Mas Testimonio Tokante Hesus

Humildat di Alma: Juan Boutista ta Testifiká Atrobe

Lès 2 a deskribí kon e testimonio di Juan Boutista a trese e promé disipelnan, Andrés i Juan, Pedro, Felipe i Natanael, serka Hesus. Lo bo a spera ku e Boutista, despues di a duna su testimonio, lo a bai for di esena. Pero e ta bolbe aparesé vários biaha den e Evangelio di Juan.

Lesa Juan 3:25–36. Kon Juan Boutista ta kompará su mes ku Hesus?

A surgi un disputa entre e disipelnan di Juan Boutista i un hudiu anónimo tokante purifikashon, probablemente un kuestion riba e efikasia di boutismo (kompará ku Marko 1:4,5). Ta interesante pa bisa ku, ora su disipelnan bini serka Juan, sin duda pa resolvé e asuntu, nan ta trese Hesus dilanti, bisando: “ ‘E ta batisando, i tur hende ta bai serka dje’ ” (Juan 3:26, ESV). No ta difísil pa lesa entre liña: nan ta yalurs riba Hesus, yalurs pa nan maestro, i yalurs pa nan mes tambe.

Lo tabata masha fásil pa Juan entregá su mes na yalursheit, pero e no ta hasié, pasobra e sa kiko su mishon tabata. En kambio, e ta kòrda su disipelnan ku nunka el a afirmá di ta e Kristu. Al kontrario: el a bini pa mustra na djE, pa prepará e kaminda p’E, pa ta un testigu riba djE (Juan 1:6–8).

Usando e ilustrashon di un kasamentu, e ta yama su mes e amigu di e brùidehòm, ku Hesus komo e brùidehòm. E brùit lo tabata e pueblo di Dios (kompará ku Hos. 2:16–23 i Isa. 62:1–5). Despues, ku palabranan ku ta mustra e grandesa berdadero di Juan, e ta bisa: “E mester oumentá, ma ami mester bira ménos” (Juan 3:30).

Juan 3:31–36 ta sigui ku e komparashon entre Hesus i Juan, mustrando e superioridat di e Mesias riba su predesesor. Ku e testimonio di Juan ku ta mustra na Hesus, e idea di testimonio ta ser enfatisá atrobe. Esnan ku risibí e testimonio ei i kere den Hesus tin bida eterno. Esnan ku no risibiE ta permanesé bou di e rabia di Dios. Esei ta loke e teksto ta bisa. Dios ta stima mundu i a manda Su Yu pa redimí mundu (Juan 3:16,17). Pero esnan ku rechasá e regalo ofresé na nan lo tin ku paga e kastigu pa nan mes pikánan: morto eterno.

Kon nos por siña e lès di humildat dilanti di tantu Dios komo humanidat? Kiko nos por siña di e ehèmpel di Juan aki tokante humildat di alma?

Komprondementu Nobo di e Mesias

Lesa Juan 1:32–36. Kiko Juan Boutista ta bisa aki tokante Hesus ku e hendenan no a spera tokante e Mesias tan sperá?

E hudiunan tabata anhelá binida di un Mesias ku lo a libra nan di e gobièrnu di Roma. Pa hopi tempu bou di opreshon, e hudiunan tabata kere ku e Mesias no solamente lo a basha Roma abou sino lo a establesé nan komo un nashon grandi i poderoso. E palabranan di Juan, sinembargo, yamando Hesus “e Lamchi di Dios”, aunke e tabata mustra direktamente na Su sakrifisio ekspiatorio, probablemente a ser mal komprondé dor di mayoria hende. Nan lo no tabata sa mes di kiko e tabata papiando.

Pues, ku su Evangelio Juan ker a kambia nan komprondementu di e Mesias pa asina nan por a rekonosé den Hesus e kumplimentu di e profesianan tokante e Rei benidero i loke E lo a hasi. E no tabata bini komo un lider polítiko i militar sino pa ofresé su Mes komo un sakrifisio pa e pikánan di mundu. Esei tabata Su propósito. Solamente despues di esei, ora tur kos a terminá, e reino final lo bini (lesa Dan. 7:18).

“Ora, na e boutismo di Hesus, Juan a mustra na djE komo e Lamchi di Dios, un lus nobo a ser tirá riba e obra di e Mesias. Mente di e profeta tabata dirigí riba e palabranan di Isaias: ‘E ta ser hibá manera un lamchi pa ser matá.’ Isa. 53:7.”—Ellen G. White, The Desire of Ages, p. 136.

Juan ta bisa den Juan 1:31: “ ‘Mi tabata konos’E’ ” (NKJV). Asina, kon antó Juan a yega na konosé Hesus komo e Mesias? E kontesta ta ku e Señor ku a manda Juan, a bis’é anteriormente: “ ‘Riba esun ku bo mira Spiritu Santu baha, i keda riba djE, esaki ta Esun ku lo batisá ku Spiritu Santu.’ Anto mi a mira i a testifiká ku esaki ta e Yu di Dios’ ” (Juan 1:33,34, NKJV). Ku otro palabra, Dios a revelá na Juan ku Hesus tabata e Mesias.

“Kristu [ta] e poder di Dios i e sabiduria di Dios (1 Kor. 1:24, NKJV). Konosementu ku Hesus ta e Kristu ta bini di Dios Mes atraves di e poder konvinsente di Su Spiritu. E tema akí ta aparesé frekuentemente den Juan. Salbashon no ta bini di filosofia mundano, siensia, òf edukashon mas haltu. E ta bini solamente di Dios na un kurason ku a someté den fe i obediensia na Hesus.

Kon nos lo a konosé e bèrdat tokante Hesus komo nos sakrifisio ekspiatorio a ménos ku el a ser revelá na nos? Dikon, antó, konosé Beibei i loke e ta siña tokante Hesus ta asina krusial?

Aseptashon i Rechaso

Lès 2 a deskribí e alimentashon di e 5.000 den Juan 6 ma no a kubri e sekshon final di e storia ei, ku ta ser studiá aki.

Lesa Juan 6:51–71. Kiko Hesus a bisa ku hende tabatin problema pa aseptá?

Despues di a ser alimentá, milagrpsamente, dor di Hesus, e hendenan tabata kla pa koron’E komo rei (Juan 6:1–15). Pero ora E ta papia ku nan mas despues na e snoa di Capernaum, E ta splika e nifikashon spiritual di e milager, bisando: “Ami ta e pan di bida” (Juan 6:35). E ta eksponé den mas detaye ku e pan akí ta Su karni, ku E ta duna pa bida di mundu (Juan 6:51).

E palabra akí a habri bista di e multitut pa e echo ku Hesus lo no tabata nan rei terenal. E no tabata pas ku e malchi produsí pa pensamentu terenal. Nan a rechasá kombershon, ku lo a transformá e manera ku nan tabata pensa pa asina nan por a rekonosé i aseptá Hesus komo e Mesias. Hopi di Su disipelnan a bandon’E na e punto akí (Juan 6:66).

For di un sentido humano, esaki mester tabata difísil pa Hesus. E aprobashon di e multitut ta agradabel. Ken no ke ta gustá? Pero mira hopi hende hala atras i kuestioná bo prinsipionan ta naturalmente desalentador tambe. Ora Hesus a mira e multitut bai, E ta puntra su sírkulo íntimo, e Diesdos, si nan tambe ke bai.

Esaki ta momento ku Pedro ta hasi su konfeshon asombroso, un otro testimonio na tantu loke Hesus tin komo ken E ta. “ ‘Abo tin e palabranan di bida eterno, i nos a kere, i nos a haña sa, ku Bo ta Esun Santu di Dios’ ” (Juan 6:68,69, ESV).

E disipelnan tabata huntu ku Hesus durante un par di aña, biahando kunE, mirando Su milagernan, i ta tende Su predikashinan. Nan tabata sa di eksperensia ku no tabatin niun hende komparabel kunE. E konvikshon a bini riba nan ku, maske kon inusual algun situashon lo por tabata, e hòmber akí tabata e Mesias, apesar di kuantu nan no tabata komprondé ainda tokante e propósito di Su binida. Solamente despues di Su morto i resurekshon nan a kuminsá komprondé pakiko Hesus a bini.

Kiko nos por siña di e storia akí tokante e echo ku generalmente e mayoria ta robes? Dikon nos mester kòrda esaki, spesialmente ku e aspektonan di nos fe ku ta impopular sera e mayoria, asta e mayoria di kristiannan?

E Testimonio di e Tata

E Evangelio di Juan ta kuminsá ku papia tokante e Palabra (logos) ku ta huntu ku Dios; es desir, ta huntu ku Dios e Tata (Juan 1:1). Ora e Palabra a bira karni, e Spiritu a testifiká tokante Hesus ora El a sosegá riba djE na Su boutismo (Juan 1:32–34). Pero e Tata tambe ta testifiká tokante Hesus durante Su ministerio terenal.

Lesa Juan 5:36–38. Kiko Hesus ta bisa aki tokante e Tata?

Hesus ta vinkulá e Tata na e obra- i milagernan ku El a realisá. E ta masha kla ku e Tata a mand’E i tambe a testifiká tokante djE.

Lesa Mateo 3:17, Mateo 17:5, Marko 1:11, i Lukas 3:22 (lesa tambe 2 Pe. 1:17,18). Kiko e Tata ta bisa tokante Hesus?

Na e boutismo di Hesus, e Tata i e Spiritu a uni ku e Yu pa marka e okashon importante akí: e komienso di e ministerio di Hesus. E Tata ta deklará ku Hesus ta Su Yu stimá den ken E tin plaser. Pero, na un momento krusial den e ministerio di Kristu, e Tata ta bolbe papia, e biaha akí manera ta registrá den e Evangelio di Juan.

Kosnan tabata yegando un klímaks den e último dianan di e ministerio ei. E lidernan religioso, ku no por a stòp E (lesa Juan 12:19), tabata ker E morto, awor mas ku nunka. E multitut tabata entusiasmá riba djE, spesialmente segun ku mas i mas hende, ora nan a tende e testimonio di esnan ku a mir’E lanta Lázaro for di morto (Juan 12:17,18), a kuminsá ta sigui Hesus. Asta griegonan, ku tabata ei pa e fiesta, ker a mira Hesus.

Na e punto akí, komo kontesta riba e palabranan di Hesus den Juan 12:28: “ ‘Tata, glorifiká Bo nòmber’ ”, e Tata ta bolbe papia for di shelu: “ ‘Mi a glorifik'é, i lo Mi glorifik’e atrobe’ ” (Juan 12:28, ESV).

Manera nos a mira kaba, e ora di gloria di Hesus ta e krus. Pues, e testimonio di e Tata tokante Hesus ta mustra na e gran sakrifisio di e Lamchi di Dios pa pikánan di mundu. E ta e kulminashon di Su ministerio terenal. Su morto na nos fabor a paga e kastigu kompleto pa tur nos pikánan, i den djE, pa medio di fe, nunka nos tin ku enfrentá e kastigu ei nos mes.

E Testimonio di e Multitut

“Riba e último dia, e gran dia di e fiesta, Hesus a lanta para i a grita, bisando: ‘Si kualke ende tin set, lag’é bin serka Mi i bebe. Esun ku kere den Mi, manera Skritura ta bisa, for di su kurason lo kore riunan di awa bibu’ ” (Juan 7:37,38, NKJV).

Juan a registrá, numeroso biaha, Hesus hasiendo deklarashonnan oudas tokante E mes, tokante ken E tabata i loke El a bin hasi.

E liñanan sitá aki riba di Juan 7:37,38 ta un otro ehèmpel di loke Hesus a afirmá tokante E mes i tokante loke E lo a hasi ku tur esnan ku bini serka djE. Esakinan tabata afirmashonnan asombroso tambe.

Ora Hesus a papia ku e hudiunan ku a asistí na e Fiesta di Tabernakel, kiko tabata e reakshon di hopi den e multitut? (Lesa Juan 7:37–53.)

Algun hende a bisa ku E tabata e Profeta manera Moises a pronostiká hopi tempu pasá (lesa Deut. 18:15–19). Otronan a pensa ku Hesus tabata e Kristu. Pero esaki a trese e argumento ku e Mesias lo no a bini for di Galilea, ku E mester tabata di e liña di David, i ku E mester a nase na Bètlehèm, di kua tur tabata bèrdat tokante Hesus (kompará ku Mateo 1–2), aunke hopi no tabata parse di sa esaki!

Asta e ofisialnan ku a arest’E a keda strobá pa E i e elokuensia di Su palabranan. E fariseonan a kontestá e ofisialnan ku un otro pregunta. “ ‘Kualke di e gobernantenan òf e fariseonan a kere den djE?’ ” (Juan 7:48, NKJV). E pregunta akí di e fariseonan a duna Juan e oportunidat atrobe di trese Nikodemo, ku, despues ku e tabatin su enkuentro ku Hesus, tabata trata na protehá Hesus for di nan intriganan. “ ‘Nos lei t husga un hende promé ku e tend'é i sa kiko e ta hasiendo?’ ” (Juan 7:51, NKJV).

Nikodemo a yega di aseptá Hesus komo e Mesias? Aunke e esena akí no ta proba ku el a asept’E, entre e akto akí i loke el a hasi despues ku Hesus a muri (lesa Juan 19:39,40), Beibel ta duna nos evidensia sólido ku Nikodemo, de echo, a yega na kere den djE.

I asina, e kontesta riba nan pregunta tabata, sí, de echo, un di e fariseonan a kere den djE finalmente.

Lesa Juan 7:49. Kiko e lidernan tabata bisando ku a mustra nan malkontentu pa e masa ku tabata sigui Hesus? Ki lès lo por tin pa nos aki?