E Furia di Amor Divino

Lesa pa e Estudio di e Siman Akí:

Versíkulo di Memoria:

“Ma E, siendo yen di kompashon, a pordoná nan inikidat, i no a destruí nan. Sí, hopi biaha El a kita Su rabia, i no a lanta tur Su furia” (Salmo 78:38, NKJV).

Aunke Dios su kompashon hopi biaha ta ser selebrá, hopi hende ta haña e idea di Su rabia fastioso. Si Dios ta amor, nan ta pensa ku nunka E mester ekspresá rabia. E noshon ei, sinembargo, ta falsu. Su furia ta surgi direktamente for di Su amor.

Algun hende ta pretendé ku e Dios di Tèstamènt Bieu ta un Dios di rabia i ku e Dios di Tèstamènt Nobo ta un Dios di amor. Pero tin solamente un Dios, i E ta ser revelá komo e mesun den tur dos Tèstamènt. E Dios ku ta amor ta rabia sí ku maldat, pero hustamente pasobra E ta amor. Hesus Mes a ekspresá rabia profundo kontra maldat, i Tèstamènt Nobo ta siña numeroso biaha tokante e rabia hustu i apropiá di Dios.

E furia di Dios semper ta Su reakshon hustu i amoroso kontra maldat i inhustisia. Furia divino ta indignashon hustu motivá pa bondat i amor perfekto, i e ta buska floresementu di tur kreashon. E furia di Dios ta simplemente e kontesta apropiá di amor na maldat i inhustisia. Di akuerdo ku esaki, maldat ta provoká Dios na pashon na fabor di e víktimanan di maldat i kontra di su outornan. Furia divino, anto, ta un otro ekspreshon di amor divino.

Tristu pa motibu di Maldat

E Dios di Beibel ta stima hustisia i ta odia maldat. Piká i maldat, pues, ta provok’E na pashon, un pashon ekspresá na fabor di esnan oprimí i abusá, i asta den kasonan den kua un hende su maldat ta afektá prinsipalmente e mes. Dios ta odia maldat pasobra maldat semper ta hasi daño na Su kriaturanan, asta si ta e mes a kousa esaki. Den e relatonan bíbliko, Dios ta ser provoká na rabia bes tras bes dor di loke eruditonan bíbliko ta referí na dje komo e siklo di rebelion. E siklo akí ta bai di e siguiente manera:

E pueblo ta rebeldiá kontra Dios i ta hasi maldat, tin biaha asta krueldatnan hororoso, manera sakrifisio infantil i otro abominashonnan, den Su bista.

Dios ta retirá di akuerdo ku e desishonnan di e pueblo.

E pueblo ta ser oprimí dor di nashonnan strañero.

E pueblo ta sklama na Dios pa liberashon.

Dios bondadosamente ta libra e pueblo.

E pueblo ta bolbe rebeldiá kontra Dios, hopi biaha mas flagrante ku promé.

Enfrente di e siklo akí di maldat i infieldat flagrante, sinembargo, bes tras bes Dios ta enfrentá infieldat humano, pero ku fieldat sin fin, pasenshi indulgente, grasia asombroso, i profundo kompashon.

Lesa Salmo 78. Kiko e pasashi akí ta transmití tokante e reakshon di Dios riba e rebelionnan ripití di Su pueblo?

Di akuerdo ku Beibel, amor i hustisia ta ligá na otro. Furia divino ta e kontesta di amor korekto kontra maldat pasobra maldat semper ta heridá un hende ku Dios ta stima. No tin ningun kaso den Skritura kaminda Dios ta arbitrariamente òf inhustamente furioso òf rabiá.

I miéntras e pueblo di Dios a bandon’E i traishon’E bes tras bes, durante siglonan Dios a sigui ku pasenshi otorgá kompashon mas ayá di tur ekspektativa rasonabel (Neh. 9:7–33), demostrando asina e profundidat insondabel di Su kompashon indulgente i amor mizerikòrdioso. En bèrdat, di akuerdo ku Salmo 78:38, Dios, “siendo yen di kompashon, a pordoná nan inikidat i no a destruí nan. Sí, hopi biaha El a kita Su rabia, i no a lanta tur Su furia” (NKJV).

Siguramente bo a yega di rabia pa e maldat hasí na otronan. Kon e emoshon akí ta yudabo komprondé mihó, e ora ei, e furia di Dios pa ku maldat?

Dios Ta Pokopoko pa Rabia

Dios ta rabia riba maldat pasobra Dios ta amor. Dios ta asina kompasivo i bondadoso ku un profeta bíbliko a asta kastigá Dios pa ta muchu mizerikòrdioso!

Konsiderá e storia di Jonas i reflekshoná riba e reakshon di Jonas na Dios su pordon kompasivo di e ninivitanan, den Jonas 4:1–4. Kiko esaki ta bisa nos tokante Jonas, i tokante Dios? (Lesa tambe Mat. 10:8.)

E reakshon di Jonas riba e mizerikòrdia di Dios ta revelador na dos manera prinsipal. Na promé lugá, e ta desplegá Jonas su propio duresa di kurason. E tabata odia e asirionan asina tantu pa loke nan a hasi ku Israel, ku e no tabata ke pa Dios mustra mizerikòrdia na nan.

Ki un lès pa nos! Nos mester ta kuidadoso pa warda nos mes kontra e mesun aktitut akí, maske kon komprendibel e por ta. Di tur hende, esnan ku a risibí e grasia di Dios mester rekonosé grasia inmeresí i asina ta dispuesto pa ekstendé grasia na otronan.

Na di dos lugá, e reakshon di Jonas ta reforsá kon sentral e kompashon i grasia di Dios ta pa Su karakter. Jonas tabata asina konosí ku e mizerikòrdia di Dios ku, hustamente pasobra Dios ta “yen di grasia i mizerikòrdioso” i “pokopoko pa rabia i abundante den bondat amoroso” (Jon. 4:2, NKJV), Jonas tabata sa ku Señor lo a keda sin trese huisio kontra Nínive. Dios ta trata di forma hustu i mizerikòrdioso ku tur pueblo i nashon.

E frase hebreo tradusí “pokopoko pa rabia” òf “pasenshi” por a ser tradusí literalmente komo “largu di nanishi”. Den idioma hebreo, rabia tabata ser asosiá metafórikamente ku e nanishi, i e largura di nanishi ta representá metafórikamente kon largu ta tuma pa un hende rabia.

Referensianan na Dios komo “largu di nanishi”, anto, ta transmití ku Dios ta pokopoko pa rabia i tin pasenshi. Miéntras no ta tuma hopi tempu pa hende rabia, Dios ta ekstremadamente saksenu i ku pasenshi, i ta duna grasia libremente i abundantemente, sinembargo sin hustifiká piká òf sera wowo pa inhustisia. En kambio, Dios Mes ta hasi ekspiashon pa piká i maldat via e krus pa asina E por ta tantu hustu komo e hustifikadó di esnan ku ta kere den djE (Rom. 3:25,26).

Indignashon Hustu

Miéntras tin hopi forma inapropiá di rabia, Beibel ta siña tambe ku tin “indignashon hustu”.

Imaginábo un mama ta wak su yu muhé di tres aña ta hunga den kurá di rekreo i despues, diripiente, un hòmber ta ataká su yu muhé. E no mester ta rabiá? Naturalmente, e mester. Rabia ta e kontesta korekto di amor den un sirkunstansia asina. E ehèmpel akí ta yuda nos komprondé Dios su “indignashon hustu”.

Lesa Mateo 21:12,13 i Juan 2:14,15. Kiko Hesus su reakshon riba e manera ku e tèmpel tabata ser usá ta bisa nos tokante ku Dios ta rabia kontra maldat?

Den e kasonan akí, Hesus ta desplegá e “zelo piadoso” di indignashon hustu kontra esnan ku tabata trata e tèmpel di Dios komo algu komun i ku a kombertié den un “kueba di ladron” pa asina probechá di biuda-, huérfano- i e pobernan (Mat. 21:13; kompará ku Juan 2:16). E tèmpel i sirbishinan, ku tabata suponé di ta tipifiká e pordon mizerikòrdioso di Dios i Su limpiesa di pekadornan, tabata ser usá en kambio pa gaña i oprimí algun di esnan di mas vulnerabel. Hesus no mester a rabia pa e abominashon akí?

Marko 10:13,14 i Marko 3:4,5 ta ofresé mas ehèmpel di Su indignashon hustu. Ora hende a trese muchanan chikitu serka Hesus i “e disipelnan a reprendé esnan ku a trese nan” , Hesus “tabata masha disgustá”, literalmente “indigná”. El a bisa nan: “ ‘Laga e muchanan chikitu bini serka Mi’ ” (Marko 10:13,14, NKJV).

Otro kaminda, ora e fariseonan tabata warda pa akusá Hesus di a kibra e Sabat dor di kura hende riba dje, Hesus a puntra nan: “ ‘Ta legal riba Sabat pa hasi bon òf pa hasi malu, pa salba bida òf pa mata?’ ” (Marko 3:4, NKJV). El “a wak nan ku rabia, siendo tristu pa e duresa di nan kurason” i despues a sigui kura e hòmber (Marko 3:5, NKJV). E furia di Kristu ta asosiá aki ku tristesa pa nan duresa; e ta e furia hustu di amor, meskos ku e rabia atribuí na Dios den Tèstamènt Bieu ta e rabia hustu di amor. Kon amor no por ta molestiá pa maldat, spesialmente ora maldat ta hasi daño na e ophetonan di e amor ei?

Dios No Ta Aflihí Boluntariamente

Den henter Beibel, Dios ta desplegá Su pashon bes tras bes na fabor di esnan oprimí i Su indignashon hustu korespondiente kontra e malechornan i opresornan. Si no tabatin maldat, Dios lo no a rabia. Su rabia ta solamente i semper kontra e loke ta hasi daño na Su kreashon.

Segun Lamentashonnan 3:32,33, Dios no ta aflihí boluntariamente (literalmente, Dios no ta afligí “di Su kurason”). E no ke trese huisio kontra hasidónan di maldat, pero amor finalmente ta rekerí hustisia.

E bèrdat akí ta ser ilustrá den kon largu Dios a sigui pordoná Su pueblo i bes tras bes ta duna nan oportunidatnan pa arepentí i rekonsiliá kunE. Bes tras bes, atraves di e profetanan, Dios a yama Su pueblo, pero nan a nenga di skucha (lesa Jer. 35:14–17, Sal. 81:11–14).

Lesa Esdras 5:12 i kompar’é ku Jeremias 51:24,25,44. Kiko esaki ta splika tokante e huisio ku a bini riba Jerúsalèm via e babilonionan? (Lesa tambe 2 Kron. 36:16.)

Di akuerdo ku Esdras 5, despues ku e pueblo a provoká Dios na rabia persistentemente i sin arepentimentu, El a retirá finalmente i “a duna” e pueblo “ ‘den man di Nabukodonosor, Rei di Babilonia’ ” (Esdras 5:12, NKJV). Pero Dios a hasi esei solamente despues ku no tabatin “remedi mas” (2 Kron. 36:16), i despues Dios a husga Babilonia pa e destrukshon eksesivo ku el a okashoná riba Huda (Jer. 51:24,25,44; kompará ku Zak. 1:15).

Hopi otro huisionan ku Skritura ta deskribí komo efektuá pa Dios ta ser spliká komo kasonan den kua Dios “ta entregá” e pueblo na nan enemigunan (Huesnan 2:13,14; Salmo 106:41,42), di akuerdo ku e pueblo su desishonnan pa bandoná Señor i sirbi e “diosnan” di e nashonnan (Huesnan 10:6–16, Deut. 29:24–26). Dios Su rabia kontra maldat, ku finalmente lo kulminá den eradikashon di tur maldat un biaha pa semper, ta surgi for di Su amor pa tur hende i for di Su deseo pa e bienestar final di universo, ku riba su mes tin un interes den henter e kuestion di piká i rebelion i maldat.

Mustra Kompashon

Miéntras ku furia divino ta un kos “teribel”, di ningun manera e ta inmoral òf indiferente. Al kontrario, den Tèstamènt Bieu i Nobo, Dios ta ekspresá rabia kontra maldat pa motibu di Su amor. Furia divino ta teribel pa motibu di e naturalesa traisionero di maldat, kontrali na e bondat puru i splendor di Dios.

Den e sentido akí, amor ta esensial pa Dios; rabia no ta. Kaminda no tin maldat òf inhustisia, no tin rabia. Na final, e akshon di mas amoroso di Dios di eradiká maldat for di universo tambe lo eliminá rabia i furia efektivamente. I esei ta pasobra nunka mas lo tin ningun inhustisia òf maldat. Pa semper, lo tin solamente e eternidat di felisidat i hustisia den un relashon amoroso perfekto. Nunka mas lo tin furia divino pasobra nunka mas lo tin nesesidat di dje. Ki un pensamentu maravioso!

Algun hende ta preokupá ku furia divino kisas por ser tumá sin intenshon komo duna pèrmit na vengansa humano. Lesa Deuteronomio 32:35, Proverbionan 20:22, Proverbionan 24:29, Romanonan 12:17–21, i Hebreonan 10:30. Kon e tèkstnan akí ta protehá kontra vengansa humano?

Di akuerdo ku Skritura, Dios tin e derecho di trese huisio; i ora E hasi esaki, semper E ta hasié ku hustisia perfekto. Tantu Tèstamènt Bieu komo esun Nobo ta reservá vengansa eksplísitamente pa Dios. Manera Pablo ta skirbi den Romanonan 12:19 (NASB), “Nunka tuma bo mes vengansa, stimánan, ma laga espasio pa e furia di Dios, pasobra ta pará skirbí: ‘VENGANSA TA DI MI, AMI LO PAGA,’ Señor ta bisa” (sitando for di Deuteronomio 32:35).

Miéntras ku Dios finalmente ta trese huisio kontra inhustisia i maldat, Kristu a traha un kaminda pa tur ku ta kere den djE. En bèrdat, ta “Hesus ta libra nos di e furia ku ta bini” (1 Tes. 1:10, NKJV; kompará ku Rom. 5:8,9). I esaki ta di akuerdo ku e plan di Dios: “Pasobra Dios no a nombra nos pa rabia, ma pa optené salbashon pa medio di nos Señor Hesu-Kristu” (1 Tes. 5:9, NKJV). Furia divino no ta ser anulá, ma esnan ku tin fe den Hesus lo ser librá di tal furia pa motibu di Kristu.

Lesa Ellen G. White, “Idolatry at Sinai,” p. 315– 330, den Patriarchs and Prophets.

Den konteksto di e piká di e bisé di oro, Ellen G. White a skirbi: “E israelitanan tabata kulpabel di traishon, i esei kontra un Rei ku a karga nan ku benefisionan i kende su outoridat nan a primintí nan mes boluntariamente pa obedesé. Pa e gobièrnu divino por a ser mantené, hustisia mester ser hasi ku e traidornan. Sinembargo, asta aki e mizerikòrdia di Dios a ser manifestá. Miéntras E tabata mantené Su lei, El a duna libertat di eskoho i oportunidat pa arepentimentu na tur hende. Solamente esnan ku a persistí den rebelion a ser kòrtá afó.

“Tabata nesesario pa e piká akí ser kastigá, komo un testimonio pa e nashonnan rònt di nan di e desagrado di Dios kontra idolatria. Dor di ehekutá hustisia riba esnan kulpabel, Moises, komo instrumento di Dios, mester a laga un protesta solèm i públiko registrá kontra nan krímen. Ora ku despues di esaki e israelitanan mester a kondená e idolatria di e tribunan bisiña, nan enemigunan lo a tira e akusashon bèk riba nan ku e pueblo ku a reklamá Yehova komo nan Dios a traha un bisé i a adorá esaki na Horeb. E ora ei, aunke obligá pa rekonosé e bèrdat bergonsoso, Israel por a mustra riba e destino teribel di e transgresornan, komo evidensia ku nan piká no a ser aprobá òf diskulpá.

“Amor no ménos ku hustisia a demandá ku pa e piká akí huisio mester a ser imponé. Tabata e mizerikòrdia di Dios ku míles mester a sufri, pa prevení e nesesidat di ehekutá huisionan riba miónes. Pa salba e hopinan, E mester a kastigá e pokonan.”—Ellen G. White, Patriarchs and Prophets, p. 324, 325.

Preguntanan pa Diskushon: