E Amor di Hustisia di Dios

Lesa pa e Estudio di e Siman Akí:

Versíkulo di Memoria:

“ ‘Ma laga esun ku ta gloria gloria den esaki, ku e ta komprondé i konoséMi, ku Ami ta SEÑOR, ku ta ehersé bondat, huisio i hustisia riba tera. Pasobra den esakinan mi tin delisia’ SEÑOR ta bisa” (Jer. 9:24, NKJV).

Den Oriente Serkano antiguo, e “diosnan” di e nashonnan no solamente tabata inkonstante, inmoral i impredesibel, sino tambe nan a ordená krueldatnan, manera sakrifisio di mucha. I asta e ora ei, e masanan pagano no por a konta riba nan fabor, i asina nan no tabata riska krusa nan “deidatnan” tribal.

Di akuerdo ku Deuteronomio 32:17, tras di “diosnan” asina tabatin demoñonan (lesa tambe 1 Kor. 10:20,21). I nan formanan di adorashon tabata madurá pa eksplotashon, lagando e pueblo den gran skuridat spiritual i moral.

E Dios di Beibel no por tabata mas diferente for di e forsanan demoniako akí. Yahweh ta perfektamente bon i Su karakter no ta kambia. I ta solamente pa motibu di Dios su bondat konstante ku nos por tin kualke speransa, awor i pa eternidat.

Den kontraste fuerte ku e diosnan falsu di e mundu antiguo, i asta ku e “diosnan” moderno di awendia, tambe, Yahweh ta profundamente preokupá tokante maldat, sufrimentu, inhustisia i opreshon, tur di kua E ta kondená konstantemente i sin duda. I, mas importante ainda, un dia E lo eradiká nan tur tambe.

Amor i Hustisia

Den henter Skritura, amor i hustisia ta bai huntu. Berdadero amor ta rekerí hustisia, i berdadero hustisia por ser goberná pa medio di i duná solamente den amor. Nos no ta kustumbrá di pensa riba e dos konseptonan akí huntu, pero esei ta solamente pasobra tantu amor komo hustisia a ser grandemente pervertí dor di humanidat.

Lesa Salmo 33:5, Isaias 61:8, Jeremias 9:24, Salmo 85:10, i Salmo 89:14. Kon e tèkstnan akí ta tira lus riba Dios su preokupashon pa hustisia?

E tèkstnan akí ta deklará eksplísitamente ku Dios ta stima hustisia (Salmo 33:5, Isa. 61:8). Den Skritura, e ideanan di amor i hustisia ta inseparablemente konektá. E amor di Dios i e hustisia di Dios ta bai huntu, i E ta profundamente preokupá pa hustisia ser hasí den e mundu akí.

Pa bon motibu anto, e profetanan konsistentemente ta denunsiá tur tipo di inhustisia, inkluyendo leinan inhustu, transakshonnan komersial engañoso, i inhustisia i opreshon di e pobernan i e biudanan òf kualke hende vulnerabel. Aunke hende ta kometé hopi maldat i inhustisia, Dios ta esun ku konstantemente “ta ehersé bondat, huisio i hustisia riba tera” (Jer. 9:24, NKJV). Di akuerdo ku esaki, den henter Skritura, esnan fiel na Dios ta antisipá huisio divino grandemente komo un kos masha bon pasobra e ta trese kastigu kontra hasidónan di maldat i opresornan, i e ta trese hustisia i liberashon pa e víktimanan di inhustisia i opreshon.

De echo, hustisia ta e fundeshi di e gobièrnu di Dios. Dios su gobièrnu moral di amor ta hustu i rekto, totalmente diferente for di e gobièrnunan korupto di e mundu akí, ku hopi biaha ta perpetuá inhustisia pa ganashi i poder personal. Den Dios, “mizerikòrdia i bèrdat a topa huntu; hustisia i pas a sunchi” (Salmo 85:10, NKJV).

