Kumpliendo ku Profesianan di Tèstamènt Bieu

Señalnan, Obranan, i Maravianan

Ademas di e milagernan spesífiko ku Juan a usa pa señalá Hesus komo e Mesias, el a registrá tambe e diskushon mas amplio tokante e señalnan, obranan, i maravianan ku Hesus a hasi.

E señalnan i maravianan, den i di nan mes, no tabata prueba di Su mesianismo, pasobra hopi profeta, tin biaha esnan falsu, tambe tabata realisá milagernan. Juan no a registrá e señalnan pasobra nan tabata mustra na un gran hasidó di milager so. E señalnan ku Juan a skirbi di dje tabatin e karakter úniko di señalá Hesus komo e Mesias i mustra ku E, enbèrdat, a bini di Dios Tata Mes.

Lesa Juan 5:17,20,36–38. Kon e versíkulonan akí ta deskribí e relashon entre Hesus i Dios Tata, spesialmente den konteksto di e señalnan?

Hesus a usa e señalnan pa mustra Su relashon di trabou será ku e Tata. Nan dos tabata un. E obranan a mustra ku “ ‘Tata ta den Mi i Ami ta den djE’ ” (Juan 10:38, NKJV; lesa tambe Juan 14:10,11.)

E propósito di Hesus su binida tabata pa hasi e obranan di Esun ku a mand’E, pa asina e obranan akí por a ser hasí manifesto na e mundu. Es desir, El a bini pa hasi e trabou ku e Tata a mand’E hasi, i e obranan ku El a hasi a testifiká, klaramente, ku El a bini di e Tata.

I sinembargo, manera nos a mira kaba, asta apesar di e señalnan poderoso i e testimonionan di hopi hende, ainda hende a skohe pa no kere.

E lidernan religioso a puntra Hesus: “ ‘Kuantu tempu Bo ta tene nos den duda? Si Bo ta e Kristu, bisa nos klaramente.’ Hesus a kontestá nan: ‘Mi a bisa boso, ma boso no ta kere. E obranan ku Mi ta hasi den nòmber di mi Tata ta duna testimonio di Mi’ ” (Juan 10:24,25, NKJV).

Si Hesus a sali i bisa direktamente ku E tabata e Mesias, e lidernan religioso, ku tabata buska kualke kos ku nan por a haña kontra djE, lo a bula riba djE. Sabiendo esaki, Hesus, en kambio, a mustra na e obranan ku El a hasi. Si Hesus a bisa ku E tabata e Kristu, fásilmente nan lo por a trata na nenga esei. Pero kon nan por a nenga e señalnan, e obranan, i e maravianan? Esakinan tabata testimonionan poderoso di ken E tabata i di unda El a bini.

Kon nos por protehá nos mes di tin e tipo di kurason duru ku nos ta mira meimei di e lidernan religioso akí? Den ki formanan nos lo por ta bringando kontra e obra di Dios den nos mes bida?

E Ròl Outorisá di Skritura

Ademas di e señalnan i testimonionan spesífiko ku Juan a usa pa mustra na Hesus komo e Mesias, Juan a apelá tambe na e outoridat di Tèstamènt Bieu i na su profesianan, ku a pronostiká e obra di Kristu. Tèstamènt Bieu ta sentral, no solamente na e Evangelio di Juan sino na henter Tèstamènt Nobo. Hustifikashon pa Hesus, pa ken E tabata, di unda El a bini, loke El a hasi, i loke E lo hasi, ta basá riba Skritura, den e kaso akí Tèstamènt Bieu.

Lesa e siguiente tekstonan: Juan 5:39,40,46,47. Kiko nan ta siña nos tokante e aktitut di Hesus pa ku e outoridat di Skritura?

Atraves di e Evangelionan, bes tras bes, Hesus ta mustra na e outoridat di Skritura komo un testimonio klave na Su fabor. Por ehèmpel, hopi biaha Hesus ta usa eventonan di Tèstamènt Bieu pa yuda mustra na E mes i na loke E ta hasi. Lo siguiente ta un kaso, kaminda e ta kue un kaso for di Numbernan 21:5–9. “ ‘Manera Moises a halsa e kolebra den desierto, asina tambe e Yu di hende mester ser halsá’ ” (Juan 3:14, NKJV). Aki, no solamente Hesus ta referí na e storia, sino usando esaki pa mustra na E mes, básikamente E ta duna nos e interpretashon outorisá di loke e storia ker a transmití.

I no solamente Hesus, sino otronan tambe, ta usa Tèstamènt Bieu pa mustra na Hesus. Por ehèmpel, na prinsipio den Juan, nos ta lesa e palabranan di Felipe: “ ‘Nos a haña Esun di ken Moises den lei, i tambe e profetanan, a skirbi’ ” (Juan 1:45).

Lesa e siguiente tekstonan: Juan 13:18; Juan 17:12; i Juan 19:24,28,36. Kiko nan ta siña tokante e outoridat di Skritura manera el a ser komprondé dor di Hesus i Juan? Kiko esaki mester bisa nos tokante e ròl krusial ku henter Skritura mester tin pa nos fe tambe?

Kua ta e forsanan aktualmente ku sea sutilmente òf abiertamente ta traha pa mina nos fe den e outoridat di Beibel? Trese bo kontesta na klas riba Sabat.

Profesianan di Tèstamènt Bieu tokante Hesus: Parti I

Den un diskushon ku e lidernan religioso tokante Su identidat, Hesus a afirmá e outoridat di Skritura. Na promé bista, lo tabata parse innesesario pa E hasi esei pasobra e lidernan religioso tabata kere den Skritura. No opstante, asta ku nan, Hesus lo a enfatisá e ouotridat di e Skrituranan, i El a hasi esei pa asina mustra nan ken E tabata, no importá kon duru nan kurason tabata, i no importá kuantu nan a purba bringa konvikshon.

Mientrastantu, Juan ta registrá hopi sita direkto for di i referensia na Tèstamènt Bieu ku ta mustra na Hesus komo e kumplimentu di e promesa di Tèstamènt Bieu di un Mesias.

Kon e siguiente pasashinan di Tèstamènt Nobo i Tèstamènt Bieu ta konektá? Es desir, kon Tèstamènt Nobo ta usa e tekstonan akí pa duna testimonio di Hesus?

No solamente Juan, sino Pedro, Pablo, Mateo, Marko, Lukas, i tur e eskritornan di Tèstamènt Nobo, bou di inspirashon di Spiritu Santu, kada biaha di nobo ta enfatisá kon e bida, morto, resurekshon, i asenshon di Hesus di Názarèt na e trono di Dios, tur ta kumplimentunan di e profesianan di Tèstamènt Bieu.

I aunke Hesus tabata mustra e disipelnan kontinuamente na e Skrituranan, ku a pronostiká Su ministerio, ki ora e disipelnan a komprondé finalmente ku e Skrituranan tabata mustra na Su morto i resurekshon? Tabata solamente despues ku El a muri i a resusitá i a aparesé na nan ku, finalmente, nan a komprondé. “P’esei, ora El a lanta for di morto, su disipelnan a kòrda ku El a bisa nan esaki; i nan a kere e Skritura i e palabra ku Hesus a papia ” (Juan 2:22, NKJV; lesa tambe Juan 20:9).

Profesianan di Tèstamènt Bieu tokante Hesus: Parti II

Hesus a bisa e lidernan religioso: “ ‘Boso ta skrudiñá Skritura, pasobra den nan boso ta kere ku boso tin bida eterno; i ta esakinan ta esnan ku ta testifiká di Mi’ ” (Juan 5:39, NKJV). Ki un afirmashon inkreibel pa hasi tokante E mes!

Kalkulashonnan ta varia, pero algun erudito ta argumentá ku Hesus di Názarèt a kumpli ku sentenáres di profesianan di Tèstamènt Bieu. Loke sea ta e kantidat, e probabilidat kontra di ku un hòmber ta kumpli ku sikiera un par di nan, muchu ménos nan tur, ta enorme. De bes en kuando un hende lo usa un imágen manera esaki: imaginábo ku bo ta yena un área di grandura di Texas ku dos pia haltu di moneda i bo ta fèrf un moneda koló ros i despues ta brua nan tur den otro. Despues duna un hende ku kara tapá un chèns pa kue e moneda ros. Kua ta e probabilidat ku, den un biaha, e lo ta haña esun ros?

No tin duda, e nasementu, bida, i morto di Kristu a ser pronostiká dor di Tèstamènt Bieu, evidensia sorprendente di Su identidat komo e Mesias sperá. Juan ta mustra bes tras bes na e tekstonan akí di Tèstamènt Bieu pa laga e punto ei kla tokante ken Hesus tabata, i tambe, dikon nos mester kere den djE i aseptá e salbashon ku E ta ofresé.

Kiko kada un di e siguiente pasashinan di e Evangelio di Juan ta revelá tokante Hesus komo un kumplimentu di profesia mesiániko?

Kon firmemente ankrá bo ta den loke bo ta kere? Si un hende lo a desafiábo riba dikon bo ta kere den Hesus komo e Mesias, kua kontestanan bo por a duna? Unda lo bo a bai, i dikon, pa yuda defendé bo fe?

Di Aki bou

Den nos estudio di Juan te asina leu, nos a mira ku Juan ta mustra kon Hesus, en bèrdat, ta e Mesias primintí, e gran speransa ku e pueblo hudiu tabata anhelá p’e.

I tòg, en kambio, hopi di e lidernan religioso, e guianan spiritual di e pueblo, tabata Su enemigunan di mas grandi. Dikon?

Lesa Juan 8:12–30. Kiko ta e dinámika entre Hesus i e lidernan religioso akí? Kua tekstonan ta splika mihó dikon hopi hende a rechas’E?

Hesus ta bisa ku nan no konosé ni E ni e Tata (Juan 8:19). Nan lo mester tabata konosé tur dos, pero e hòmbernan akí a gaña nan mes. Nan tabata asina atrapá den nan mes tradishonnan i filosofianan ku asta ku Hesus nèt nan dilanti, hasiendo tur e kosnan ku El a hasi i bisando e kosnan ku El a bisa, tur revelashonnan poderoso di e Tata, ainda nan a rechas’E.

Na di dos lugá, Hesus ta bisa nan: “ ‘Boso ta di aki bou’ ” (Juan 8:23, NKJV). Ku otro palabra, maske kon religioso nan lo por tabata, esakinan no tabata hòmbernan spiritual i piadoso. Nan tabatin un “forma di piedat” (2 Tim. 3:5), pero esei tabata tur kos. Nan tabatin piedat eksterior pero inkredulidat interior.

Esaki no tabata nada nobo: “ ‘Te asina leu ku e pueblo akí ta hala serka ku nan boka i ta honraMi ku nan lepnan, pero a kita nan kurason leu for di Mi, i nan temor pa Mi ta ser siñá pa e mandamentu di hende’ ” (Isa. 29:13, NKJV). E mesun konsepto akí ta ser di eko dor di Hesus siglonan despues, ora El a bisa: “ ‘I enbano nan ta adoráM, siñando komo doktrinanan e mandamentunan di hende’ ” (Marko 7:7, NKJV). Nan siñansanan humano, nan mandamentuna humano, tabata “di e mundu akí” (Juan 8:23) i, manera Hesus a bisa despues: “Ami no ta di e mundu akí” (Juan 8:23). Tabata sufisiente malu ku e hòmbernan akí tabata gañando nan mes; e tragedia a ser hasí pió pasobra nan a despistá otronan tambe, aunke, ta interesante pa bisa, Juan a skirbi ku, komo resultado di e interkambio deskribí den e versíkulonan akí, “hopi a kere den djE” (Juan 8:30, NKJV).

Pues, asta apesar di mal liderazgo, hopi hudiu por a yega mas ayá di dje i mira, pa nan mes, ken Hesus tabata.

Ki lèsnan bo ta saka for di e interkambio di Hesus ku e lidernan religioso? Kon nos por ta “di ariba” i no “di aki bou”, i kon nos por sa e diferensia?