Versíkulo di Memoria:

“ ‘Pasobra asta e Yu di hende no a bin pa ser sirbí, ma pa sirbi, i pa duna Su bida komo reskate pa hopi hende’ ” (Marko 10:45, NKJV).

E siman akí ta kubri Marko 10, ku ta kompletá e sekshon spesial den kua Hesus ta siña Su disipelnan den preparashon pa e Krus. Masoménos mitar di e kapítulo ta trata ku e disipelnan mes, i e restu ku asuntunan importante pa disipulado, ma kontá atraves di e lèns di otronan ku ta interaktuá ku Hesus. Fariseonan ta bin i ta diskutí kunE riba e tema di diborsio. Mayornan ta trese nan yunan pa Hesus bendishoná. Un hòmber riku ta puntra tokante bida eterno, i un hòmber siegu ta pidi pa bista.

E kapítulo di Marko akí ta kontené siñansanan importante tokante loke ta nifiká sigui Hesus, partikularmente ora e ta referí na nos biba aki i awor: matrimonio, yunan, kon relashoná ku rikesa, i e rekompensa i kosto di siguiE. Pa kulminá, tin e kurashon di un di dos hòmber siegu (Marko 10:46–52, kompará ku Marko 8:22–26), ku ta sera e paréntesis di e sekshon (Marko 8:22–10:52) i un bunita ilustrashon di tantu loke sigui Hesus ta kosta komo ta hiba na dje.

Huntu, e lèsnan akí ta prepará e siguidó di Hesus, sea ta e disipelnan di 2.000 aña pasá òf disipelnan den siglo bintiun, pa e desafionan ku ta bin ku disipulado.

Lesa Marko 10:1–12, i tambe Génesis 1:27 i Génesis 2:24. Kua trampa tabata skondí bou di e pregunta di e fariseonan tokante diborsio, i ki lèsnan Hesus a siña den Su kontesta?

Den e pasashi akí, e fariseonan ta puntra Hesus si ta permití pa un hòmber diborsiá su esposa. Meimei di e fariseonan, diborsio tabata ser konsiderá legal. E pregunta tabata pa ki motibunan. E Skol di Shammai tabata posiblemente mas restriktivo, ya ku tabata permití diborsio solamente pa motibu di no tin yu, negligensia material, negligensia emoshonal, òf infieldat marital. E Skol di Hillel tabata muchu mas indulgente, i tabata permití diborsio pa kasi kualke motibu, aunke nan proseso di duna diborsio tabata mas kompliká, loke tabata yuda frena e kosnan.

Asina, por parse un tiki straño ku nan ta hasi Hesus e pregunta general si diborsio ta aseptabel mes. Skondí bou di e pregunta tabatin un kòmplòt pa hinka Hesus den problema ku Herodes Antipas, gobernante di e region na ost di Jordan, kaminda Hesus tabata awor akí. Antipas a diborsiá su esposa i a kasa ku Herodias, esposa di su ruman hòmber. Herodes a kita kabes di Juan Boutista afó pa motibu di su reprenshon tokante e relashon ilísito akí (lesa Mat. 14:1–12).

Hesus ta desviá nan pregunta ku esun di E mes, puntrando e fariseonan kiko Moises a ordená riba e asuntu. E pasashi ku e fariseona ta referí na dje komo kontesta ta Deuteronomio 24:1–4, ku ta deskribí un kaso partikular di bolbe kasa despues di diborsio. E israelitanan den tempu di Moises ya tabata praktikando diborsio. E kaso ku lei a ser deskribí den Deuteronomio 24 tabatin e propósito di protehá e hende muhé. Pero den tempu di Hesus, esaki a ser trosé dor di e Skol di Hillel pa hasié mas fásil pa haña diborsio pa kasi kualke motibu. Asina, e lei ku tabata destiná pa protehá e muhé, tabata ser usá pa hasié mas fásil pa push’é un banda.

Na lugá di debatí e hurisprudensia den Deuteronomio 24, Hesus ta referí bèk na Dios su ideal original pa matrimonio, den Génesis 1 i 2. E ta destaká e echo di ku, na prinsipio, Dios a traha un hòmber i un muhé (Gén. 1:27), dos individuo. Despues E ta kombiná e bèrdat akí ku Génesis 2:24, ku ta bisa ku un hòmber ta bandoná su mayornan i ta uni ku su esposa, i nan dos ta bira ún karni. E konsepto di unidat akí ta bira e base di Hesus su afirmashon di e laso matrimonial. Loke Dios a uni, hende no mester separá.

Kiko bo kongregashon por hasi pa fortalesé e matrimonionan meimei di boso? Kon boso ta yuda esnan ku nan matrimonio ya a kibra?

Lesa Marko 10:13–16. Kiko Hesus a hasi pa esnan ku a trese nan yunan serka djE?

Miéntras yunan tabata masha deseá den e mundu antiguo (partikularmente mucha hòmber, den e kultura maskulino dominante), nasementu i infansia no tabata fásil. Sin kuido médiko moderno, e riesgonan pa mamanan ora ta duna lus, yunan resien nasí, yunan na lechi, i muchanan, tabata haltu. Hopi kultura tabatin remedinan tradishonal i amuletonan, usá pa protehá e individuonan vulnerabel akí kontra forsanan maligno.

Miéntras muchanan tabata deseá, nan tabata di státus sosial abou, na nivel di katibunan, realmente (Gal. 4:1, 2). Den e mundu grekoromano, e yunan deformá òf indeseabel tabata ser bandoná, òf asta tirá den riu. Muchanan hòmber tabata ser balorá riba muchanan muhé; tin ora beibinan muhé tabata ser lagá pa muri meimei di e elementonan. Tin biaha e beibinan bandoná akí tabata ser “reskatá”, solamente pa ser kriá i bendé komo katibu.

Ta parse ku e disipelnan no a komprondé e siñansa di Hesus den Marko 9 tokante risibí e reino di Dios manera un mucha (Marko 9:33–37). Awor nan ta reprendé esnan ku tabata trese muchanan serka Hesus pa bendishon, kisas pensando ku E lo no tabatin tempu pa un tarea asina simpel.

Nan tabata kiboká. Hesus ta indigná. Den henter e Evangelio di Marko, Hesus tin algun reakshon sorprendente riba hende, i ta ilustrativo ku un di Su reakshonnan fuerte tabata pa ku hendenan ku tabata tene muchanan alehá for di djE.

E ta insistí firmemente ku e disipelnan no mester para den kaminda di e muchanan. Dikon? Pasobra e reino di Dios ta pertenesé na nan, i hende mester risibié ku e aktitut i perspektiva di un mucha, probablemente un referensia na konfiansa simpel i implísito den Dios.

“No laga bo karakter no kristian mal representá Hesus. No tene e chikitunan alehá for di djE pa motibu di bo frieldat i duresa. Nunka duna nan motibu pa sinti ku shelu lo no tabata un lugá plasentero pa nan si bo tabata aya. No papia di religion komo algu ku muchanan no por komprondé, òf aktua komo si fuera no tabata spera ku nan ta aspetá Kristu den nan infansia. No duna nan e impreshon robes ku e religion di Kristu ta un religion di tristesa, i ku si nan bin serka e Salbador nan tin ku entregá tur loke ta yena bida ku goso.”—Ellen G. White, The Ministry of Healing, p. 43, 44.

Kon bo por revelá Hesus mihó na kualke mucha ku ta rònt di bo?

Lesa Marko 10:17–31. Kua lèsnan krusial tokante fe i e kosto di disipulado, pa kualke hende, riku òf pober, ta ser revelá aki?

E aserkamentu di e hòmber ta indiká su sinseridat i rèspèt pa Hesus. E ta kore bin, hinka rudia Su dilanti, i ta hasi e pregunta sentral pa destino di tur alma: Kiko ta e rekerimentunan pa heredá bida eterno? Hesus ta kontestá i ta referí na e di dos tabla di e Dekálogo. Atrobe, e hòmber ta mustra su idealismo i ta bisa ku el a warda tur esakinan desde su hubentut.

Di e kuater Evangelionan, Marko so ta destaká e echo ku Hesus a stima e hòmber. Tin algu interesante den e idealismo di e hòmber. Pero Hesus ta tèst su sinseridat i ta bis’é pa bende tur loke e tin i siguiE. E hòmber ta bai dekaí pasobra e tabatin gran poseshonnan. De echo, e no tabata wardando e mandamentunan realmente. El a kibra esun di promé, poniendo algu riba Dios den su bida. Su rikesanan tabata su ídolo.

Despues Hesus ta splika kon seduktor rikesa ta i ku ta mas fásil pa un animal grandi manera un kamel pasa dor di e buraku chikí di un angua ku pa un hòmber riku drenta shelu.

E disipelnan ta keda asombrá pa e palabranan di Hesus i ta puntra nan mes ta ken por ser salbá. Hesus ta duna e punto den Marko 10:27. “ ‘Ku hende e ta imposibel, ma no ku Dios. Pasobra ku Dios tur kos ta posibel’ ” (ESV).

Marko 10:27 ta parse manera un kaminda bunita pa terminá e storia: bo no por alkansá shelu riba bo mes, bo tin mester di e grasia di Dios pa ta salbá.

Pero e ora ei Pedro ta bula bisa ku e i su amigunan a laga tur kos pa sigui Hesus. Hesus ta kontestá ku loke sea bo a bandoná pa siguiE ta nada en kontraste ku loke lo bo risibí, awor i den “e siglo benidero” (ESV).

Ata e punto aki: ta e morto di Kristu ta resolvé kulpa humano, i despues e grasia di Kristu i Su bida di resurekshon, ta loke ta empoderá obediensia na Su mandatonan.

Lesa Romanonan 6:1–11. Kon e versíkulonan akí ta revelá e realidat di e grasia di Dios den nos bida, tantu pa hustifiká nos komo pa hasi nos hendenan nobo den djE?

Lesa Marko 10:32–45. Kon e versíkulonan akí ta revelá e ignoransia kontinuo di e disipelnan respekto no solamente e mishon di Hesus sino loke ta nifiká siguiE?

Segun ku Hesus ta aserká Jerusalèm den Su biahenan, E ta revelá na Su disipelnan loke lo sosodé aya. No ta un senario ku nan ta kere den dje òf ke tende. E presishon di Hesus tokante e skema di Su morto i resurekshon ta impaktante. Pero ora ta trata di algu ku bo ke tende, ta demasiado fásil pa ignor’é.

Esaki ta aparentemente loke Santiago i Juan ta hasi ora nan bin serka Hesus ku un petishon privá. Hesus, ku rason, ta pidi mas detaye, i nan ta kontestá ku nan ke sinta na Su man drechi i robes den Su gloria. Ta fásil pa kritiká nan petishon komo puru egosentrismo. Pero e dos hòmbernan akí a dediká nan mes na e ministerio di Hesus, i nan deseonan probablemente no tabata di naturalesa kompletamente egoista.

Hesus ta trata na profundisá nan komprenshon di loke nan ta pidiendo. E ta puntra si nan por bebe Su kopa òf ser batisá ku Su boutismo. Su kopa lo ta e kopa di sufrimentu den Getsemaní i riba e krus (kompará ku Marko 14:36), i Su boutismo lo ta Su morto i entiero (Marko 15:33–47), kaminda eventonan einan ta paralelo na Su boutismo ku ta registrá den Marko 1.

Pero Santiago i Juan no ta kapt’é. Rápidamente nan ta kontestá ku nan por. Hesus ta pronostiká e ora ei ku enbèrdat nan lo bebe Su kopa i ser batisá ku Su boutismo. Santiago tabata e promé di e apòstelnan ku ta muri komo mártir (Echonan 12:2). Juan tabata e apòstel ku a biba mas largu i a ser deportá na Patmos (Rev. 1:9). Pero Hesus ta indiká ku lugánan den gloria ta ser establesé dor di Dios.

Kon e otro disipelnan a reakshoná riba e kontesta di Hesus? No masha bon. E mesun palabra griego, aganakteō “ta rabiá, indigná”, ta ser usá tantu den Marko 10:41 komo den Marko 10:14, tokante Hesus su rabia riba mantené e muchanan alehá di djE.

Despues Hesus ta yama e grupo huntu pa duna un di Su siñansanan di mas profundo. E ta indiká ku gobernantenan pagano ta usa poder pa benefisio personal. Pero den e reino di Dios, poder mester ser usá semper pa elevá i bendishoná otronan. Hesus ta bai dilanti komo Rei di e reino di Dios. Kon? Dunando Su mes bida komo un reskate, no eksaktamente loke Su siguidónan tabata spera di tende.

Kiko ta nifiká komo un kristian pa ta un “sirbidó” pa otronan? Es desir, kon bo ta manifestá e prinsipio akí den bo interakshon diario ku hende?

Lesa Marko 10:46–52. Kon Bartimeo a reakshoná ora Hesus tabata kana pasa?

Te na e punto akí den e Evangelio di Marko, ku poko eksepshon, Hesus tabata bisa hende pa keda ketu tokante Su milagernan i tokante ken E ta. Den e relato akí, miéntras E ta bandonando Jeriko, un hòmber siegu ku ta pidi limosna kantu di kaminda, ora el a tende ku ta Hesus di Názarèt, ta kuminsá grita: “ ‘Hesus, Yu di David, tene piedat di mi!’ ” (Marko 10:47, NKJV). Di akuerdo ku e tema revelashon/sekresia di e buki, e multitut ta asumí e ròl di esnan ku ta pidi silensio miéntras nan ta trata, sin éksito, na silensiá e pididó di limosna ku ta hasi bochincha.

Ma Bartimeo no ta laga nan desanim’é i ta grita mas duru ainda: “ Yu di David, tene piedat di mi!’ ” (Marko 10:48). Su palabranan ta tantu un konfeshon di fe den Hesus komo e Mesias komo konfiansa ku E por kur’é. E título “Yu di David” den tempu di Hesus tabatin dos konsepto konektá na dje: e restourashon di un rei na e trono di Israel (kompará ku Isaias 11; Jer. 23:5,6; Jer. 33:15; Ezek. 34:23,24; Ezek. 37:24; Mik. 5:2–4; Zak. 3:8; Zak. 6:12), i ku e personahe akí lo tabata un sanadó i eksorsista.

Hesus ta keda para i ta bisa nan pa yama e hòmber siegu. Signifikativamente, e hòmber siegu ta tira su mantel un banda miéntras e ta bin serka Hesus. Hende siegu den tempu di Hesus tabata na e parti abou di sosiedat, huntu ku biuda- i wérfanonan. Esakina tabata individuonan bou di nivel di supsistensia i den berdadero peliger. E mantel lo tabata e siguridat di e hòmber. Lag’é atras a nifiká ku e tabatin fe ku Hesus lo a kur’é.

Hesus no ta desapuntá hende. En efekto, den e Evangelionan, ken ku bin serka djE pa yudansa semper ta risibí esaki. Hesus ta hasi e mesun pregunta ku El a hasi Santiago i Juan den Marko 10:36: “ ‘Kiko bo ke pa Mi hasi pa bo?’ ” (Marko 10:51, NKJV). Sin niun tiki duda, e hòmber siegu ta pidi pa e risibí su bista, loke Hesus ta restourá inmediatamente. E hòmber ku tabata siegu ta siguiE riba kaminda.

E storia akí ta konklushon di e sekshon di disipulado den Marko, i ta sirbi komo e paréntesis ku a habri ku kurashon di un hòmber siegu den Marko 8:22–26. E dos storianan ta ilustrá e echo ku disipulado ta konsistí di mira mundu ku bista nobo, tin biaha no klaramente na prinsipio, pero semper siguiendo Hesus riba e kaminda ku E ta guia.

Di ki manera bo a sklama tin biaha: “Hesus, Yu di David, tene mizerikòrdia di mi!”? Kiko a sosodé, i kiko bo a siña di e eksperensia akí?

Lesa Ellen G. White, “Blessing the Children”, p. 511–517; “ ‘One Thing Thou Lackest’ ”, p. 511–523, den The Desire of Ages.

“Semper Hesus tabata un stimadó di mucha. E tabata aseptá nan simpatia infantil i nan amor habrí i puru. E alabansa gradesidu for di nan lepnan puru tabata muzik den Su orea, i tabata refreská Su spiritu ora E tabata ser oprimí pa motibu di kontakto ku hòmbernan astuto i hipókrita. Unda ku e Salbador a bai, e bondat di Su kara, i Su manera amabel i bondadoso tabata gana e amor i konfiansa di muchanan.”—Ellen G. White, The Desire of Ages, p. 511.

“Na esnan ku, meskos ku e hóben riku, ta den posishonnan haltu di konfiansa i tin gran poseshonnan, por parse un sakrifisio demasiado grandi pa entregá tur kos pa sigui Kristu. Pero esaki ta e regla di kondukta pa tur esnan ku ke yega na ta Su disipelnan. No por aseptá nada ku ta ménos ku obediensia. Entrega di e ami ta e esensia di e siñansana di Kristu. Hopi biaha e ta ser presentá i ordená den un lenguahe ku ta parse outoritario, pasobra no tin niun otro manera di salba hende ku kòrta kita e kosnan ku, si nan ser praktiká, lo desmoralisá henter e ser.”— The Desire of Ages, p. 523.

Preguntanan pa Diskushon: