Sintando den un tienda na Teheran, Iran, e tapeit persa tabata representá un mondi antiguo. Trahá masha bunita, el a rekreá un esena na Suisa: serunan, un waterval, un lago turkesa, serunan kubrí ku palu, i un shelu blou ekstenso yen di nubia.

Kualke hende den e tienda ei por a pasa nan tempu tumando nota di e detayenan: e kantidat di kònòpi pa inch kuadrá, e tela di e tapeit, e tiponan di enk usá, tur e detayenan chikitu ku a resultá den e tapeit.

Of e persona por a enfoká, en kambio, riba e téknikanan i temanan fasinante ku a duna e tapeit su bunitesa úniko: e shelu ku tabata reflehá den e lago, e sneu ku tabata tapa e serunan, e mondi bèrdè komplementá ku e mòs koló bèrdè intenso. E temanan di e tapeit tabata kombiná ku otro den un presentashon di beyesa abilmente koordiná pa manifestá e splendor di e lugá sereno ei den e Alpanan.

E kuartal akí nos lo ta studiando un otro obra maestro elaborá di forma refiná. E obra akí no ta resultado di un kuashi riba canvas, un potrèt minusiosamente hinká den leshi, òf un tapeit profeshonalmente tehí. Mas bien, e ta e Palabra di Dios, manera e ta ser ekspresá di forma ingenioso den e Evangelio segun San Juan.

Palabranan tin nifikashon denter di nan konteksto. Pa kualke hende komprondé loke Skritura ke bisa, e mester ser studiá den konteksto: e frasenan inmediato, kapítulonan, i sekshonnan, i e mensahe general di Beibel mes. Finalmente, pa motibu ku henter Beibel ta inspirá pa Spiritu Santu, kada parti mester ser studiá den konteksto di e totalidat.

E intenshon di e kuartal akí lo ta pa komprondé e mensahe di e Evangelio segun San Juan. E ta úniko entre e kuater Evangelionan, i hopi biaha e ta enfoká atenshon riba entrevistanan personal entre Hesus i djis un òf dos hende, manera Nathaniel, Nikodemo, e muhé na e pos, e paralítiko na e tanki di Betesda, e hòmber ku a nase siegu, Lázaro i su ruman muhénan, Pilato, Pedro, òf Tomas. Hopi di e historianan akí ta aparesé solamente den Juan.

E Evangelio segun San Juan ta e Palabra di Dios transmití na nos atraves di e apòstel. Manera ku henter Beibel, e Evangelio a bini pa motibu di e boluntat di Dios, mas bien ku pa motibu di boluntat di humanidat. Juan tabata simplemente e instrumento boluntario ku Spiritu Santu a usa pa transmití hopi tema krusial: e Palabra (logos), lus, pan, awa, Spiritu Santu, unidat, señalnan, testimonio, i profesia. E temanan akí ta fortifiká i iluminá otro a lo largu di e Evangelio.

Hopi biaha estudio di Beibel ta konsentrá riba nifikashon di un palabra òf un pasashi chikitu di Skritura. Nos ta kontrolá nifikashon di e palabra den un dikshonario bíbliko. Nos ta analisá e gramátika, e konteksto inmediato, i e konteksto históriko; i, usando nos analogia di e tapeit, nos ta keda atrapá den estudio di e kantidat di kònòpi pa inch kuadrá, e tela, e enk, i e parti patras. Tur e detayenan akí ta importante.

Pero no laga nos pèrdè e kuadro grandi for di bista miéntras nos ta analisá e detayenan. De echo, meskos ku e tapeit persa por a transportá un hende hiba na e esenario alpino bunita ei, asina e Evangelio segun San Juan por hiba nos bèk na e bida i ministerio di Hesu-Kristu, kende konos’É ta bida eterno. E detayenan tin un funshon, ku ta pa mustra nos na e panorama general, i den Juan e panorama general ei ta un revelashon divinamente inspirá di Hesus, nos Señor i Salbador.