Versíkulo di Memoria:

“Ora El a yama e hendenan serka djE, ku Su disipelnan tambe, El a bisa nan: ‘Ken ku ta deseá di siguiMi, lag’e nenga su mes, i hisa su krus, i siguiMi” (Marko 8:34, NKJV).

E promé mitar di Marko ta enfoká atenshon riba ken Hesus ta. Su siñansa i milagernan milagroso ta mustra den e mesun direkshon: E ta e Mesias. Na e punto di kambio krusial akí den e narativo, Hesus lo puntra e disipelnan ken nan ta kere ku E ta.

Pedro lo duna un kontesta kla riba e pregunta ei, i Hesus lo kuminsá splika inmediatamente den ki direkshon Su pasonan ta bai komo Mesias, ku nos sa ta e krus.

Den e último parti di Marko 8 te na final di Marko 10, Hesus ta enfoká riba siña Su disipelnan tokante Su biahe. Den e kapítulonan akí, E lo duna pronóstikonan tokante e Krus. Esakinan lo ser siguí pa instrukshon spesial riba disipulado. E lèsnan poderoso akí ta keda relevante awe.

E sekshon akí di e di dos Evangelio ta ser destaká pa e kurashon di dos diferente hòmber siegu, unu meimei di Marko 8 i e otro na final di Marko 10. E dos milagernan akí ta funshoná komo paréntesis na komienso i na final di e kontenido ku tin entre nan, i ta ilustrá dramátikamente ku disipulado ta inkluí persepshon spiritual tokante ken Hesus ta i unda E ta bai. Manera Su siñansanan a desafiá e diesdos disipelnan masoménos 2.000 mil aña pasá, asina nan ta sigui konfrontá disipelnan awe ku e preis profundo, i benefisio, di sigui Hesus.

Lesa Marko 8:22–30. Dikon a tuma Hesus dos toke pa kura e hòmber siegu, i ki lèsnan a sali for di e relato akí?

E Evangelionan ta reportá un kantidat di hende siegu ku a ser kurá dor di Hesus. Ademas di e pasashi aki den Marko 8, Bartimeo siegu ta ser kurá manera ta reportá den Marko 10:46–52. Mateo ta referá na dos hòmber siegu (Mat. 20:29–34), i Juan 9 ta konta e storia di Hesus ku ta kura un hòmber nasé siegu, i ta mand’é bai laba su mes den e tanki di Siloam.

Pero e storia akí den Marko 8 ta úniko. E ta aparesé solamente den Marko, i e ta e úniko milager di Hesus ku ta rekerí dos akshon pa produsí salú perfekto. Komo parti di e storia, un detaye konmovedor ta ku Hesus ta kue e hòmber na man i ta hib’é pafó di e pueblo. Hende por sinti Su simpatia pa e desabilidat di e hòmber.

Pero pakiko dos toke? Komo ku esaki ta e úniko milager den kua dos akshon ta envolví, no ta probabel pa motibu di un falta di poder di parti di Hesus. En kambio, ta mas probabel un parábola aktuá, ku ta ilustrá e echo di ku persepshon spiritual tin biaha ta tuma tempu pa desaroyá su mes. Esei ta loke ta sosodiendo pa e disipelna di Hesus. Henter e sekshon, Marko 8:22–10:52 ta kuminsá i ta kaba ku e kurashon di un hòmber siegu. Den e sekshon akí di Marko, Hesus ta siñando Su disipelnan spesialmente tokante Su morto benidero. Nan tin problema pa kapt’e aunke E ta bisa nan numeroso biaha. Meskos ku e hòmber siegu, nan tin mester di “dos toke” pa mira klaramente. Restourashon di bista ta bira un metáfora pa disipulado transparente.

Maestronan stima pregunta. Hopi biaha nan ta e klave pa habri komprondementu di un studiante. Den e pasashi akí den Marko 8, e punto di kambio di e buki a yega. Tres karakterístika ta konfirmá e afirmashon akí. Di promé, Hesus ta kuestioná Su disipelnan tokante Su identidat, algu ku E no a hasi promé ku e punto akí. Di dos, Pedro ta e promé persona no poseí pa demoño ku ta deklará ku Hesus ta e Mesias. Di tres, inmediatamente despues di e revelashon akí di ken Hesus ta, E ta kuminsá splika unda E ta bai: na e Krus.

Dikon Hesus ta bisa Su disipelnan pa no bisa niun hende ku E ta e Mesias? Ta parse kontradiktorio pa establesimentu di e reino di Dios. Sinembargo, den tempu di Hesus, “Mesias” tabatin konotashonnan polítiko di bashamentu di e gobièrnu romano abou. Hesus no a bini pa ta e tipo di mesias ei; ta p’esei, Su yamada pa silensio riba Su identidat.

Kiko e storia akí ta siña nos tokante momentonan ora ta importante pa no bisa algun kos, maske kon bèrdat kisas nan lo por ta?

Lesa Marko 8:31–38. Kiko Hesus ta siña aki tokante e kosto di sigui Kristu?

E disipelnan a yega na un punto desisivo den nan relashon ku Hesus. Awor na sa ku E ta e Mesias. E lektor di Marko tabata sa esaki for di komienso di e buki (Marko 1:1) i, di e forma ei, tabatin un bentaha riba e disipelnan ku tin biaha tabata torpe.

Ora Hesus a yama e disipelnan e promé biaha, El a bisa ku E lo a hasi nan piskadónan di hende (Marko 1:17). No tabatin nada papiá di problema. Pero awor ku nan sa realmente ken E ta, E ta revelá e meta di Su mishon na nan: ku ta nesesario pa E sufri hopi kos, ser rechasá i matá, i despues resusitá despues di tres dia.

Ta notisia impaktante. Pedro, ku a kaba di konfesá ku Hesus ta e Mesias, ta hal’E un banda i ta reprend’E pa a bisa kosnan asina. Tur esaki a ser bisá den diskurso indirekto, pero awor e eskritor di evangelio ta reportá e palabranan di Hesus, palabranan ku mester a hsi Pedro doló ora el a tende nan. E ta yama Pedro “Satanas” i ta bis’é pa hala for di Su kaminda, ya ku pensamentunan asina no ta den harmonia ku e boluntat di Dios.

“E palabranan di Pedro no tabata di tal forma ku nan lo tabata un yudansa i solas pa Hesus den e gran prueba ku tabata sper’E. Nan no tabata den harmonia ku e propósito di grasia di Dios pa ku un mundu pèrdí, ni ku e lès di apnegashon ku Hesus a bini pa siña pa medio di Su propio ehèmpel.”—Ellen G. White, The Desire of Ages, p. 415.

Siguidónan di Hesus ta yamá pa nan tin e mesun meta ku E tin: hisa e krus i siguE. Krusifikashon tabata e método di ehekushon di mas kruel, humiliante, i intimidante ku e romanonan tabatin. Tur hende ker a evitá e krus. Asina, dikon un hende lo ker a asumí e krus komo símbolo di nan deboshon na Hesus?

Hesus ta splika no solamente e kosto di disipulado sino tambe su gran balor. Den e paradòks di fe kristian, pèrdè bo bida ta bira e manera pa hañ’é. En kambio, gana henter mundu ma pèrdè bida eterno no tin sentido. Komo mishonero, Jim Elliott a pon’é di forma asina elokuente den su revista di 28 di òktober 1949: “Esun ku ta duna loke e no por konservá pa gana loke e no por pèrdè, no ta bobo”.

“ ‘Esun ku stima su bida lo pèrd'é, i esun ku ta odia su bida den e mundu akí, lo ward'é pa eternidat’ ” (Juan 12:25, NKJV). Kon bo a eksperensiá e realidat di e palabranan akí?

Lesa Marko 9:1–13. Kiko Pedro, Santiago, i Juan a mira un anochi huntu ku Hesus?

Den Marko 9:1 Hesus ta pronostiká ku algun ku tabata pará huntu kunE lo no a purba morto promé ku nan mira e reino di Dios bini ku poder. E pronóstiko ei ta kumpli denter di un par di dia, ora E ta hiba Pedro, Santiago, i Juan riba un seru haltu nan so. Aya E ta ser transfigurá nan dilanti den e gloria di e reino selestial.

Elias i Moises ta aparesé for di e reino selestial i a kombersá ku Hesus. Lukas ta destaká ku nan tabata papia tokante e partida di Hesus (griego exodos) ku E tabata na punto di kumpli den Jerusalèm (Lukas 9:30,31). Asina, e esena di gloria akí ta mará na Hesus su morto benidero riba e krus (kompará ku Marko 9:9). E lo a duna speransa ora e disipelnan mir’E krusifiká.

E siguiente mainta, ora nan tabata bahando for di e seru, e tres disipelnan ta puntra Hesus si Elias ta bini promé. Probablemente e idea akí ta konektá na e espektativa ku Elias lo a reaparesé promé ku e Mesias (kompará ku Mal. 4:5,6). Hesus ta kontestá ku Elias a bini kaba, un referensia na Juan Boutista. Meskos ku nan a mata Juan, asina Hesus lo muri na nan man, ma E lo resusitá despues di tres dia.

Despues di e anochi di gloria, e esena na pia di e seru tabata káos tristu (lesa Marko 9:14–29). E nuebe disipelnan a topa un mucha hòmber poseí pa demoño ku nan no por a kura. Ora Hesus yega na e esena, tur hende ta kore pa mir’E. E storia ta sigui ku un desaroyo tokante e poder di e demoño riba e mucha. Ta parse ku Hesus ta tuma hopi tempu pa puntra tokante e detayenan di e poseshon di demoño. E ta resultá demasiado pa e tata, ku ta grita: “ ‘Si Bo por hasi algu, tene kompashon ku nos i yuda nos’ ” (Marko 9:22, NKJV).

Inmediatamente Hesus ta kapta e ekspreshon di duda. E kontesta di Señor por ser parafraseá: “Ki bo ke men, ‘Si Bo por’?” (Marko 9:23). Diripiente, manera welek for di shelu, e tata ta mira ku no ta solamente su yu hòmber tin un problema, e mes tin un problema di inkredulidat. I su inkredulidat por a resultá den e echo ku su yu no ta ser kurá. E tata desesperá ta entregá su mes na e mizerikòrdia di Hesus ku e frase memorabel: “ ‘Mi ta kere; yuda mi inkredulidat!’ ” (Marko 9:24, NKJV). Hesus ta kura e mucha.

Den ki situashonnan, si tabatin, bo mester a grita: “ ‘Mi ta kere; yuda mi inkredulidat’ ”? Kiko bo a siña di e eksperensianan ei?

Lesa Marko 9:30–41. Kiko ta diferente tokante e di dos pronóstiko di Hesus di Su morto i resurekshon (kompará ku Marko 8:31)? Tambe, tokante kiko e disipelnan ta diskutí, i ki instrukshon Hesus ta duna?

Den e promé pronóstiko, Hesus ta referí na esnan ku lo rechas’E i mat’E. Den e di dos pronóstiko, Hesus te referí na e echo ku E lo ser traishoná. E traidor no ta ser señalá na e momento akí, ma e lektor sa kaba ken e ta pa motibu di e identifikashon di Judas (lesa Marko 3:19). Atrobe, Señor ta referí na e echo ku E lo ser matá i ku E lo resusitá despues di tres dia. Pero e disipelnan ta parse ménos interesá den e detayenan di e pronóstiko akí ku den esun promé. Notisia indeseá no ta atraé diskushon.

Den Marko 8:27, Hesus tabata na nort di Laman di Galilea serka di Cesarea Filipo. Den Marko 9:30 E ta pasando atraves di Galilea, i den Marko 9:33 E ta drenta Capernaum. Asina, no ta difísil pa visualisá su biahe di nort pa sùit. Sinembargo, E ta drenta Capernaum E so miéntras e diesdos disipelnan ta keda atras. Na e kas, E ta puntra tokante nan diskushon riba kaminda. Niun hende ta papia, loke ta un señal sigur di nan inkomodidat ku e pregunta, kasi manera muchanan gará hasiendo algu ku nan sa ku ta robes. Nan kombersashon tabata tokante ken tabata esun di mas grandi. Aunke mayoria hende no ta dispuesto na atmitié, e pregunta akí tokante ken ta mas grandi ta algu ku tur hende ta pensa riba dje. Pero, den e reino di Dios, e idea akí ta bira kabes abou.

Hesus ta reakshoná riba e problema den dos stap. Di promé, E ta pronunsiá e deklarashon kla ku, pa ta di promé (di mas grandi), bo mester bira un sirbidó. Despues Hesus ta ilustrá e nifikashon di loke El a bisa pa medio di un akshon. Evidentemente tabatin un mucha pará den serkania ta skucha. Hesus ta kohe e mucha i ta pon’é meimei di e grupo. Esei lo tabata intimidante pa e mucha. Pero despues Hesus ta tuma e mucha den Su brasa, hasiendo e esena relahante. E ta siña ku si bo risibí e mucha, bo ta risibiE. I si bo risibiE, bo ta risibí Su Tata. Asina, e mucha di mas humilde ta vikulá ku Dios Mes.

Juan ta hasi un pregunta tokante esnan ku no ta forma parti di e sírkulo di e siguidónan di Hesus, i Hesus ta siña e lès importante di ku esnan ku no ta kontra nos ta na nos fabor. Señor ta afirmá ku yuda esnan den servisio kristian, asta den formanan moderá, no ta keda sin ser notá den shelu.

Kiko ta e idea bíbliko di grandesa, kontrali na e idea di mundu? Kua di nan bo ta tratando na logra?

Lesa Marko 9:42–50. Kiko e siñansanan di Hesus den e pasashi akí tin en komun?

Na promé bista, e pasashi akí por parse un kolekshon di siñansanan divergente di Hesus, agrupá sin un rason en partikular. Sinembargo, un bista mas djaserka ta revelá ku kada siñansa susesivo tin un palabra klave ku ta vinkulá ku esun anterior. E pasashi ta bira rònt di tres término prinsipal ku ta move e instrukshon un pia un pia padilanti: “motibunan pa peka”, “kandela”, i “salu”.

E promé siñansa ta tokante “e chikitunan”, refiriendo na kreyentenan nobo. Maestronan i lidernan ta enkargá den e reino di Dios ku e responsabilidat di kuida e konversonan nobo akí ku kuido spesial, similar na e étika di Tèstamènt Bieu di kuida esnan di mas suak den sosiedat antiguo: biudanan, wérfanonan, i strañeronan. Hesus ta papia den hipérbole, ku lo tabata mihó hoga den laman ku pone un di e “chikitunan” akí peka.

E slogan “pone hasi piká” ta hiba na e siñansa di mas largu den e pasashi akí. Dos enigma ta konfrontá e lektor. Di promé, Hesus ta siña e hendenan realmente pa kòrta un man òf pia kita afó òf saka un wowo? Di dos, E ta siñando eksistensia di un fièrnu ku ta kima eternamente? E kontesta riba e promé pregunta ta nò, Hesus no ta siñando mutilashon, algu ku hudaismo tabata rechasá (kompará ku Deut. 14:1; 1 Reinan 18:27,28). Señor ta usando hipérbole pa ekspresá Su punto. Si pèrdè un man, pia, òf wowo ta teribel, kuantu mas un desaster lo mester ta pa e kristian hasi piká!

E di dos pregunta tambe ta haña un kontesta negativo; nò, Hesus no ta siñando eksistensia di un fièrnu ku ta kima eternamente. Kon nos sa esei? Na promé lugá, e pasashi ta kontené un sierto aspekto kómiko. Konsiderá hendenan ku ta drenta e stat selestial ku un wowo òf un pia òf un man. Despues, konsiderá e idea di hendenan ku ta bai fièrnu kompletu. Lo no mester ta nèt kontrali? E hende saludabel den fièrnu? Esei ta komedia. Un komedia asina riba un tópiko asina serio ta hiba hende na konsiderá ku Hesus ta ilustrando un punto ku hipérbole. Piká mester ser tumá asina na serio ku lo tabata mihó pèrdè un man, pia, òf wowo ku hasi piká.

Pa loke ta trata fièrnu, su konsekuensianan ta eterno, no e kandela di fièrnu mes. “ ‘Pasobra Dios a stima mundu asina tantu ku El a duna su úniko Yu, pa ken ku kere den djE no mester bai pèrdí, ma tin bida eterno’ ” (Juan 3:16; énfasis añadí). Esnan ku bai pèrdí no ta kima pa semper; en kambio, nan ta peresé pa semper, un gran diferensia!

Lesa Ellen G. White, “Ministry”, p. 426–431; “Who Is the Greatest”, p. 432–446, den The Desire of Ages.

“Promé ku honor tin humildat. Pa okupá un lugá haltu dilanti di hende, Shelu ta skohe un obrero ku, meskos ku Juan Boutista, ta asumí un lugá humilde dilanti di Dios. E disipel ku ta mas manera un mucha ta esun mas efisiente den trabou pa Dios. E sernan selestial por koperá ku esun ku ta trata na, no halsa su mes, sino salba alma.”—Ellen G. White, The Desire of Ages, p. 436.

“Tur loke a duna nos bentaha riba un otro, sea ta edukashon òf refinamentu, noblesa di karakter, formashon kristian, eksperensia religioso, nos ta den debe ku esnan ménos benefisiá; i, te asina leu ku ta den nos poder, nos mester ministrá na nan. Si nos ta fuerte, nos mester sostené e mannan di esnan débil. Angelnan di gloria, ku semper ta kontemplá kara di e Tata den shelu, ta gosa den ministrá na Su chikitinnan. Almanan temblante, ku tin hopi rasgo di karakter repudiabel, ta nan enkargo spesial. Angelnan ta semper presente kaminda nan ta mas nesesario, huntu ku esnan ku tin e batayanan di mas difísil ku e ami pa bringa, i ku nan ambiente ta esun di mas desalentador. I den e ministerio akí e berdadero siguidónan di Kristu lo koperá.”— The Desire of Ages, p. 440.

Preguntanan pa Diskushon: