Amor Ta Kumplimentu di Lei

Lesa pa e Estudio di e Siman Akí:

Versíkulo di Memoria:

“No debe niun hende nada eksepto stima otro, pasobra esun ku stima otro a kumpli ku e lei” (Rom. 13:8, NKJV).

Miéntras nan tabata tratando ku un miembro problemátiko, un hende den e hunta di iglesia a bisa e pastor: “Nos no por tuma desishonnan basá riba kompashon.” Nos no por? E pastor a puntra su mes kiko e persona akí su komprondementu di Dios i di e lei di Dios mester tabata. Kompashon sigur mester ta sentral den kon nos ta trata ku hende, spesialmente esnan ku ta kometé eror. Kompashon ta parti esensial di amor, i manera Romanonan 13:8 ta bisa nos, stima bo próhimo ta kumpli ku lei. Si enbèrdat amor ta kumplimentu di lei, e ora ei nos mester ta kuidadoso pa no pensa riba lei na un manera ku ta separá for di amor òf pa pensa riba amor na un manera ku ta deskonektá for di lei. Den Skritura, amor i lei ta bai huntu. E Legisladó divino ta amor, i di akuerdo ku esei, e lei di Dios ta e lei di amor. E ta, manera Ellen G. White a pon’é, e transkripshon di e karakter di Dios. (Lesa Christ’s Object Lessons, p. 305.)

E lei di Dios no ta un sèt di prinsipionan apstrakto sino mandatonan i instrukshonnan destiná pa nos floresimentu. E lei di Dios ta, parsialmente, un ekspreshon di amor manera Dios Mes ta ekspres’é.

E Lei di Amor

E lei di Dios no ta konsistí di prinsipionan apstrakto; en kambio, e lei di Dios ta un ekspreshon di relashon. Esaki por ser mirá eksplísitamente den e Dies Mandamentunan. E prinsipionan básiko di e Dies Mandamentunan tabata vigente kaba den e Hòfi di Eden, e prinsipionan di amor ku mester a goberná e relashon entre Dios i hende i entre hende mes.

Ora e Dies Mandamentunan a ser skirbí den piedra den Eksodo 20, nan a ser duná na Israel den konteksto di e relashon di pakto. E mandamentunan a ser skirbí despues ku Señor a libra e pueblo for di Egipto kaba, i e mandamentunan tabata basá riba e amor di Dios i riba Su promesanan na e nashon (lesa Eks. 6:7,8 i Lev. 26:12). Hende por mira den e dos divishonnan di e Dies Mandamentunan ku nan ta dirigí riba e floresementu di un relashon humano ku Dios i di relashonnan ku otro.

Lesa Eksodo 20:1–17. Kon e versíkulonan akí ta revelá e dos prinsipionan, esnan di amor pa Dios i di amor pa otronan?

E promé kuater mandamentunan ta trata ku e relashonnan di hende ku Dios, i e último seis ku e relashonnan di hende entre nan mes. Nos relashon, tantu ku Dios komo ku otro hende, mester ta regulá pa e prinsipionan di e lei di Dios.

E dos partinan akí di e lei ta korespondé direktamente na loke Hesus a identifiká komo e dos mandamentunan di mas grandi, “Lo bo stima SEÑOR bo Dios ku henter bo kurason” (Mat. 22:37, NKJV; kompará ku Deut. 6:5) i “Lo bo stima bo próhimo manera bo mes” (Mat. 22:39, NKJV; kompará ku Lev. 19:18).

E promé kuater mandamentunan ta e maneranan den kua nos mester stima Dios ku henter nos ser, i e último seis ta maneranan ku nos mester stima otro manera nos mes. Hesus ta hasié eksplísito ku e dos gran mandamentunan di amor akí ta integralmente relashoná ku e lei. “Riba e dos mandamentunan akí henter e Lei i e Profetanan ta dependé” (Mat. 22:40, NKJV).

E totalidat di e lei di Dios, e ora ei, ta basá riba e amor di Dios. Dios su amor i lei ta inseparabel. Hopi biaha nos ta tende hende bisa: Nos no mester kumpli ku lei, nos mester djis stima Dios i stima otronan. Dikon e idea ei no tin sentido?

Kon nos lo por a ekspresá amor na Dios, òf amor na otronan, si nos ta violando kualke un di e Dies Mandamentunan?

E Lei Ta Santu i Hustu i Bon

Amor ta e fundeshi di e lei di Dios. Ora Dios ta sostené e lei, E ta sostené amor. Esaki ta e motibu pakiko Hesus a muri pa asina salba pekadornan, pa asina E por a sostené e lei miéntras ku E tabata ekstendé grasia na nos. Pues, E por tabata tantu hustu komo e hustifikadó di esnan ku ta kere (Rom. 3:25,26). Ki un ekspreshon di amor! Di akuerdo ku esaki, e lei no ta ser invalidá dor di e proseso di redenshon; mas bien, e ta ser konfirmá ainda mas.

Lesa Romanonan 6:1–3 i despues Romanonan 7:7–12, ku énfasis partikular riba versíkulo 12. Kiko e versíkulonan akí ta bisando nos tokante e lei, asta despues ku Kristu a muri?

Miéntras ku algun hende ta kere ku grasia i redenshon ta kanselá e lei, Pablo ta kla ku nos no mester sigui den piká pa asina grasia oumentá. Mas bien, esnan ku ta den Kristu pa medio di fe a ser “batisá den Su morto” i p’esei mester konta nan mes komo morto pa piká i bibu pa Kristu.

E lei di Dios no ta piká, sino (entre otro kosnan) e ta hasi piká i nos pekaminosidat bisto pa nos. Ta p’esei, sí, “e lei ta santu, i e mandamentu santu i hustu i bon” (Rom. 7:12, NKJV). E ta revelá, manera nada otro ta hasi, nos gran nesesidat di salbashon, di redenshon, e salbashon i redenshon ku ta bini solamente pa medio di Kristu. Di akuerdo ku esaki, nos no “ta hasi e lei nulo pa medio di fe” sino “al kontrario, nos ta establesé e lei” (Rom. 3:31, NKJV).

Kristu no a bini pa anulá e lei sino pa kumpli ku tur loke a ser primintí den e Lei i den e Profetanan. Pues, E ta enfatisá ku “te ora shelu i tera pasa bai,” ni sikiera “e lèter òf strepi di mas chikitu lo pasa di e Lei” (Mat. 5:18, NASB 1995).

E lei di Dios mes ta representá e santidat di Dios, Su karakter perfekto di amor, hustisia, bondat i bèrdat (Lev. 19:2; Salmo 19:7,8; Salmo 119:142,172). Den e sentido akí, ta signifikante ku, di akuerdo ku Eksodo 31:18, Dios a skirbi e Dies Mandamentunan riba e tablanan di piedra E mes. Skirbí den piedra, e leinan akí ta testimonio di e karakter inkambiabel di Dios i di Su gobièrnu moral, ku ta fundá riba amor, un tema sentral di e gran konflikto.

Lei i Grasia

Manera nos a mira, lei i grasia no ta kontrali na otro. En kambio, nan ta sirbi diferente funshon di akuerdo ku e amor i hustisia di Dios. Un kontraste skerpi entre lei i grasia lo a deskonsertá e israelitanan antiguo, ku a mira e echo ku Dios a duna e lei mes komo un gran demostrashon di e grasia di Dios. Miéntras ku e “diosnan” di e nashonnan alrededor tabata inkonstante i kompletamente impredesibel, lagando hende sin un manera pa sa kiko e “diosnan” tabata deseá i kiko lo a agradá nan, e Dios di Beibel ta instruí Su pueblo di forma masha kla tokante kiko ta agrad’E. I loke ta agrad’E ta presisamente loke ta pa e bon final di henter Su pueblo, individualmente i kolektivamente.

Sinembargo, e lei no por salba nos di piká òf kambia kurason di hende. Pa motibu di nos pekaminosidat innato, nos mester di un transplante di kurason spiritual.

Lesa Jeremias 31:31–34. Kiko esaki ta siña tokante e promesanan di Dios pa duna nos un kurason nobo? Kompará esaki ku e palabranan di Kristu na Nikodemo den Juan 3:1–21 tokante e nasementu di nobo. (Lesa tambe Hebr. 8:10.)

E Dies Mandamentunan a ser skirbí dor di Dios Mes riba e tablanan di piedra (Eks. 31:18), pero e lei mester a ser skirbí tambe den kurason di e pueblo di Dios (Salmo 37:30,31). Idealmente, e lei di amor di Dios lo no tabata eksterno pa nos sino interno pa nos mes karakternan. Dios so por a inskribí Su lei riba kurasonnan humano, i El a primintí di hasi esaki pa Su pueblo di pakto (lesa Hebr. 8:10).

Nos no por salba nos mes dor di kumpli ku lei. Mas bien, ta pa medio di grasia nos ta ser salbá pa medio di fe, no di nos mes sino komo e don di Dios (Efe. 2:8). Nos no ta warda e lei pa nos ser salbá; nos ta warda e lei pasobra nos ta salbá kaba. Nos no ta warda e lei pa ser stimá sino pasobra nos ta stimá, i pues nos ta deseá di stima Dios i otronan (lesa Juan 14:15).

Na mes momentu, e lei ta mustra nos nos piká (Santiago 1:22–25, Rom. 3:20, Rom. 7:7), ta mustra nos nos nesesidat di un Redentor (Gal. 3:22–24), ta guia nos den e mihó formanan di bida, i ta revelá e karakter di amor di Dios.

Amor Ta Kumplimentu di Lei

E relashon entre amor i lei no por ser eksagerá. De echo, di akuerdo ku Skritura, stima ta nifiká kumpli ku lei.

Den Romanonan 13:8–10, Pablo ta siña ku “esun ku stima otro a kumpli ku lei” (Rom. 13:8, NKJV). Despues di a numerá hopi di e último seis di e Dies Mandamentunan, Pablo ta deklará ku esakinan tur “ta resumí den e dicho akí, esta, ‘Lo bo stima bo próhimo manera bo mes’ ” (Rom. 13:9, NKJV). De echo, Pablo ta siña eksplísitamente: “Amor ta kumplimentu di lei” (Rom. 13:10, NKJV). Atrobe, den Galationan 5:14, Pablo ta splika: “Henter e lei ta kumplí den un palabra, asta den esaki: ‘Lo bo stima bo próhimo manera bo mes’ ” (Gal. 5:14, NKJV). Pero ki tipo di amor ta esun ku ta kumpli ku lei? Kon un amor asina ta?

Lesa Mateo 23:23,24. Kiko ta e “asuntunan di mas importante di e lei”? Lesa Deuteronomio 5:12–15 i Isaias 58:13,14. Kon e pasashinan akí ta demostrá e relashon entre e lei (partikularmente e mandamentu di Sabat) i e preokupashon di Dios pa hustisia i liberashon?

Hesus ta identifiká e “asuntunan mas importante di lei” komo “hustisia, mizerikòrdia i fe.” I den relashon ku un lei en partikular, e Sabat, nos por mira den Skritura ku e Sabat mes ta integralmente konektá ku liberashon i hustisia.

Den Deuteronomio 5, e mandamentu di Sabat ta basá den relashon ku Dios su liberashon di Israel for di sklabitut. Es desir, e Sabat no ta solamente un rekordatorio di kreashon sino tambe un rekordatorio di liberashon for di sklabitut i opreshon. I den e konteksto tokante bira for di bo mes plaser pa yama e Sabat un delisia dor di tin delisia den Señor (Isa. 58:13,14), e énfasis ta riba obranan di amor i hustisia pa otronan, hasi bon, alimentá esnan ku hamber, alohá esnan sin kas (lesa Isa. 58:3–10).

Mirando tur e siñansanan akí (i hopi otro), esnan ku ta deseá di kumpli ku e lei pa medio di amor mester ta preokupá, no solamente tokante pikánan di komishon, sino tambe tokante pikánan di omishon. Amor komo kumplimentu di lei no ta enbolbí solamente warda e lei den sentido di apstené di kometé piká sino tambe ta konsistí di hasi bon aktivamente, hasi e obranan di amor ku fielmente ta avansá hustisia i mizerikòrdia. Ser fiel na Dios ta mas ku djis no violá e lèter di lei.

Riba Tur Kos, Stima Otro

Si amor ta kumplimentu di lei, e ora ei un hende no por warda e lei di Dios den su pleno sentido simplemente dor di apstené di hasi kosnan robes. E lei di amor mes (ekspresá den e plenitut di Skritura) no solamente ta manda nos apstené di hasi malu sino e lei ta impulsá nos pa hasi aktonan ku ta revelá e amor di Dios na otronan, no solamente na otro miembronan di iglesia sino tambe na mundu en general, ku ta asina desesperadamente den nesesidat di un berdadero testimonio kristian.

Lesa Santiago 2:1–9. Ki mensahenan krusial nos ta ser duná aki?

Aki, Santiago ta dekretá inhustisia den sosiedat fuertemente, identifikando spesífikamente e deshonra di e pobernan i opreshon dor di algun hende ku ta riku. Despues, e ta yama atenshon na e lei di amor pa un hende su próhimo, bisando ku si bo kumpli ku e lei akí, e ora ei “bo ta hasi bon” (Santiago 2:8, NKJV).

Manera Ellen G. White a ekspres’é: “Amor pa hende ta e manifestashon terenal di e amor di Dios. Tabata pa implantá e amor akí, pa hasi nos yunan di un famia, ku e Rei di gloria a bira un ku nos. I ora Su palabranan di despedida ta kumplí, ‘Stima otro, meskos ku Ami a stima boso’ (Juan 15:12); ora nos stima mundu manera El a stim’é, e ora ei pa nos Su mishon ta kumplí. Nos ta apto pa shelu; pasobra nos tin shelu den nos kurason.”—Ellen G. White, The Desire of Ages, p. 641.

Ora nos stima mundu, manera Kristu a stima mundu, e ora ei nos ta apto pa shelu. Ki un ekspreshon poderoso di loke ta nifiká pa ta un siguidó di Hesus!

Hesus ta manda Su siguidónan pa “stima otro”; meskos ku “Mi a stima boso” (Juan 13:34, NKJV). Hesus ta proklamá tambe: “Pa medio di esaki tur hende lo sa ku boso ta Mi disipelnan, si boso tin amor pa otro” (Juan 13:35, NKJV). Amor ta asina sentral pa fe kristian pasobra Dios ta amor (1 Juan 4:8,16). I esnan ku ta pretendé di ta stima Dios mester stima otro (kompará ku 1 Juan 3:11; 4:20,21).

Di akuerdo ku esaki, 1 Pedro 4:8 ta eksortá kristiannan: “I riba tur kos, tin amor ferviente pa otro, pasobra ‘amor lo tapa un multitut di piká’ ” (NKJV; lesa tambe Hebr. 10:24 i 1 Tes. 3:12).

Lesa Ellen G. White, “The Least of These My Brethren,” p. 637–641, den The Desire of Ages.

“Esnan ku ta ministrá na otronan lo ser ministrá dor di e Wardadó Prinsipal. Nan mes lo bebe di e awa bibu, i lo keda satisfecho. Nan lo no ta anhelando pa dibertishonnan eksitante, òf pa algun kambio den nan bida. E gran tópiko di interes lo ta, kon pa salba e almanan ku ta kla pa peresé. Relashon sosial lo ta probechoso. E amor di e Redentor lo hala kurasonnan huntu den unidat.

“Ora nos realisá ku nos ta obreronan huntu ku Dios, Su promesanan lo no ser pronunsiá ku indiferensia. Nan lo kima den nos kurason, i sende riba nos lepnan. Na Moises, ora el a ser yamá pa ministrá na un pueblo ignorante, indisipliná, i rebelde, Dios a duna e promesa: ‘Mi presensia lo bai ku bo, i lo Mi dunabo sosiegu.’ I El a bisa, ‘Siguramente lo Mi ta ku bo.’ Eks. 33:14; 3:12. E promesa akí ta pa tur hende ku ta traha na lugá di Kristu pa Su yunan aflihí i sufriendo.”—Ellen G. White, The Desire of Ages, p. 641.

Preguntanan pa Diskushon: