Señalnan Ku ta Mustra e Kaminda

E Kasamentu na Kana

Lesa Juan 2:1–11. Ki señal Hesus a hasi na Kana, i kon esaki a yuda Su disipelnan yega na kere den djE?

Mira Hesus realisá e milager di kambia e awa den biña a proveé evidensia na fabor di e desishon di e disipelnan pa sigui Hesus. Kon e lo no por tabata un señal poderoso ku ta mustra na djE komo un hende di Dios? (Probablemente nan no tabata kla ainda pa komprondé ku E tabata Dios.)

Moises tabata lider di e israelitanan, i el a saka Israel for di Egipto pa medio di hopi “señal i milager” (Deut. 6:22, Deut. 26:8, NKJV). E tabata esun ku Dios a usa pa libra Israel for di e egipsionan. (E tabata, den un sentido, nan “salbador.”)

Dios a pidi Israel pa skuch’E (Deut. 18:15, Mat. 17:5, Echonan 7:37). E “profeta” ei tabata Hesus i, den Juan 2, Hesus a realisá Su promé señal, ku tabata mustra bèk na e liberashon di e yunan di Israel for di Egipto.

Riu Nilo tabata un rekurso klave i un deidat pa e egipsionan. Un di e plaganan tabata dirigí na e riu: kambiamentu di su awanan den sanger. Na Kana, Hesus a realisá un milager similar pero, na lugá di kambia awa den sanger, El a kambié den biña.

E awa a bin for di seis tinashi di awa ku tabata ser usá pa propósitonan di purifikashon den ritualnan hudiu, loke ta konektá e milager ainda mas djaserka na temanan bíbliko di salbashon. Dor di konta e insidente di kambia e awa den biña, i pues refiriendo bèk na e Eksodo, Juan tabata mustra na Hesus komo nos Libertador.

Kiko doño di e fiesta a pensa di e biña no fermentá ku Hesus a proveé? E tabata, en efekto, sorprendí pa motibu di e kalidat di e bibida i, sin sa di e milager ku Hesus a realisá ei, el a pensa ku nan a warda e mihó pa último.

E término griego oinos ta ser usá tantu pa djus di drùif fresku komo fermentá (lesa The Seventh-day Adventist Bible Dictionary, p. 1177). Ellen G. White ta deklará ku e djus produsí pa medio di e milager no tabata alkohóliko (lesa “At the Marriage Feast”, The Desire of Ages, p. 149). No tin duda, esnan ku tabata sa kiko a sosodé a keda asombrá di loke a tuma lugá.

Kua ta bo motibunan pa sigui Hesus? (Nos a ser duná asina tantu, no ta bèrdat?)

E Di Dos Señal na Galilea

Durante henter Su ministerio terenal, Hesus a realisá milagernan ku a yuda hende kere den djE. Juan a registrá e milagernan akí pa asina otronan tambe por a kere den Hesus.

Lesa Juan 4:46–54. Dikon e evangelista ta hasi un konekshon bèk na e milager na e fiesta di kasamentu?

Ora Juan a duna un relato di e di dos señal ku Hesus a hasi na Galilea, e ta mustra bèk na e promé señal, na e kasamentu na Kana. Parse ku Juan ta bisando: E señalnan ku Hesus a hasi lo yuda boso mira ken Hesus ta. Despues, Juan ta añadí: “Esaki atrobe ta e di dos señal ku Hesus a hasi ora ku El a sali di Judea bin Galilea” (Juan 4:54, NKJV).

Na prinsipio, e reakshon di Hesus riba e súplika di e ofisial por parse duru. Sinembargo, e ofisial akí a hasi e kurashon di su yu e kriterio pa kere den Hesus. Hesus a lesa su kurason i a señalá e enfermedat spiritual ku tabata mas profundo ku e malesa ku tabata menasá bida di su yu. Meskos ku un welek for di un shelu blou, e hòmber a rekonosé diripiente ku su pobresa spiritual por a kosta bida di su yu.

Ta importante pa rekonosé ku milagernan, den i di nan mes, no tabata proba ku Hesus tabata e Mesias. Otronan a realisá milagernan. Algun tabata berdadero profetanan, otronan tabata falsu. Milagernan ta revelá solamente eksistensia di loke ta sobrenatural; nan no ta nifiká, riba nan mes, ku Dios mester ta Esun ku ta hasi nan. (Satanas por realisá “milager” si, ku e palabra “milager”, nos ke men aktonan sobrenatural.)

E ofisial, den angustia, ta tira su mes riba e mizerikòrdia di Hesus, i ta suplik’E pa kura su yu. Hesus su kontesta tabata trankilisante. El a bisa: “ ‘Bai, bo yu lo biba’ ” (Juan 4:50, ESV). E verbo “lo biba” na griego ta en realidat den tempu presente. E uso akí ta ser yamá un “presente futurístiko”, kaminda ta papia di un evento futuro ku asina un siguransa, komo si fuera e tabata tumando lugá kaba. E hòmber no a pura pa bai kas sino, keriendo Hesus, el a yega kas e siguiente dia, i a haña ku eksaktamente ora Hesus a bisa e palabranan ei, e keintura a kita for di e yu.

Ki un motibu poderoso pa kere den Hesus!

Asta si nos lo a mira milagernan, ki otro kriterio nos mester buska promé ku nos asumí outomátikamente ku e ta di Dios?

E Milager na e Tanki di Betèsda

E siguiente señal ku Juan ta registrá a tuma lugá na e Tanki di Betèsda (Juan 5:1–9). Hende tabata kere ku un angel tabata kousa moveshon den e awa i ku e promé hende malu ku drenta den e awa lo a ser kurá. Komo resultado, e verandanan di e pisina tabata yená ku esnan ku tabata spera di ser kurá na e siguiente akontesimentu. Hesus a bai Jerusalèm, i ora El a pasa banda di e pisina, El a mira e multitut ku tabata warda.

Ki un bista esei mester tabata, tambe! Tur e hendenan akí, algun siguramente bastante malu, sperando i sperando banda di e awa pa un kura ku, siguramente lo no yega. Ki un oportunidat pa Hesus!

Lesa Juan 5:1–9. Pasobra kualke hende na e pisina opviamente ker a bira bon, dikon Hesus ta puntra e paralítko si e ker a ser kurá? (Juan 5:6)?

Ora un hende tabata malu pa hopi tempu, e malesa ta bira e norma. I pa straño ku e por parse, tin biaha e por ta un tiki preokupante pa laga e desabilidat atras. E hòmber ta impliká den su kontesta ku e ke kurashon. E problema ta ku e ta buskando esaki na e lugá robes, miéntras ku Esun ku a traha hende su pianan ta pará nèt su dilanti. Poko e hòmber tabata sa ken tabata papiando kuné; aunke despues di e kurashon, kisas e lo por a kuminsá komprondé ku Hesus tabata, en bèrdat, Un hende masha spesial.

“Hesus no ta pidi e sufridó akí pa ehersé fe den djE. Simplemente E ta bisa: ‘Lanta, kohe bo kama i kana’. Pero e fe di e hòmber ta tene na e palabra ei. Kada nèrvio i múskulo ta trel ku bida nobo, i akshon saludabel ta bini na su miembronan mankaron. Sin duda e ta pone su boluntat pa obedesé e mandato di Kristu, i tur su múskulonan ta reakshoná riba su boluntat. Ora e bula lanta riba su pianan, e ta ripará ku e ta un hòmber aktivo. ... Hesus no a dun’é siguransa di yudansa divino. E hòmber lo por a stòp pa duda, i pèrdè su úniko chèns di kurashon. Pero el a kere e palabra di Kristu, i ora el a aktua riba dje, el a risibí forsa.”—Ellen G. White, The Desire of Ages, p. 202, 203.

Mas despues Hesus a topa e hòmber den tèmpel i a bisa: “ ‘Bo a ser hasí bon. No peka mas, sino algu pió ta bini riba bo!’ ” (Juan 5:14, NKJV). Kiko ta e relashon entre malesa i piká? Dikon nos mester komprondé ku no ta tur malesa ta un resultado direkto di pikánan spesífiko den nos bida?

Kurasonnan Duru

Señal-, maravia-, i milagernan, den i di nan mes, no ta proba ku algu ta di Dios. Pero, na otro banda, ora nan ta di Dios, ta un kos peligroso pa rechasá nan.

Lesa Juan 5:10–16. Ki lèsnan nos por saka for di e duresa di kurason asombroso di e lidernan religioso respekto Hesus i e milager ku El a kaba di realisá?

Ora Hesus a revelá Su mes na e hòmber ku a ser kurá, inmediatamente e hòmber a bisa e lidernan religioso ku tabata Hesus. Hende lo a pensa ku esaki lo tabata un momento pa alabá Dios, pero en kambio, e lidernan “a pèrsiguí Hesus, i tabata buska pa mat’E, pasobra El a hasi e kosnan akí riba Sabat” (Juan 5:16, NKJV).

Kurashon tabata permití riba Sabat solamente den kaso di un emergensia. E hòmber akí tabata desabilitá pa 38 aña; pues, su kurashon tabata apénas un emergensia. I ademas, kua tabata e nesesidat di lag’é kohe su kama? Lo bo a pensa ku un hende ku e poder di Dios pa realisá un milager asina lo tabata sa tambe si tabata permití pa karga un kama hiba kas riba dia di Sabat. Klaramente, Hesus tabata tratando di hiba nan na bèrdatnan bíbliko mas profundo, mas ayá di regla- i regulashonnan ku hende a traha ku, den algun kaso, a suprimí fe berdadero.

Kiko e otro relatonan akí ta siña tokante kon spiritualmente duru hende por bira, apesar di e evidensia? (Lesa Juan 9:1–16; Marko 3:22,23; Mat. 12:9–14).

Kon e lidernan religioso akí por tabata asina siegu? E probabel kontesta ta ku tabata pa motibu di nan propio kurason korupto, nan kerensia falsu ku e Mesias lo a libra nan for di Roma awor, i nan amor pa poder i falta di sumishon na Dios. Tur esakinan a yuda pone nan rechasá e bèrdat ku tabata pará nèt nan dilanti.

Lesa Juan 5:38–42. Kiko tabata e spièrtamentu di Hesus? Kiko nos por siña di e palabranan akí? Es desir, kiko por tin den nos ku ta siega nos pa e bèrdatnan ku nos mester konosé i apliká na nos propio bida?

E Afirmashonnan di Hesus

E milager na e Tanki di Betèsda a proveé un oportunidat ekselente pa Juan enfatisá ken Hesus ta. Juan ta usa nuebe versíkulo pa deskribí e milager i masoménos 40 versíkulo (wak aki bou) pa deskribí Esun ku a realisá e milager.

Lesa Juan 5:16–18. Dikon Hesus a ser pèrsiguí pa Su akshon riba Sabat?

Juan 5:18 por ta preokupante pasobra ta parse ku e ta bisa ku Hesus tabata kibrando e Sabat. Sinembargo, un bista mas djaserka riba Juan 5:16–18 ta mustra ku Hesus ta argumentá ku Su “trabou” riba Sabat ta den liña ku Su relashon ku Su Tata. Dios no ta stòp di sostené e universo riba Sabat. Konsekuentemente, e aktividat di Sabat di Hesus tabata parti di Su demanda riba divinidat. E lidernan religioso a persiguiE a base di supuesto kibramentu di Sabat i un demanda di igualdat na Dios.

Lesa Juan 5:19–47. Kiko Hesus tabata bisando pa asina yuda e lidernan mir’E pa ken E ta realmente, un afirmashon ku a ser afirmá asina poderosamente pa medio di e milager ku El a kaba di hasi?

Hesus ta defendé Su akshonnan den tres paso. Di promé, E ta splika Su relashon íntimo ku e Tata (Juan 5:19–30). Hesus ta indiká ku E i Su Tata ta aktua den harmonia, te na e punto ku Hesus tin poder tantu pa husga komo pa lanta morto (Juan 5:25–30).

Di dos, Hesus ta yama kuater “testigu” rápido tras di otro na Su defensa: Juan Boutista (Juan 5:31–35), e milagernan ku Hesus ta hasi (Juan 5:36), e Tata (Juan 5:37,38), i e Skrituranan (Juan 5:39). Kada un di e “testigunan” akí ta duna testimonio na fabor di Hesus.

Finalmente, den Juan 5:40–47, Hesus ta pone dilanti di Su akusadónan nan mes kondena, revelando e kontraste entre Su ministerio i nan egoismo. Nan kondena, E ta bisa, lo bini di Moises (Juan 5:45–47), esun den ken nan a pone nan speransa.

Kon nos por ta kuidadoso pa no kai den e trampa di kere den Dios, asta ora nos tin doktrinanan korekto, pero no ta someté kompletamente na Kristu? Trese bo kontesta den klas riba Sabat.