso. E ta mustra presis kon korupto e kustumbernan di e maestronan a bira. Asta religion berdadero por kambia den skuridat si hende no ta kuidadoso.

Ken ta esnan ku awendia lo por a ser konsiderá komo e kobradónan di belasting den tempu di Hesus? Kon nos por ahustá nos pensamentu tokante nan?

Den Marko 2:23,24, e fariseonan ta akusá e disipelnan di ta kibra Sabat. Di akuerdo ku tradishon hudiu, 39 forma di trabou tabata prohibí riba Sabat, ku, den mente di e fariseonan, tabata inkluí loke e disipelnan a hasi.

Lesa Marko 2:23–28. Kon Hesus ta kontrarestá e akusashon tresé pa e fariseonan?

Hesus ta respondé ku e storia di ora David a kome e pan konsagrá (1 Sam. 21:1–6) . E pan konsagrá tabata ser kitá riba Sabat; asina, e biahe di David por tabata masha bon un eskape di emergensia riba Sabat. Hesus ta argumentá ku si tabata hustifiká ku David i su hòmbernan a kome e pan konsagrá, e ora ei e disipelnan di Hesus ta hustifiká ora nan a piki i kome trigo.

Ademas Hesus ta indiká ku Sabat tabata kreá pa benefisio di humanidat, no kontrali, i ku e base di Su afirmashon ta ku E ta Señor di Sabat.

Lesa Marko 3:1–6. Kon e storia akí ta ilustrá Hesus su punto di ku Sabat a ser trahá pa humanidat?

Atrobe Hesus ta enfrentá konflikto ku e lidernan religioso tokante e Sabat. (Nota, sinembargo, ku e konflikto nunka ta tokante e dia di Sabat mes.) E lidernan religioso ke akusá Hesus si E kura riba Sabat. Hesus no ta evitá di konfrontá nan. E ta establesé un kontraste entre hasi bon òf hasi daño, salba bida òf mata. E kontesta riba Su pregunta ta opvio; hasi bon i salba bida ta muchu mas apropiá komo aktividatnan di Sabat.

Hesus ta prosedé pa kura e hòmber, loke ta pone Su oponentenan, ku inmediatamente ta kuminsá plania Su morto, rabia. Ironia di e storia ta ku esnan ku ta purba atrapá Hesus kibrando Sabat mes tabata kibrando Sabat ora nan tabata plania Su morto riba e mesun dia ei.

Ki prinsipionan tokante wardamentu di Sabat bo por saka for di e relatonan akí i di e desafionan ku nos ta enfrentá den era moderno pa warda Sabat?

Lesa Marko 3:20–35. Ki konekshon bo ta mira entre e dos storianan kombiná den e pasashi akí?

E pasashi akí ta e promé “Storia Sèntwich” den Marko, kaminda un storia ta kuminsá i despues e ta keda interumpí ku un otro storia, ku e promé storia kompletá despues numa.

E storia eksterno ta bai tokante e famianan di Hesus ku ta proponé pa tuma enkargo di djE pasobra nan ta pensa ku Su kabes no ta bon (Marko 3:21) . E storia interior ta tokante e eskribanan di Herusalèm ku ta akusá Hesus di ta den konspirashon ku diabel. (E estudio di awe ta enfoká riba e storia interior hañá den Marko 3:22–30.)

Den Marko 3:22, e eskribanan ta presentá e akusashon di ku e poder sanador di Hesus ta bin di diabel. Hesus ta kontestá promé ku un pregunta general: “Kon Satanas por saka Satanas afó?” No tin sentido ku Satanas lo ta traha kontra su mes. Hesus ta sigui papia tokante divishon denter di un reino, un kas, i Satanas mes, mustrando kon apsurdo un divishon asina lo tabata pa nan éksito. Pero e ora ei Señor ta kambia e ilustrashon diripiente i ta papia tokante mara un hòmber fuerte pa asina pluma su kas. Den e último ehèmpel akí Hesus ta e ladron ku ta drenta den kas di Satanas, i ta mara e prens di skuridat pa pone su koutivonan den libertat.

Lesa Marko 3:28–30. Kua ta e piká imperdonabel, i kiko esei ta nifiká?

E piká imperdonabel ta e piká kontra Spiritu Santu, yamando e obra di e Spiritu obra di diabel. Paga tinu ku den Marko 3:30 e motibu dikon Hesus ta hasi e deklarashon akí den Marko 3:28, 29 ta pasobra e eskribanan ta bisando ku E tin un spiritu impuru ora, en realidat, E tin Spiritu Santu. Si bo yama e obra di Spiritu Santu obra di diabel, e ora ei lo bo no skucha Spiritu Santu pasobra niun hende den su sano huisio ke sigui direkshon di diabel.

Dikon e miedu ku kisas bo por a kometé e “piká imperdonabel” ta revelá ku bo no a komet’é? Dikon e miedu mes ta evidensia ku bo no a komet’é?

Lesa Marko 3:20,21. Kua eksperensia a hiba Hesus su famia na konsiderá ku Su kabes no ta bon?

Un akusashon di instabilidat mental ta bastante serio. E kos típiko ta ku esaki ta surgi di eksperensianan den kua un persona ta un menasa pa su mes siguridat. Hesus su famia a sinti e manera akí tokante djE pasobra E tabata asina okupá ku E no tabata tuma tempa pa stòp pa kome. Nan a disidí di tuma enkargo di djE, i ei ta kaminda e storia sèntwich eksterior ta kibra, interumpí pa e storia interior tokante e eskribanan ku ta akusá Hesus di konspirashon ku diabel.

Ta eksistí un paralelismo straño entre e storianan eksterior i interior di e storia sèntwich akí. Hesus su mes famia parse tin un punto di bista di djE ku ta paralelo na esun di e eskribanan. E famia ta bisa ku E ta loko. E eskribanan ta bisa ku E ta den aliansa ku diabel.

Lesa Marko 3:31–35. Kiko Hesus su famia ke, i kon E ta reakshoná?

E esena akí por parse straño. Si bo mama òf otro miembronan di famia bin wak bo, lo bo no mester reuní ku nan? E problema tabata ku Hesus su famia na e momento ei no tabata den sintonia ku e boluntat di Dios. Hesus a rekonosé e bèrdat ei, i den e pasashi akí ta redefiní e konsepto di famia. Esnan ku ta hasi e boluntat di Dios ta Su ruman hòmber, ruman muhé, i mama. E ta Yu di Dios, i esnan ku ta uni nan mes ku e boluntat di Dios ta bira Su famia.

E dos storianan di e Storia Sèntwich Markano akí huntu ta kontené un ironia profundo. Den e storia interior, Hesus ta bisa ku un kas dividí kontra su mes no por permanesé. Na promé bista, ta parse ku den e storia eksterior Hesus su mes kas, Su famia, ta dividí kontra su mes! Pero Hesus ta resolvé e misterio akí atraves di Su redefinishon di famia. Su berdadero famia ta esnan ku ta hasi boluntat di Dios huntu kunE (lesa Lukas 12:53, Lukas 14:26).

Hopi biaha, a lo largu di historia, kristiannan a haña nan mes ta separá for di nan mes famianan. E ta un eksperensia difísil. E pasashi akí den Marko ta revelá ku Hesus a pasa dor di e mesun problema. E ta komprondé loke e ta nifiká i por konsolá esnan ku ta sinti e isolashon akí ku hopi biaha ta doloroso.

Lesa Ellen G. White, “Levi-Matthew,” p. 272–280; i “The Sabbath,” p. 281–289, den The Desire of Ages.

“Ora nan a puntr’É: ‘Lei ta pèrmití pa kura riba dia di Sabat?’ Hesus a kontestá: ‘Kual di boso, si e tin ún karné i esaki kai den pos riba dia di Sabat, lo no gar'é i sak'é afó? Awor, kuantu mas un hende bal kompará ku un karné! Asina anto, Lei ta pèrmití pa hasi bon riba dia di Sabat.’ Mat. 12:10–12.

“E spionnan no a riska kontestá Kristu den presensia di e multitut, pa miedu di hinka nan mes den difikultat. Nan tabata sa ku El a papia bèrdat. Mas bien ku violá nan tradishonnan, nan lo a laga un hòmber sufri, miéntras nan lo a aliviá un animal pa motibu di pèrdida di e doño si e lo a ser neglishá. Pues tabata mustra preokupashon mas gandi pa un animal bobo ku pa hende, ku ta trahá den imágen di Dios. Esaki ta ilustrá e funshonamentu di tur religion falsu. Nan ta originá den deseo di hende pa halsa nan mes riba Dios, pero nan ta resultá den degradá hende bou di un animal. Tur religion ku ta hasi guera kontra e soberania di Dios ta defroudá hende di e gloria ku el a haña na kreashon, i ku mester ser restourá na dje den Kristu. Tur religion falsu ta siña su siguidónan pa deskuidá nesesidatnan, sufrimentu, i derechonan humano. E evangelio ta pone balor haltu riba humanidat komo kompra di e sanger di Kristu, i e ta siña un rèspèt tierno pa e nesesidatnan i aflikshonnan di hende. Señor ta bisa: ‘Lo Mi hasi hende mortal mas skars ku oro puru, i humanidat mas skars ku oro di Ofir.’ Isa. 13:12.”—Ellen G. White, The Desire of Ages, p. 286, 287.

Preguntanan pa Diskushon: