Algun Prinsipio di Profesia

Lesa pa e Estudio di e Siman Akí:

Versíkulo di Memoria:

“ ‘Ma laga esun ku ta gaba gaba den esaki, ku e ta komprondé i konosé Mi, ku Ami ta SEÑOR, ku ta ehersé bondat, huisio i hustisia riba tera. Pasobra den esakinan mi tin delisia,’ SEÑOR ta bisa” (Jeremias 9:24, NKJV).

Meskos ku mayoria di tur otro kos den Skritura, kristiannan ta den desakuerdo tokante profesia, loke hopi biaha ta konvensé otronan ku profesia di Beibel ta un pèrdida di tempu. Al fin i al kabo, si kristiannan ta bringa pa kada yota i tilde profétiko, kon bálido e por tabata? Desafortunadamente, hopi kreyente ta kuminsá pensa tambe ku algun buki di Beibel, manera Revelashon, ta simplemente inkomprendibel. Na lugá di lesa nan, nan ta evitá nan, tin biaha ku enkurashamentu di un pastor ku bon intenshon, ku ta pensa ku studia profesia ta kousa mas problema ku e ta solushoná.

No tabata asina semper. Pa e promé diesocho siglonan di historia kristian, mayoria kristian tabata masha komfortabel ku profesia bíbliko, i tabatin un nivel sorprendente di akuerdo riba kiko e mensahenan klave di e profesianan tabata. Ta asin’akí Dios tabatin intenshon pa e ta: “Awor mi ta roga boso, rumannan, den nòmber di nos Señor Hesu-Kristu, pa boso tur papia e mesun kos, i pa no tin divishon entre boso, ma pa boso ta perfektamente uní den e mesun mente i den e mesun huisio” (1 Kor. 1:10, NKJV).

E siman akí nos lo eksplorá algun prinsipio ku ta duna un komprondementu konsistente i konfiabel di profesia.

Ken ku Lesa, Lag’é Komprondé

Kana drenta kualke libreria kristian i blader dor di e títulonan riba profesia di Beibel. Rápidamente lo bo deskubrí ku tin un surtido impreshonante di punto di bista i interpretashon, i e por ta tentador pa kere ku niun hende por komprondé berdaderamente kiko bukinan manera Revelashon ta bisando. Por ehèmpel, un outor ta bisa ku e antikristu no ta nada otro sino un metáfora; un otro ta bisa ku e ta bini ainda den futuro; i un otro ku e tabata un referensia na algu òf un hende den e dianan di e Imperio Romano pagano. Manera un predikador bieu a pon’é: “Kisas Beibel ta manera un violin bieu; bo por toka kualke melodia ku bo ke riba dje.”

Beibel mes, sinembargo, no ta sugerí nada asina. En kambio, e ta invitá nos pa lesa, asumiendo ku Dios no ta papiando enbano i ku nos por sa e bèrdat di loke E ta bisando pa medio di Su Palabra.

Lesa Mateo 24:15; Revelashon 1:3; Mateo 11:29; i Jeremias 9:23,24. Kiko e tekstonan akí ta sugerí tokante e intenshon di Dios pa hasi Su mes komprondibel?

Hopi universidat ta ofresé kursonan yamá “Beibel komo Literatura” òf algu similar. Pa e kreyente, e por ta asombroso pa sinta durante inkontabel charlanan, solamente pa deskubrí ku e profesor ta lesa Beibel meskos ku un hende lo por lesa mitologia pagano. E idea ta ku por tin un núkleo di “bèrdat” moral den e storianan, pero un hende por hasi di e storianan loke e ke. Pa e maestronan akí, e idea ku e buki akí a ser inspirá dor di Dios ta kos di hari.

Pues, e instruktor ta lesa Beibel pero no ta tende e bos di Dios ta papia. Otronan ta yega na konklushonnan ku ta klaramente kontrario na e mensahe di Beibel. Sin ta someté na Señor, i sin un kurason habrí pa siña e bèrdat, esnan ku ta lesa Beibel probablemente no solamente lo pèrdè su mensahe sino lo komprondé e karakter amoroso i santu di e Dios, revelá den su páginanan, robes. Esaki por tabata mas fásil pa hasi ku hopi ta realisá, loke ta e motibu pakiko djis lesa Beibel sin e hèrmèntnan korekto i (mas importante ainda) e aktitut korekto bou di guia di Spiritu Santu, por ta doloroso.

Un hende ku no ta konosí pa ta piadoso a ser hañá ta lesa Beibel. Ora a puntr’é kiko e tabata hasiendo, el a kontestá: “Buskando buraku. Buskando buraku.” Dikon esei ta eksaktamente e aktitut robes pa bo tin ora bo ta lesa e Palabra di Dios?

Dios Ke Ser Komprondé

Nada ta asina frustrante manera nesesidat pa komuniká urgentemente, kisas na un klínika òf botika, miéntras bo ta den un pais strañero kaminda apénas bo ta papia e idioma. Bo sa kiko bo mester bisa, pero bo no tin un vokabulario adekuá pa bis’é.

Ku Dios, ta surgi un problema diferente. “Pasobra meskos ku e shelunan ta mas haltu ku tera,” E ta bisa, “asina Mi kamindanan ta mas haltu ku boso kamindanan, i Mi pensamentunan ku boso pensamentunan” (Isa. 55:9, NKJV). E problema no ta ku Dios no tin e vokabulario pa komuniká ku nos; e problema ta ku nos no tin e vokabulario òf kapasidat intelektual pa komprond’E kompletamente.

Kiko e siguiente pasashinan ta sugerí tokante e komprondementu di Dios den komparashon ku esun di nos mes?

E bèrdat di e asuntu ta ku nunka nos lo komprondé e mente di Dios kompletamente pasobra E ta infinito i omnisiente. Al fin i al kabo, apénas nos por komprondé tur kos tokante e kreashon; kon nos lo komprondé su Kreador kompletamente? Nos no por.

Aunke nunka nos lo no komprondé tur kos, nos por komprondé loke ta nesesario pa nos salbashon. (Lesa 2 Tim. 3:14,15.) Ora e apòstelnan a splika e evangelio na nan oudiensianan, nan tabata referí frekuentemente na profesia kumplí, for di kua nos por dedusí ku un di e propósitonan klave di profesia ta pa ilustrá e plan di salbashon. En bèrdat, na final, profesia di Beibel mester, di un manera òf otro manera, hiba nos finalmente na Hesus i e promesa di salbashon ku E ta ofresé na henter humanidat.

Despues di tur kos, Señor, pa medio di ken tur kos a ser kreá (lesa Kol. 1:16, Juan 1:1–3), ta baha na e tera akí i despues ta ofresé Su mes komo un sakrifisio riba e krus pa e pikánan di tur ser humano, asta esun di mas miserabel. Ta asina tantu Dios ta stima nos tur. Despues di a hasi tur esei pa nos, opviamente Señor lo tabata ke pa tur hende, esnan miserabel inkluí, sa kiko E ta ofresé nos den Hesus. I profesia por hasi nèt esei.

Daniel, Skonde e Palabranan

Lesa Daniel 12:4. Kiko Señor tabata bisando Daniel aki? (Kompará esaki ku Rev. 22:10 .)

No ta inkomun pa tende predikadornan usa Daniel 12:4 pa pronostiká e surgimentu di konosementu teknológiko i sientífiko djis promé ku e binida di Kristu. Hopi ta us’é tambe pa deskribí e avansenan den biahe rápido ku a tuma lugá durante e último siglo asina. Hopi di nos mes bukinan a tuma e aserkamentu akí. Aunke siguramente ta interpretashonnan rasonabel, e lo por nifiká algu otro tambe.

Lesa e pasashi atrobe. E instrukshon di e angel na Daniel ta kuminsá ku un instrukshon pa “skonde e palabranan, i seya e buki.” E tema ku ta ser diskutí ta e buki di Daniel mes. Kisas, antó, e konosementu ei ku diripiente lo a oumentá na fin di tempu por ta konosementu di e buki di Daniel mes?

Esaki ta hasi e buki di Daniel algu diferente for di Revelashon, den sentido ku Juan a ser bisá pa no seya su buki (Rev. 22:10). Revelashon tabata destiná pa ser komprondé for di prinsipio, pasobra “tempu [tabata] serka.” Den kontraste, Daniel lo a ser komprondé mas kla na sierto momento den futuro leu.

Atraves di siglonan, hopi bon pensadónan kristian a purba splika e buki di Daniel, i algun di nan a hasi gran progreso. Komprondementu di Daniel a oumentá rápidamente, sinembargo, despues di final di e profesia di 1.260 aña, ku a terminá na 1798, ora ku múltiple ekspositor rònt mundu a kuminsá konkluí ku algu espektakular tabata bai sosodé rònt di 1843. Esun mas notabel di esakinan, sinembargo, tabata William Miller, kende su predikashon a lansa e Gran Movementu Atventista di siglo diesnuebe i a kuminsá un kadena di eventonan ku lo a duna lus na e iglesia “remanente” i un komprondementu kla di e mensahe di e tres angelnan.

E nasementu di nos movementu global, ku otro palabra, ta un kumplimentu di e pronóstiko di Daniel ku “konosementu lo oumentá” na “e tempu di fin.”

Den kontraste, i sin husga salbashon di hende, pensa riba e “skuridat” ku asina tantu di kristiandat ta eksistí aden. Algu asina básiko manera e Sabat di e di shete dia, establesé den Eden, ta ser ignorá, asta rechasá, na fabor di djadumingu, un dia ku ta ankrá den paganismo romano. Of pensa riba e ignoransia total tokante morto, ku e gran mayoria di kristiannan ta kere e idea pagano ku e mortonan mesora ta bula bai na un otro eksistensia, loke pa algun hende ta nifiká un fièrnu ku ta kima eternamente.

Den kontraste, nos mester ta agradesido, i humilde, pa e konosementu di e bèrdat.

Studiando e Palabra

Atventistanan di e di shete dia ta debe hopi na William Miller pa nan komprondementu di profesia di Beibel. Miéntras ku su komprondementu di pasashinan klave (manera Daniel 8:14) no tabata perfekto, e metodologia di Miller tabata, sinembargo, importante, pasobra el a traha kaminda pa e nasementu di nos movementu di remanente di último dia.

Lesa Mateo 5:18, 2 Timoteo 3:15–17, i Lukas 24:27. Kiko e versíkulonan akí ta siña nos tokante e manera ku nos mester aserká profesia di Beibel?

Den algun formanan, studia Beibel no ta diferente for di monta un pùzel grandi. Si bo reuní djis dos òf tres pida huntu, ta kasi imposibel pa diserní henter e kuadro. Kisas den e dos òf tres pida ei, bo por mira un kabai, i asina bo ta konkluí ku bo ta montando un potrèt di kabai. Pero algun pida mas ta revelá un galiña i un baka, i despues, unabes bo a monta sentenár di pida, bo por mira finalmente ku bo tabata trahando riba un potrèt di un paisahe, ku ta inkluí un stat, un kunuku, i un seri di seru den distansia.

Un di e maneranan sentral den kua algun kristian ta kometé eror den nan estudio di Beibel ta ku nan ta trata e Skrituranan komo un kolekshon lòs di dichonan òf proverbionan ku nan por usa pa atendé un situashon spesífiko. Algun lo akudí na e guia di estudio simpel dilanti den un Beibel di Gideon, kaminda nan por haña versíkulonan útil riba un kantidat di tópiko, i asumí ku e ta representá e kantidat total di e siñansanan di Beibel riba un sierto tópiko.

Desafortunadamente, nan ta tuma e mesun aserkamentu na profesia, sakando un teksto individual for di su konteksto i kompará esaki ku eventonan aktual enbes di e restu di Beibel. Esaki, parsialmente, a hiba na e fluho konstante di bukinan moderno riba profesia ku mester ser aktualisá kada par di aña pasobra nan tabata robes riba loke nan a bisa ku tabata bai sosodé, i ki ora.

Ta p’esei ta asina importante pa no solamente selektá algun teksto spesífiko riba kualke tópiko sino, en bes di esei, pa studia kuidadosamente tur loke Beibel ta bisa tokante e tópiko ei i pa tuma na konsiderashon e konteksto den kua e ta bis’é tambe. Ta masha fásil pa saka un pasashi for di konteksto i lag’é bisa loke sea ku nos ke.

Figurativo òf Literal?

Un di e asuntunan klave ku studiantenan di profesia mester trata kuné ta kon pa determiná si e lenguahe di Beibel mester ser tumá literalmente òf figurativamente. Kon un hende ta determiná si e outor tabata usando lenguahe simbóliko, i kon un hende por sa kiko e símbolo ta representá? E manera krusial pa hasi esaki ta pa wak kon e figura ei, e símbolo, a ser usá den henter Beibel, kontrali na wak kon un símbolo ta ser usá den tempu kontemporáneo. Por ehèmpel, algun hende ta mira e símbolo di ber den Daniel 7 komo mustrando na Rusia, pasobra e imágen ei ta ser usá awendia hopi biaha komo un símbolo di Rusia. Esaki no ta un manera sano òf sigur pa interpretá simbolismo profétiko.

Buska e siguiente tekstonan, pèrmitiendo Beibel pa ta su mes ekspositor (pa definí su mes términonan). Kiko ta e símbolo profétiko komun na e tekstonan den kada kaso, i kiko Beibel ta bisa ku e ta representá?

Dor di sigui e simpel regla ku Beibel mester ser permití pa definí su propio términonan, mayoria di e misterio tras di simbolismo profétiko ta simplemente disparsé. Por ehèmpel, nos ta mira ku un kachu por simbolisá un poder polítiko òf un nashon. Un spada por simbolisá e Palabra di Dios. I, sí, un hende muhé por simbolisá e iglesia. Aki nos por mira klaramente ku Beibel ta splika su mes.

Loke ta keda pa ser kontestá, sinembargo, ta dikon Dios lo a papia den símbolo na lugá di ta habrí? Dikon, por ehèmpel, Pedro lo a referí kríptikamente na e stat di Roma komo Babilonia, den 1 Pedro 5:13?

Por tin hopi motibu pakiko Dios a skohe pa komuniká simbólikamente den profesia. Den kaso di e iglesia di Tèstamènt Nobo, por ehèmpel, si e buki di Revelashon a nombra Roma klaramente komo e outor di asina tantu maldat, e persekushon di e iglesia, ku tabata malu kaba, lo por tabata pió ainda. Loke sea ta e motibunan, nos por konfia ku Dios ke pa nos komprondé kiko e símbolonan ta nifiká.

Lesa Ellen G. White, “An American Reformer,” p. 319–324, den The Great Controversy.

“Pastor- i hendenan a deklará ku e profesianan di Daniel i e Revelashon tabata misterionan inkomprendibel. Pero Kristu a dirigí Su disipelnan na e palabranan di profeta Daniel tokante eventonan ku lo a tuma lugá den nan tempu, i a bisa: ‘Ken ku lesa, lag’é komprondé.’ Mateo 24:15. I e afirmashon ku e Revelashon ta un misterio, no pa ser komprondé, ta ser kontradesí pa e título mes di e buki: ‘E Revelashon di Hesu-Kristu, ku Dios a dun’E, pa mustra Su sirbidónan kosnan ku mester sosodé pronto. Bendishoná ta esun ku ta lesa, i esnan ku ta tende e palabranan di e profesia akí, i ta warda e kosnan ku ta skirbí aden: pasobra e tempu ta serka.’ Revelashon 1:1–3. . . .

“En bista di e testimonio di Inspirashon, kon hende ta tribi di siña ku e Revelashon ta un misterio fuera di alkanse di komprondementu humano? E ta un misterio revelá, un buki habrí. E estudio di e Revelashon ta dirigí e mente na e profesianan di Daniel, i tur dos ta presentá instrukshon di mas importante, duná di Dios na hende, tokante eventonan ku lo tuma lugá na final di e historia di e mundu akí.

“Na Juan a ser habrí esenanan di interes profundo i emoshonante den e eksperensia di e iglesia. El a mira e posishon, peligernan, konfliktonan, i liberashon final di e pueblo di Dios. E ta registrá e mensahenan di klousura ku ta pa madurá e kosecha di tera, sea komo bòshinan pa e kosecha selestial òf komo bòshinan pa e kandela di destrukshon. Temanan di gran importansia a ser revelá na dje, spesialmente pa e último iglesia, pa esnan ku mester a bira di eror pa bèrdat por a ser instruí tokante e peligernan i konfliktonan nan dilanti. Ningun hende mester ta den skuridat tokante loke ta bini riba tera.”—Ellen G. White, The Great Controversy, p. 341 i 342.

Preguntanan pa Diskushon: