Amor i Hustisia: E Dos Mandamentunan di Mas Grandi

Lesa pa e Estudio di e Siman Akí:

Versíkulo di Memoria:

“Si un hende bisa: ‘Mi ta stima Dios,’ i ta odia su ruman, e ta un gañadó; pasobra esun ku no ta stima su ruman ku e ta mira, kon e por stima Dios ku e no a mira?” (1 Juan 4:20, NKJV).

Aunke nos tin konfiansa ku Dios lo drecha tur kos na final, tòg ta importá kiko nos, komo kristian, ta hasi den e aki i awor. Aunke por tin hopi inhustisia i maldat ku Dios lo no eradiká awor (pa motibu di e parameternan di e konflikto kósmiko), esaki no ta nifiká ku nos no por ser usá pa yuda aliviá kualke sufrimentu i maldat ku nos topa, a lo ménos te na kualke grado posibel. De echo, nos ta obligá, komo kristian, pa hasi nèt esei.

Manera nos a mira, amor i hustisia ta bai huntu; nan ta inseparabel. Dios ta stima hustisia. Di akuerdo ku esaki, si nos ta stima Dios, nos lo stima hustisia tambe.

Di mes manera, si nos ta stima Dios, nos lo stima otro. Parti di stima otro ta kompartí un preokupashon pa bienestar di esnan rònt di nos. Ora otronan ta ser afligí pa pobresa, opreshon òf kualke tipo di inhustisia, nos mester ta preokupá. Ora otronan ta ser oprimí, nos no mester sera wowo. En kambio, nos mester puntra nos mes kiko nos por hasi, individualmente i korporativamente, pa avansá e amor i hustisia di Dios na un manera ku ta reflehá na nos mundu kibrá e karakter perfekto di hustisia i amor di nos Señor.

E Dos Mandamentunan di Mas Grandi

Pa reflehá riba kiko nos lo por hasi, individualmente i korporativamente, pa avansá e amor i hustisia di Dios den nos mundu, ta apropiá pa kuminsá dor di enfoká riba loke Dios a ordená nos.

Lesa Mateo 22:34–40. Kon Hesus a kontestá e pregunta di e abogado?

Di akuerdo ku Hesus Mes, e “promé i gran mandamentu” ta “Lo bo stima SEÑOR bo Dios ku henter bo kurason, ku henter bo alma, i ku henter bo mente.” I, Hesus ta agregá: “e di dos ta meskos kuné: Lo bo stima bo próhimo meskos ku bo mes.” E mandamentunan akí no ta para nan so, sinembargo. Hesus ta instruí ademas: “Riba e dos mandamentunan akí henter e Lei i e Profetanan ta dependé” (Mat. 22:37–40, NKJV). En bèrdat, nan mes ta sitá for di Tèstamènt Bieu.

Lesa Mateo 19:16–23. Kon e kontestanan di Hesus riba e preguntanan di e hóben riku ta relashoná ku Su kontestanan riba e pregunta di e abogado den Mateo 22?

Kiko tabata pasando aki? Dikon Hesus a kontestá e hòmber akí manera El a hasié? I kiko e enkuentronan akí mester bisa nos tur, independientemente di nos posishon òf puesto den bida?

“Kristu a presentá e úniko términonan ku por a pone e gobernante kaminda e lo a perfekshoná un karakter kristian. Su palabranan tabata palabranan di sabiduria, ounke nan tabata parse severo i eksigente. Den aseptá i obedesé nan tabatin e gobernante su úniko speransa di salbashon. Su posishon eksaltá i su poseshonnan tabata ehersé un influensia sutil pa maldat riba su karakter. Si nan ser preferá, nan lo a remplasá Dios den su afektonan. Tene poko òf hopi atras for di Dios tabata nifiká retené e loke lo a mengua su forsa i efisiensia moral; pasobra si e kosnan di e mundu akí ta ser tesorá, maske kon insigur i indigno nan por ta, nan lo apsorbé tur kos.”—Ellen G. White, The Desire of Ages, p. 520.

Aunke nos tur lo no ser yamá pa bende tur loke nos tin, manera e hóben riku akí, kiko abo, personalmente, lo por ta teniendo na dje ku, si bo no entreg’e, lo por hiba na bo ruina eterno?

E Dos Pikánan di Mas Grandi

Segun Hesus Mes, e dos mandamentunan di mas grandi ta amor pa Dios i amor pa otro. I kumpli ku e mandatonan akí ta enbolbí sakrifisionan ku ta mustra amor di forma tangibel na otronan, ku ta loke sigui den e pasonan di Hesus ta trata realmente.

Awor, si e dos mandamentunan di mas grandi ta amor pa Dios i amor pa otronan, kua ta e dos pikánan di mas grandi?

Lesa Salmo 135:13–19. Kiko esaki ta revelá tokante un piká komun enfatisá den henter e Skritura?

Tèstamènt Bieu ta enfatisá kontinuamente e importansia di amor pa Dios riba tur kos (lesa Deut. 6:5). Esaki ta estrechamente relashoná ku e gran piká di idolatria, ku ta lo kontrali di amor pa Dios.

Lesa Zakarias 7:9–12. Di akuerdo ku profeta Zakarias den e pasashi akí, kiko Dios ta dekretá? Kon esaki i e piká di idolatria ta relashoná ku e dos gran mandamentunan?

No ta solamente riba idolatria Dios ta respondé ku e rabia di amor sino riba maltrato di Su pueblo, sea individualmente òf korporativamente. Dios ta rabia riba inhustisia pasobra Dios ta amor.

E dos gran pikánan enfatisá den henter e Tèstamènt Bieu ta fayonan relashoná ku e dos gran mandamentunan: stima Dios i stima otro. E dos pikánan di mas grandi ta fayonan di amor. Den dos palabra, anto, bo no por warda e mandamentunan si bo no ta stima Dios i si bo no ta stima otronan.

En bèrdat, 1 Juan 4:20,21 ta deklará: “Si un hende bisa: ‘Mi ta stima Dios,’ i ta odia su ruman, e ta un gañadó; pasobra esun ku no ta stima su ruman ku e ta mira, kon e por stima Dios ku e no a mira? I e mandamentu akí nos tin di djE: ku esun ku ta stima Dios mester stima su ruman tambe” (NKJV).

Dios ta Stima Hustisia

Skritura ta deklará ku Dios ta stima hustisia i ta odia maldat (por ehèmpel, Salmo 33:5, Isa. 61:8), i E ta preokupá profundamente pa inhustisia, ku ta lanta indignashon hustu na nòmber di tur esnan ku ta víktimanan di inhustisia. Den henter Tèstamènt Bieu i Nobo, Dios ta konsistentemente pashoná na fabor di esnan oprimí miéntras E ta ekspresá rabia hustu kontra e malechornan i opresornan.

Lesa Salmo 82. Kon e salmo akí ta ekspresá Dios su preokupashon pa hustisia den e mundu akí? Kiko e lo por nifiká pa nos awe?

Manera hopi komentarista ta komprond’é, e pasashi akí ta dekretá tantu e gobernantenan terenal, responsabel pa tantu e inhustisia den sosiedat, komo tambe ta un referensia na ora Dios ta husga e gobernantenan selestial (e “diosnan”) tras di huesnan i gobernantenan terenal korupto (forsanan demoniako, obviamente). Spesífikamente, e gobernantenan ta ser puntrá, “Kuantu tempu mas boso lo husga inhustamente, i mustra parsialidat na e malbadonan?” (Salmo 82:2, NKJV).

Ademas, nan ta ser akusá: “Defendé e pobernan i e huérfanonan; hasi hustisia na esnan afligí i den nesesidat. Libra e pobernan i esnan den nesesidat; libra nan for di man di e malbadonan” (Salmo 82:3,4, NKJV). Aki i otro kaminda, e profetanan di Tèstamènt Bieu ta trese un yamada kla pa hustisia. Esaki no ta un preokupashon sekundario di Skritura; e ta sentral na e mensahe di e profetanan den henter Tèstamènt Bieu i na loke Hesus a papia ora E tabata aki den karni.

No ta un sekreto kiko Dios ta deseá i ta rekerí di esnan ku lo a pretendé di stim’E i obedes’E. E ta spesifiká masha kla den Mikeas 6:8 (i den pasashinan similar na otro kaminda): “El a mustrabo, o hende, kiko ta bon; i kiko SEÑOR ta rekerí di bo sino pa hasi hustisia, stima mizerikòrdia i kana humildemente ku bo Dios?” (NKJV).

E prinsipio akí ta ser ripití den henter Skritura. Por ehèmpel, Hesus a bisa: “Pa medio di esaki tur hende lo sa ku boso ta Mi disipelnan, si boso tin amor pa otro” (Juan 13:35, NKJV; kompará ku 1 Juan 4:8–16).

Yamá pa Establesé Hustisia

E profetanan den Skritura ta destaká kontinuamente e yamada di Dios pa hustisia den sosiedat. Bes tras bes, Skritura no ta hala atras di resaltá asuntunan di inhustisia i opreshon. En bèrdat, e yamada pa Dios trese huisio tabata riba su mes e yamada pa Dios establesé hustisia.

Por ehèmpel, profeta Isaías no ta duda ora e ta papia tokante e inhustisia den Israel e tempu ei. Su palabranan i yamada pa hustisia mester zona duru i kla den nos oreanan awe. “Siña hasi bon; buska hustisia, reprendé e opresor; defendé e huérfano, pleita pa e biuda” (Isa. 1:17, NKJV). Ademas, e ta proklamá “ai” kontra esnan ku “ta dekretá dekretonan inhustu” i “ta hòrta esnan den nesesidat di hustisia” (Isa. 10:1,2, NKJV), atvirtiendo: “Kiko lo bo hasi riba e dia di kastigu, i den e desolashon ku lo bini for di leu? Serka ken lo bo hui pa yudansa? I unda lo bo laga bo gloria?” (Isa. 10:3, NKJV).

Di mes manera, profeta Jeremías ta proklamá e mensahe di Dios: “Ai di esun ku ta konstruí su kas pa medio di inhustisia i su kambernan pa medio di inhustisia, ku ta usa sirbishi di su próhimo sin pago i no ta dun’é nada pa su trabou. Bo tata no tabata kome i bebe, i hasi hustisia i rektitut? anto e tempu ei tabata bai bon kuné. El a husga e kousa di e pobernan i esnan den nesesidat; anto tabata bai bon kuné. Esaki no tabata nifiká konoséMi?’ SEÑOR ta bisa” (Jer. 22:13, 15,16, NKJV).

Lesa Mateo 23:23–30. Kiko Hesus ta siña aki tokante kiko ta mas importante? Kiko bo ta kere ku E ke men ora E ta referí na “asuntunan mas importante”?

Pa no pensa ku inhustisia tabata un preokupashon solamente di profetanan di Tèstamènt Bieu, nos ta mira klaramente aki i otro kaminda den e ministerio di Hesus ku esaki tabata di sumo preokupashon pa Kristu Mes. Manera E ta bisa: “Ai di boso, eskriba- i fariseonan, hipókritanan! Pasobra boso ta paga diesmo di menta i anis i komino, i boso a neglishá e kosnan mas importante di lei: hustisia i mizerikòrdia i fe. Esakinan boso mester a hasi, sin laga e otronan sin hasi” (Mat. 23:23, NKJV). Den e pasashi paralelo den Lukas, Hesus ta lamentá ku nan “ta pasa hustisia i e amor di Dios por alto” (Lukas 11:42, NKJV).

Ken Ta Mi Próhimo?

Den e relato di Lukas, djis despues ku Hesus a deklará e dos mandamentunan di mas grandi di amor pa Dios i amor pa un próhimo, un abogado, “ku ker a hustifiká su mes, a bisa Hesus: ‘I ken ta mi próhimo?’ ” (Lukas 10:29, NKJV). Komo kontesta riba esaki, Hesus ta konta e parabel di e bon samaritano ku awor ta konosí, pero e tempu ei impaktante.

Lesa e parabel di e bon samaritano den Lukas 10:25–37. Kiko e pasashi akí ta bisando den lus di e gritu di e profetanan pa mizerikòrdia i hustisia i di e tiponan di inhustisia ku diferente grupo di hende a kousa “otronan” atraves di historia humano?

Hesus no a djis papia tokante hustisia; El a bin pa tres’é. E tabata i lo ta e kumplimentu di e yamada profétiko i anhelo pa hustisia (lesa Lukas 4:16–21 den lus di Isaias 61:1,2). E ta e deseo di tur nashon, spesialmente esnan ku ta rekonosé nan nesesidat pa liberashon.

Den kontraste direkto ku e enemigu, ku a gara pa poder i a trata na usurpá e trono di Dios, Hesus a baha Su mes i a identifiká ku esnan bou di piká, inhustisia i opreshon (sin ser infektá pa piká), i El a derotá e enemigu dor di duna Su mes den amor pa asina establesé hustisia komo Esun ku ta hustu i e Hustifikadó di tur ku ta kere. Kon nos por pretendé di ta preokupá tokante e lei ku Kristu a muri pa sostené si nos no ta preokupá tokante loke Kristu ta yama e asuntunan mas importante di e lei?

Salmo 9:8,9 ta proklamá: “E lo husga mundu den hustisia, i E lo atministrá huisio pa e pueblonan den rektitut. SEÑOR lo ta tambe un refugio pa esnan oprimí, un refugio den tempu di problema” (NKJV). Di mes manera, Salmo 146:7–9 ta agregá: Dios “ta ehekutá hustisia pa esnan oprimí” i “ta duna kuminda na esnan ku hamber. SEÑOR ta duna libertat na e prezunan. SEÑOR ta habri wowo di e siegunan; SEÑOR ta lanta esnan ku a kai; SEÑOR ta stima e hustunan. SEÑOR ta warda e strañeronan; E ta aliviá huérfano- i biudanan; pero e kaminda di e malbadonan E ta trastorná” (NKJV).

Kuantu mas kla e Palabra di Dios por tabata pa loke ta trata kon nos mester trata na ministrá na esnan rònt di nos ku ta den nesesidat i ta sufriendo?

Lesa Ellen G. White, “The Sabbath,” p. 281–289, den The Desire of Ages.

“E spionnan no a riska kontestá Kristu den presensia di e multitut, pa miedu di enbolbí nan mes den difikultat. Nan tabata sa ku El a papia bèrdat. Mas bien ku violá nan tradishonnan, nan lo a laga un hòmber sufri, miéntras ku nan lo a aliviá un hòmber brutu pa motibu di pèrdida pa e doño si el a ser neglishá. Asina mayor kuido a keda demostrá pa un animal bobo ku pa hende, ku ta trahá den imágen di Dios. Esaki ta ilustrá e funshonamentu di tur religion falsu. Nan ta originá den e deseo di hende pa halsa su mes riba Dios, pero nan ta resultá den degradá hende bou di e brutu. Tur religion ku ta hasi guera kontra e soberania di Dios ta defraudá hende di e gloria ku tabata di dje na Kreashon, i ku mester ser restourá na dje den Kristu. Tur religion falsu ta siña su atherentenan pa no tene kuidou ku nesesidatnan, sufrimentunan i derechonan humano. E evangelio ta pone un balor haltu riba humanidat komo e kompra di e sanger di Kristu, i e ta siña un rèspèt tierno pa e deseonan i aflikshonnan di hende. Señor ta bisa: ‘Lo Mi hasi un hende mas presioso ku oro puru; asta un hòmber mas ku e punta di oro di Ofir.’ Isa. 13:12.

“Ora Hesus a bira riba e fariseonan ku e pregunta ku si tabata legal riba dia di Sabat pa hasi bon òf pa hasi malu, pa salba bida òf pa mata, El a konfrontá nan ku nan propio propósitonan malbado. Nan tabata yag riba Su bida ku odio amargo, miéntras E tabata salbando bida i tresiendo felisidat pa multitutnan. Tabata mihó pa mata riba Sabat, manera nan tabata planiando pa hasi, ku kura esnan afligí, manera El a hasi? Tabata mas hustu pa tin asesinato den kurason riba e dia santu di Dios ku amor pa tur hende, ku ta haña ekspreshon den echonan di mizerikòrdia?”—Ellen G. White, The Desire of Ages, p. 286, 287.

Preguntanan pa Diskushon: