E Konflikto Kósmiko

Lesa pa e Estudio di e Siman Akí:

Versíkulo di Memoria:

“I lo Mi pone enemistat entre abo i e muhé, i entre bo simia i su Simia; E lo machiká bo kabes, i abo lo machiká Su hilchi”. (Génesis 3:15, NKJV).

Sentral na teologia bíbliko tin e gran konflikto entre Kristu i Satanas. Aunke e idea di un konflikto kósmiko entre Dios i kriaturanan selestial ku a kai i a rebeldiá kontra Dios ta un motibu prominente di Skritura (Mat. 13:24–30,37–39; Rev. 12:7–10) i tambe ta prevalente den gran parti di tradishon kristian, hopi kristian a rechasá òf neglishá henter e idea.

For di un perspektiva bíbliko, sinembargo, e tema di un konflikto kósmiko, den kua e reino di Dios ta ser oponé pa diabel i su angelnan, no ta unu ku nos por neglishá sin pèrdè un gran parti di loke e relatonan bíbliko ta trata. E Evangelionan so ta yená ku referensianan na diabel i demoñonan ku ta oponé Dios.

Un Enemigu a Hasi Esaki

Lesa Mateo 13:24–27. Kon e parabel ta yuda nos komprondé maldat den nos mundu?

Hesus ta konta e storia di un doño di tereno ku ta sembra solamente bon simia den su kunuku. Sinembargo, yerba shimaron ta lanta meimei di e trigu. Ora e sirbidónan di e doño a mira esaki, nan a puntr’é: “Señor, bo no a sembra bon simia den bo kunuku? Kon antó e tin yerba shimaron?” (Mat. 13:27, NKJV). Esaki ta similar na e pregunta ku hopi biaha ta ser hasí awendia relashoná ku e problema di maldat: Si Dios a krea mundu kompletamente bon, dikon tin maldat den dje?

Lesa Mateo 13:28–30 den lus di e splikashon di Kristu den Mateo 13:37–40. Kon esaki tambe ta tira lus riba e naturalesa di e konflikto kósmiko?

E doño ta kontestá e pregunta di su sirbidó: “Un enemigu a hasi esaki” (Mat. 13:28, NKJV). Despues Hesus ta identifiká esun “ku ta sembra e bon simia” komo “e Yu di Hende”, kende ta Hesus Mes (Mat. 13:37, NKJV), i ta splika ku “e kunuku ta mundu” (Mat 13:38), i e “enemigu ku a sembra” e yerba shimaron ta “diabel” (Mat. 13:39, NKJV), deskribiendo eksplísitamente un konflikto kósmiko entre Kristu i Satanas. Dikon tin maldat den mundu? Maldat ta resultado di e enemigu (diabel) ku ta oponé e doño. “Un enemigu a hasi esaki” (Mat. 13:28, NKJV).

E kontesta akí, sinembargo, ta provoká e pregunta di siguimentu: “Bo ke pa nos bai i rekohé nan antó?” Ku otro palabra, pakiko no destruí e maldat mesora? “Nò,” e doño ta kontestá, “pa no sosodé ku, miéntras boso ta rekohé e yerba shimaron boso ta ranka e trigu tambe huntu ku nan. Laga tur dos krese huntu te na e kosecha” (Mat. 13:29,30, NKJV; kompará ku Marko 4:29). Di akuerdo ku e parabel, Dios finalmente lo pone un fin na maldat, pero destruyé prematuramente lo a resultá den daño kolateral ireversibel ku ta hasi daño na e bon.

Kua ta algun di e peligernan ora ta trata na ranka e yerba shimaron for di e trigu awor? Na mes momentu, dikon esaki no ta nifiká simplemente ignorá e maldat ku nos ta topa?

E Orígen di e Konflikto riba Tera

Paralelo na e pregunta den e parabel, tokante dikon tin mal simia den e kunuku si e doño a planta solamente bon simia, tin un otro pregunta: si Dios a krea e mundu kompletamente bon, kon maldat a surgi aki?

Lesa Génesis 1:31. Kiko e palabranan di Dios ta revelá tokante e estado di kreashon ora Dios a kaba di krea, i dikon e kontesta akí ta importante?

Di akuerdo ku Génesis 1:31, ora Dios a kaba di krea mundu, e tabata “masha bon”. Den Génesis 1, no tin ningun indikashon di maldat den e kreashon di Dios di e planeta akí. Kon, antó, maldat a drenta den e eksperensia humano?

Lesa Génesis 3:1-7. Kiko esaki ta bisa nos tokante kon maldat a yega aki riba tera? Ki lus esaki ta tira riba e naturalesa di e konflikto kósmiko? (Lesa tambe Rev. 12:7–9.)

Den e relato akí, nos ta mira mentiranan tokante e karakter di Dios lantá dor di e kolebra, identifiká komo diabel mes (e “kolebra di ántes” ei [NKJV]) den Revelashon 12:7–9. E kolebra ta usa un pregunta promé pa tira duda riba e mandato di Dios, kasi anulando loke Dios a ordená den su pregunta. Despues, e kolebra ta desafiá direktamente loke Dios a bisa, bisando Eva: “Siguramente boso lo no muri” (Gén. 3:4, NKJV).

Un hende, sea e kolebra òf Dios, a gaña Eva, ku awor tin un eskoho pa hasi tokante si e lo kere loke Dios a bis’é òf loke e kolebra a hasi.

Aki i otro kaminda den Skritura, e naturalesa di e konflikto akí ta primeramente riba kiko i ken kere, ku riba su mes ta integralmente relashoná ku amor. I esei ta pasobra bo kreensianan tokante un hende, e tipo di persona ku e ta, i si e por ser konfiá, ta impaktá profundamente si lo bo stima i konfia e persona ei i, den e kaso akí, skucha kiko E ta bisabo.

E Orígen di e Konflikto den Shelu

Génesis 1–3 so ta demostrá ku maldat tabata eksistí promé ku e kaida di Adam i Eva. Konseptualmente, “maldat” a aparesé kaba, den nòmber di “e palu di konosementu di bon i malu” (Gén. 2:9,17). Despues e kolebra ta akusá Dios di ta gaña ora ku, de echo, e, e kolebra, ta esun ku ta gaña. E eksistensia di e kolebra (Rev. 12:9), huntu ku su mentira, ta mustra e realidat di maldat einan. Pues, asta den Eden promé ku e Kaida, e presensia di maldat ta manifesto.

Lesa Ezekiel 28:12–19 den lus di Eksodo 25:19,20. Kiko ta naturalesa di e kaida di e ser akí?

Segun e pasashi akí, e orígen di maldat i e konflikto kósmiko a kuminsá den shelu.

Promé ku el a kai, e ser ku a bira konosí komo Satanas tabata un kerubin ku ta kubri. Mas ayá di ser identifiká komo e kerubin akí, e tabata “e seyo di perfekshon, yen di sabiduria i perfekto den bunitesa” i tabata “den Eden, e hardin di Dios” (Ezek. 28:12,13, NKJV). Ningun di e kosnan akí por a ser bisá di e rei humano di Tiro (òf kualke otro hende). P’esei, nos sa ku nos a ser duná aki un bista riba e kaida di Lucifer.

Lesa Isaias 14:12–15. Ki lus adishonal esaki ta tira riba e orígen di e gran konflikto?

Di akuerdo ku Isaias 14, Lucifer a disidí di halsa su mes i hasi su mes manera Dios. E versíkulo akí ta komplementá loke nos a mira den Ezekiel 28, ku su “kurason a ser elevá” pa motibu di su “beyesa” (Ezek. 28:17), loke mester a hib’é na glorifiká e Dios kende a hasié bunita. En kambio, el a bira orguyoso. Pió ainda, den e orguyo akí, el a proponé pa tuma e lugá di Dios i pa kalumni’É. E término hebreo pa “trato komersial” den Ezekiel 28:16 ta nifiká tambe “kalumnia”, un indikashon di kon Satanas lo operá kontra Dios i kontra nos, tambe.

Si Bo AdoráMi

E búskeda di Satanas pa usurpá e trono di Dios ta ser revelá tambe den e relatonan di tentashon hañá den Mateo 4 i Lukas 4. Den e enkuentro impreshonante entre Hesus i e tentadó, hopi ta ser revelá tokante naturalesa di e konflikto. Aki nos ta mira e realidat di e gran konflikto entre Kristu i Satanas, pero representá den términonan skèrpi i gráfiko.

Lesa Mateo 4:1–11. Kon e realidat di e gran konflikto entre Kristu i Satanas ta ser revelá aki?

E Spiritu a “hiba” Hesus den desierto ku e propósito ekspreso ku Hesus tabata bai “ser tentá dor di diabel” (Mat. 4:1, NKJV). I promé di a enfrentá e enkuentro reglá delantá akí, Hesus a yuna pa kuarenta dia. Pues ora diabel a bini, el a tenta Hesus pa kombertí piedra den pan, hungando riba e hamber ekstremo di Hesus. Pero Hesus a kontrarestá e tentashon akí ku Skritura, i Satanas su triki a frakasá.

Despues, den un intento pa pone Hesus aktua ku presunshon, diabel a tenta Hesus pa tira Su mes abou for di e tòp di e tèmpel. Satanas a trose Skritura pa sugerí ku si Hesus tabata berdaderamente e Yu di Dios, angelnan lo a proteh’E. Pero ku Skritura lesá korektamente, Hesus ta bolbe kontrarestá e tentashon.

E di tres tentashon ta revelá klaramente loke diabel ta trata na logra. E ke pa Hesus ador’é. Satanas ta purba usurpá e adorashon ku ta debí na Dios so.

I pa hasi esei, e ta mustra Hesus “tur e reinonan di mundu i nan gloria” i despues ta pretendé: “Tur e kosnan akí lo mi dunaBo si Bo kai na rudia i adorámi” (Mat. 4:8,9, NKJV). En bèrdat, den Lukas 4:6, un tèkst ku ta paralelo na Mateo, diabel ta pretendé: “Tur e outoridat akí lo mi dunaBo, i nan gloria; pasobra esaki a ser entregá na mi, i mi ta dun’é na ken ku mi ta deseá ” (Lukas 4:6, NKJV).

Un biaha mas, Hesus ta kontrarestá e tentashon ku Skritura, i atrobe Satanas ta faya.

Den tur tres kaso, Hesus a usa Skritura pa defendé kontra e atakenan di e enemigu.

E Naturalesa di e Konflikto Kósmiko

Nos a mira algun pasashi ku ta siña un konflikto kósmiko entre Dios i Satanas. Pero kon un konflikto asina ta posibel mes? Kon un hende por a oponé e Dios omnipotente? Si e konflikto kósmiko tabata riba simpel poder, e lo a kaba promé ku el a kuminsá. E mester ta di un tipo diferente. En bèrdat, Skritura ta revelá ku e konflikto ta un disputa riba e karakter di Dios, un konflikto riba akusashonnan kalumnioso lantá dor di diabel kontra Dios, ku (entre otro kosnan) E no ta kompletamente bon i amoroso. E tipo di afirmashonnan ei no por ser derotá pa poder òf forsa brutu sino dor di kompará e dos personahenan kompetitivo.

“Den Su trato ku piká, Dios por a usa solamente hustisia i bèrdat. Satanas por a usa loke Dios no tabata por: chiflamentu i engaño. El a trata na falsifiká e palabra di Dios i a mal representá Su plan di gobernashon dilanti di e angelnan, alegando ku Dios no tabata hustu den pone lei- i reglanan riba e habitantenan di shelu; ku rekiriendo sumishon i obediensia di Su kriaturanan, E tabata buskando meramente eksaltashon di Su mes. P’esei mester ser demostrá dilanti di e habitantenan di shelu, komo tambe di tur e mundunan, ku e gobernashon di Dios tabata hustu, Su lei perfekto. Satanas a laga parse ku e mes tabata buska pa promové e bon di universo. E berdadero karakter di e usurpadó, i su opheto real, mester ser komprondé dor di tur hende. E mester tin tempu pa manifestá su mes pa medio di su obranan malbado.”—Ellen G. White, The Great Controversy, p. 498.

Lesa Juan 8:44,45 den lus di Revelashon 12:7–9. Kiko e pasashinan akí ta revelá tokante e karakter di diabel i su strategia?

E plan di diabel for di prinsipio tabata pa purba pone kriaturanan kere ku Dios no tabata realmente hustu i amoroso i ku Su lei tabata opresivo i perhudisial pa nan. No ta nada straño ku Hesus ta referí na diabel komo “un gañadó i e tata di mentira” (Juan 8:44, NKJV). Den kontraste, Hesus a bin pa “testifiká di e bèrdat” (Juan 18:37, NASB) i direktamente kontrarestá e mentiranan i kalumnia di Satanas, derotando i, finalmente, destruyendo diabel i su poder (1 Juan 3:8, Hebr. 2:14).

Revelashon 12:9,10 ta identifiká Satanas

1. komo e “kolebra di antigwedat” (NKJV),
2. komo esun ku den e korte selestial ta akusá e pueblo di Dios, i
3. komo e dragon gobernante ku ta gaña mundu.

E palabra griego tradusí “diabel” ta djis nifiká “kalumniádó”, demostrando un biaha mas ku naturalesa di e konflikto ta riba kreensianan, inkluyendo kreensianan tokante e karakter di Dios.

Lesa Ellen G. White, “The Origin of Evil,” p. 492–504, den The Great Controversy.

“Nada ta ser siñá di forma mas kla den Skritura ku e echo ku Dios no tabata responsabel di ningun manera pa e entrada di piká; ku no tabatin retiro arbitrario di grasia divino, niun defisiensia den e gobièrnu divino, ku a duna okashon pa e lantamentu di rebelion. Piká ta un intruso, pa kende su presensia niun motibu por ser duná. E ta misterioso, ineksplikabel; diskulpá esaki ta nifiká defend’é. Si e [Satanas] a ser eliminá inmediatamente for di eksistensia, nan [e habitantenan di shelu i di otro mundunan] lo a sirbi Dios pa miedu en bes di pa amor. E influensia di e gañadó lo no a ser destruí kompletamente, ni e spiritu di rebelion lo a ser eradiká totalmente. Maldat mester a ser pèrmití pa yega na madures. Pa bienestar di henter universo atraves di siglonan sin fin, Satanas mester desaroyá su prinsipionan mas kompletamente, pa su akusashonnan kontra e gobièrnu divino lo por ser mirá den nan berdadero lus dor di tur ser kreá, pa e hustisia i mizerikòrdia di Dios i e inmutabilidat di Su lei lo por ser poné pa semper mas ayá di tur kuestion.”—Ellen G. White, The Great Controversy, p. 492,493,499.

Preguntanan pa Diskushon: