Prekursornan

Lesa pa e Estudio di e Siman Akí:

Versíkulo di Memoria:

“Pasobra Dios no a duna nos un spiritu di miedu, ma di poder i di amor i di sano huisio” (2 Timoteo 1:7, NKJV).

E siman akí, nos lo wak dos storia bíbliko mas ku ta prefigurá eventonan di último dia den detaye remarkabel.

Promé, nos lo analisá e relato di Shadrach, Mesach i Abednego, ku tin alushonnan opvio na e asuntunan deskribí den Revelashon 13. Despues nos lo bira na Tèstamènt Nobo, kaminda nos ta haña ku e eksperensia di e promé kristiannan tambe por yuda nos komprondé kiko spera entre awor i e regreso di Kristu.

Tur dos ehèmpel ta destaká kurashi remarkabel i ta proveé klavenan pa haña pas mental bou di e sirkunstansianan di mas difísil.

Bes tras bes Hesus a bisa kosnan manera “No tene miedu,” i “Pakiko bo pensamentunan ta molestiábo?” Ta importante pa kòrda ku e enfoke di profesia ta Kristu, i, komo tal, nos mester por haña e mesun konseho den tur e esenanan deskribí den e momentunan di klousura di tera. “No laga boso kurason ta preokupá,” El a siña Su disipelnan, “boso ta kere den Dios, kere tambe den Mi” (Juan 14:1, NKJV).

Ku otro palabra, sí, eventonan di último dia lo ta difísil i tormentá pa esnan ku ta trata na keda fiel na Dios. Pero finalmente, nos mester wak e eventonan akí ku speransa, no ku miedu.

Daniel 2 i e Aserkamentu Historisista na Profesia

Un di e profesianan di mas poderoso den henter e Skritura ta Daniel 2. Skirbiendo mas ku sinkushen aña promé ku Kristu, e profeta a eksponé historia mundial, kuminsando for di su tempu na Babilonia i despues atraves di Medo-Persia, Gresia, Roma, i e kiebro di Roma den e nashonnan di Oropa moderno manera nan ta eksistí awe.

De echo, papiando tokante e nashonnan oropeo akí, un teksto ta bisa ku “nan lo meskla ku e simia di hende; ma nan lo no pega na otro, meskos ku heru no ta meskla ku klei” (Dan. 2:43, NKJV). E profesia akí a ser kumplí asombrosamente. Esta, apesar di tur sorto di matrimonio miksto entre e hendenan (for di prens te na plebeyo) di e nashonnan akí, nan ta permanesé dividí.

Por ehèmpel, e monarkia britániko ta ser yamá House of Windsor, un nòmber ingles bunita. Sinembargo, e nòmber ei ta un desaroyo relativamente resien, 1917, realmente. Promé ku esei, e famia tabata ser yamá Saxe-Coburg-Gotha, un nòmber klaramente aleman, pasobra hopi di e realesa britániko, atraves di mesklamentu “ku simia di hende”, tabata parientenan di sanger ku e alemannan. Sinembargo, e lasonan di sanger ei no tabata sufisiente pa tene nan for di hasi guera, i asina, durante Promé Guera Mundial, ora nan ker a desasosiá nan mes for di nan enemigunan odiá, nan a kambia e nòmber pa House of Windsor.

Lesa Daniel 2:31–45. Kiko tabata e soño di Nabukodonosor, i kon Daniel a interpret’é?

E profesianan apokalíptiko den Daniel tur ta sigui e fundeshi poné den Daniel 2. Es desir, e restu di e profesianan akí, meskos ku Daniel 2, ta sigui e sekuensia di un imperio mundial tras di otro te ora Dios establesé Su reino eterno (lesa Dan. 2:44; Dan. 7:13,14). Ku otro palabra, e profesianan ta pasa atraves di historia den un sekuensia no interumpí di imperionan, ku ta kuminsá den antigwedat i ta kaba den futuro, asta te na nos tempu. Esaki ta e aserkamentu historisista pa interpretá profesia i ta loke e tekstonan ta demandá. E uso akí di e aserkamentu historisista ta krusial pa komprondé eventonan di último dia, partikularmente manera nan ta ser deskribí den e buki di Revelashon.

Kon Daniel 2 ta proba na nos ku no solamente Dios sa e futuro sino ku E ta, finalmente, na enkargo di dje?

Adorando e Imágen

Maske kuantu fieldat Nabukodonosor, impreshoná pa loke Daniel a hasi, a paga na promé instante na Daniel i na su Dios (lesa Daniel 2, spesialmente v. 46–48), e no a dura.

Lesa Daniel 3:1–12. Ki nifikashon por ser hañá den e echo ku e estatua tabata kompletamente di oro i ku e rei a eksigí pa e ser adorá?

E rei a enfatisá su desafio di e mensahe di Dios dor di konstruí un estatua trahá kompletamente di oro. E mensahe? Babilonia lo no kai nunka, i Nabukodonosor lo ta rei semper. I kualke hende ku a tribi di desafiá e idea ei lo a ser matá. E ta sirbi komo un rekordatorio poderoso ku nos deseo humano pa outodeterminashon por siega nos rápidamente pa e bèrdat tokante kon e gran konflikto siguramente lo tuma lugá.

Di algun manera, Nabukodonosor ta desplegá karakterístikanan di Lucifer: e tabata ambisioso, presumido i orguyoso sufisiente pa rebeldiá abiertamente kontra e outoridat di Dios. Di otro maneranan, naturalmente, tin diferensianan remarkabel: Nabukodonosor finalmente a bin na fe den e Dios berdadero, i ta probabel ku nos lo topa kuné den e reino ku originalmente el a bringa asina duru pa desafiá.

Lesa Daniel 3:17,18, e palabranan di e tres mucha hòmbernan hebreo den desafio di e rei. Kiko esaki ta siña nos tokante fe i kiko tin biaha e por eksigí di nos?

Pensa kon fásil e tres hòmbernan akí por a rashonalisá nan kaminda pa sali for di e situashon peligroso akí. Al fin i al kabo, nan no tabata fanátiko, dispuesto pa ser kimá bibu riba djis bùig? Nan no por a djis fingí esaki, bùig pa mara nan feternan di sapatu miéntras nan tabata resa na nan mes Dios? Tabata realmente bale la pena loke nan tabata enfrentando? Opviamente, nan a pensa asina, aunke nan palabranan a mustra ku nan tabata sa ku kisas nan lo no skapa ku nan bida.

Adorando e Imágen, Atrobe

Pa hopi tempu kaba studiantenan di Beibel a mira e konekshon entre Daniel 3 i loke Revelashon ta siña tokante eventonan di último dia. I ku bon motibu tambe, pasobra Daniel 3, ku e mandato, kastigabel ku morto, pa “adorá e imágen” (Dan. 3:15), ta reflehá loke Revelashon ta siña tokante e mandato, kastigabel ku morto, pa adorá un otro imágen. “El a ser duná poder pa duna rosea na e imágen di e bestia, pa e imágen di e bestia por a tantu papia komo pone tur hende ku no ker a adorá e imágen di e bestia ser matá” (Rev. 13:15, NKJV).

Lesa Revelashon 13:11–17; Revelashon 14:9,11,12; Revelashon 16:2; Revelashon 19:20; i Revelashon 20:4. Ki kontraste ta presente aki ku ta enfrentá e mandamentunan di Dios ku e mandamentunan di hende?

E pueblo di Dios ta yamá pa adorá “Esun ku a traha shelu i tera, laman i fuentenan di awa.” Es desir, e Kreador, kontrali na e bestia i su imágen. E tres mucha hòmbernan hebreo, ora nan a enfrentá un menasa similar, a nenga di adorá nada otro sino Dios Kreador mes. P’esei, maske kon diferente e sirkunstansianan ta entre loke a sosodé riba e sabana di Dura, ku e mandato pa adorá e imágen, kontrali na e Kreador i loke lo pasa mundialmente ku e yamada pa adorá e imágen kontrali na e Kreador, e prinsipio ta mesun kos.

Lesa Romanonan 1:18–25. (Tuma nota di e vínkulo entre Romanonan 1:18 i Revelashon 14:9,10 tokante “e furia di Dios.”) Den ki forma e asuntu di adorá e imágen ta djis un otro manifestashon di e mesun prinsipio akí tokante na ken hende ta duna nan lealtat finalmente?

Adorashon no nesesariamente ta nifiká bùig i ofresé sensia, aunke e por. Nos ta adorá loke sea ku tin nos máksimo fieldat. Ora bo konsiderá ken Dios ta, nos Kreador i, despues di loke El a hasi pa nos den Hesus, nos Redentor tambe, e ora ei naturalmente E so mester ser adorá. Tur otro kos ta idolatria. Kisas esaki ta yuda splika Hesus su palabranan duru aki: “Esun ku no ta ku Mi ta kontra Mi, i esun ku no ta rekohé ku Mi ta plama tur kaminda” (Mat. 12:30, NKJV). Eventonan final simplemente ta bai ta un manifestashon dramátiko di e bèrdat akí.

Persekushon di Iglesia Primitivo

No ta solamente Tèstamènt Bieu ta duna nos prekursornan pa eventonan final; Tèstamènt Nobo tambe ta hasié. Bida no tabata fásil pa kristiannan di promé siglo. Nan tabata ser odiá pa hopi di nan propio kompañeronan religioso, ku tabata mira nan komo un menasa pa e fe di Moises. Tambe nan tabata enfrentá e furia di e Imperio Romano pagano. “E podernan di tera i fièrnu a prepará nan mes kontra Kristu den persona di Su siguidónan. Paganismo a premirá ku si e evangelio lo a triunfá, su tèmpel- i altarnan lo a ser lastrá bai kuné; p’esei el a duna su forsanan òrdu pa destruí kristianismo. E kandelanan di persekushon a ser sendé.”—Ellen G. White, The Great Controversy, p. 39.

Tin un storia den e buki di Echonan ku ta demostrá, bastante poderosamente, kiko e pueblo di Dios lo por a spera segun ku nos ta bai den direkshon di e senario hañá den Revelashon 13.

Lesa Echonan 12:1–17. Ki elementonan di e storia akí por prefigurá eventonan di último dia?

Santiago a ser dekapitá, i Pedro mester tabata e siguiente; tabatin kastigu di morto kontra kristiannan. Kisas un di e aspektonan di mas remarkabel di e storia akí por ser hañá den e echo ku Pedro ta drumí riba loke lo mester ta e pió anochi di su bida, asina duru ku e angel realmente tin ku dal e pa lant’é!

Pedro, naturalmente, a ser librá milagrosamente i a haña su kaminda pa un reunion di kreyentenan ku tabatin problema pa kere ku el a ser librá di bèrdat, aunke nan tabata hasi orashon. Beibel ta bisa ku nan a keda asombrá, loke ta pone nos puntra nos mes kon frekuente nos ta hasi orashon i apénas ta riska kere ku Dios lo kontestá nos realmente.

Algun kreyente a skapa; otronan a ser matá. Segun ku nos ta aserká e tempu di fin, e mesun kos lo sosodé. Asta Pedro, ounke el a skapa e tempu ei, finalmente a muri pa su fe. Hesus Mes a asta bis’é kon: “ ‘Siguramente, Mi ta bisabo: tempu bo tabata mas hóben, bo a faha bo mes i a kana kaminda bo tabata ke, ma ora bo bira bieu, lo bo saka bo mannan, i un otro lo fahabo i hiba bo kaminda bo no ke.’ Esaki El a bisa, ku ta nifiká pa medio di ki morto e lo a glorifiká Dios. I ora El a bisa esaki, El a bis’é: ‘SiguiMi’ ” (Juan 21:18,19, NKJV).

E Marka di e Bestia

Segun e añanan a pasa i e eventonan final, manera e dekreto di morto i e enforsamentu di e marka di e bestia, no a sosodé ainda, algun a ekspresá duda, asta skeptisismo, tokante nos interpretashon di eventonan final, inkluyendo kon Sabat i djadumingu por ta sentral den e konflikto final.

E buki di Revelashon ta kla: sea nos ta adorá e Kreador òf e bestia i su imágen. I pasobra e Sabat di e di shete dia ta e señal fundamental di Dios komo Kreador, ku ta bai bèk na Eden mes (lesa Gen. 2:1–3), no mester ta un sorpresa ku, den un asuntu tokante adorá e Kreador, e Sabat lo ta sentral. Tambe, no ta un koinsidensia ku e poder di bestia ta e mesun poder ku ta pretendé di a kambia e mandamentu di Sabat for di e dia bíbliko pa djadumingu, loke no tin sanshon den Beibel. Ku e fondo akí den mente, e idea di Sabat i djadumingu ta enbolbí den e asuntu di adorashon, atrobe, sea e Kreador (lesa Rev. 14:6,7) òf e bestia, ta hasi bon sentido. I nos tin den Tèstamènt Nobo un prekursor pa e asuntu di e Sabat di e di shete dia kontra lei humano.

Lesa Mateo 12:9-14 i Juan 5:1-16. Ki asuntu a pone ku e lidernan religioso ker a mata Hesus?

Den Mateo 12, despues ku riba Sabat Hesus a kura e hòmber ku un man seku (Mat. 12:9–13), kon e lidernan religioso a reakshoná? “Ma e fariseonan a sali pafó i a plania kon nan lo por a mata Hesus” (Mat. 12:14, NIV). Morto pa motibu di e Sabat di e di shete dia? Den Juan 5:1–16, despues di un otro sanashon milagroso riba e di shete dia, e lidernan “a persiguí Hesus, i a buska pa mat’E, pasobra El a hasi e kosnan akí riba Sabat” (Juan 5:16, NKJV).

Morto pa motibu di tradishon humano (nada den Beibel tabata prohibí sanashon riba Sabat, meskos ku nada den Beibel a pone djadumingu na lugá di Sabat) versus e Sabat di e di shete dia? Aunke e asuntu spesífiko akí ku Hesus no ta meskos ku den eventonan final, e ta sufisiente serka: lei humano versus esun di Dios, i, den tur dos, e lei diskutí ta sentra riba e Sabat bíbliko.

Lesa Ellen G. White, “God’s People Delivered,” p. 635–652, den The Great Controversy.

“Den tur époka, Dios a obra atraves di angelnan santu pa yudansa i liberashon di Su pueblo. Sernan selestial a tuma un parti aktivo den asuntunan di hende. Nan a aparesé bistí ku bistínan ku tabata bria manera welek; nan a bini manera hende den trahe di biahero. Angelnan a aparesé den forma humano na hende di Dios. Nan a sosegá, komo si fuera nan tabata kansá, bou di e palunan di eik mèrdia. Nan a aseptá e hospitalidatnan di hogarnan humano. Nan a aktua komo guia pa biaheronan di anochi. Nan a, ku nan mes man, sende e kandelanan na e altar. Nan a habri portanan di prizòn i a libra e sirbidónan di Señor. Bistí ku e armadura di shelu, nan a bin pa lora e piedra kita for di e graf di e Salbador.

“Den forma di hende, hopi bes angelnan ta den e asambleanan di e hustunan, i nan ta bishitá e asambleanan di e malbadonan, manera nan a bai Sódoma, pa traha un registro di nan echonan, pa determiná si nan a pasa e límite di e pasenshi di Dios. Señor tin delisia den mizerikòrdia; i pa motibu di un poko ku realmente ta sirbiE, e ta restringí kalamidatnan i ta prolongá trankilidat di multitutnan. Pekadornan kontra Dios ta realisá poko ku nan ta debe nan propio bida na e poko fielnan ku nan tin delisia den ridikulisá i oprimí.”—Ellen G. White, The Great Controversy, p. 631,632.

Preguntanan pa Diskushon: