Lès 11
* 7 – 13 di desèmber
Tata, Yu, i Spiritu
Sabat, 7 di desèmber
Lesa pa e Estudio di e Siman Akí:
Juan 14:10,24; Gen. 3:7–9; Juan 16:27,28; Juan 16:7–11; Juan 17:1–26.
Versíkulo di Memoria:
“ ‘E Yudadó, Spiritu Santu, ku e Tata lo manda den Mi nòmber, E lo siña boso tur kos, i trese na boso memoria tur kos ku Mi a bisa boso’ ” (Juan 14:26, NKJV).
E Evangelio di Juan ta un mosaiko di tema. Juan ta apelá na señalnan (milagernan) pa mustra ku Hesus ta e Mesias ku e profetanan a primintí. Juan ta usa un seri di testigunan pa proklamá Hesus komo e Kristu. Tambe e ta usa e deklarashonnan di “AMI TA” pa indiká Su divinidat.
Tur tres miembro di e Deidat ta ser menshoná den Juan 1 (Juan 1:1–4,14,18,32–34). Pa siglonan hende a purba komprondé e naturalesa di e Deidat kompletamente, pero pasobra nos no por, hopi hende ta rechasá e idea. Ki bobo, sinembargo, ta pa rechasá algu djis pasobra nos no por komprond’e kompletamente òf pasobra e no ta pas denter di e límitenan smal di rasonamentu humano.
Juan ta bisa ku si bo ke komprondé Dios, Bo mester wak Hesus i loke a ser revelá den e Palabra. E aserkamentu akí ta habri henter un mundu nobo di relashonnan na nos: entre e Tres Miembronan di e Deidat, entre e Miembronan di e Deidat i hende, i entre hendenan mes. E lès di e siman akí ta wak kon e Evangelio di Juan ta presentá e Tata, Yu, i Spiritu Santu, pero awor denter di e konteksto di e diskurso di despedida (Juan 13–17).
Djadumingu
8 di desèmber
E Tata Selestial
E Evangelio di Juan ta skirbí for di e punto di bista di e narativo bíbliko general, kuminsando ku nos orígen. “Na prinsipio Dios a krea e shelunan i tera” (Gen. 1:1). Of: Na prinsipio e Tata, Yu, i Spiritu Santu a krea e shelunan i tera. Nan ta e Fuente di tur loke ta eksistí. Nan a krea e universo, inkluyendo e sernan ku ta biba riba dje. Riba nos planeta tabatin un kreashon spesial di bida, i e kos mas spesial di e kreashon ei tabata humanidat. I e propósito di Dios pa a krea humanidat tabata ku nos mester biba den harmonia amoroso kunE i un ku otro.
Desafortunadamente, Lucifer a trese piká den e mundu akí. Piká ta, entre otro, un kiebro di nos relashon ku Dios. E ta mal representá ken Dios ta. Asina, Hesus a tuma nos naturalesa humano riba djE pa asina restourá konosementu di Dios i pa trese salbashon pa humanidat.
Miéntras aki, Hesus a someté Su bida na e Tata, bibando di akuerdo ku Su guiansa, El a bisa: “ ‘Ami i Mi Tata ta un’ ” (Juan 10:30, NKJV). “ ‘E Tata ta den Mi i Ami ta den djE ” (Juan 10:38, NKJV). “ ‘Si Mi no ta hasi e obranan di mi Tata, no kereMi’ ” (Juan 10:37, NKJV).
Kiko tabata algun di e ròlnan di e Tata, manera ta ser deskribí den e siguiente pasashinan?
E versíkulonan akí ta presentá e Tata den estrecho konekshon ku Hesu-Kristu, Su Yu. E Tata tin kontakto íntimo ku nos mundu i un invershon profundo den nos salbashon. Kiko e bèrdat akí ta siña nos tokante e amor di Dios pa nos?
Djaluna
9 di desèmber
Hesus i e Tata
Nos a ser kreá dor di e Deidat pa un relashon personal ku Nan (Gen. 1:26,27). Sinembargo, pa motibu di piká, e relashon ei a ser interumpí radikalmente. Nos por mira e impakto inmediato di e interupshon akí den e storia di e Hòfi di Eden.
Lesa Génesis 3:7–9. Kon esaki ta revelá e kiebro ku piká a kousa, i kiko ta nifiká ku tabata Dios a buska nan, i no vice versa?
E intenshon di e Deidat tabata pa ofresé sanashon na henter humanidat pa e kiebro ei kousá pa piká, asta si henter humanidat lo no a aseptá loke Nan a ofresé.
Pa logra restourashon di e relashon akí, un Miembro di e Deidat a bira hende. Asina, e Palabra a bira karni i a biba meimei di nos, manifestando e gloria di Dios (Juan 1:14–18). Komo resultado, humanidat a risibí Su plenitut i grasia. Esaki ta loke Hesus a bin pa kompartí, pa deklará e gloria di Dios pa asina e relashon kibrá dor di piká lo por a ser restourá, a lo ménos na tur esnan ku tabata dispuesto pa aseptá, pa medio di fe, loke a ser ofresé na nan den Kristu Hesus.
Ki speransa maravioso ta ser mirá pa nos den e tekstonan akí? Juan 1:1,2; Juan 5:16–18; Juan 6:69; Juan 10:10,30; Juan 20:28.
“Den Kristu tin bida, original, no fiá, no derivá.”—Ellen G. White, The Desire of Ages, p. 530. Sinembargo, komo e Yu enkarná ku a “hasi su mes bashí” (Fil. 2:7, RSV) di e ehersisio di Su prerogativanan, Kristu, papiando di Su eksistensia riba tera komo hende meimei di hende, por a referí na Su poseshon di bida komo un don di Dios. “E divinidat di Kristu ta e kreyente su siguransa di bida eterno.”— The Desire of Ages, p. 530. Dios no a ser rekonosé dor di humanidat (Juan 17:25). Asina, El a manda Su úniko Yu (Juan 9:4; Juan 16:5) pa asina E, e Tata, lo por a bira konosí.
Den konteksto di e kòsmòs, un ateo a skirbi: “Den nos skuridat, den tur e inmensidat akí, no tin niun indikashon ku yudansa lo bin for di otro kaminda pa salba nos di nos mes.” Kiko Beibel ta siña, ku ta mustra kon robes e hòmber akí ta?
Djamars
10 di desèmber
Konosé e Yu Ta Nifiká Konosé e Tata
Den henter e Evangelio di Juan, e apòstel ta deskribí kon Hesus, e Yu, ta realisá aktividatnan ku ta mustra na e Tata. Hesus ta splika ken e Tata ta i ta mustra kiko Su relashon ku nos mundu ta. Tur esaki ta konforme Juan 1:18, ku ta bisa ku E ta hasi e Tata konosí (griego exēgeomai: splika, interpretá, eksponé). Bes tras bes Hesus ta hasi esaki. E palabra Tata (patēr) ta aparesé 136 biaha den Juan i 18 biaha den 1–3 Juan, mas ku un tersera parti di tur e usonan den Tèstamènt Nobo. E diskurso di despedida ta un di e lugánan prinsipal den e Evangelio kaminda Hesus ta hasi e Tata konosí.
Hesus tabata e representante di e Tata riba tera, i El a bin pa biba, den karni humano, boluntat di e Tata. De echo, Hesus a bisa ku den tur kos El a trata na hasi e boluntat di e Tata, i no di E mes (Juan 5:30). Esaki por parse na prinsipio un deklarashon sorprendente, pero e ta mustra kon totalmente someté Hesus, komo un ser humano, tabata na e Tata.
Hesus a bisa tambe ku El a ser mandá dor di e Tata pa terminá Su obra, salbashon di humanidat, i ku e Tata Mes a duna testimonio di Su obra (Juan 5:36–38).
Hesus a proklamá ku e Tata a mand’E pa sirbi komo e úniko atraves di ken humanidat por bin serka e Tata (Juan 6:40,44). E Tata ke pa hende tin e bida eterno ku ta ser hañá den Hesus, ku ta primintí pa lanta nan den e resurekshon.
Kiko e siguiente tekstonan ta siña nos tokante e relashon di Hesus i e Tata? Juan 7:16; Juan 8:38; Juan 14:10,23; Juan 15:1,9,10; Juan 16:27,28; Juan 17:3.
E afirmashonnan di Hesus tokante Su relashon ku e Tata ta asombroso. E ta afirmá ku tur Su siñansanan ta e siñansanan di e Tata; ku tur loke E ta bisa El a tende personalmente di e Tata; ku kerensia den djE ta meskos ku kerensia den e Tata; ku tantu Su mes palabranan komo Su obranan tur ta di e Tata; i ku E i e Tata ta uní den stima i traha pa salbashon di humanidat. Ki un testimonio poderoso di e serkania di Hesus ku Su Tata den shelu!
Kon bo bida lo a kambia si bo pensamentunan i akshonnan tabata totalmente un ekspreshon di e boluntat di Dios pa bo bida? Es desir, kon nos por biba mihó loke nos sa for di Hesus ku ta e boluntat di Dios pa nos bida?
Djárason
11 di desèmber
Spiritu Santu
Spiritu Santu no ta mes prominente den e Evangelio di Juan ku e Tata i e Yu ta. Sinembargo, Su ròl ta krusial pa e éksito di e mishon di Hesus.
Lesa Juan 1:10–13. Kiko e teksto akí ta siña nos tokante e importansia di Spiritu Santu pa kombershon?
Den e promé kapítulo di Juan, nos por mira kon sentral e ròl di Spiritu Santu ta. Juan ta bisa nos ku tur ku a risibí e Palabra (es desir, tur ku a kere den djE) a bira yunan di Dios, esnan “ku a nase, no di sanger, ni di boluntat di karni, ni di boluntat di hende, sino di Dios” (Juan 1:13, NKJV). Esaki ta bin solamente di e obra di Spiritu Santu.
Kiko e siguiente pasashinan ta bisa di e aktividatnan di Spiritu Santu? Juan 3:5–8; Juan 6:63; Juan 14:26; Juan 15:26; Juan 16:7–11.
“Ora Hesus tabata deskribí e obra di Spiritu Santu na Su disipelnan, El a trata na inspirá nan ku e goso i speransa ku a inspirá Su propio kurason. E tabata kontentu pa motibu di e yudansa abundante ku El a proveé pa Su iglesia. Spiritu Santu tabata esun di mas haltu di tur e donnan ku E por a pidi di Su Tata pa e eksaltashon di Su pueblo. E Spiritu mester a ser duná komo un agente regenerador, i sin esaki e sakrifisio di Kristu lo tabata inútil. E poder di maldat tabata fortalesiendo pa siglonan, i e sumishon di hende na e koutiverio satániko akí tabata asombroso. Piká por a ser resistí i vensé solamente atraves di e agensia poderoso di e Terser Persona di e Deidat, ku lo a bin sin energia modifiká, sino den e plenitut di poder divino.”— Ellen G. White, The Desire of Ages, p. 671.
Ki un bendishon, antó, pa risibí Spiritu Santu, ku ta sertifiká ku Dios ta berdadero (Juan 3:33). Ta e Spiritu ta konvensé di piká, di hustisia, i di huisio (Juan 3:16:8–11). Pa e motibu ei, e klave pa nos sa kiko ta korekto, kiko ta berdadero, kiko ta bon, ta nos sumishon di nos rason i eksperensianan di bida na e Palabra di Dios atraves di e poder persuasivo i konvinsente di Spiritu Santu.
Djaweps
12 di desèmber
E Orashon di Hesus
Tin biaha Juan 17 ta ser yamá e orashon sumosaserdotal di Hesus. E ta konkluí e diskurso di despedida. Hesus a bin na e tera akí pa humanidat por a ser restourá, finalmente, na su relashon personal original ku Dios. Fielmente El a realisá e señalnan ku Dios a dun’E pa hasi. Den palabra i echo, El a komuniká Dios na e hendenan.
Pronto Hesus lo a bandoná e tera akí. E tabata deseá di kompartí Su amor pa Su disipelnan un biaha mas. E tabata ke pa nan komprondé e relashon será entre E mes, e Tata, i Spiritu Santu. I E ker a trese nan den e mesun relashon personal ku Dios Tata i e Spiritu ku E Mes tabatin.
Lesa Juan 17:1–26. Kua palabranan òf frasenan den e kapítulo akí ta ekspresá e deseo di Hesus pa un relashon di amor será entre E Mes, e Tata, i Su disipelnan?
Hopi hende ta lesa Juan 17 den sentido ku e úniko kos ku ta importá ta unidat i amor. No tin duda, e propósito di Dios ta pa restourá nos na un relashon personal kunE i ku tur hende. Pero un lesamentu mas kuidadoso ta sugerí un konekshon muchu mas vital entre amor i bèrdat.
“ ‘Esaki ta bida eterno, ku nan por konoséBo, e úniko Dios berdadero’ ” (Juan 17:3, NKJV), no Dios, ken ku nos ta kere ku E ta. “ ‘Mi a hasi Bo nòmber konosí na esnan ku Bo a dunaMi, ... i nan a warda Bo palabra ... i sa den bèrdat ku Mi a bin di Bo’ ” (Juan 17:6,8, NRSV). “ ‘Santifiká nan pa medio di Bo bèrdat. Bo palabra ta bèrdat’ ” (Juan 17:17, NKJV).
Kristu a bin pa revelá e Tata. E revelashon akí tabata importante pa motibu di e hopi konseptonan eróneo tokante Dios. E Evangelio di Juan ta mustra kon na serio Hesus a tuma e mishon akí. El a representá e Palabra i akshonnan di Dios korektamente. Si bèrdat no tabata importá, pakiko bai asina leu?
Hesus a biba un bida di gran difikultat, pa finalmente ser rechasá pa e outoridatnan religioso. El a sufri indiferensia di e pueblo i asta, tin biaha, di Su mes disipelnan. Un di Su disipelnan a traishon’E, un otro a neng’E tres biaha. El a pasa atraves di un prueba insesante i a muri riba un krus na man di esnan mes ku El a bin salba.
Kon bo por reflehá mihó e amor di Dios mihó, manera ta eksistí entre Hesus i e Tata, den bo mes bida?
Djabièrnè
13 di desèmber
Mas Estudio:
Lesa Ellen G. White, “ ‘Let Not Your Heart be Troubled’ ”, p. 662-680, den The Desire of Ages; “Nota Adishonal riba [Juan] Kapítulo 1,” The SDA Bible Commentary, tomo 5, p. 911–919.
Ora nan tabata evaluá ken Hesus ta, Su oponentenan tabata husga segun normanan humano “ ‘di akuerdo ku e karni’ ” (Juan 8:15, NKJV). Esaki ta probablemente pió ainda ku husga “segun puru aparensia” (Juan 7:24, NIV). Aki nan a rekurí na e kriterio di e karni, di humanidat kaí den un mundu kaí, sin e kontrol obligatorio di e Spiritu (lesa Juan 3:3–7). Nan a mira Su “karni” manera e tabata, pero nunka a kontemplá e posibilidat ku E por tabata e Palabra ku a bira karni (Juan 1:14). Pa konsiderá Kristu segun kriterio asina limitá ta nifiká pis’E for di un punto di bista mundano (2 Kor. 5:16).
“E Konsolador ta ser yamá ‘e Spiritu di bèrdat’. Su obra ta pa definí i mantené e bèrdat. Promé E ta biba den e kurason komo e Spiritu di bèrdat, i asina E ta bira e Konsolador. Tin konsuelo i pas den e bèrdat, pero pas òf konsuelo real no por ser hañá den falsedat. Ta atraves di teorianan i tradishonnan falsu Satanas ta haña su poder riba e mente. Dor di dirigí hende na normanan falsu, e ta deformá e karakter. Atraves di e Skrituranan Spiritu Santu ta papia na e mente, i ta impreshoná bèrdat riba e kurason. Asina E ta eksponé eror, i ta kore kuné for di e alma. Ta pa medio di e Spiritu di bèrdat, ku ta obra atraves di e palabra di Dios, Kristu ta someté Su pueblo skohí na E Mes.”—Ellen G. White, The Desire of Ages, p. 671.