Komprondiendo Sakrifisio

Lesa pa e Estudio di e Siman Akí:

Versíkulo di Memoria:

“I nan a kanta un kantika nobo, bisando: ‘Bo ta digno di tuma e ròl, i di habri su seyonan; pasobra Bo a ser matá, i a redimí nos pa Dios pa medio di Bo sanger for di tur tribu i lenga i pueblo i nashon’ ” (Revelashon 5:9, NKJV).

Ora Hesus a bin serka dje, Juan Boutista a deklará: “Ata e Lamchi di Dios ku ta kita piká di mundu!” (Juan 1:29, NKJV). Esaki tabata un referensia indiskutibel na e idea di sakrifisio di animal, di kua tur tabata mustra riba e morto sustitutivo di Kristu na fabor di henter humanidat.

Den Beibel, nos no por skapa e tema di sakrifisio di animal; e ta kore manera un hilu kòrá atraves di su páginanan i ta hunga un ròl sentral den e esena grandioso den Revelashon, kaminda Juan ta ser guiá den e sala di trono di Dios (Revelashon 4 i 5). E echo ku Hesus ta aparesé den e esena krusial akí, i ta parse manera un lamchi matá (Rev. 5:6), ta un klave importante pa komprondé henter e episodio profétiko.

E siman akí nos lo wak algun di e temanan di sakrifisio ku ta informá nos komprondementu di Hesus, e Lamchi matá, e protagonista kla di e esena di sala di trono. E ta ser aseptá komo digno, kaminda niun otro ser ta, i Su dignidat úniko ta papia hopi tokante loke Señor tabata hasiendo pa medio di e sistema di sakrifisio. E ta revelá E komo un Dios di amor infinito ku a hasi e sakrifisio supremo, un akto ku nos, i e otro inteligensianan den universo, lo keda maraviá pa eternidat.

Sakrifisionan inútil?

Tin biaha kontrastá dos idea por ta masha instruktivo. Hopi por ser siñá tokante e naturalesa di sakrifisio den e perspektiva bíbliko di tempu ku Dios realmente a rechasá e sakrifisionan di Su pueblo.

Kompará Isaias 1:2–15 ku Isaias 56:6,7 i Salmo 51:17. Ki lèsnan importante tokante sakrifisio ta ser siñá aki?

E episodio trágiko akí den historia di Israel no tabata e promé biaha ku Dios a rechasá un sakrifisio; algu similar a sosodé serka di e kuminsamentu di historia di salbashon, ora ku e sakrifisio di Abel a ser aprobá i rekonosé pa Dios, i esun di Cain no. E episodio trempan ei ta duna nos un otro oportunidat pa kontrastá sakrifisionan aseptabel i inaseptabel. (Lesa Gén. 4:3–7 i Hebr. 11:4.)

Den tempu di Isaias, Israel tabata pasando atraves di e moshonnan, i tabata marka mentalmente viñetanan religioso den un intento mínimo pa kalma Dios, tur miéntras nan tabata biba manera nan tabata ke. Nan sakrifisionan tabata ankrá den nan mes, meskos ku esnan di Cain tabata, i no den un aktitut di entrega i sumishon na Dios.

Ta e mesun spiritu ta animá e reinonan di e mundu akí: e spiritu di outosufisiensia. Cain lo a biba manera e tabata ke i a rindi mero ritual na Dios riba su mes kondishonnan. Un hende por solamente asumí ku e tabata mira Dios komo un inkumbiniensia, un opstákulo, pa establesé su mes rumbo, pero e tabata teme Dios nèt sufisiente pa kumpli ku obligashonnan.

Abel, sinembargo, a ofresé e sakrifisio ku Dios a pidi, e sakrifisio ku tabata representá e promesa ku Dios a hasi di un Mesias benidero (Gén. 3:15): un lamchi, mustrando padilanti na e akto di salbashon di Kristu na Kalvario.

“Abel a kapta e gran prinsipionan di redenshon. El a mira su mes komo un pekador, i el a mira piká i su kastigu, morto, pará entre su alma i komunion ku Dios. El a trese e víktima matá, e bida sakrifiká, rekonosiendo asina e demandanan di e lei ku a ser violá. Atraves di e sanger dramá el a mira e futuro sakrifisio, Kristu muriendo riba e krus di Kalvario; i konfiando den e ekspiashon ku tabata bai ser hasí aya, e tabatin e testimonio ku e tabata hustu, i su ofrenda aseptá.”—Ellen G. White, Patriarchs and Prophets, p. 72.

Kon krusial ta pa nos protehá nos mes di simplemente kumpli ku e formalidatnan! Kon kada un di nos por eksperensiá loke ta nifiká pa dependé totalmente riba e morto di Hesus komo nos úniko speransa di salbashon?

E Sanger di Toro i Kabritu

Algun hende a kritiká henter e konsepto di sakrifisio, bisando ku e ta kruel, duru, i, den un sentido, inhustu. Tòg, esei ta presisamente e punto. E morto di Kristu tabata kruel, duru i inhustu: esun inosente ta muri pa esun kulpabel. Esei ta loke tabata nesesario pa solushoná e problema di piká. I e morto di Kristu tabata loke tur e sakrifisionan duru, kruel i inhustu akí a señalá.

Lesa Hebreonan 10:3–10. Kiko e pasashi akí ta siña nos tokante e sakrifisionan ku e pueblo di Dios a ofresé den Tèstamènt Bieu? Si pekadornan no por a ser salbá realmente dor di nan, pakiko ofresé nan mes?

E lamchinan i otro animalnan di sakrifisio tabata simplemente símbolonan ku ta mustra padilanti na e sakrifisio ekspiatorio di e Lamchi di Dios. Nan tabata aktonan di fe, ku ta duna pekadornan un manera tangibel pa ekspresá fe den e obra di e Mesias benidero. Hopi biaha nos ta referí na e tiponan di símbolo akí komo tiponan, ku ta ser kumplí dor di un antitipo, òf e apariensia di e kos òf evento ku nan a prefigurá. Algun hende a asta deskribí e sakrifisionan komo “mini-profesianan” di e morto di Hesus riba krus.

E ritualnan asosiá ku sakrifisio tabata un tiki manera paga pa un biahe. Ora bo kumpra un pasashi di trein, bùs, òf avion, bo no ta risibí e biahe ku bo a paga p’e mesora. En kambio, bo ta haña un karchi òf karchi di embarkashon, un símbolo òf promesa di e biahe ku ta bini. Bo por sinta riba e pida papel ei tantu ku bo ke, pero e lo no hibabo na ningun destinashon. Unabes bo a abordá i e biahe kuminsá, sinembargo, bo a risibí loke bo a paga p’e, i e karchi di papel ta bira innesesario.

Asina tabata ku e animalnan di sakrifisio. Nan tabatin un ròl importante pa hunga, pero unabes ku e sakrifisio real a ser hasí, nan a bira insignifikante, un realidat deskribí ora e velo entre e Lugá Santu i e Lugá Santísimo den e santuario terenal a sker na morto di Hesus. “E ora ei e velo di e tèmpel a sker na dos, di ariba te abou” (Marko 15:38, NKJV). Henter e sistema di sakrifisio, tèmpel i tur, tabata mustra padilanti na e morto di Hesus riba krus. Unabes ku Hesus a kumpli ku Su promesa na krus i a lanta viktorioso riba morto, e tiponan a bira innesesario.

E Lamchi di Pasku

E buki di Revelashon ta referí na Hesus komo “e Lamchi” kasi 30 biaha. For di e promé dianan den e plan di redenshon, e pueblo di Dios a usa lamchi komo símbolo di e Mesias benidero. Abel a ofresé “e primogénito di su tou” (Gén. 4:4, NKJV), i promé ku e israelitanan a bandoná Egipto pa e Tera Primintí, nan a ser instruí pa redimí kada persona òf animal primogénito ku un lamchi di un aña (Eks. 12:5).

Lesa Eksodo 12:1–11; Isaias 53:7,8; 1 Korintionan 5:7; i Revelashon 5:6. Kiko e versíkulonan akí ta siña nos tokante Hesus komo e sakrifisio di Pasku? Kiko esei ta nifiká pa kada un di nos?

Añanan despues di e morto, resurekshon i asenshon di Kristu, Pedro a reflekshoná riba loke a sosodé, i el a skirbi: “Sabiendo ku boso a ser reskatá for di e maneranan inútil heredá for di bo antepasadonan, no ku kosnan ku ta peresé manera plata òf oro, sino ku e sanger presioso di Kristu, manera esun di un lamchi sin defekto òf mancha” (1 Pe. 1:18,19 ESV). Hesus a biba e úniko bida humano ku a satisfasé e santidat di Dios; e restu di nos a peka, i e manera ku nos ta biba nos bida pekaminoso ta bisa basta literalmente mentira tokante e naturalesa di nos Kreador.

Hesus, sinembargo, a bira e “último Adam” (1 Kor. 15:45). Kaminda nos a faya, El a biba perfektamente. Den Su humanidat, E tabata tur loke e rasa humano tabata suponé di ta. El a reflehá e gloria di Dios perfektamente. “Si boso a mira Mi,” El a bisa Felipe, “boso a mira e Tata” (Juan 14:9, CEV).

Hesus, mientrastantu, a ser krusifiká riba dia di Pasku, demostrando ainda mas ku E ta e Lamchi antitípiko. Den Juan 18:19,20, Hesus a bisa ku El “a papia abiertamente” (NKJV) di Su doktrina. Di un manera paralelo, relashoná ku e lamchi di Pasku den Eksodo 12:5,6, e yunan di Israel a ser instruí pa skohe un lamchi pa Pasku, i “ward’é,” òf pon’é na ekshibishon durante e dianan promé ku e sakrifisio. Ora e sumo saserdote a kuestioná Hesus tokante Su siñansanan, Hesus a hasi referensia na e echo ku E mes tabata na ekshibishon habrí den tèmpel pa tur hende konsiderá. Su bida, Su obranan, Su siñansa, tur a revelá ken E tabata realmente. E ta e Lamchi sin defekto, e ekspreshon di mas poderoso di e hustisia i gloria di Dios.

Hesus na Tèmpel

Tin tenshon den henter e storia di salbashon. Dios ta deseá di restourá e komunion ku un tempu nos tabata disfrutá di dje i ta anhelá pa hala serka di nos. Pero trese pekadornan den Su presensia lo a destruí nan. “Pasobra Bo no ta un Dios ku tin plaser den maldat,” David ta skirbi, “ni maldat lo no biba huntu ku Bo” (Salmo 5:4, NKJV). Na mes momentu, David ta skirbi tambe: “Ma pa loke ta ami, lo mi drenta den Bo kas den e multitut di Bo mizerikòrdia, den temor di Bo lo mi adorá den direkshon di Bo tèmpel santu” (Salmo 5:7, NKJV).

Lesa Hageo 2:7–9. Segun ku e di dos tèmpel tabata ser konstruí, profeta Hageo a hasi un promesa asombroso: e tèmpel nobo lo tabata mas glorioso ku esun anterior. Kiko e profesia ei tabata nifiká?

Ora e promé tèmpel a ser dediká dor di Salomon, e gloria di Shekinah, e presensia di Dios ku a kompañá e yunan di Israel na kaminda pa Kanaan, a yena e tèmpel, i asina e saserdotenan no por a keda pa kompletá nan trabou di ministerio (1 Reinan 8:10,11). Ora e di dos tèmpel a ser dediká, e arka di aliansa, ku ta representá e trono di Dios, no tabata presente pasobra algun hòmber fiel, disgustá pa e pikánan di e nashon, a skonde esaki. E presensia literal di Dios no a yena e tèmpel e biaha akí. E tabata desgarador. Kon e promesa di Hageo posiblemente por a bira realidat?

Tabata den e di dos tèmpel ku Hesus, e enkarnashon di Dios, a aparesé en Persona, den karni i sanger. Dios Mes a sali for di tras di e velo pa bira un di nos i pa uni nos den e mundu kibrá akí. Pa motibu ku e Yu di Dios awor tabata e Yu di hende, nos por a mira Su kara, tende Su bos, i testiguá, por ehèmpel, ora El a mishi ku un leproso impuru i a san’é (Mat. 8:3). En bes di trese nos mas serka den Su direkshon, Dios a trese nos mas serka di djE dor di move den nos direkshon. El a bin abou, personalmente, serka nos. No ta nada straño ku Beibel a bisa tokante Hesus: “Mira, e bírgen lo ta na estado, i duna lus na un Yu, i nan lo yama Su nòmber Immanuel, ku ta tradusí: Dios ku nos” (Mat. 1:23, NKJV). Pensa riba kiko esaki ta nifiká: e Kreador di universo a kondesendé no solamente pa biba meimei di nos sino pa muri pa nos.

Pasobra Abo a Krea Tur Kos!

Na un man yen di okashon, profetanan a ser tresé sufisiente serka di Dios den vishon ku nan a ser pèrmití pa mira e trono di Dios. Ezekiel a mir’e riba e firmamento (Ezek. 1:26); Isaias a bishitá e tèmpel den shelu pa mir’e (Isa. 6:1); i den un di e deskripshonnan di mas eksplísito proveé na nos, Juan a ser kompañá einan den vishon den Revelashon 4 i 5. E tiponan di Tèstamènt Bieu den e sirbishi di santuario tabata indiká ku tabatin solamente un kaminda pa medio di kua humanidat por a drenta presensia di Dios: e sanger di Kristu. (Lesa Lev. 16:2,14, por ehèmpel.)

Lesa Isaias 6:1–5 i Revelashon 4:7–11. Ki elementonan di e dos vishonnan akí ta similar? Pone atenshon na e órden di eventonan: Ki tema ta ser presentá promé? Kiko ta bini despues? Ki bèrdat tokante Dios ta ser enfatisá den e vishonnan akí?

Den kada un di e vishonnan di sala di trono akí, e promé kos ku ta pasa ta ku sernan selestial ta enfatisá e santidat di Dios. Den e vishon di Isaias, e esena ta impreshonante: e tèmpel ta yená ku huma, i e “kozeinnan di e porta” a sagudí segun ku serafinnan ta proklamá e santidat di Dios. Den e vishon di Juan, kerubinnan ta hasi e mesun anunsio: “Santu, santu, santu.” (Lesa Ezekiel 10:14,15 pa haña e kriaturanan bibu deskribí komo kerubin.) Kada profeta a ser mustrá un esena deslumbrante di e gloria di Dios.

Despues nos ta ser mustrá e reakshon di e profeta riba e esena. Isaias ta sklama ku e ta un hòmber di lepnan impuru (Isa. 6:5), i Juan ta yora pasobra e ta ser konfrontá ku e bèrdat trágiko ku ni un hende digno por ser hañá (Rev. 5:4). Ora nos ta ser presentá direktamente ku e dignidat di Dios, e ora ei nos ta kuminsá komprondé e situashon humano finalmente: nos ta totalmente indigno, i nos tin mester di Kristu komo nos Redentor.

Satanas a lansa hopi akusashon kontra Dios, argumentando ku E ta arbitrario, egoista, i severo, pero asta un momentu kòrtiku den e sala di trono di Dios ta eksponé e mentiranan di Satanas. Ta mira Kristu pa ken E ta berdaderamente, “e Lamchi ku a ser matá” (Rev. 5:12, NKJV), ta pèrmití nos mira e Tata manera E ta berdaderamente. Esta un konsuelo pa sa ku dor di mira Hesus, nos ta mira kon e Tata ta (Juan 14:9). I e revelashon di mas grandi di kon e Tata ta, ta ser mirá den Hesus muriendo riba krus pa nos.

E krus, antó, mester mustra nos dos kos: di promé, kuantu Dios ta stima nos ku E lo a sakrifiká Su mes pa nos; di dos, e mester mustra nos kon pekaminoso i kaí nos ta ku solamente pa medio di e krus nos por a ser salbá.

E Skrituranan ta hasi bon kla ku Kristu ta e Esun úniko digno pa sigurá nos salbashon. Su bida tabata e úniko bida humano sin piká, e úniko ehèmpel di un bida ku a rindi satisfakshon perfekto na gloria di e Tata. E ta e Lamchi di Dios sin mancha, i awor E ta para na kabes di e rasa humano komo nos prenda eterno. Na mes momentu, El a tuma nos kulpa riba Su mes, satisfasiendo e huisio ku ta e reakshon di Dios riba maldat. Segun ku Juan ta presensiá e esena inkreibel di sernan selestial reuní rònt di e trono di Dios, e ta ser bisá pa stòp di yora pasobra “e Leon di e tribu di Huda . . . a prevalesé” (Rev. 5:5, NKJV).

Pensa tambe kon malu piká ta, i kon kaí e rasa humano realmente ta, ku solamente e morto di Hesus, Dios Mes, lo tabata sufisiente pa solushoná e problema di piká. Sin duda, si tabatin un otro manera ku Dios por a salba nos, sin violá e prinsipionan di Su gobièrnu divino, sigur E lo a hasié.

“E lei kibrá di Dios a demandá e bida di e pekador. Den henter universo tabatin solamente un ku por a satisfasé su eksigensianan na fabor di hende. Ya ku e lei divino ta mes sagrado ku Dios Mes, solamente un igual ku Dios por a hasi ekspiashon pa su transgreshon. Ningun otro sino Kristu por a redimí hende kaí for di e maldishon di e lei i bolbe tres’é den harmonia ku shelu. Kristu lo a tuma riba Su mes e kulpa i bèrgwensa di piká, piká ku ta asina ofensivo pa un Dios santu ku e mester separá e Tata i Su Yu. Kristu lo a alkansá te na e profundidatnan di mizeria pa reskatá e rasa ruiná.”—Ellen G. White, Patriarchs and Prophets, pág. 63.

Preguntanan pa Diskushon: