Den Salmonan: Parti 2

Lesa pa e Estudio di e Siman Akí:

Versíkulo di Memoria:

“Laga e pueblonan alabáBo, o Dios, laga tur e pueblonan alabáBo. O, laga e nashonnan ta kontentu i kanta di alegria! Pasobra Abo lo husga e pueblonan hustamente, i goberná e nashonnan riba tera. Selah” (Salmo 67:3,4, NKJV).

Ora nos ta pensa riba eventonan final, nos tin tendensia di enfoká riba e bestianan i e podernan di Revelashon. I, naturalmente, nan tin un ròl grandi, unu importante tambe. Di otro manera, Dios lo no a pone nan den Beibel pa nos komprondé nan (lesa Rev. 1:3).

Profesia, sinembargo, ta trata tambe asuntunan klave asosiá ku piká i sufrimentu, huisio, e bataya entre bon i malu, e naturalesa di hustisia i inhustisia, persekushon, i mas.

E Salmonan tambe ta trata e asuntunan akí den gran profundidat, eksplorando kasi tur posibel emoshon humano, for di desesperashon skur te na goso desenfrená. Nos ta mira Israel ta preparando pa bataya kontra e forsanan di skuridat. Nos ta lesa tokante individuonan ku ta bringa ku e pregunta di dikon Dios no ta atendé maldat mas direktamente i inmediatamente, un pregunta ku sin duda nos tur a yega di hasi. Nos ta ser dirigí na e santuario pa kontesta, i tambe tin apelashonnan ripití na e státus di Dios komo Kreador. Esakinan no ta asuntunan i preguntanan ku nos, den nos konteksto di awendia, ta bringa kuné tambe?

Naturalmente, esaki ta e motibu pakiko nos lo sigui desempaketá e buki di Salmonan pa asina siña mas tokante e bèrdatnan krusial akí.

Un Pronto Ousilio den Tempu di Angustia

Lesa Salmo 46. Ki mensahe di speransa nos por saka for di esaki meimei di e agitashon di bida awor i loke nos sa ku ta bai bini riba tera den e último dianan segun ku e gran konflikto ta desaroyá aki?

Salmo 46 ta parse di ta toka un tema ku nos ta haña den e buki di Hebreonan: esun di algu mihó. Hesus ta mihó ku e sumo saserdote terenal, Su sakrifisio ta mihó ku tur e sakrifisionan di animal, i e santuario selestial ta mihó ku e tiponan ku tabata eksistí riba tera.

E salmo akí ta tuma un aserkamentu diferente, sinembargo. E outor no ta tumando kosnan bon i kontrastá nan ku kosnan mihó; e ta kontrastando un mundu den rebelion, i e konsekuensianan teribel ku el a trese, ku promesa di e mihó kosnan ku Dios ta planiando pa nos. Enbèrdat, e salmo akí ta yená ku speransa i promesa ku, asta meimei di e desolashon i prueba i sufrimentu i gueranan ku nos ta enfrentá, finalmente nos mester “keda ketu, i sa ku Ami ta Dios” (Salmo 46:10) i sosegá den e siguransa ku un dia tur esaki ta bai kaba i ku Dios “lo ser halsá riba tera” (Salmo 46:10).

Nota tambe loke ta skirbí aki. “P’esei nos lo no tin miedu, maske tera ser kitá for di su lugá, i maske e serunan ser hibá den e kurason di laman” (Salmo 46:2, NKJV).

Un hende no por yuda sino ser rekordá di e esenanan ku lo tuma lugá na e Segundo Binida: “E ora ei e shelu a baha manera un ròl ora e ser lorá, i tur seru i isla a ser mové for di su lugá” (Rev. 6:14, NKJV). I esaki: “Sperando i aselerando e binida di e dia di Dios, motibu pa kua e shelunan lo ser disolvé, siendo na kandela, i e elementonan lo dirti ku kalor ferviente” (2 Pe. 3:12, NKJV). Nos mundu presente, ku tur su maldatnan korespondiente, no ta bai dura pa semper, i loke ta bini despues ta primintí nos algu ku nos mente apénas por komprondé awor. Pa awor, sinembargo, nos mester djis tene duru, perseverando den fe i tene na e revelashon di Dios ku nos tin, spesialmente den Hesus riba krus.

Maske kon malu kosnan ta den e mundu akí (i nos sa ku nan ta bai bira pió), ki speransa bo mester saka for di bo konosementu di e bondat, poder, i karakter di Dios (pensa: e Krus)?

Speransa meimei di turbulensia

Hopi di e lenguahe den e buki di Salmonan ta simbóliko, pero ora ta trata di e lenguahe ku ta mustra padilanti na e restablesimentu final di nos planeta, nos tin tiki motibu pa kere ku e ta meramente simbóliko. Salmo 46 ta rekordá nos ku e tera físiko lo ser afektá profundamente dor di e regreso di Kristu. Pero no ta solamente e barankanan i oséano lo ser afektá; e gran kulminashon di historia di tera lo nifiká kiebro di reinonan mundano, e sistemanan mizerabel di gobièrnu humano ku a kousa asina tantu sufrimentu atraves di milenionan.

Na final, tur e podernan akí, i tur e maldat i sufrimentu ku nan a trese riba humanidat, lo yega na un fin kompleto.

Lesa Jeremias 4:23–26. Kiko esaki ta bisando nos tokante e destino di e mundu akí, por lo ménos te ora tin un “shelu nobo i un tera nobo” (Rev. 21:1)?

Profesia di Beibel ta mustra nos kiko lo pasa ku e mundo akí. E vishon di Daniel 7, por ehèmpel, ta mustra nos un laman tormentoso for di kua e nashonnan di mundu ta lanta. E bientunan di pleitu i guera ta supla atraves di e laman pagano (e tera), produsiendo un reino mundano tras di otro, i ni un di nan por solushoná e problemanan masha real ku ta ataká e rasa humano. E lidernan mundano ku nos ta tribi di konfia ta resultá kasi semper di ta mes pekaminoso i egoista ku e restu di nos.

Ningun di e reinonan, mustrá na Daniel, a proba di ta un hogar sigur pa e pueblo di Dios (aunke algun tabata mihó ku otro). Pero nos sa ku nos tin siudadania den e reino di Dios (Fil. 3:20), i, haltu riba e káos di e planeta akí, tin un trono ku no por ser mové (lesa Eze. 1:26). Hesus a siña ku mundu lo bai kai den un desórden mas profundo segun ku nos ta aserkando e momentu di e regreso di Kristu (Mateo 24), pero nos por perseverá den fe, no importá e kondishon di nos planeta, pasobra nos sa ku Dios no a pèrdè kontrol, i ku E lo kumpli ku Su promesanan: “E nashonnan a rabia, e reinonan a ser mové; El a pronunsiá Su bos, tera a dirti. E SEÑOR di ehérsitonan ta ku nos; e Dios di Jakòb ta nos refugio” (Salmo 46:6,7, NKJV). A korto plaso, kosnan no ta bai bon ni nan lo no bai bon. A largu plaso? Esei, danki na Hesus, ta kompletamente un otro asuntu.

Bou di Su Pianan

Lesa Salmo 47:1-4. Kiko e ta bisa tokante nos lugá, finalmente, den e reino di Kristu?

Riba plaso largu, e futuro ta briante. Te e momentu ei, humanidat a sede dominio riba e planeta na Lucifer, i na momentu ku Satanas a aparesé na e konsilio selestial den Job, el a broma ku e tera akí tabata pertenesé na dje.

“For di unda bo ta bini?” Dios a puntra.

“For di bai bin riba tera, i for di kana bai bin riba dje,” el a kontestá (Job 1:7, NKJV).

Satanas tabata deklarando derecho di propiedat; e pia tabata ser usá den antigwedat pa representá propiedat. “Lanta, kana atraves di e largura i hanchura di e tera,” Dios a instruí Abraham, “pasobra lo Mi dun’e na bo” (Gén. 13:17, ESV).

Kompará 1 Tesalonisensenan 4:13–17 i Zakarias 14:4, i paga atenshon na e pianan di Kristu. Ki diferensianan bo ta haña entre e pasashinan akí, i kiko nan ta siña nos tokante e dos diferente aspektonan akí, aunke relashoná, di e soberania final di Kristu di e mundu akí?

Papiando tokante loke Kristu ta hasi na fin di e milenio, Ellen G. White a skirbi: “Kristu ta baha riba Seru di Oleifi, for di unda, despues di Su resurekshon, El a subi, i kaminda angelnan a ripití e promesa di Su regreso. E profeta ta bisa: ‘Anto SEÑOR, mi Dios, lo bin, i tur e santunan huntu kunE!’. ‘I den e dia ei Su pianan lo para riba Seru di Oleifi, ku ta keda dilanti di Jerusalèm, parti pariba; i Seru di Oleifi lo spleit den dos, . . . kousando un vaye masha masha grandi.’ ‘I SEÑOR lo ta rei riba henter e tera; den e dia ei SEÑOR lo ta e úniko, i Su nòmber e úniko.’ Zakarias 14:5,4,9. Segun ku e Jerúsalèm Nobo, den su splendor briante, ta baha for di shelu, e ta sosegá riba e lugá purifiká i hasí kla pa risibié, i Kristu, huntu ku Su pueblo i e angelnan, ta drenta e Stat Santu.”— The Great Controversy, p. 662,663.

Biña i Sanger

Lesa Salmo 75. Lesa tambe Mateo 26:26–29 i Revelashon 14:9–12. Kiko e salmo akí ta revelá tokante algun di e asuntunan den wega den e huisio, i kon e otro tekstonan akí ta yuda nos komprondé e asuntunan akí?

Tin algun pensamentu ku e salmo akí lo a ser kantá riba e destrukshon milagroso di e ehérsito di Sennacherib (2 Krónikanan 32, 2 Reinan 19), un storia ku ta parse di ta mustra dilanti na e destrukshon final di e malbadonan den Revelashon 20. E pueblo di Dios ta paden di e Stat Santu huntu ku nan rei hustu ora e ehérsitonan di maldat ta subi i rondoná nan, i despues nan ta ser destruí dor di Dios Mes.

Un di e kosnan ku Dios ta koregí den e huisio ta e malversashon di poder ku a tuma lugá den nos mundu kaí. Hende kaí no ta biba mas pa otronan òf pa e gloria di Dios sino pa nan mes. Awendia, den hopi forma, nos ta bibando ku e konsekuensianan di skohe pa kere ku no tin nifikashon òf norma moral ophetivo den universo. Si mester tin un nifikashon, e filósofo Friedrich Nietzsche a insistí ku nos mester invent’e pa nos mes i pretendé komo si fuera e universo ta eksistí pa nos benefisio. Kada individuo, en efekto, ta komportá komo si fuera e ta un dios.

(Un hende por puntra, ku rason: Kon bon e filosofia akí a funshoná pa Nietzsche mes? No muchu bon, realmente. El a bira loko, kai riba un kaya na Italia despues di a purba stòp un hòmber di bati un kabai. Despues el a pasa e siguiente 11 añanan di su bida den un estado semi-katatóniko promé ku su morto na 1900.)

Maske kon malu e problemanan ta, komo kreyente nos ta ser rekordá pa biba ku speransa i pa no husga futuro atraves di susesonan aktual. Ta fásil pa desesperá ora nos ta mira e pilánan di sivilisashon ta ser eroshoná konstantemente dor di kurason i mente di esnan sin Dios òf dor di esnan ku nan punto di bista di Dios no ta ser hañá den Beibel. Nos ta bibando aktualmente den un periodo den kua balornan moral, asta kosnan asina básiko manera género humano, maskulino i femenino, ta ser ataká, a lo ménos den algun parti di mundu. Sierto tipo di inmoralidat, kosnan ku hopi hende lo tabatin bèrgwensa di papia di dje, asta den privá, awor ta ser elogiá i aploudí públikamente. Asina malu kosnan ta birando.

Pa Bo Salbashon Por Ta Konosí

Lesa Salmo 67. Kon e himno di alabansa akí ta informá bo komprondementu di e ròl di e pueblo di Dios den Revelashon 14:6–12?

Ingenieronan na e Instituto di Teknologia di Massachusetts a krea un kapa pretu nobo ku ta hasi ophetonan pintá kuné kasi invisibel. Kreá for di tubunan ku diameter masha chikitu (den nanometer), e ta hopi biaha mas skur ku kualke material pretu kreá anteriormente. E material nobo akí por apsorbé 99.995 porshento di tur lus visibel. Asta e lus di mas briante no ta logra hasi ophetonan ku ta kubrí ku e kapa akí visibel.

Salmo 67 ta kuminsá ku un apelashon pa Dios “laga Su kara bria riba nos, pa Bo kaminda por ta konosí riba tera” (Salmo 67:1,2, NKJV). Den e plan di salbashon, Dios a proveé un manera pa pekadornan ser atmití di nobo na Su presensia glorioso i inmediato sin ser destruí pa Su gloria; i asta awor, den e bida akí, e krus di Kristu ta hasi posibel pa e kara di Dios bria riba nos.

Pero tin mas: Dios su intenshon ta pa nos reflehá Su lus na e restu di mundu. Esaki tabata e tarea duná na Israel: e tèmpel mester tabata un kas di orashon pa tur nashon: “Asta nan lo Mi trese na Mi seru santu, i hasi nan kontentu den Mi kas di orashon. Nan ofrendanan kimá i nan sakrifisionan lo ser aseptá riba Mi altar, pasobra Mi kas lo ser yamá un kas di orashon pa tur nashon” (Isa 6:7, NKJV).

Den e salmo akí, David ta rekordá nos ku Dios ke pa Su “kaminda [ta] konosí riba tera, [Su] salbashon meimei di tur nashon” (Salmo 67:2, NKJV). Trágikamente, e pueblo di Dios hopi bes a faya den e tarea akí. E registro di Israel den Tèstamènt Bieu ta kontené algun kapítulo skur, manera e registro di e iglesia kristian durante e último dos milenionan. Ta komo si fuera nos a fèrf nos kurason ku un supstansia ultraskur, kontentu di apsorbé e lus di Dios sin refleh’e.

Tin biaha, nos ta trata e movemento di último dia di Dios komo un tipo di sala di salida privilegiá reservá pa buladónan spiritual frekwente, i nos ta parse basta kontentu ku e restu di mundu mester sinta den e sala di embarke inkómodo i yen di bochincha, sin ta prepará pa e biahe nos dilanti. E iglesia remanente di Revelashon 14, sinembargo, no ta kontentu pa djis para riba Sion ku Kristu, disfrutando den Su presensia. En kambio, nan ta bula riba e kara di tera, urgiendo mundu pa uni ku nan riba e seru santu di Dios.

Lesa Salmo 133, Echonan 1:4–9, i Revelashon 5:4–7.

“Durante e era patriarkal e influensia di Spiritu Santu hopi bes a ser revelá na un manera remarkabel, pero nunka den su plenitut. Awor, den obediensia na e palabra di e Salbador, e disipelnan a ofresé nan súplikanan pa e don akí, i den shelu Kristu a añadí Su interseshon. El a reklamá e don di Spiritu, pa E por a bash’e riba Su pueblo.”—Ellen G. White, The Acts of the Apostles, p. 37

E disipelnan a ser instruí pa duna testimonio di Kristu “te na fin di tera” (Echonan 1:8, NKJV), un obra ku lo a anunsiá e regreso di Kristu (Mat. 24:14). Nos mester sigui ku loke nan a kuminsá.

Ora Kristu a bisa nos pa hiba e evangelio na e mundu, E no a laga nos nos so pa saka afó kon e lo por a sosodé. E trabou ta ser dirigí for di e santuario di shelu. Nos trabou ta íntimamente envolví den Kristu: E ta guia i empoderá nos. Esaki ta Su obra, no di nos: nos ta ser pidí pa sigui Su guia. Lo bo nota ku ta asin’akí el a funshoná ku Israel: Dios a pidi nan pa sigui Su instrukshonnan, i despues E a hasi lo imposibel sosodé. E Spiritu ta obrando kaba den kurason di nos bisiñanan; nos ta ser pidí pa ta ei ora e momentu di desishon yega pa asina nos por invitá nan pa uni ku e pueblo di Dios segun ku nan ta para ku e Lamchi riba Sion. Nos no mester inventá medio- i métodonan nobo pasobra nunka nos tabata enkargá ku e trabou.

Preguntanan pa Diskushon: