Señalnan di Divinidat

E Alimentashon di e Sinku Mil

Den Juan 6:4,5 e apòstel ta hasi su máksimo esfuerso pa deklará ku e tempu di e alimentashon di e sinku mil tabata serka di Pasku. Pasku tabata un konmemorashon di e liberashon di Israel for di Egipto. E lamchi di Pasku tabata tuma lugá di e morto di e primogénito. E sakrifisio akí tabata simbolisá e morto di Hesus na nos fabor. Riba e krus, e kastigu ku nos tabata meresé pa motibu di nos pikánan a kai riba Hesus, en kambio. Kristu, nos Pésah, a ser, en efekto, sakrifiká pa nos (1 Kor. 5:7).

“El a karga e kulpa di transgreshon, i e skondementu di kara di Su Tata, te ora Su kurason a ser kibrá i Su bida aplastá. Tur e sakrifisio akí a ser hasí pa pekadornan por a ser redimí.”—Ellen G. White, The Great Controversy, p. 540.

Lesa Juan 6:1–14. Kua paralelonan por ser hañá aki entre Hesus i Moises? Es desir, kiko Hesus a hasi aki ku mester a kòrda e pueblo riba e liberashon ku nan antepasadonan a risibí atraves di e ministerio di Moises?

Numeroso detaye di e storia akí ta pone Hesus paralelo na Moises den e Eksodo. E tempu di Pasku (Juan 6:4) ta mustra na e gran liberashon for di Egipto. Hesus ta subi bai riba un seru (Juan 6:3) meskos ku Moises a subi bai riba Sinai. Hesus ta tèst Felipe (Juan 6:5, 6) manera e israelitanan a ser di tèst den desierto. E multiplikashon di e pannan (Juan 6:11) ta rekordativo di e mana. E rekohementu di e kuminda ku a sobra (Juan 6:12) ta mira patras na e rekohementu di e mana dor di e israelitanan. Diesdos makutu di loke a sobra ta ser rekohé (Juan 6:13), e mesun kantidat ku e diesdos tribunan di Israel. I e hendenan ta komentá ku Hesus ta e profeta ku a bini na mundu (Juan 6:14), paralelo na e “profeta meskos ku Moises” pronostiká den Deuteronomio 18:15. Tur e puntonan akí ta señalá Hesus komo e Moises nobo, ku a bini pa libra Su pueblo.

Pues, Juan ta mustrando ku Hesus ta hasi señal- i milagernan ku, den nan konteksto, mester tabatin nifikashon spesial pa e pueblo hudiu. E tabata mustrado nan, en esensia, na Su mes divinidat.

Lesa Isaias 53:4–7 i 1 Pedro 2:24. Ki gran bèrdat e tekstonan akí ta siña tokante Hesus komo e Lamchi di Dios? Kon Su divinidat ta relashoná ku e bèrdat akí, i dikon e bèrdat akí ta e bèrdat di mas importante ku hamas nos por konosé?

“Siguramente, E Ta e Profeta”

Lesa Juan 6:14,15, 26–36. Kon e hendenan a reakshoná riba Su milager, i kon Hesus a usa esaki pa purba siña nan ken E tabata?

E hudiunan tabata spera un mesias terenal ku lo a libra nan for di e opreshon di e imperio romano. Dos di e kosnan di mas difísil ku ta topa den guera ta: alimentá e trupanan i kuida esnan heridá i morto. Atraves di Su milagernan, Hesus a demostrá ku E por a hasi tur dos.

Pero esei no ta e motibu pa kua Hesus a bini, i esei no tabata e propósito di Su milager. En kambio, e relato di e alimentashon di e 5.000 a proveé e oportunidat pa ilustrá ku Hesus ta e Pan di Bida, ku Dios Mes a baha bini for di shelu. “ ‘Ami ta e pan di bida’ ”, El a bisa. “ ‘Esun ku bin serka Mi lo no haña hamber nunka’ ” (Juan 6:35, NKJV).

Esaki ta e promé di e shete deklarashonnan “Ami ta” den e Evangelio di Juan, kaminda “Ami ta” ta konektá ku un ke otro predikado (“pan di bida”, Juan 6:35; “lus di mundu”, Juan 8:12; “porta”, Juan 10:7,9; “Bon Wardadó”, Juan 10:11,14; “resurekshon i bida”, Juan 11:25; “kaminda, bèrdat i bida”, Juan 14:6; “berdadero mata di wendrùif”, Juan 15:1,5). Kada un di e puntonan akí ta señalá un bèrdat importante tokante Hesus. E deklarashonnan “Ami ta” ta mustra bèk na Eksodo 3, kaminda Dios ta presentá su Mes na Moises komo e gran AMI TA (kompará ku Juan 8:58). Hesus ta e gran AMI TA.

Pero e hendenan no a komprondé nada di esaki.

“Nan kurason mal kontentu tabata puntra dikon, si Hesus por a hasi asina tantu obranan milagroso manera nan a testiguá, E no por a duna salú, fortalesa, i rikesa na henter Su pueblo, libra nan di nan opresornan, i elevá nan na poder i honor? E echo ku El a afirmá di ta Esun mandá di Dios, i tòg a nenga di ta rei di Israel, tabata un misterio ku nan no por a komprondé. Su rechaso a ser interpretá robes. Hopi a konkluí ku E no tabata riska afirmá Su alegashonnan pasobra E mes tabata duda di e karakter divino di Su mishon. Asina nan a habri nan kurason pa inkredulidat, i e simia ku Satanas a sembra a karga fruta di su mes sorto, den inkomprenshon i infieldat.”—Ellen G. White, The Desire of Ages, p. 385.

Nan tabata buska benefisio material na lugá di bèrdat ku ta dura te na bida eterno. Esaki ta un trampa ku nos tur ta enfrentá potensialmente, si nos no ta kuidadoso.

Kon nos por evitá di keda atrapá den kosnan material, a kosto di loke ta spiritual?

E Kurashon di e Hòmber Siegu: Parti 1

Lesa Juan 9:1–16. Kiko e disipelnan a pensa ku tabata kousa di e sieguedat di e hòmber akí, i kon Hesus a koregí nan kerensianan eróneo?

E disipelnan a hasi un konekshon entre malesa i piká. Un kantidat di pasashinan di Tèstamènt Bieu ta mustra den e direkshon ei (kompará ku Eks. 20:5; 2 Reinan 5:15–27; 2 Reinan 15:5; i 2 Kron. 26:16–21), pero e storia di Job mester tabata sufisiente pa demostrá ku un konekshon asina no semper ta e kaso.

Hesus ta aklará e asuntu, sin nenga niun konekshon entre piká i sufrimentu sino, den e kaso akí, E ta mustra na un propósito mas haltu: ku Dios lo a ser glorifiká atraves di e sanashon. E relato ta kontené sierto afinidatnan ku e historia di Kreashon, ora Dios a forma e promé hòmber for di stòf di tera (Gen. 2:7), meskos ku Hesus ta traha klei pa proveé e hòmber siegu loke tabata falta for di den barika di su mama.

Den Mateo, Marko, i Lukas, relatonan di milager ta sigui un patronchi komun: un ekspreshon di e problema, tresementu di e individuo serka Hesus, e kurashon, i rekonosementu di e kurashon ku alabansa na Dios.

Den e relato den Juan 9, e sekuensia akí ta ser kompletá den Juan 9:7. Pero, típiko di Juan, e nifikashon di e milager ta bira e punto di diskushon muchu mas amplio, ku ta hiba na un interakshon largu entre e hòmber ku a ser kurá i e lidernan religioso. E diskushon remarkabel akí ta drai rònt di dos par di konsepto kontrastante ku ta ligá ku otro: piká/obranan di Dios i sieguedat/bista.

E naradó no ta bisa e lektor te den Juan 9:14 ku Hesus a hasi e kurashon akí riba Sabat, ku, di akuerdo ku tradishon i no Skritura, a violá e Sabat. I pues, El a ser kontá komo un kibradó di Sabat dor di e fariseonan. Nan konklushon tabata ku E no tabata di Dios pasobra nan tabata persistí ku “E no ta warda Sabat.” Pero otronan tabata haña preokupante ku un pekador por a hasi señalnan asina (Juan 9:16).

E diskushon ta leu for di kaba, pero ya ta surgi un divishon. E hòmber siegu ta hañando mas i mas klaridat tokante ken Hesus ta, pero e lidernan religioso ta birando mas i mas konfundí òf siegu pa loke ta trata Su berdadero identidat.

Kiko e storia akí mester bisa nos tokante e peligernan di ta asina siegá pa motibu di nos propio kerensia- i tradishonnan, ku nos por pèrdè bèrdatnan importante nèt dilanti di nos propio bista?

E Kurashon di e Hòmber Siegu: Parti 2

Lesa Juan 9:17–34. Ki preguntanan e lidernan a hasi, i kon e hòmber siegu a reakshoná?

E sekshon largu akí di Juan 9 ta e úniko porshon di Juan kaminda Hesus no ta e aktor prinsipal, aunke E ta siguramente e tema di diskushon. Meskos ku e kuestion di piká a kuminsá e historia (Juan 9:2), e fariseonan ta kere ku Hesus ta un pekador pasobra El a kura riba Sabat (Juan 9:16,24), i nan ta kalumniá e hòmber kurá i bis’é: “Bo a nase kompletamente den piká” (Juan 9:34, NKJV).

Un kambio pekuliar ta tuma lugá. E hòmber siegu ta kuminsá mira mas i mas, no djis físikamente sino spiritualmente, miéntras e ta krese den su apresio pa Hesus i ta kere mas fuertemente den djE. E fariseonan, en kambio, ta bira mas i mas siegu den nan komprondementu: di promé, pasobra nan tabata dividí tokante Hesus (Juan 9:16), i despues, nan no sa di unda El a bini (Juan 9:29).

Mientrastantu, su relato di e milager akí ta duna Juan e oportunidat pa bisa nos ken Hesus ta. E tema di señalnan den Juan 9 ta krusa ku vários otro temanan den e Evangelio. Juan ta reafirmá ku Hesus ta e Lus di mundu (Juan 9:5; kompará ku Juan 8:12). E relato ta trata tambe ku e orígen misterioso di Hesus. Ken E ta, di unda E ta, kiko ta Su mishon (Juan 9:12,29; kompará ku Juan 1:14)? E figura di Moises, na ken ta hasi referensia den relatonan di milager anterior, tambe ta aparesé den e kapítulo akí (Juan 9:28,29; kompará ku Juan 5:45,46 i Juan 6:32). Finalmente, tin e tema di e reakshon di e multitut. Algun ta stima skuridat mas bien ku lus, miéntras otronan ta reakshoná ku fe (Juan 9:16–18, 35–41; kompará ku Juan 1:9–16, Juan 3:16–21, Juan 6:60–71).

Asina spantoso e sieguedat spiritual di e lidernan religioso ta aki. Un pididó di limosna ku un tempu tabata siegu por deklará: “ ‘Desde prinsipio di mundu tabata inkreibel ku un hende a habri wowo di un hende ku a nase siegu. Si e Hòmber akí no tabata di Dios, E lo no por a hasi nada’ ” (Juan 9:32,33, NKJV). I tòg e lidernan religioso, e guianan spiritual di e nashon, esnan ku mester tabata esnan di promé pa rekonosé Hesus i asept’E komo e Mesias, apesar di tur e evidensia poderoso, no por mir’e, òf nan no ke mir’e realmente. Ki un spièrtamentu poderoso tokante kon nos kurason por gaña nos!

Lesa 1 Korintionan 1:26–29. Kon loke Pablo ta skirbi den e versíkulonan akí ta pas ku e relato di Juan aki riba, i kon e mesun prinsipio ta apliká asta awor?

E Resurekshon di Lázaro

Juan 11 ta yená ku tristesa: e notisia tristu di malesa di un amigu stimá (Juan 11:1–3); e yoramentu pa motibu di su morto (Juan 11:19,31,33); e lamento di e ruman muhénan ku Lázaro lo no a muri si Hesus tabata presente (Juan 11:21,32); i Hesus mes su lágrimanan (Juan 11:35).

Pero Hesus a tarda dos dia promé ku El a kuminsá Su biahe pa bai serka Lázaro (Juan 11:6), i asta El a indiká ku E tabata kontentu ku E no a bai mas promé (Juan 11:14,15). E akshon akí no tabata pa motibu di niun frialdat di kurason. Mas bien, tabata pa revela e gloria di Dios.

Pa momento ku nos yega na Juan 11:17–27, Lázaro tabatin kuater dia morto, i su kurpa lo tabata putri kaba. Manera Marta a bisa: “ ‘Señor, na e momento akí tin un oló stinki, pasobra e tin kuater dia morto’ ” (Juan 11:39, NKJV). No tin duda, e tardansa di Hesus solamente a yuda hasi e milager ku a sigui ainda mas asombroso. Resusitá un kurpa ku ta putriendo? Ki prueba mas Hesus por a duna ku en bèrdat E tabata Dios Mes?

I, komo Dios, komo Esun ku a krea bida na komienso, Hesus tabatin poder riba morto. Pues, Hesus ta usa e oportunidat akí, esun di e morto di Lázaro, pa revelá un bèrdat krusial tokante E mes. “ ‘Ami ta resurekshon i bida. Ken ku kere den Mi, maske e muri, tòg e lo biba, i tur ku biba i kere den Mi, lo no muri nunka’ ” (Juan 11:25,26, ESV).

Lesa Juan 11:38–44. Kiko Hesus a hasi ku a sostené Su afirmashon?

Meskos ku Hesus a demostrá ku E ta e Lus di mundu (Juan 8:12, Juan 9:5) ora El a duna e hòmber siegu bista (Juan 9:7), E ta lanta Lázaro for di morto aki (Juan 11:43,44) i ta demostrá asina ku E ta Resurekshon i Bida (Juan 11:25).

E milager akí, mas ku kualke otro, ta mustra na Hesus komo e Dunadó di Bida, komo Dios Mes. E ta proveé sosten fuerte pa e tema di Juan ku Hesus ta e Yu divino di Dios i ku, ora nos kere, nos por tin bida atraves di djE (Juan 20:30,31).

Sinembargo, pa momento ku nos yega na final di e storia inkreibel akí (Juan 11:45–54), den kua hopi ku a mira a kere (Juan 11:45), un ironia poderoso pero tristu ta desaroyá. Hesus ta demostrá ku E por resusitá morto, i tòg, e hòmbernan akí ta kere ku nan por stòp E dor di mat’E? Ki un ehèmpel di e debilidatnan di humanidat kontrali na e sabiduria i poder di Dios!