Dios ta amor. Asina 1 Juan 4:8 i versíkulo 16 ta bisa. Beibel kompletu ta testifiká di e echo akí. E fe kristian ta sentrá riba e karakter di amor di Dios. Amor ta e núkleo di ken Dios ta, na núkleo di tur loke nos ta kere, i mester ta na e núkleo di tur loke nos ta hasi. Di akuerdo ku esaki, e manera ku nos ta komprondé amor ta afektá e totalidat di nos fe i práktika. Si, por ehèmpel, un hende ta kere ku e amor di Dios mester ser ganá òf meresé, un persona lo por pensa ku Dios no ta stim’é pasobra nan ta pekaminoso i indigno. I, relashoná ku otronan, un hende lo por spera ku otronan ta meresé amor: un reseta pa desaster.
Di e manera akí i hopi otro, kon nos ta komprondé e amor di Dios tin implikashonnan masivo pa nos fe i práktika. Sinembargo, kiko ta amor? Si bo puntra dies hende pa definí amor, lo bo por haña dies diferente kontesta. Asta entre kristiannan, tin hopi mito i mal komprondementu tokante e amor di Dios.
Por ehèmpel, kristiannan ta ofresé diferente kontesta riba preguntanan manera:
E amor di Dios ta duna solamente pero nunka ta risibí? Amor divino ta puramente sakrifisio propio, òf kisas Dios por deleitá tambe den i ser agradá pa hende? E amor di Dios ta emoshonal? Dios realmente ta preokupá pa hende? E amor di Dios por ser rechasá òf pèrdí? Dios ta drenta den un relashon di amor di bai bin ku kriaturanan? Rabia ta inkompatibel ku amor? Kon amor i hustisia ta bai huntu? Si Dios ta amor, dikon tin maldat den e mundu akí, i asina tantu di dje? Hende por stima manera Dios ta stima? Si ta asina, kon esei lo tabata?
E kontesta riba algun di e preguntanan akí kisas por parse opvio, pero hopi bia ta ser diskutí den tratamentunan kristian di amor divino. I hopi kontesta ku tin biaha ta ser tumá komo opvio, ta resultá, riba inspekshon mas djaserka, di ta inkompatibel ku loke Skritura ta siña tokante e amor di Dios.
Nos lo no atendé tur e preguntanan akí pareu, pero nos lo trata e preguntanan akí i otronan durante henter e kuartal akí. I nos lo mira ku e amor di Dios ta muchu mas grandi ku kisas nos por pensa. E amor di Dios, manera e ta ser deskribí den Skritura, ta muchu mas superior ku e ideanan ku ta pasa pa “amor” den gran parti di nos mundu awendia. Den e próksimo simannan, nos lo wak mas djaserka algun di e aspektonan di mas prominente i bunita di e amor di Dios ku ta ser revelá den Beibel.
I, segun ku nos ta sigui, nos lo mira kon amor i hustisia divino ta inseparablemente konektá. E Dios di Beibel ta stima hustisia (lesa, por ehèmpel, Isa. 61:8). I, manera Beibel ta deskribí nan, amor i hustisia divino ta bai di tal manera huntu ku bo no por tin esun sin e otro. Pa motibu ku Dios ta amor, E ta profundamente preokupá pa inhustisia i sufrimentu den e mundu akí, i E ta identifiká Su mes ku esnan oprimí i esnan ku ta sufri, drentando boluntariamente den e doló i tristesa ku maldat a kousa den kreashon, E mes sufriendo mas ku tur, asina tantu ku Dios Mes ta e víktima di mas grandi di maldat.
Den henter Beibel, repetidamente Dios ta bira tristu i tin doló pa motibu di maldat i sufrimentu pasobra E ta stima kada persona mas ku posiblemente nos por imaginá. Bo por mira e profundidat di e amor di Dios den e lamento di Kristu riba Su pueblo ora El a bisa: “ ‘O Jerusalèm, Jerusalèm, esun ku ta mata e profetanan i ta piedra esnan ku ta ser mandá serka dje! Kuantu biaha mi tabata ker a reuní bo yunan huntu, manera un galiña ta reuní su puitunan bou di su alanan, pero boso no tabata ke!’ ” (Mat. 23:37, NKJV).
E Dios di Beibel, kende ta amor, hopi biaha ta ser deskribí den henter e Skritura komo di kurason kibrá i tristu pa amor rechasá i amor pèrdí. Henter e storia di Skritura ta tokante loke Dios a hasi i ta hasiendo pa restourá amor na tur skina i skref di universo. Esaki i hopi mas ta e tópiko di e lèsnan di e kuartal akí.