Durante e Promé Guera di Golfo (1991), un eskritor i orador protestant bon konosí tabata konvensí ku e buki di Revelashon a pronostiká e konflikto akí. Su argumento tabata basá riba e echo ku algun di e helikòpternan den e guera tabata parse e dalakochinan deskribí den Revelashon 9. “I el a habri e pos sin fondo, i huma a sali for di e pos manera huma di un gran fòrnu. Asina solo i aire a bira skur pa motibu di e huma di e pos. E ora ei, for di e huma a sali dalakochi riba tera. I na nan a ser duná poder, manera e skòrpionnan di tera tin poder” (Rev. 9:2,3, NKJV).
No ta eksaktamente e mihó manera pa interpretá profesia bíbliko, no ta bèrdat? Tòg, interpretashonnan manera esaki ta bastante komun. De echo, atraves di dékadanan un fluho di buki, artíkulo, video, i awor wèpsait, tur dediká na profesia, a hasi hopi pronóstiko, inkluso fihamentu di fecha, tokante eventonan final, generalmente sentrá riba guera òf turbulensia den Medio Oriente.
I, sorpresa di sorpresa, den tur kaso e pronóstikonan ei no a bira realidat. Komo Atventistanan di e di Shete Dia, nos ta tuma un aserkamentu diferente, un aserkamentu sentrá riba Kristu, den kua e enfoke di profesia no ta riba un solo lugá geográfiko den Medio Oriente mas i kualke konflikto militar ku ta desaroyá einan. En kambio, nos ta mira e profesianan atraves di e lèns di e gran konflikto entre Kristu i Satanas, un lucha spiritual mundial ku lo yega su kulminashon ora e pueblo di Dios, hudiu i pagano (lesa Rev. 12:17, Rev. 14:12), enfrentá e krísis final, ku ta sentra riba adorá e Kreador (lesa Rev. 14:17), kontrali na e bestia i su imágen.
Un elemento klave pa komprondé e profesianan di último dia akí ta Daniel 2, ku ta kontené no solamente e skema históriko di e profesianan sino e yabi interpretativo pa desifrá nan nifikashonnan, tambe.
Daniel 2 ta deskribí kuater imperio mundial: Babilonia, Media-Persia, Gresia i Roma, siguí pa Dios ku ta establesé Su reino eterno, “ku nunka lo ser destruí; i e reino lo no keda pa otro pueblo; e lo kibra na pida pida i destruí tur e reinonan akí, i e lo permanesé pa semper” (Dan. 2:44, NKJV). E profesianan paralelo den Daniel 7 i 8 ta kontené e mesun skema básiko akí, esun di e imperionan mundano akí ku ta surgi i disparsé te ora ku e reino di Dios ta establesé pa semper.
Den Daniel 7, e angel ku ta interpretá, ta splika tur kos pa nos: “E bestianan grandi ei, ku ta kuater, ta kuater rei ku ta lanta for di tera. Pero e santunan di e Haltísimo lo risibí e reino, i poseé e reino pa semper, asta pa semper i semper” (Dan. 7:17,18, NKJV).
Kuater imperio mundano (Babilonia, Media-Persia, Gresia, i Roma) ta move den un suseshon ininterrumpí atraves di historia te ora, despues di e segundo binida di Hesus, Dios establesé Su reino eterno.
Naturalmente, nos ta aki ainda, den e tempu di e divishon di Roma, e di kuater i último reino terenal promé ku Kristu regresá.
Ku e perspektiva históriko akí komo e fundeshi pa komprondé profesia, nos ta bai studia e kuartal akí e tema di kon interpretá profesia di Beibel, spesífikamente algun di e alushonnan, storianan, imágennan, i metáforanan ku ta desifrá bèrdat profétiko i eventonan final.
Nos ta bai for di e relato di kreashon di Génesis, importante pa komprondé no solamente profesia sino loke ta sigui, spesialmente e krus i e morto ekspiatorio di Hesus, pa e toren di Babel, pa e sirbishi di santuario, pa e Salmonan, asta pa algun matrimonio di Tèstamènt Bieu. Den tur esakinan, i mas, nos por haña imágennan, símbolonan, i metáforanan ku, ora studia nan ku orashon i ku un spiritu humilde i sumiso (si bo bai na Beibel ku un kurason rebelde, bo ta pèrdè bo tempu), lo yuda hasi profesianan di tempu di fin, spesífikamente den Revelashon, bira bibu.
Un kuartal sigur no ta sufisiente ni pa kuminsá studia tur e storianan i imágennan ku ta yuda desifrá bèrdat profétiko. Ken sa, nos lo por tin mester di eternidat pa esei. Te e momentu ei, pa grasia di Dios, nos lo studia loke nos por.