I Dios ta duna di konosé kiko E ta spera di nos. “El a mustra bo, o hende, kiko ta bon; i kiko Señor ta rekerí di bo sino pa hasi hustisia, stima mizerikòrdia, i kana humildemente ku bo Dios?” (Mikeas 6:8, NKJV). Si tin kualke kos ku nos mester reflehá di e karakter di Dios, amor, i e hustisia i mizerikòrdia ku ta surgi for di dje, lo ta sentral.

Kiko ta ehèmpelnan, hasta awor, di hustisia humano pervertí? Kon antó nos no por sklama pa e hustisia perfekto di Dios yega un dia?

Dios Ta Totalmente Bon i Hustu

Dios no ta simplemente afirmá di stima hustisia i ta yama hende pa stima i hasi hustisia, sino Dios Mes ta demostrá e rasgonan akí perfektamente i inkebrantablemente. Skritura ta siña ku Dios ta totalmente santu, fiel, hustu, i amoroso. Dios so i semper ta hasi loke ta amoroso, hustu i rekto. Nunka E ta hasi algu malu.

Lesa Deuteronomio 32:4 i Salmo 92:15. Kiko e pasashinan akí ta siña tokante e fieldat i hustisia di Dios?

Esakinan i hopi otro pasashi ta deklará ku Dios ta hustu i amoroso, “no tin inhustisia den djE” (Salmo 92:15; kompará ku Salmo 25:8, Salmo 129:4). Dios “lo no hasi inhustisia. Tur mainta E ta trese Su hustisia na lus; E no ta faya nunka, ma e inhustu no konosé bèrgwensa” (Sof. 3:5, NKJV). Tuma nota di e kontraste direkto di e karakter di Dios riba i kontra esun di esnan ku ta stima inhustisia.

Dios sa kiko ta mihó pa tur hende, ke loke ta mihó pa tur hende, i ta traha kontinuamente pa realisá e mihó resultado pa tur envolví.

Lesa Salmo 9:7,8 i Salmo 145:9–17. Kiko e versíkulonan akí ta siña tokante Dios?

E Dios di Beibel ta “un hues hustu” (Salmo 7:11, NKJV), i ningun maldat ta biba den djE (Salmo 5:4). Manera 1 Juan 1:5 ta siña: “Dios ta lus i den djE no tin ningun skuridat” (NKJV). En bèrdat, Dios no ta solamente perfektamente bon, sino, di akuerdo ku Santiago 1:13 (NKJV): “Dios no por ser tentá dor di maldat” (kompará ku Hab. 1:13).

Den tur esaki, Dios su bondat i gloria ta inseparablemente konektá. Miéntras ku hopi ta idolatrá poder, Dios ta todopoderoso, pero E ta ehersé Su poder solamente den formanan ku ta hustu i amoroso. No ta koinsidensia ku ora Moises a pidi Dios: “Mustrami Bo gloria,” Dios a kontestá bisando: “Lo Mi laga tur Mi bondat pasa bo dilanti” (Eks. 33:18,19, NKJV).

Dios Su Karakter Inkambiabel

Lesa Malakías 3:6 i Santiago 1:17. Kiko e pasashinan akí ta siña tokante e karakter di Dios?

Den Malakias 3:6, Dios ta deklará: “Ami ta SEÑOR, Mi no ta kambia” (NKJV). Miéntras ku algun ta lesa e parti akí di e versíkulo i ta tuma ku esaki ta nifiká ku Dios no ta kambia di ningun manera, e restu di e versíkulo i su konteksto inmediato ta mustra ku e inmutabilidat di Dios afirmá aki ta Dios su inmutabilidat moral. E restu di e versíkulo ta indiká ku Dios por kambia relashonalmente, pasobra Dios ta bisa: “P’esei boso no ta ser destruí, o yunan di Jacob.” I den e siguiente versíkulo mes, Dios ta proklamá na Su pueblo: “Bolbe serka Mi, i lo Mi bolbe serka boso” (Mal. 3:7, NKJV).

Asina, Dios ta drenta den relashonnan di bai-i-bin ku Su kreashon, pero atraves di tur e relashonnan di bai-bin asina, i atraves di tur otro kos, Dios su karakter ta konstante. Esaki ta ser afirmá tambe den Santiago 1:17, ku ta proklamá ku tur don bon i perfekto ta bini di Dios, ku ken no tin variashon. Dios no ta e fuente di maldat.

Aki i otro kaminda, Skritura ta siña bes tras bes ku e karakter di Dios ta inkambiabel. Ku otro palabra, Beibel ta siña konsistentemente ku Dios ta moralmente inkambiabel. Sinembargo, Dios por i ta drenta den relashon real ku kriaturanan, na ken Dios ta respondé, pero semper ku amor i hustisia.

Lesa 2 Timoteo 2:13; Tito 1:2; i Hebreonan 6:17,18. Kiko e tèkstnan akí ta siña tokante Dios?

Dios no por nenga Su mes; Dios nunka ta gaña; i e promesanan di Dios ta inkebrantabel. Nos por ta sigur ku e Dios di Beibel ta e mesun Dios kende (den Kristu) a duna Su mes boluntariamente pa nos riba krus. E ta un Dios ku por ser konfiá, sin reserva, i nos por tin konfiansa i speransa pa futuro pasobra, manera Hebreonan 13:8 ta pon’é: “Hesu-Kristu ta meskos ayera, awe i pa semper” (NKJV).

Un Dios Arepentí?

Dios por “arepentí”? Si ta asina, kiko esei lo a nifiká? Nos a mira ku e karakter di Dios nunka ta kambia. Sinembargo, algun tèkst bíbliko ta bisa ku Dios “ta arepentí” òf “ta sede.” A lo ménos pa hende, arepentimentu ta envolví rekonosementu ku un hende a hasi algu robes. Kon, anto, algun pasashi bíbliko por deskribí Dios komo “arepentí”?

Lesa Eksodo 32:14 i kompar’é ku Jeremias 18:4–10. Kiko bo ta opiná di e deskripshonnan akí di Dios ku ta “sede”?

Den e pasashinan akí i hopi otro, Dios ta ser deskribí komo un ser ku ta sede den Su huisio komo kontesta riba algun arepentimentu òf interseshon dor di hende. Dios ta primintí ku, si e pueblo lo bira for di nan maldat, E lo bira for di e huisio ku El a plania. Dios su biramentu for di trese huisio komo kontesta riba arepentimentu humano ta un tema komun den henter Skritura.

Lesa Numbernan 23:19 i 1 Samuel 15:29. Kiko e tèkstnan akí ta siña tokante si Dios ta òf no ta “sede” òf “arepentí”?

E pasashinan akí ta deklará eksplísitamente ku Dios “no ta un hende, ku E mester arepentí” (1 Sam. 15:29, NKJV) i “Dios no ta un hende, pa E mester gaña, ni un yu di hende, pa E mester arepentí. El a bisa, i lo E no hasi? Of El a papia, i lo E no kumpli?” (Num. 23:19, NKJV). Lesá den lus di e otro pasashinan, e tèkstnan akí no por ser tumá di ta nifiká ku Dios no ta “arepentí” mes, sino en kambio nan ta transmití e bèrdat ku E no ta “sede” òf “arepentí” den e formanan ku hende ta hasi. Mas bien, Dios semper ta kumpli ku Su promesanan, i miéntras E lo kambia di rumbo komo kontesta riba arepentimentu humano, E ta hasi esei semper di akuerdo ku Su bondat i Su Palabra. Dios ta suspendé huisio komo kontesta riba arepentimentu, hustamente pasobra Su karakter ta bon, hustu, amoroso i mizerikòrdioso.

Tene firme na Amor i Hustisia

Skritura ta siña konsistentemente ku “SEÑOR bo Dios, E ta Dios, e Dios fiel kende ta warda pakto i mizerikòrdia pa mil generashon ku esnan ku ta stim’E i ta warda Su mandamentunan’ ” (Deut. 7:9, NKJV). Su karakter di bondat i amor a ser demostrá supremamente dor di Hesus na krus (lesa Rom. 3:25,26; Rom. 5:8). Di akuerdo ku Salmo 100:5, “SEÑOR ta bon; Su amor firme ta dura pa semper, i Su fieldat pa tur generashon” (ESV; kompará ku Salmo 89:2). Pues, Dios por ser konfiá; E ta duna solamente bon regalonan na Su yunan (Santiago 1:17; kompará ku Lukas 11:11–13). De echo, E ta otorgá kosnan bon asta na esnan ku ta posishoná nan mes komo Su enemigunan.

Lesa Mateo 5:43–48. Kiko esaki ta siña tokante e amor asombroso di Dios? Kon nos mester aktua pa ku otro hende den lus di e siñansa akí di Hesus?

Mateo 5 ta deskribí e amor di Dios komo amor perfekto. Amor imperfekto ta e amor ku ta stima solamente esnan ku ta stimabo. Pero Dios ta stima asta esnan ku ta odi’E, asta esnan ku ta posishoná nan mes komo Su enemigunan. Su amor ta kompleto i, pa e motibu ei, perfekto.

Aunke Dios su amor i mizerikòrdia ta surpasá kualke ekspektativa rasonabel, nunka e ta anulá òf violá hustisia. Al kontrario, e ta trese hustisia i mizerikòrdia huntu (Salmo 85:10). Di mes manera, Beibel ta eksortá nos: “Warda mizerikòrdia i hustisia, i spera riba bo Dios kontinuamente” (Os. 12:6, NKJV). Manera un otro vershon ta pon’é: “Tene duru na amor i hustisia” (Os. 12:6, ESV; kompará ku Lukas 11:42).

Na final, Dios mes lo realisá hustisia perfekto. Romanonan 2:5 ta siña ku Su “huisio hustu lo ser revelá” (ESV). Finalmente, e redimínan lo kanta: “Grandi i maravioso ta Bo obranan, Señor Dios Todopoderoso! Hustu i berdadero ta Bo kamindanan, o Rei di e santunan! Ken lo no temeBo, o Señor, i glorifiká Bo nòmber? Pasobra Abo so ta santu. Pasobra tur nashon lo bin i adorá Bo dilanti, pasobra Bo huisionan a ser manifestá” (Rev. 15:3,4, NKJV; kompará ku Rev. 19:1,2).

Lesa Ellen G. White, “God’s Love for Man,” p. 9–15, den Steps to Christ.

“E palabra di Dios ta revelá Su karakter. E Mes a deklará Su amor i kompashon infinito. Ora Moises a resa: ‘Mustrami Bo gloria,’ Señor a kontestá: ‘Lo Mi laga tur Mi bondat pasa Bo dilanti.’ Eksodo 33:18,19. Esaki ta Su gloria. Señor a pasa dilanti di Moises, i a proklamá: ‘Señor, Señor Dios, mizerikòrdioso i yen di grasia, ku pasenshi, i abundante den bondat i bèrdat, ku ta mantené mizerikòrdia pa míles, pordonando inikidat i transgreshon i piká.' Eksodo 34:6,7. E ta ‘pokopoko pa rabia, i di gran bondat,’ ‘pasobra E tin delisia den mizerikòrdia.’ Jonas 4:2; Mikeas 7:18.

“Dios a uni nos kurason na djE pa medio di señalnan inkontabel den shelu i riba tera. Pa medio di e kosnan di naturalesa, i e lasonan terenal di mas profundo i tierno ku kurasonnan humano por konosé, El a trata na revelá Su mes na nos. Tòg esakinan, di un manera imperfekto, ta representá Su amor. Ounke tur e evidensianan akí a ser duná, e enemigu di bon a siega e mente di hende, di manera ku nan a wak Dios ku miedu; nan a pensa di djE komo severo i imperdonabel. Satanas a hiba hende na konsebí Dios komo un ser kende su atributo prinsipal ta hustisia severo, un ku ta un hues severo, un kreditor duru i eksigente. El a pinta e Kreador komo un ser ku ta wak ku wowo yalurs pa diserní e erornan i kibokashonnan di hende, pa E por pone Su huisionan kai riba nan. Tabata pa kita e sombra skur akí, dor di revelá na mundu e amor infinito di Dios, ku Hesus a bin biba meimei di hende.”—Ellen G. White, Steps to Christ, p. 10,11.

Preguntanan pa Diskushon: