Dios ta Pashoná i Kompasivo

Lesa pa e Estudio di e Siman Akí:

Versíkulo di Memoria:

Emoshonnan hopi biaha ta ser mirá komo indeseabel i pa ser evitá. Pa algun hende, emoshonnan ta intrínsikamente irashonal, i pues, e bon hòmber òf muhé lo no a ser deskribí komo “emoshonal”. Den algun filosofia griego antiguo, e idea di e hòmber “rashonal”, ku ta (generalmente) sea impenetrabel pa pashonnan òf ku ta goberná riba su emoshonnan pa medio di rason no emoshonal, ta ser balorá komo esun ideal.

Emoshonnan desenfrená por ta problemátiko, sí. Sinembargo, Dios a krea hende ku e kapasidat pa emoshonnan, i Dios Mes ta ser desplegá den henter e Skritura komo eksperensiando emoshonnan profundo. Si Dios por eksperensiá emoshonnan profundo, manera Beibel ta deskribí konsistentemente, e ora ei emoshonnan no por ta intrínsikamente malu òf irashonal, pasobra e Dios di Beibel ta perfektamente bon i ta poseé sabiduria perfekto.

De echo, tin bèrdatnan bunita pa ser rekohé for di e realisashon ku e amor di Dios pa nos ta un amor profundamente emoshonal, pero semper ku e atvertensia ku, aunke e amor di Dios (emoshonal òf di otro manera) ta perfekto, no mester pensa riba dje komo idéntiko na emoshonnan manera hende ta eksperensiá nan.

Mas ku Amor di un Mama

Kisas e amor di mas grandi, komun den eksperensia humano, ta e amor di un mayor pa un yu. Hopi biaha Beibel ta usa e imágen di e relashon mayor-yu pa deskribí Dios su kompashon maravioso pa hende, enfatisando ku Dios su kompashon ta eksponensialmente mas grandi ku asta e ekspreshon humano di mas profundo i di mas bunita di e mesun emoshon.

Lesa Salmo 103:13, Isaías 49:15 i Jeremias 31:20. Kiko e deskripshonnan aki ta transmití tokante e naturalesa i profundidat di Dios su kompashon?

Di akuerdo ku e tèkstnan akí, Dios ta relashoná ku nos komo Su yunan stimá, stimando nos manera un bon tata i mama ta stima nan yunan. Tòg, manera Isaías 49:15 ta splika, asta un mama humano por “lubidá su yu na pechu” òf “no tin kompashon ku e yu di su barika” (NKJV), pero Dios nunka ta lubidá Su yunan, i Su kompashon nunka no ta faya (Lam 3:22). Notabelmente, e término hebreo raḥam, usá pa kompashon aki i den hopi otro tèkst ku ta deskribí Dios su amor kompasivo abundante, ta ser keré di ta derivá for di e término hebreo pa matris (raḥam). I p’esei, manera eruditonan a señalá, Dios su kompashon ta un “amor di mama manera matris”. En bèrdat, e ta eksponensialmente mas grandi ku kualke kompashon humano, asta esun di un mama pa su yu resien nasí.

Di akuerdo ku Jeremias 31:20 (NKJV), Dios ta mira Su pueblo di pakto komo Su “yu stimá” i “yu agradabel”, apesar di e echo ku hopi biaha nan a rebeldiá kontra djE i a hasiE tristu. Asta asina, Dios ta deklará: “Mi kurason ta anhelá na dje” i “Siguramente lo mi tin mizerikòrdia di dje.” E término tradusí “mizerikòrdia” aki ta e término usá aki riba pa kompashon divino (raḥam). Ademas, e frase “Mi kurason ta anhelá” por ser tradusí literalmente komo “Mi mondongo ta grita”. E deskripshon akí ta e lenguahe profundamente intuitivo di emoshon divino, ku ta nifiká e profundidat profundo di e amor kompasivo di Dios pa Su pueblo. Asta apesar di nan infidelidat, Dios ta sigui otorgá Su kompashon i mizerikòrdia abundante na Su pueblo i ta hasi esaki mas ayá di tur ekspektativa rasonabel.

Amor Konmovedor

E profundidatnan inkalkulabel di e amor kompasivo di Dios pa humanidat ta ser manifestá den Oseas. Dios a ordená profeta Oseas: “ ‘Bai, tuma pa bo mes un esposa di prostitushon i yunan di prostitushon, pasobra e tera a kometé gran prostitushon dor di apartá for di Señor’ ” (Os. 1:2, NKJV). Mas despues Oseas 11 ta deskribí e relashon di Dios ku Su pueblo, pero ku e metáfora di un tata amoroso pa su yu.

Lesa Oseas 11:1–9. Kon e imágennan den e versíkulonan akí ta duna bida na e manera ku Dios ta stima i kuida Su pueblo?

E amor di Dios pa Su pueblo ta ser kompará ku e tierno kariño di un mayor pa un yu. Skritura ta usa e imágen di siña un mucha chikitu kana; tuma un yu stimá den bo brasa; sana i proveé sustento; i di otro manera tiernamente kuida Su pueblo. Skritura ta deklará tambe ku Dios “a karga” Su pueblo meskos “ ‘ku un hòmber ta karga su yu’ ” (Deut. 1:31, NKJV). Den “Su amor i den Su mizerikòrdia El a redimí nan” i “a hisa nan i a karga nan tur e dianan di ántes ayá” (Isa. 63:9, NASB).

Kontrali na e fieldat inkebrantabel di Dios, Su pueblo tabata infiel repetidamente, finalmente nan a alehá Dios i a trese huisio riba nan mes i a hasiE profundamente tristu. Dios ta kompasivo, pero nunka te na eksklushon di hustisia. (Manera nos lo mira den un lès mas despues, amor i hustisia ta bai huntu.)

Bo a yega di ta asina disgustá tokante algu te na e punto ku bo stoma ta bòltu? Esei ta e tipo di imágen ku ta ser usá pa e profundidat di e emoshonnan di Dios riba Su pueblo. E imágen di un hende su kurason ku ta bira i kompashonnan ku ta ser sendé ta lenguahe idiomátiko di emoshonnan profundo, usá tantu pa Dios komo hende.

E imágen akí, di kompashonnan ku ta ser sendé (kamar), ta ser usá den kaso di e dos muhénan ku a bini dilanti di Sálomon, kada un reklamando e mesun beibi komo di dje. Ora Salomon a ordená pa kòrta e beibi na dos (sin intenshon di hasi daño na e mucha), e imágennan akí a deskribí e reakshon emoshonal di e mama real (1 Reinan 3:26; kompará ku Gén. 43:30).

E Kompashon di Hesus

Den Tèstamènt Nobo, e mesun tipo di imágen ku den esun Bieu ta ser usá pa deskribí e kompashon di Dios. Pablo ta referí na e Tata komo e “Tata di mizerikòrdianan i Dios di tur konsuelo” (2 Kor. 1:3, NKJV). Mas aleu, Pablo ta splika den Efesionan 2:4 ku Dios ta “riku den mizerikòrdia” i ta redimí hende “pa motibu di Su gran amor ku kua El a stima nos” (NKJV).

Den vários parabel, Kristu Mes repetidamente ta usa términonan di emoshon intuitivo i konmovedor pa deskribí e kompashon di e Tata (Mat. 18:27, Lukas 10:33, Lukas 15:20). I e mesun lenguahe ku ta deskribí kompashon divino den Tèstamènt Bieu i Tèstamènt Nobo ta ser usá tambe den e Evangelionan pa deskribí Hesus su kontestanan kompasivo na esnan den angustia.

Lesa Mateo 9:36, Mateo 14:14, Marko 1:41, Marko 6:34 i Lukas 7:13. Lesa tambe Mateo 23:37. Kon e versíkulonan akí ta tira lus riba e manera ku Kristu a ser konmoví dor di e situashon prekario di hende?

Bes tras bes den e Evangelionan, ta ser bisá ku Kristu a ser konmové na kompashon dor di hende den angustia òf den nesesidat. I E no solamente a sinti kompashon, El a atendé e nesesidatnan di e hendenan tambe.

I sí, Hesus a lamentá tambe riba Su pueblo. Un hende lo por imaginá e lágrimanan den wowo di Kristu ora E ta wak riba e stat: “ ‘Kuantu biaha mi ker a reuní boso yunan huntu, manera un galiña ta reuní su puitunan bou di su halanan, ma boso no tabata ke!’ ” (Mat. 23:37, NKJV). Aki, nos ta mira ku e lamento di Kristu ta kuadra estrechamente ku esun deskribí di Dios den henter Tèstamènt Bieu. De echo, hopi erudito bíbliko ta señalá ku e imágen di un para ku ta kuida su yunan ta imágen ku solamente tabata ser usá di divinidat den e antiguo Oriente Serkano. Aki, hopi ta mira un alushon na e imágen den Deuteronomio 32:11, di Dios komo un para ku ta bula riba, protehá, i kuida su yunan.

Un Dios Yalurs?

E Dios di Beibel ta e “Dios kompasivo”. Na hebreo, Dios ta ser yamá el raḥum (Deut. 4:31). E término “el” ta nifiká “Dios”, i raḥum ta un forma diferente di e rais pa kompashon (raḥum). Tòg, Dios no ta ser yamá solamente e Dios kompasivo sino tambe e Dios yalurs, el qana’. Manera Deuteronomio 4:24 ta pon’e: “ ‘Señor bo Dios ta un kandela ku ta kima, un Dios yalurs [el qana’].’ ” (Lesa Deut. 4:24; Deut. 6:15; Jos. 24:19; Nah. 1:2.)

Promé Korintionan 13:4 ta deklará ku “amor no ta yalurs” (RSV). Kon por ta, antó, ku Dios ta un “Dios yalurs”? Lesa 2 Korintionan 11:2 i konsiderá e manera ku e pueblo di Dios tabata infiel na djE den tur e narativonan di Beibel (lesa, por ehèmpel, Salmo 78:58). Ki lus e pasashinan akí ta tira riba komprondementu di “yalursheit” divino?

E “yalursheit” di Dios hopi biaha ta ser mal komprondé. Si bo ta referí na un hende komo un esposo òf esposa yalurs, probablemente bo no ke men esei komo un kòmplimènt. E término yalurs hopi biaha tin konotashonnan negativo den hopi idioma. Sinembargo, den Beibel, yalursheit divino no tin konotashonnan negativo. E ta e pashon hustu di un esposo amoroso pa un relashon eksklusivo ku su esposa.

Miéntras ku tin un tipo di yalursheit ku ta kontra amor (1 Kor. 13:4), di akuerdo ku 2 Korintionan 11:2, tin un “yalursheit” bon i hustu. Pablo ta referí na dje komo “yalursheit divino” (2 Kor. 11:2). Dios su yalursheit ta solamente i semper e tipo hustu i por ser papiá mihó di dje komo e amor pashoná di Dios pa Su pueblo.

Dios su pashon (qana’) pa Su pueblo ta surgi for di Su amor profundo pa nan. Dios ta deseá un relashon eksklusivo ku Su pueblo; E so mester ta nan Dios. Tòg, hopi biaha Dios ta ser deskribí komo un amante despresiá, kende su amor no ta ser kontestá (lesa Oseas 1–3, Jer. 2:2, Jer. 3:1–12). Pues, Dios su “yalursheit” òf “pashon” nunka ta sin provoká sino semper ta reakshoná riba infidelidat i hendenan malbado. Dios su yalursheit (òf “amor pashoná”) ta falta e konotashonnan negativo di yalursheit humano. Nunka e ta envidioso sino semper e pashon hustu korekto pa un relashon eksklusivo ku Su pueblo i pa nan bon.

E Nifikashon di Pentekòster

E Dios di Beibel ta kompasivo i pashoná, i e emoshonnan divino akí ta manifestá nan mes di forma supremo den Hesu-Kristu. Dios ta kompasivo (kompará ku Isa. 63:9, Hebr. 4:15), profundamente afektá pa e tristesanan di Su pueblo (Huesnan 10:16, Lukas 19:41), i dispuesto pa tende, kontestá, i konsolá (Isa. 49:10,15; Mat. 9:36; Mat. 14:14).

Lesa 1 Korintionan 13:4–8. Den ki formanan e pasashi akí ta yama nos pa reflehá e amor kompasivo i asombroso di Dios den nos relashonnan ku otronan?

Nos ta anhelá pa ta den relashon ku personanan ku ta ehèmpel di e tipo di amor deskribí den 1 Korintionan 13:4–8. Pero kon frekuente nos ta trata na bira e tipo di persona akí pa ku otronan? Nos no por hasi nos mes ku pasenshi i amabel; nos no por evitá di ta envidioso, presumido, grosero òf egoista. Nos no por produsí un amor den nos mes ku “ta soportá tur kos, ta kere tur kos, ta spera tur kos, ta soportá tur kos”, i “nunka ta faya” (1 Kor. 13:7,8, NKJV). Un amor asina por ser manifestá den nos bida solamente komo e fruta di Spiritu Santu. I alabá sea Dios ku Spiritu Santu ta basha e amor di Dios den kurason di esnan ku, pa medio di fe, ta den Kristu Hesus (Rom. 5:5).

Pa grasia di Dios i e poder di Spiritu Santu, den ki formanan práktiko nos lo por respondé riba, i reflehá, Dios su amor profundamente emoshonal, pero semper perfektamente hustu i rashonal? Na promé lugá, e úniko kontesta apropiá ta pa adorá e Dios ku ta amor. Na di dos lugá, nos mester respondé riba e amor di Dios dor di mustra aktivamente kompashon i amor benevolente na otronan. Nos no mester simplemente ta animá den nos fe kristian sino nos mester ta motivá pa animá otronan. Finalmente, nos mester rekonosé ku nos no por kambia nos kurason, sino ku ta Dios so por.

Pues, laga nos pidi Dios pa duna nos un kurason nobo p’E i pa otronan, un amor puru i purifikante ku ta elevá loke ta bon i ta kita e bagas for di nos paden.

Laga nos orashon ta: “ku Señor laga boso oumentá i abundá den amor pa otro i pa tur, . . . pa E por establesé boso kurasonnan sin kulpa den santidat dilanti di nos Dios i Tata na e binida di nos Señor Hesu-Kristu ku tur Su santunan” (1 Tes. 3:12,13, NKJV).

Lesa Ellen G. White, “The Beatitudes,” p. 6–44, den Thoughts From the Mount of Blessing.

“Tur ku tin un sintimentu di nan pobresa di alma profundo, ku ta sinti ku nan no tin nada bon den nan mes, por haña hustisia i forsa dor di wak Hesus. E ta bisa: ‘Bin serka Mi, boso tur ku ta kansá i kargá.’ Mateo 11:28. E ta pidibo pa kambia bo pobresa pa e rikesanan di Su grasia. Nos no ta digno di e amor di Dios, pero Kristu, nos garantia, ta digno, i ta abundantemente kapas pa salba tur ku lo bini serka djE. Loke sea por tabata bo eksperensia di pasado, maske kon desalentador bo sirkunstansianan presente por ta, si bo bini serka Hesus manera bo ta, débil, indefenso i desesperá, nos Salbador kompasivo lo topabo for djaleu, i lo tira rònt di bo Su brasanan di amor i Su mantel di hustisia. E ta presentá nos na e Tata, bistí ku e paña blanku di Su mes karakter. E ta supliká dilanti di Dios na nos fabor, bisando: Mi a tuma lugá di e pekador. No wak e mucha kabesura akí, sino wak Mi. Si Satanas ta supliká na bos haltu kontra nos alma, akusando di piká, i reklamando nos komo su presa, e sanger di Kristu ta supliká ku poder mas grandi.”—Ellen G. White, Thoughts From the Mount of Blessing, p. 8,9.

Preguntanan pa Diskushon: