Dios ta Stima Libremente

Lesa pa e Estudio di e Siman Akí:

Versíkulo di Memoria:

Aunke Pedro a nenga Hesus tres biaha, meskos ku Hesus a pronostiká (Mat. 26:34), e nengamentunan akií no tabata fin di e storia. Despues di e Resurekshon, Hesus a puntra Pedro: “ ‘Bo ta stimaMi mas ku esakinan?’ ” I Pedro a kontestá: “ ‘Sí, Señor; Bo sa ku mi ta stimaBo.’ ” I Hesus a bisa: “ ‘Kuida Mi lamchinan.’ ” E ora ei, Hesus a bolbe puntra Pedro: “ ‘Bo ta stimaMi?’ ” I Pedro a kontestá “ ‘Sí, Señor; Bo sa ku mi ta stimaBo.’ ” I Hesus a bisa: “ ‘Pastoriá Mi karnénan.’ ” Despues, atrobe, pa di tres biaha Hesus a puntra Pedro: “ ‘Bo ta stimaMi?’ ” I “Pedro a bira tristu pasobra El a bis’é un di tres biaha: ‘Bo ta stimaMi?’ ” I Pedro a kontestá: “ ‘Señor, Bo sa tur kos; Bo sa ku Mi ta stimaBo.’ ” I Hesus a bisa, “ ‘Kuida Mi karnénan’ ” (Juan 21:15–17, NASB 1995). Meskos ku Pedro a nenga Hesus tres biaha, Hesus, pa medio di e pregunta krusial: “ ‘Bo ta stimaMi?’ ”, a restourá Pedro tres biaha.

Maske kon diferente nos sirkunstansianan por ta for di esun di Pedro, den hopi forma e prinsipio ta meskos. Es desir, e pregunta ku Hesus a hasi Pedro ta realmente e pregunta final ku Dios ta hasi na kada un di nos den nos tempu i lugá: Bo ta stimaMi?

Tur kos ta dependé di nos kontesta riba e pregunta ei.

Mas ayá di Ekspektativanan Rasonabel

Dios no solamente ta puntra nos: “Bo ta stimaMi,” sino Dios Mes ta stima kada persona, i ta hasi esaki libremente. Enbèrdat, E ta stima abo i ami i tur otro persona libremente mas ku posiblemente nos por a imaginá. I nos konosé e amor akí dor di e manera ku El a aktua den e historia di Su pueblo.

Lesa Eksodo 33:15–22 i konsiderá e konteksto di e versíkulonan akí i e narashon den kua nan ta aparesé. Kiko e pasashi akí, spesialmente versíkulo 19, ta revelá tokante e boluntat i amor di Dios?

Tur kos tabata parse pèrdí. No muchu tempu despues di e liberashon asombroso di Dios di Su pueblo for di sklabitut na Egipto, e pueblo di Israel a rebeldiá kontra Dios i a adorá un bisé di oro. Ora Moises a baha for di e seru, el a mira loke nan a hasi, i el a tira e tablanan, ku tabatin e Dies Mandamentunan, abou i a kibra nan na wèrki. Aunke e pueblo a pèrdè kualke derecho riba e privilegionan di pakto i bendishonnan ku Dios a otorgá nan libremente, Dios a skohe libremente pa sigui di tur manera ku nan den relashon di pakto, apesar di nan indignidat pa e bendishonnan di pakto.

E palabranan di Eksodo 33:19: “ ‘Lo mi ta mizerikòrdioso na esun ku lo mi ke ta mizerikòrdioso, i lo mi tin kompashon di esun ku lo mi ke tin kompashon’ ” (NKJV), hopi biaha ta ser mal komprondé di ta nifiká ku Dios arbitrariamente ta skohe pa ta kompasivo i mizerikòrdioso ku algun, pero no pa otronan. Sinembargo, den konteksto, Dios no ta bisando aki ku E lo ta arbitrariamente mizerikòrdioso i kompasivo ku algun i no ku otronan. No ta asina Dios ta funshoná, kontrali na algun teologia popular den kua Dios ta predestiná algun pa bai pèrdí i pa enfrentá kondena eterno.

Kiko antó Dios ta proklamando aki? Esensialmente, Dios ta proklamando ku, komo e Kreador di tur kos, E tin e derecho i outoridat pa duna grasia i kompashon libremente na asta e hendenan di mas indigno. I E ta hasiendo esei den e situashon akí, asta despues di e rebelion di e bisé di oro, dor di duna mizerikòrdia na Su pueblo, Israel, asta si nan no tabata meresé esaki.

Esaki ta un di hopi kaso den kua Dios ta manifestá Su amor i ta hasi esaki mas ayá di kualke ekspektativa rasonabel. Bon notisia pa nos tur, no ta bèrdat?

Den ki formanan Dios a sigui revelá i manifestá Su amor na bo, asta mas ayá di kualke ekspektativa rasonabel?

Amor di Un Banda So

Dios su ehèmpel notabel di Su amor pa humanidat kaí ta ser hañá den e storia di Oseas. Dios a ordená profeta Oseas: “ ‘Bai, tuma pa bo mes un esposa di prostitushon i yunan di prostitushon, pasobra e tera a kometé gran prostitushon dor di apartá for di Señor’ ” (Os. 1:2, NKJV). Oseas i su esposa infiel mester tabata un lès ophetivo bibu di e amor di Dios pa Su pueblo, asta apesar di Israel su infieldat i prostitushon spiritual. Es desir, e ta un storia di Dios su amor otorgá libremente na esnan ku no meresé esaki.

Enbèrdat, apesar di e fieldat i amor di Dios, e pueblo a rebeldiá kontra djE, bes tras bes, tambe. Di akuerdo ku esaki, Skritura ta deskribí Dios repetidamente komo e amante, sin kontesta di un esposo infiel. El a stima Su pueblo perfektamente i fielmente, pero nan a despresi’E i a sirbi i adorá otro diosnan, hasiendo E profundamente tristu i kibrando e relashon, aparentemente mas ayá di reparashon.

Lesa Oseas 14:1–4. Kiko e versíkulonan akí ta revelá tokante e amor firme di Dios pa Su pueblo?

Despues di rebelion ripití dor di Su pueblo, Dios ta deklará: “ ‘Lo Mi kura nan apostasia, lo Mi stima nan libremente’ ” (NKJV). E término “libremente” den e frase “ ‘Lo mi stima nan libremente’ ” a tradusí un palabra hebreo (nedabah), ku ta impliká e loke ta ser ofresé boluntariamente. E ta e mesun término ku ta ser usá di e ofrendanan boluntario den e sistema di santuario.

Den henter Oseas, i den henter e narativonan di Skritura, Dios ta mustra kompromiso i kompashon asombroso na Su pueblo. Aunke nan a bai tras di otro amantenan kada bes di nobo, kibrando e relashon di pakto, aparentemente mas ayá di reparashon, Dios di Su mes boluntat liber, a sigui otorgá Su amor na nan. E pueblo no tabata meresé e amor di Dios; nan a rechasá i pèrdè tur derecho legítimo riba dje. Sinembargo, Dios a sigui otorgá amor na nan sin ningun obligashon, moral òf di otro manera. Aki i otro kaminda, Skritura ta desplegá e amor di Dios konsistentemente komo liber i boluntario.

Amor duná libremente

Dios no solamente a sigui basha Su amor libremente riba Israel, apesar di rebelionnan ripití, pero Dios ta sigui basha amor libremente tambe riba nos, asta miéntras nos ta pekadornan. Nos no meresé e amor di Dios, i nunka nos por a gana esei. Al kontrario, Dios no tin mester di nos. E Dios di Beibel no tin mester di nada (Echonan 17:25). E amor di Dios pa bo i pa ami i pa tur hende ta kompletamente di Su propio boluntat.

Kompará Revelashon 4:11 i Salmo 33:6 . Kiko e versíkulonan akí ta bisa nos tokante e libertat di Dios pa loke ta trata Kreashon?

Dios a krea e mundu akí libremente. I, pa motibu di esaki, Dios ta digno di tur gloria, honor i poder. Dios no tabatin mester di krea ningun mundu. Promé ku fundashon di mundu, Dios ya tabata disfrutá di e relashon di amor ku tabata eksistí denter di e Divinidat.

Lesa Juan 17:24. Kiko e ta bisa nos tokante e amor di Dios promé ku mundu tabata eksistí?

Dios no tabatin mester di kriaturanan komo opheto di Su amor. Pero, di akuerdo ku Su karakter di amor, Dios a skohe pa krea mundu i drenta den un relashon di amor ku kriaturanan.

No solamente Dios a krea e mundu akí libremente komo un regalo di Su amor generoso, pero Dios ta sigui stima hende libremente tambe, asta despues ku hende a kai den piká den Eden, i asta despues ku nos ta peka personalmente.

Despues di e Kaida den Eden, Adam i Eva no tabatin derecho di sigui biba i risibí e amor di Dios. Pero Dios, kende ta sostené “tur kos pa medio di e palabra di Su poder” (Hebr. 1:3, NKJV), den Su gran amor, mizerikòrdia, i grasia a sostené nan bida i a krea un manera pa rekonsiliá humanidat bèk ku Su mes den amor . I e rekonsiliashon ei ta inkluí nos tambe.

Hopi Ta Yamá, ma Poko Ta Skohí

Dios no solamente ta stima hende di Su mes boluntat liber, pero E ta invitá nan tambe pa stim’E a kambio. Ku Dios ta duna nan e abilidat pa skohe libremente sea ku nan lo aseptá òf rechasá Su amor ta bisto den (entre otro lugánan) Kristu su parabel di e bankete di kasamentu.

Lesa Mateo 22:1–14. Kiko ta nifikashon di e parabel akí?

Den Kristu su parabel di e bankete di kasamentu, un rei ta regla un matrimonio pa su yu hòmber i ta manda su sirbidónan pa bai “ ‘yama esnan ku tabata invitá na e kasamentu,’ ” pero “ ‘nan no tabata dispuesto pa bini’ ” (Mat. 22:2,3, NKJV). Mas ku un biaha e rei a manda su sirbidónan bai pa yama nan, pero nan a ignorá su yamada i, pió ainda, a gara su sirbidónan i a mata nan (Mat. 22:4–6).

Mas despues, despues di a atendé ku esnan ku a mata algun di su sirbidónan, e rei a bisa su sirbidónan: “ ‘E kasamentu ta kla, ma esnan ku tabata invitá no tabata digno. P’esei, bai den e kamindanan grandi, i invitá tur hende ku boso haña na e kasamentu’ ” (Mat. 22:8,9, NKJV). Despues di un otro episodio di un hòmber sin un paña di kasamentu ku a ser saka afó, loke ta nifiká e nesesidat di risibí un paña di kasamentu for di e rei pa asistí na e bankete di kasamentu, Hesus ta sera e parabel ku e frase kríptiko pero altamente signifikante: “ ‘Hopi ta yamá, ma poko ta skohí’ ” (Mat. 22:14, NKJV).

Kiko esaki ta nifiká? Esnan ku finalmente ta ser “skohí,” e “skohínan”, ta esnan ku a aseptá e invitashon di Señor na e kasamentu. E término tradusí “yama” i “invitá” den henter e parabel ta e término griego kaleo (yama, invitá), i loke ta determiná ken finalmente ta “skohí” (eklektos) ta si un hende a aseptá e invitashon libremente.

De echo, Dios ta yama (esta, ta invitá) tur hende na e fiesta di kasamentu. Sinembargo, kualke un di nos por rechasá e amor di Dios. Libertat ta esensial pa amor. Dios nunka lo fòrsa Su amor riba niun hende. Ta tristu pa bisa ku nos por rechasá di tin un relashon di amor ku Dios.

E “skohínan” ta esnan ku ta aseptá e invitashon. Pa esnan ku ta stima Dios, Dios a prepará kosnan mas maravioso ku kualke kos ku posiblemente nos por a imaginá. Un biaha mas, tur kos ta yega na e kuestion di amor i e libertat inherente den amor.

Krusifiká pa Nos

Dios ta invitá tur hende den un relashon di amor kunE, pero solamente esnan ku aseptá e invitashon libremente ta disfrutá di e resultadonan eterno. Manera ta ser mirá den e parabel di e bankete di kasamentu, hopi di esnan ku e rei a yama “ ‘no tabata dispuesto pa bini’ ” (Mat. 22:3, NKJV).

Di akuerdo ku esei, poko promé ku Su krusifikashon, Kristu a lamentá: “ ‘O Jerusalèm, Jerusalèm, esun ku ta mata e profetanan i ta piedra esnan ku ta ser mandá serka dje! Kuantu biaha mi ker a reuní bo yunan huntu, manera un galiña ta reuní su yunan bou di su alanan, pero boso no tabata ke!’ ” (Mat. 23:37, NKJV). Kristu ker a reuní nan, pero nan no tabata dispuesto. E mesun verbo komun griego ku ta nifiká “ke” (thelo) ta ser usá tantu di Kristu su deseo di salba nan, komo di nan falta di boluntat pa ser salbá (i e mesun término ta den Mateo 22:3 aki riba, tambe).

Sinembargo, Kristu a bai na krus pa e hendenan akí i pa nos. Amor asombroso! Miéntras ku piká humano ta meresé morto, Dios Mes (den Kristu) a paga e preis i a krea un manera pa drecha e relashon kibrá entre shelu i tera. Mientrastantu, E ta sigui basha Su amor riba nos, ounke E no ta bou di ningun obligashon mas ayá di Su mes kompromiso liber pa hasi esaki.

Lesa Juan 10:17 i 18. Kompará ku Galationan 2:20 . Kiko ta e mensahe pa nos aki den e tèkstnan akí?

Den e demostrashon final di e amor di Dios, e Krus, nos ta mira ku Kristu a duna Su mes pa nos di Su mes boluntat liber. Kristu a entregá Su bida di Su “propio inisiativa”. Niun hende a kita Su bida for di djE; El a ofres’é libremente, di akuerdo ku e plan di redenshon akordá den shelu promé ku fundashon di mundu.

“E plan pa nos redenshon no tabata un idea di último momento, un plan formulá despues di e kaida di Adam. E tabata un revelashon di ‘e misterio ku a ser tené den silensio atraves di tempunan eterno.’ Romanonan 16:25, R.V. E tabata un despliegue di e prinsipionan ku for di siglonan eterno tabata e fundeshi di e trono di Dios. For di prinsipio, Dios i Kristu tabata sa di e apostasia di Satanas, i di e kaida di hende atraves di e poder engañoso di e apóstata. Dios no a ordená ku piká mester a eksistí, sino El a antisipá su eksistensia, i a hasi provishon pa enfrentá e emergensia teribel. Asina grandi Su amor pa mundu tabata, ku El a hasi un pakto di duna Su Yu unigénito, ‘pa ken ku kere den djE no mester peresé, ma tin bida eterno.’—Ellen G. White, The Desire of Ages, p. 22.

Lesa Ellen G. White, “To Meet the Bridegroom,” p. 405–421, den Christ’s Object Lessons.

“Ta e skuridat di mal komprondementu di Dios ta envolví mundu. Hende ta pèrdiendo nan konosementu di Su karakter. El a ser mal komprondé i malinterpretá. Na e tempu akí un mensahe di Dios mester ser proklamá, un mensahe ku ta iluminante den su influensia, i salbador den su poder. Su karakter mester ser hasí konosí. Den e skuridat di mundu mester ser deramá e lus di Su gloria, e lus di Su bondat, mizerikòrdia, i bèrdat.

“Esaki ta e trabou diseñá pa profeta Isaías den e palabranan: ‘O Jerusalèm, abo ku ta trese bon notisia; lanta bo bos ku forsa; lanta bo bos, no tene miedu. Bisa e statnan di Juda: Ata boso Dios! Ata, Señor DIOS ta bin ku poder, i Su brasa lo goberná p'E; ata, Su rekompensa ta bin huntu kunE, i Su obra ta bin Su dilanti.’ Isa. 40:9,10.

“Esnan ku ta warda riba e binida di e Brùidehòm mester bisa e pueblo ‘Ata boso Dios.’ E último rayonan di lus mizerikòrdioso, e último mensahe di mizerikòrdia ku mester ser duná na mundu, ta un revelashon di Su karakter di amor. E yunan di Dios mester manifestá Su gloria. Den nan propio bida i karakter nan mester revelá loke e grasia di Dios a hasi pa nan.

“E lus di e Solo di Hustisia mester bria den bon obranan, den palabranan di bèrdat i echonan di santidat.”—Ellen G. White, Christ’s Object Lessons, p. 415,416.

Preguntanan pa Diskushon: