Imágennan for di Matrimonio

Lesa pa e Estudio di e Siman Akí:

Versíkulo di Memoria:

“E ora ei el a bisa mi: ‘Skirbi: Felis ta esnan ku ta invitá na e sena di kasamentu di e Lamchi!’ I el a bisa mi: ‘Esaki ta e palabranan berdadero di Dios’ ” (Revelashon 19:9, NKJV).

Beibel ta yen di storianan di amor ku, di forma poderoso, ta revelá aspektonan di salbashon i di e amor di Dios pa Su pueblo. Esun di mas íntimo di relashonnan, matrimonio, ta proba di ta un skol den kua, si nos pèrmití nos mes pa eksperensi’e manera tabata Dios su intenshon, nos por deskubrí lèsnan profundo tokante Su amor pa nos, tokante nos relashon kunE, i tokante te na unda El a bai pa redimí nos.

Konseptonan moderno di amor i matrimonio a deformá nos abilidat di apresiá loke Dios ta purba siña nos atraves di e pakto matrimonial. Aunke pekaminosidat humano a pervertí matrimonio grandemente (i kasi tur otro kos), matrimonio ainda por ta un manera poderoso di revelá bèrdat, asta bèrdat profétiko. Mas ku djis pa hasi nos felis, matrimonio mester ta un skol den kua nos ta siña lèsnan profundo tokante nos mes i nos relashon ku Dios.

E siman akí nos lo eksplorá diferente manera ku e Palabra di Dios ta papia tokante matrimonionan, bon i malu. E ora ei nos por saka lèsnan for di e ehèmpelnan akí pa komprondé mihó kon Dios ta relashoná ku Su pueblo, asta ora nan keda sin kumpli, i nos por siña algun bèrdat tokante Su amor ku por yuda nos kapta e eventonan di último dia mihó.

Un Karni

Poko metáfora bíbliko ta enfatisá e intimidat ku Dios ta deseá ku e rasa humano mas ku esun di matrimonio. E metáfora akí ta ser usá asina frekuentemente den e narativo bíbliko, i ta aparesé asina enfátikamente den Revelashon, ku ta imperativo pa studiantenan di Beibel kapta kiko Dios ke bisa ora E ta us’e den e Palabra.

Lesa Génesis 2:23-25 i Efesionan 5:29-32. Den ki formanan un matrimonio humano ta reflehá e laso di Kristu ku humanidat?

Na un okashon, ora Hesus tabata papiando ku e fariseonan, El a sita e relato di Génesis di e matrimonio di Adam i Eva, riba kua rápidamente e fariseonan a lansa e pregunta: “Dikon antó Moises a ordená pa duna un sertifikado di divorsio, i pa deshasí di dje?” (Mat. 19:7, NKJV).

Moises, naturalmente, tabata ser konsiderá un profeta fundadó pa e nashon. Imaginábo ta kuestioná e Outor di e institushon di matrimonio dor di pon’E kontra Su mes profeta. Nan táktika tabata típiko di nan aserkamentu na Hesus; hopi biaha nan tabata purba proba ku Su siñansanan tabata kontradisí Skrituranan.

Matrimonio fiel i pa bida largu, tabata e ideal establesé pa Dios na fundashon di e rasa humano. Humanidat kaí, desafortunadamente, a daña e don fundamental akí di Dios.

Kisas, mirando e importansia ku Skritura ta asigná na matrimonio, no ta un koinsidensia ku e institushon semper tabata bou di atake sin mizerikòrdia. Huntu ku e Sabat, e ta un di e dos donnan otorgá na nos den Eden, i tur dos tabata destiná pa demostrá e deseo di Dios pa un relashon íntimo ku Su kreashon.

Matrimonio, e union íntimo di dos persona imperfekto, semper lo duna motibu pa tenshon. Un matrimonio entre e iglesia i Kristu ta e union di un Salbador perfekto ku un brùit masha imperfekto. No opstante, nos por siña tokante e amor di Dios for di loke un bon matrimonio ta ofresé.

Aki tin tres prinsipio pa matrimonio. Di promé, pordoná bo kasá, maske e no ta meresé, meskos ku Kristu ta pordoná nos, maske nos no ta meresé. Di dos, aseptá bo kasá, ku fayonan i tur, meskos ku Kristu ta aseptá nos, ku fayonan i tur. Di tres, meskos ku Kristu a pone nos promé ku Su mes, pone bo kasá promé ku bo mes. Kon tur e tres prinsipionan akí, basá riba e evangelio, lo por yuda nos no solamente komprondé kon Dios ta relashoná ku nos, sino tambe yuda kualke matrimonio?

E Brùit Bunita

Ezekiel 16 ta mustra nos un imágen asombroso di e rèspèt di Dios pa Su pueblo. E ta deskribí e nashon di Israel komo un bebi bandoná, lagá den un kunuku pa muri. E ta hib’é kas, limpi’é, i ora e ta kompletamente desaroyá, e ta kasa kuné. E ta un kuadro poderoso di un matrimonio improbabel.

Lesa Ezekiel 16:4–14. Kiko e detayenan tokante e eksaltashon di e brùit akí ta siña nos tokante e intenshonnan di Dios pa ku nos?

Dios a bisa Israel ku, bou di Su kuido, el a bira “ekstremadamente bunita” (Ezek. 16:13, NKJV). Ora Dios a hañ’é pa promé biaha, niun hende a hañ’é bunita; e tabata un rechaso entre otro muchanan, bentá un banda ku e speransa ku e lo a muri. Pero segun ku Dios a basha Su atenshon riba dje, el a bira mas i mas bunita, te ora ku e tabata e tema di kombersashon di mundu. Den e promé dianan di e reinan hebreo, bou di David i Salomon, esaki tabata partikularmente bèrdat. E reina di Etiopia a asta hasi un biahe spesial pa e por a mira e splendor di Israel pa su mes!

Israel su bunitesa, sinembargo, tabata kompletamente e regalo di Dios. E tabata bunita,e tema di kombersashon di e nashonnan, presisamente pasobra e tabata Su brùit. Dios ta bisa ku su beyesa “tabata perfekto pa medio di Mi splendor ku Mi a otorgá na bo” (Ezek. 16:14, NKJV).

Esaki ta un tema rekurente den Beibel: Dios su brùit ta bunita, no pa motibu di nada ku e a hasi sino pasobra Dios a basha Su fabor riba dje i a trah’é asina. Di un manera similar, kreyentenan ta parse bunita den balorashon di shelu, no pa motibu di kualke kos ku nos a hasi pa gana esaki sino pa motibu di e fabor di Dios, e salbashon ku El a basha riba nos. Nos ta bunita pasobra nos ta kubrí ku Su hustisia, e “hustisia di Dios” Mes (2 Kor. 5:21).

Tur kos tabata bon, sinembargo, te na e siguiente versíkulo den Ezekiel: “Ma bo a konfia den bo mes bunitesa, a hasi prostitushon pa motibu di bo fama, i a basha bo prostitushon riba tur hende ku tabata pasa ku tabata ke tin e” (Ezek. 16:15).

Nos a ser kreá pa reflehá e bondat i gloria di Dios. Ora e kreashonnan di Dios ta asumí ku nan bunitesa ta di nan mes, e bunitesa ei ta bira barata, i ta spera problema.

E Esposa Prostituta di Oseas

E petishon di Dios na profeta Oseas por ta un di e tareanan di mas straño ku hamas a ser duná na un di Su sirbidónan: kasa ku un prostituta, a propósito! Pero Dios tabata usando Oseas pa yuda nos komprondé, for di Su propio perspektiva, e doló di piká i rebelion humano. Amorosamente Dios a skohe un esposa, Israel, ku a gañ’E repetidamente, i tòg, asombrosamente, El a tum’é bèk i a restour’é.

Kompará Oseas 1:2; Oseas 3:1; Revelashon 17:1, 2; i Revelashon 18:1–4. Kiko ta e prostitushon menshoná aki? Ki lèsnan e iglesia kristian por siña for di e storia di Oseas? Den ki formanan e iglesia a ripití e pikánan di Tèstamènt Bieu?

Beibel ta revelá ku e erornan di Israel den Tèstamènt Bieu lo a keda ripití pa gran parti dor di e iglesia di Kristu di Tèstamènt Nobo. E pueblo di pakto di Dios a dualu enormemente promé ku nan eksilio, tresiendo e práktikanan idolátra di nashonnan bisiña den e nashon di pakto di Dios. Na kuminsamentu di siglo kuater, e iglesia kristian, sintiendo un bentaha potensial, a buska aserkamentu di e emperador di Roma, Constantino, i a invit’é pa kuminsá resolvé e disputanan di e iglesia. Den kada kaso, e pueblo di Dios a dual pafó di nan relashon kunE pa asina haña “solushonnan” pa problemanan ku nan a opservá.

Dios su eskoho di palabranan ta pon’e parse opvio ku E no ta solamente purbando di mustra nos kiko nos a hasi robes sino tambe ta kompartí kon esei ta lag’E sinti. Esnan ku a ser traishoná dor di un kasá por kuminsá kapta e sintimentunan di devastashon ku nos infidelidat na Kristu lo por lanta den e kortenan di shelu. Kisas e parti di mas asombroso di e storia di Oseas ta te na unda e profeta a yega pa redimí su esposa rebelde.

Ora nos mira e último gritu na humanidat, yamando e pueblo di Dios pa sali for di Babilonia, ta notabel ku E ta yamando Su mes pueblo, i no strañeronan. E konosé nan íntimamente. E ta stima nan. I segun ku mundu ta bai den direkshon di su pió ora, ainda E ta ofresiendo e preis di redenshon ku El a paga pa asina kumpra nos bèk ku Su mes sanger. E krus di Kristu, mas ku kualke otro kos, mester mustra nos presis kon fervientemente Señor ke salba Su pueblo rebelde.

Isaac i Rebeka

Ora Abraham tabata bieu i sin duda pensando riba e promesanan ku Dios a hasi na dje tokante su desendensia (lesa Gen. 15:5), el a duna su sirbidó di mas bieu i di mas konfiansa un tarea solèm.

Lesa Génesis 24:1-4. Dikon tabata asina importante pa Abraham pa su yu hòmber no kasa “ku e yu muhénan di e kananeonan” (Gén. 24:3, NKJV)?

Maske kon eksklusivista su atvertensia por a parse, e asuntu pa Abraham tabata spiritual, no étniko; e tabata teológiko, no nashonal. Abraham tabata konosé e degenerashon moral di práktikanan religioso kananeo masha bon, sin menshoná nan adorashon di diosnan falsu, i e tabata sa kon fásil lo tabata pa su yu kai den e práktikanan akí si e kasa for di entre nan.

En bèrdat, e storia di asina tantu di Israel antiguo, i asta di e iglesia kristian atraves di siglonan, tabata unu den kua e pueblo di Dios, ku mester tabata testifikando na e mundu, ta keda atrapá, en kambio, den e mundu i den su siñansanan falsu i kreensianan religioso. Kisas e ehèmpel di mas grandi di e realidat tristu akí tabata e introdukshon di djadumingu, e dia pagano di solo, na lugá di e Sabat di e di shete dia bíbliko, un realidat ku lo hunga un ròl prominente den e último dianan.

Lesa Génesis 24:57-67. Ki lèsnan nos por kompilá tokante Kristu i Su iglesia for di algun detaye ku nos ta haña den e storia akí? Kiko tin pa siña, por ehèmpel, tokante nos estado kaí for di e echo ku Rebeka tabata un pariente leu i separá di Isaac?

Indudablemente nos ta relatá na nos Kreador, siendo originalmente trahá den Su imágen. Nos a ser separá for di djE dor di piká, i tòg, nos ta ser konsiderá ainda komo e brùit korekto p’E aunke nos eskohonan por hasi e matrimonio mas turbulento ku e mester ta.

E Prostituta Ta Husgá

Lesa Revelashon 19:1–9. Dos kos ta ser selebrá simultáneamente: e fin di e prostituta i e matrimonio di Kristu ku Su brùit. Kon ta posibel ku tur dos evento, na mes momentu, ta realmente demostrashonnan di e karakter hustu i amoroso di Dios?

Infidelidat ta bin ku un preis masha doloroso. E konsekuensianan ta ekstendé na bida di mucha i otronan. Asta e kasánan ku mas pasenshi, ku a ser perhudiká, por deskubrí finalmente ku tin un momentu di no regreso, despues di kua e matrimonio no por ser redimí mas. Ora nos mundu alkansá un punto kaminda kurasonnan a bira duru di forma sufisiente profundo, ku lo no tin arepentimentu mas, no tin sentido pa sigui ku historia i pèrmití e sufrimentu eksorbitante di piká sigui. Aunke tin kibramentu di kurason pa esnan pèrdí, esnan ku a sufri bou di e dispensashon di piká di e mundu akí por selebrá ku el kaba finalmente, i ku mundu ta ser restourá na e manera ku Dios a diseñ’e originalmente. E biaha akí lo no tin un biramentu for di Dios, pasobra nos a siña, na e manera duru, ku Dios tabata korekto tokante e devastashon ku ta bini di separá nos mes for di djE.

Lesa Revelashon 21:1–4. Kiko e imágen di matrimonio akinan ta nifiká, i dikon e ta yen di speransa i promesa? Kiko ta nos siguransa di e speransa presentá den e versíkulonan akí?

“Matrimonio, un union pa bida, ta un símbolo di e union entre Kristu i Su iglesia. E spiritu ku Kristu ta manifestá pa ku e iglesia ta e spiritu ku esposo i esposa mester manifestá pa ku otro.”—Ellen G. White, Testimonies for the Church, tomo 7, p. 46.

Kristu a sufri doló inimaginabel ora e rasa humano a rechas’E i a duna e afekto, ku ta pertenesé na djE, na otro diosnan. I tòg, asta e ora ei, El a duna Su mes pa nos, pagando den Su mes pa nos infidelidatnan i adulterianan pa asina, si nos arepentí i bira bai for di nan, nos tin e promesa di bida eterno.

Lesa Juan 2:1–11, Mateo 22:1–14, 2 Korintionan 11:1–5, i Mateo 25:1–13.

Unabes bo realisá kuantu dato tin disponibel den e restu di Beibel pa yudabo amplia bo komprondementu di profesia, e por ta tentador pa aplik’e di mas. Atraves di siglonan, algun kristian a enfatisá e simbolismo i imágennan hañá den storianan di Beibel te na e punto kaminda práktikamente nan ta kuminsá trata e narativo históriko virtualmente komo un mito. Miéntras ku kapanan di nifikashon ta ser hañá kasi tur kaminda den Skritura, nos mester kòrda semper ku Dios tin un manera di kohe susesonan real ku ta envolví hendenan real i usa nan pa siña nos kosnan tokante Su futuro interakshonnan ku e iglesia.

E fiesta di kasamentu na Kanaan, por ehèmpel, por ofresé persepshon den e metáfora di matrimonio usá den profesia, pero e kasamentu tabata un evento literal. “E palabra di Kristu a supli amplio provishon pa e fiesta. Asina abundante ta e provishon di Su grasia pa eliminá e inikidatnan di hende, i pa renobá i sostené e alma.”—Ellen G. White, The Desire of Ages, p. 149. Of manera e ta skirbi aki: “ ‘Señor Dios lo no hasi nada, a ménos ku E revelá Su sekreto na Su sirbidónan, e profetanan.’ Miéntras ‘e kosnan sekreto ta pertenesé na Señor nos Dios, e kosnan ei ku ta ser revelá ta pertenesé na nos i na nos yunan pa semper.’ Amos 3:7; Deuteronomio 29:29. Dios a duna nos e kosnan akí, i Su bendishon lo asistí na e estudio reverente i ku orashon, di e skrituranan profétiko.”— The Desire of Ages, p. 234.

Preguntanan pa Diskushon: