Bendishoná ta Esnan Ku ta Kere

Bai Bèk te na Abraham

Hesus no tabata tímido ora El a deklará ken E tabata, ni ora El a yama testigunan pa testifiká di ken E tabata, asta testigunan ku a bai hopi tempu kaba, inkluyendo Abraham. “ ‘Boso tata Abraham a alegrá su mes di mira Mi dia, i el a mir'é i tabata kontentu!’ ” (Juan 8:56, NKJV).

Dikon Abraham su testimonio tabata asina importante ku el a ser inkluí den e evangelio di Juan? (Gen. 12:3; Gen. 18:16–18; Gen. 26:4; Mat. 1:1; Echonan 3:25.)

“Pa medio di tipo- i promesanan Dios ‘a prediká e evangelio di antemano na Abraham.’ Galationan 3:8. I e fe di e patriarka tabata fihá riba e Redentor benidero. Kristu a bisa e hudiunan: ‘Boso tata Abraham a alegrá su mes ku e lo a mira Mi dia; el a mir'é, i tabata kontentu.’ Juan 8:56, R.V., márgen. E chubatu ofresé na lugá di Isaac tabata representá e Yu di Dios, ku tabata bai ser sakrifiká na nos lugá. Ora hende a ser kondená na morto pa motibu di transgreshon di e lei di Dios, e Tata, ora El a wak Su Yu, a bisa e pekador: ‘Biba: Mi a haña un reskate.’ ”—Ellen G. White, Patriarchs and Prophets, p. 154.

Abraham tabata tata di e nashon hudiu. El a risibí e promesa ku, atraves di dje, tur nashon lo a ser bendishoná. E bendishon akí a bini atraves di e Mesias, nasé di su desendensia.

Abraham tabata tata tambe di esnan ku a respondé na Dios den fe (Hebr. 11:8,17-19). Su disponibilidat pa sakrifiká su yu Isaac (Génesis 22), e yu di promesa, no tabata solamente un evidensia di fe sino un bentana na e plan di salbashon.

Ora Hesus a bisa: “ ‘Boso tata Abraham a alegrá su mes pa mira Mi dia’ ” (Juan 8:56, NKJV), e lidernan a kontestá: “ ‘Bo ni tin sinkuenta aña ainda, i bo a mira Abraham?’ ” (Juan 8:57, NKJV).

E kontesta di Hesus tabata asombroso. “ ‘Di bèrdat, di bèrdat Mi ta bisa boso, promé ku Abraham tabat'ei “AMI TA’ ” (Juan 8:58, NKJV).

Hesus ta usa lenguahe rekordativo di loke Dios a bisa Moises na e mata ku tabata kima. Esaki tabata un afirmashon di ta Dios, Esun ku ta eksistí di su mes. No tin duda, e lidernan a komprondé e implikashon di loke El a bisa pasobra e ora ei nan “a piki piedra pa tira riba djE” (Juan 8:59, NKJV).

Lesa Romanonan 4:1–5. Kon Pablo ta usa e storia di Abraham akí pa revelá e gran bèrdat di salbashon pa medio di fe so, sin obranan di lei? Kon e versíkulonan akí ta yuda nos komprondé e idea di Abraham komo tata di esnan ku ta biba pa medio di fe?

E Testimonio di Maria

Seis dia promé ku fiesta di Pasku, Hesus a bin bishitá Maria, Marta, i nan ruman Lázaro, ku Hesus a resusitá. Simon, ku a ser kurá di lepra, tabata anfitrion di un fiesta komo apresio pa loke Hesus a hasi p’é. Marta tabata sirbi, i Lázaro tabata sinta na mesa huntu ku e invitadonan (Juan 12:1–8).

Kiko tabata nifikashon di e akshonnan di Maria aki? Kon esaki tabata un testimonio di ken Hesus tabata realmente? (Lesa Juan 12:1–3).

E perfume tabata masha karu, e tabatin balor di mas o ménos un aña di salario pa e trahadó normal. Probablemente Maria a kumpra e regalo akí komo un ekspreshon di gratitut na e Salbador pa e pordon di su pikánan i pa e resurekshon di su ruman hòmber. Tabata su intenshon ku un dia e lo a ser usá pa entiero di Hesus. Pero despues el a tende ku pronto E lo a ser ungí Rei. Den e kaso ei, e lo tabata esun di promé pa dun’E honor.

Probablemente Maria no tabatin intenshon pa su gesto ser ripará, pero Juan ta nota: “E kas tabata yená ku e fragansia di e perfume” (Juan 12:3, ESV). Hudas a reakshoná ku un reprenshon rápido, deklarando ku e perfume mester a ser bendé i e ganashi duná na esnan pober. Inmediatamente Hesus ta trankilisá Maria i ta deklará: “ ‘Lag'é na pas; ... Esnan pober boso tin semper serka boso, ma Ami boso no tin semper’ ” (Juan 12:7,8, NKJV).

Un tema repititivo ta kore atraves di e Evangelio. Hesus sa kiko tin den hende (Juan 2:24,25; Juan 6:70,71; Juan 13:11; Juan 16:19). Na e momento akí na e fiesta di Simon, Hesus sa kiko tin den Hudas. Juan ta kuidadoso pa mustra ken Hudas ta: un ladron egoista (Juan 12:6).

“E regalo fragrante, ku Maria a pensa di basha riba e kurpa morto di e Salbador, a el a basha riba Su forma bibu. Na e entiero su dulsura por a solamente penetrá den e graf; awor el a alegrá Su kurason ku e siguransa di su fe i amor.... I segun ku E tabata baha bai den e skuridat di Su gran prueba, E tabata hiba kunE e rekuerdo di e echo ei, un garantia di e amor ku lo tabata di djE di parti di Su redimínan pa semper.”—Ellen G. White, The Desire of Ages, p. 560.

Hesus tabata sa kiko tabatin den kurason di Maria i kurason di Hudas. E sa kiko tin den bo kurason tambe. Kiko e bèrdat akí mester bisa nos tokante e nesesidat di Kristu komo nos hustisia, ku ta transformá nos i ta kubri nos tambe?

E Testimonio Inboluntario di Pilato

Kada bes di nobo Juan ta registrá e intentonan di e lidernan religioso pa gara Hesus, pa tres’E na huisio, i pa sentensi’E na morto. Un tema den e Evangelio di Juan, ku hopi biaha Hesus ta deklará, ta ku Su tempu òf ora no a yega ainda, ku kua E tabata ke men e momento di Su krusifikashon (Juan 2:4; Juan 7:6,8,30; Juan 12:7,23,27; Juan 13:1; Juan 17:1).

Awor e ora a yega. Hesus a ser arestá den Hòfi di Getsemaní, hibá dilanti di Anas, despues Kaifas e sumosaserdote, despues dos biaha dilanti di Pilato.

Juan a yama hopi testigu di tur ámbito di bida pa testifiká ku Hesus tabata e Kristu. Awor Juan ta hasi un yamada riba Pilato, e gobernadó ku a husga Hesus. Esaki tabata un testimonio importante pasobra Pilato tabata un romano, un gobernadó, i un hues; mayoria di e otro testigunan tabata hudiu i plebeyo.

Kon e veredikto di Pilato ta konektá na e tema di e Evangelio di Juan? Juan 18:38, Juan 19:4–22.

Hesus a ser tresé serka Pilato djabièrnè mainta trempan (Juan 18:28). Su plan tabata pa despachá e prizonero rápidamente na Su destino. Pero e komportashon di Hesus a hala atenshon di Pilato. E gobernadó a kuestioná Hesus minusiosamente i a tende for di Su lepnan: “ ‘Pa e propósito akí Mi a nase i pa e propósito akí Mi a bini na mundu: pa dun atestimonio di e bèrdat. Tur hende ku ta di e bèrdat ta skucha mi bos’ ” (Juan 18:37, ESV).

Aunke e gobernadó a kondená Hesus na morto finalmente, no opstante, tres biaha el a proklamá Hesus inosente (Juan 18:38; Juan 19:4,6). I riba e krus el a skirbi e palabranan: “ ‘Hesus di Nazarèt, Rei di e hudiunan’ ” (Juan 19:1, ESV9), kompletando su testimonio di ken Hesus ta. I tòg, apesar di su testimonio di e inosensia di Kristu, el a kondená Hesus tòg na morto.

Pilato tabatin e Bèrdat Mes pará su dilanti i tòg, permitiendo e multitut tèr E, Pilato a sentensiá Hesus tòg na morto! Ki un ehèmpel trágiko di no sigui loke bo konsenshi i kurason ta bisabo ku ta korekto!

Kiko nos por siña di e ehèmpel di Pilato tokante e peligernan di permití sintimentu popular, asta preshon, stroba nos di hasi loke nos ta kere ku ta korekto?

E Testimonio di Tomas

Lesa Juan 20:19–31. Kiko nos por siña di e storia di Tomas tokante fe i duda? Ki gran eror Tomas a kometé?

Kristu a aparesé na e disipelnan despues di Su resurekshon, ora nan tabata será huntu den un sala pa motibu di miedu. Tomas no tabata huntu ku nan. Mas despues, el a tende e relatonan di e Resurekshon for di e otro disipelnan, ma el a desesperá. E no tabata pas ku su kuadro di e reino. I tambe, siguramente e mester a puntra su mes dikon Hesus lo a revelá su Mes na e otronan ora e mes no tabat’ei.

Tomas a bisa: “ ‘A ménos ku mi mira den Su mannan e marka di e klabunan, i pone mi dede den e marka di e klabunan, i pone mi man den Su kustia, lo mi no kere’ ” (Juan 20:25, NKJV).

Tomas tabata diktando e kondishonnan di su fe. E aserkamentu akí na fe den Hesus a paresé bes tras bes den Juan. Nikodemo a kontestá Hesus ku: “ ‘Kon un hende por nase ora e ta bieu?’ ” (Juan 3:4, NKJV). E muhé na e pos a puntra: “ ‘Señor, bo no tin hèmber, i e pos ta hundu. Unda bo ta haña e awa bibu ei?’ ” (Juan 4:11, NRSV). E multitut ku a ser alimentá ku e pan- i piskánan a puntra: “ ‘Ki señal bo ta bai duna nos?’ ” (Juan 6:30, NRSV).

Ta e perspektiva di “mira i despues kere” akí e Evangelio di Juan ta kontrarestá. Ora Hesus a topa ku Tomas despues di e Resurekshon, El a invit’é pa bini, mira, i mishi ku Su kurpa resusitá. Pero despues E ta bisa: “ ‘Bendishoná ta esnan ku no a mira i tòg a kere’ ” (Juan 20:29, ESV).

“Dios nunka ta pidi nos pa kere, sin duna sufisiente evidensia riba kua nos por basa nos fe. Su eksistensia, Su karakter, e verasidat di Su palabra, tur ta establesé pa medio di testimonio ku ta apelá na nos rason; i e testimonio akí ta abundante. Sinembargo, nunka Dios a kita e posibilidat di duda. Nos fe mester ta basá riba evidensia, no demostrashon.”—Ellen G. White, Steps to Christ, p. 105.

Atraves di e Palabra di Dios, atraves di e Kreashon, i atraves di eksperensia personal, nos a ser duná un kantidat inkreibel di evidensia pa nos fe den Hesus.

Si un hende mester a puntrabo: Dikon bo ta kere den Hesus? kiko lo bo a bisa?

Nos Testimonio di Hesus

Bes tras bes, ora Juan ta pesentá testimonio di Hesus, su ophetivo ta pa hiba nos na un konklushon drástiko: “I di bèrdat Hesus a hasi hopi otro señal den presensia di Su disipelnan, ku no ta skirbí den e buki akí; ma esakinan a ser skirbí pa boso por kere ku Hesus ta e Kristu, Yu di Dios, i ku keriendo boso por tin bida den Su nòmber” (Juan 20:30,31, NKJV).

Imaginá bo ku nos tabata einan, personalmente, den karni, i nos a mira Hesus ta hasi hopi di e milagernan akí. Nos lo a kere siguramente, no ta bèrdat? Nos lo tabatin gana di pensa asina; pero, di algun manera, nos tin ainda mas motibu pa kere den Hesus ku esnan ku en realidat a mira e milagernan.

Dikon?

Kiko ta algun di e kosnan ku nos tin awe, ku esnan ku a biba den tempu di Hesus no tabatin, ku mester yuda nos kere? (Lesa, por ehèmpel, Mat. 24:2, Mat. 24:14, Mat. 24:6–8.)

I esei ta pasobra nos no tin solamente e relatonan poderoso den e Evangelio di Juan, sino tambe e gran bentaha di mira asina tantu di loke Hesus i otro eskritornan di Beibel a pronostiká ku lo a bira realidat, manera e destrukshon di e tèmpel (Mat. 24:2), e plamamentu di e evangelio rònt mundu (Mat. 24:14), e gran apostasia (2 Tes. 2:3), i e mundu ku ta sigui ta un lugá kaí i malu (Mat. 24:6–8). Durante henter e bida i ministerio di Hesus, Su siguidónan a keda un grupo chikitu i molestiá di hòmber- i muhénan ku, segun tur norma humano, mester a disparsé for di historia hopi tempu pasá. Kon nan por tabata sa, manera nos sa, ku tur e kosnan akí lo a yega na sosodé? I nan a sosodé. De echo, nos propio fe mes ta eksistí komo un kumplimentu di Hesus su mes profesia ku e evangelio lo a bai na henter mundu.

I awe, masoménos dos mil aña despues, komo siguidónan di Hesus, nos tambe tin e privilegio di duna testimonio di Hesus i di loke El a hasi pa nos. No ta atraves di e rasonamentu di Natanaèl, Nikodemo, e muhé di Samaria, òf e siñansanan di e fariseonan nos por konosé Hesus komo e Mesias pa nos mes. Ta atraves di lesamentu di e Skrituranan, bou di e poder konvinsente di Spiritu Santu, nos ta aseptá Hesus komo e Salbador di mundu.

I e ora ei, kada un di nos, na nos mes manera, i for di nos propio relashon ku Dios, por tin un storia pa konta. Nos storia por ta no ta mes dramátiko manera mira e mortonan ser resusitá òf un hende ku a nase siegu ser kurá, pero esei no ta importá. Loke ta importá ta ku nos konosé Hesus pa nos mes, i na nos propio manera duna testimonio di djE, manera esnan den e Evangelio di Juan a hasi.